ನವದೆಹಲಿ: ಭಾರತದಲ್ಲಿ ತನ್ನ ಉಪಗ್ರಹ ಆಧಾರಿತ ಇಂಟರ್‌ನೆಟ್ ಸೇವೆ ಸ್ಟಾರ್‌ಲಿಂಕ್ ಆರಂಭಿಸಲು ಕೆಲವರು ಅಡ್ಡಿಪಡಿಸುತ್ತಿದ್ದಾರೆ ಎಂದು ಸ್ಪೇಸ್‌ಎಕ್ಸ್ ಸಿಇಒ ಎಲಾನ್ ಮಸ್ಕ್ ಆರೋಪಿಸಿದ್ದಾರೆ. ಭಾರತದ ಟೆಲಿಕಾಂ ಮಾರುಕಟ್ಟೆಯ ಮೇಲಿನ ತಮ್ಮ ಹಿಡಿತವನ್ನು ಉಳಿಸಿಕೊಳ್ಳಲು ‘ಕೆಲವು ಒಲಿಗಾರ್ಕ್‌ಗಳು’ (ಅತ್ಯಂತ ಪ್ರಭಾವಿ ಉದ್ಯಮಿಗಳು) ಸ್ಟಾರ್‌ಲಿಂಕ್‌ಗೆ ತಡೆ ನೀಡುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ.
ಭಾರತದಲ್ಲಿ ಸ್ಟಾರ್‌ಲಿಂಕ್ ಉಪಗ್ರಹ ಇಂಟರ್‌ನೆಟ್ ಸೇವೆ ಆರಂಭಿಸುವ ಪ್ರಯತ್ನಕ್ಕೆ ಕೆಲ ಪ್ರಭಾವಿ ಉದ್ಯಮಿಗಳು ಅಡ್ಡಿಪಡಿಸುತ್ತಿದ್ದಾರೆ ಎಂದು ಸ್ಪೇಸ್‌ಎಕ್ಸ್ ಸಿಇಒ ಎಲಾನ್ ಮಸ್ಕ್ ಗಂಭೀರ ಆರೋಪ ಮಾಡಿದ್ದಾರೆ. ಟೆಲಿಕಾಂ ಮಾರುಕಟ್ಟೆಯ ಮೇಲಿನ ಏಕಸ್ವಾಮ್ಯವನ್ನು ಉಳಿಸಿಕೊಳ್ಳಲು ಈ ತಡೆ ಮಾಡಲಾಗುತ್ತಿದೆ ಎಂದು ಹೇಳಿರುವ ಮಸ್ಕ್, “ಅವರು ಯಾರೆಂದು ನೀವೇ ಊಹಿಸಬಹುದು” ಎಂದು ಕುತೂಹಲ ಮೂಡಿಸಿದ್ದಾರೆ. ಆದರೆ, ಯಾವುದೇ ವ್ಯಕ್ತಿ ಅಥವಾ ಕಂಪನಿಯ ಹೆಸರನ್ನು ಅವರು ನೇರವಾಗಿ ಬಹಿರಂಗಪಡಿಸಿಲ್ಲ.
ಭಾರತದ ಸಾವಿರಾರು ಗ್ರಾಮಗಳಲ್ಲಿ ಇನ್ನೂ ಮೊಬೈಲ್ ಸಂಪರ್ಕದ ಕೊರತೆಯಿದೆ ಎಂಬ ಪೋಸ್ಟ್‌ಗೆ ಎಕ್ಸ್‌ನಲ್ಲಿ ಪ್ರತಿಕ್ರಿಯಿಸಿದ ಮಸ್ಕ್, “ಭಾರತೀಯರ ಮೇಲೆ ಏಕಸ್ವಾಮ್ಯದ ಹಿಡಿತವನ್ನು ಮುಂದುವರಿಸಿಕೊಳ್ಳಲು ಕೆಲವು ಪ್ರಭಾವಿಗಳು ನಮ್ಮನ್ನು ತಡೆಯುತ್ತಿದ್ದಾರೆ. ಅವರು ಯಾರೆಂದು ನೀವೇ ಊಹಿಸಬಹುದು. ಇದು ಭಾರತದ ಜನರ ವಿರುದ್ಧದ ಅಪರಾಧ” ಎಂದು ಆರೋಪಿಸಿದ್ದಾರೆ.ಆದರೆ, ತಮ್ಮ ಪೋಸ್ಟ್‌ನಲ್ಲಿ ಮಸ್ಕ್ ಯಾವುದೇ ಕಂಪನಿ ಅಥವಾ ವ್ಯಕ್ತಿಯ ಹೆಸರನ್ನು ನೇರವಾಗಿ ಉಲ್ಲೇಖಿಸಿಲ್ಲ.
11 ಸಾವಿರಕ್ಕೂ ಹೆಚ್ಚು ಗ್ರಾಮಗಳಲ್ಲಿ 4G ಸಂಪರ್ಕವಿಲ್ಲ?
ಡಾಡ್ಜ್‌ಡಿಸೈನರ್ (DodgeDesigner) ಎಂಬ ಎಕ್ಸ್ ಖಾತೆ ಹಂಚಿಕೊಂಡ ಮಾಹಿತಿಯ ಪ್ರಕಾರ, 2026ರ ಮೇ ವೇಳೆಗೆ ಭಾರತದ 11,256 ಪಟ್ಟಿಮಾಡಲಾದ ಗ್ರಾಮಗಳಲ್ಲಿ ಇನ್ನೂ 4G ಸಂಪರ್ಕ ಇರಲಿಲ್ಲ ಎಂದು ಹೇಳಲಾಗಿದೆ. ಇದೇ ವೇಳೆ, ಕೇಂದ್ರ ಸರ್ಕಾರದ ಗ್ರಾಮೀಣ ಬ್ರಾಡ್‌ಬ್ಯಾಂಡ್ ಯೋಜನೆಯಾದ ಭಾರತ್‌ನೆಟ್ ವಿಸ್ತರಣೆಯಲ್ಲೂ ಕೆಲವು ಕೊರತೆಗಳಿವೆ ಎಂದು ಅದು ತಿಳಿಸಿದೆ.
ಭಾರತ್‌ನೆಟ್ ಯೋಜನೆಯಡಿ 8.50 ಲಕ್ಷಕ್ಕೂ ಹೆಚ್ಚು ರೂಟ್ ಕಿಲೋಮೀಟರ್ ಆಪ್ಟಿಕಲ್ ಫೈಬರ್ ಅಳವಡಿಸಲಾಗಿದ್ದು, ಸುಮಾರು 2.21 ಲಕ್ಷ ಗ್ರಾಮ ಪಂಚಾಯಿತಿಗಳನ್ನು ಸೇವೆಗೆ ಸಿದ್ಧಗೊಳಿಸಲಾಗಿದೆ ಎಂದು ಡಾಡ್ಜ್‌ಡಿಸೈನರ್ ಹೇಳಿದೆ.
ಆದರೆ, 2026ರ ಜೂನ್ ವೇಳೆಗೆ ಕೇವಲ 80,472 ಗ್ರಾಮ ಪಂಚಾಯಿತಿಗಳಲ್ಲಿ ಮಾತ್ರ ಕಾರ್ಯನಿರ್ವಹಿಸುವ ಪಾಯಿಂಟ್ ಆಫ್ ಪ್ರೆಸೆನ್ಸ್ (PoP) ಇದ್ದವು ಎಂದು ಖಾತೆ ತಿಳಿಸಿದೆ.
ಗ್ರಾಮೀಣ ಪ್ರದೇಶಗಳಿಗೆ ಸ್ಟಾರ್‌ಲಿಂಕ್ ಪರ್ಯಾಯವೇ?
2026ರ ಮಾರ್ಚ್ ವೇಳೆಗೆ ಭಾರತದ ಒಟ್ಟು ಇಂಟರ್‌ನೆಟ್ ಚಂದಾದಾರಿಕೆಗಳಲ್ಲಿ ಕೇವಲ 4.26% ಮಾತ್ರ ವೈರ್ಡ್ ಸಂಪರ್ಕಗಳಾಗಿದ್ದವು ಎಂದು ಡಾಡ್ಜ್‌ಡಿಸೈನರ್ ಹೇಳಿದೆ.
ಇಂತಹ ಪರಿಸ್ಥಿತಿಯಲ್ಲಿ, ಉತ್ತಮ ವೇಗದ ಬ್ರಾಡ್‌ಬ್ಯಾಂಡ್ ಸೌಲಭ್ಯದಿಂದ ವಂಚಿತವಾಗಿರುವ ಗ್ರಾಮೀಣ ಹಾಗೂ ದೂರದ ಪ್ರದೇಶಗಳಿಗೆ ಸ್ಟಾರ್‌ಲಿಂಕ್ ಮತ್ತೊಂದು ಪರ್ಯಾಯ ಸಂಪರ್ಕ ವ್ಯವಸ್ಥೆಯಾಗಬಹುದು ಎಂದು ಅದು ಅಭಿಪ್ರಾಯಪಟ್ಟಿದೆ.
ಈ ಹಿನ್ನೆಲೆಯಲ್ಲಿ ಎಲಾನ್ ಮಸ್ಕ್ ಅವರ ‘ಕೆಲವು ಪ್ರಭಾವಿಗಳು ಸ್ಟಾರ್‌ಲಿಂಕ್‌ಗೆ ಅಡ್ಡಿಪಡಿಸುತ್ತಿದ್ದಾರೆ’ ಎಂಬ ಆರೋಪ ಇದೀಗ ಚರ್ಚೆಗೆ ಕಾರಣವಾಗಿದೆ. ಆದರೆ, ಯಾವ ಕಂಪನಿ ಅಥವಾ ವ್ಯಕ್ತಿ ಸ್ಟಾರ್‌ಲಿಂಕ್ ಸೇವೆಗೆ ಅಡ್ಡಿಯಾಗುತ್ತಿದ್ದಾರೆ ಎಂಬುದನ್ನು ಮಸ್ಕ್ ಬಹಿರಂಗಪಡಿಸಿಲ್ಲ.
