ಅಮೆಜಾನ್ ಉದ್ಯೋಗಿಗಳಿಗೆ ಮತ್ತೊಂದು ಶಾಕ್ ಎದುರಾಗಿದೆ. ಜಾಗತಿಕ ಮಟ್ಟದಲ್ಲಿ ರಿಟೇಲ್ ವ್ಯವಹಾರಕ್ಕೆ ಸಂಬಂಧಿಸಿದಂತೆ 1,000ಕ್ಕೂ ಕಡಿಮೆ ಉದ್ಯೋಗಗಳನ್ನು ಕಡಿತಗೊಳಿಸಿರುವುದಾಗಿ ಕಂಪನಿ ದೃಢಪಡಿಸಿದೆ. ಭಾರತ, ಅಮೆರಿಕ ಮತ್ತು ಬ್ರಿಟನ್ ಸೇರಿದಂತೆ ಹಲವು ದೇಶಗಳ ಉದ್ಯೋಗಿಗಳು ಈ ಲೇಆಫ್‌ಗೆ ಒಳಗಾಗಿದ್ದಾರೆ. ಇದೇ ವೇಳೆ AI ಕ್ಷೇತ್ರದಲ್ಲಿ ಅಮೆಜಾನ್ ಭಾರಿ ಹೂಡಿಕೆಗೆ ಮುಂದಾಗಿರುವುದು ಗಮನ ಸೆಳೆದಿದೆ.
ಅಮೆಜಾನ್ ನ ಈ ಉದ್ಯೋಗ ಕಡಿತವು ಕಂಪನಿಯ ವ್ಯಾಪಕ ಪುನರ್‌ರಚನೆಯ ಭಾಗವಾಗಿದೆ. ಜಾಗತಿಕವಾಗಿ ಸುಮಾರು 30,000 ಉದ್ಯೋಗಗಳು ಕಡಿತಗೊಳ್ಳುವ ಸಾಧ್ಯತೆಯಿದೆ ಎಂದು ವರದಿಗಳು ಈ ಹಿಂದೆ ತಿಳಿಸಿದ್ದವು. Reuters ಮತ್ತು Business Insider ವರದಿಗಳ ಪ್ರಕಾರ, ಅಮೆಜಾನ್ನ ಇ-ಕಾಮರ್ಸ್ ವೆಬ್‌ಸೈಟ್ ಸೇರಿದಂತೆ ಸ್ಟೋರ್ಸ್ ವ್ಯವಹಾರಕ್ಕೆ ಸಂಬಂಧಿಸಿದ ಉದ್ಯೋಗಿಗಳು ಈ ಬಾರಿ ಉದ್ಯೋಗ ಕಡಿತಕ್ಕೆ ಒಳಗಾಗಿದ್ದಾರೆ.
“ನಮ್ಮ ಆದ್ಯತೆಗಳನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಸಾಧಿಸಲು ಸಾಧ್ಯವಾಗುವಂತಹ ರಚನೆ ನಮ್ಮ ವ್ಯವಹಾರಕ್ಕೆ ಅಗತ್ಯವಿದೆ ಎಂಬ ನಂಬಿಕೆಯ ಹಿನ್ನೆಲೆಯಲ್ಲಿ, ನಮ್ಮ Stores ವ್ಯವಹಾರದ ಕೆಲವು ಭಾಗಗಳಲ್ಲಿ ಬದಲಾವಣೆ ಮಾಡಿದ್ದೇವೆ” ಎಂದು ಅಮೆಜಾನ್ ವಕ್ತಾರರು Reutersಗೆ ತಿಳಿಸಿದ್ದಾರೆ. ಆದರೆ ಉದ್ಯೋಗ ಕಡಿತಕ್ಕೆ ಒಳಗಾದವರ ನಿಖರ ಸಂಖ್ಯೆಯನ್ನು ಕಂಪನಿ ಬಹಿರಂಗಪಡಿಸಿಲ್ಲ.
ಕೋವಿಡ್ ಸಮಯದಲ್ಲಿ ಹೆಚ್ಚಿನ ನೇಮಕಾತಿ ಮಾಡಿದ್ದೇ ಕಾರಣ?
Amazon ಸಂಸ್ಥಾಪಕ ಜೆಫ್ ಬೆಜೋಸ್ ಅವರು ಬುಧವಾರ ಪ್ರಸಾರವಾದ Fox News ಸಂದರ್ಶನದಲ್ಲಿ, ಮುಂದುವರಿದಿರುವ ಉದ್ಯೋಗ ಕಡಿತಕ್ಕೆ ಕೋವಿಡ್-19 ಸಾಂಕ್ರಾಮಿಕ ಸಮಯದಲ್ಲಿ ಕಂಪನಿ ಹೆಚ್ಚಿನ ಸಂಖ್ಯೆಯಲ್ಲಿ ಉದ್ಯೋಗಿಗಳನ್ನು ನೇಮಕ ಮಾಡಿಕೊಂಡಿದ್ದೇ ಪ್ರಮುಖ ಕಾರಣ ಎಂದು ಹೇಳಿದ್ದಾರೆ.
“ಜನರು ಮನೆಯಲ್ಲೇ ಉಳಿದುಕೊಂಡಿದ್ದರು ಮತ್ತು ಹೆಚ್ಚಿನ ಪ್ರಮಾಣದಲ್ಲಿ ಆರ್ಡರ್ ಮಾಡುತ್ತಿದ್ದರು. ಅದು ನಮಗೆ ಅತ್ಯಂತ ಒತ್ತಡದ ಅವಧಿಯಾಗಿತ್ತು” ಎಂದು ಅವರು ಹೇಳಿದ್ದಾರೆ.
ಮಾರಾಟ ಹಬ್ಬದ ಆರಂಭದಲ್ಲೇ ಉದ್ಯೋಗ ಕಡಿತ
ಅಮೆಜಾನ್ ನ ಇ-ಕಾಮರ್ಸ್ ವೇದಿಕೆಯಲ್ಲಿ ಪ್ರಮುಖ ಮಾರಾಟ ಹಬ್ಬ ಆರಂಭವಾಗಿರುವ ಸಮಯದಲ್ಲೇ ಈ ಉದ್ಯೋಗ ಕಡಿತ ನಡೆದಿದೆ.ಭಾರತದಲ್ಲಿ Amazon Great Indian Festival ಮಾರಾಟ ಅಕ್ಟೋಬರ್ 7ರಂದು Prime ಸದಸ್ಯರಿಗೆ ಆರಂಭವಾಗಿದ್ದು, ಇದೀಗ ಎಲ್ಲಾ ಗ್ರಾಹಕರಿಗೂ ಲಭ್ಯವಿದೆ. ಜಾಗತಿಕ ಮಟ್ಟದಲ್ಲಿ Prime Big Deal Days ಮಾರಾಟವೂ ಅಕ್ಟೋಬರ್ 6ರಂದು ಆರಂಭವಾಗಿದೆ.
ಇ-ಮೇಲ್ ಮೂಲಕ ಉದ್ಯೋಗ ಕಡಿತದ ಮಾಹಿತಿ
ಮಂಗಳವಾರ ಹಲವು ಉದ್ಯೋಗಿಗಳಿಗೆ ಇ-ಮೇಲ್ ಮೂಲಕ ಅವರ ಹುದ್ದೆಗಳನ್ನು ರದ್ದುಗೊಳಿಸಲಾಗಿದೆ ಎಂಬ ಮಾಹಿತಿ ನೀಡಲಾಗಿದೆ ಎಂದು ವರದಿಯಾಗಿದೆ.ಈ ಹಿಂದೆ Oracle ಮತ್ತು Meta ಸೇರಿದಂತೆ ಹಲವು ಕಂಪನಿಗಳು ಉದ್ಯೋಗ ಕಡಿತದ ಮಾಹಿತಿಯನ್ನು ಉದ್ಯೋಗಿಗಳಿಗೆ ಇ-ಮೇಲ್ ಮೂಲಕವೇ ನೀಡಿದ್ದವು. ಅಮೆಜಾನ್ನ ಸುಮಾರು 37,000 ಸದಸ್ಯರಿರುವ ಆಂತರಿಕ Slack ಚಾನೆಲ್‌ನಲ್ಲಿ ಉದ್ಯೋಗಿಗಳು ಪರಿಹಾರಧನ, ಆಂತರಿಕ ಉದ್ಯೋಗಾವಕಾಶಗಳಿಗೆ ಪ್ರವೇಶ, ನೋಟಿಸ್ ಅವಧಿ ಸೇರಿದಂತೆ ಹಲವು ವಿಚಾರಗಳ ಬಗ್ಗೆ ಚರ್ಚಿಸಿದ್ದಾರೆ ಎನ್ನಲಾಗಿದೆ.
ಗ್ರಾಹಕ ಸೇವೆ, ಮಾರಾಟ ಪಾಲುದಾರರ ಸೇವೆಗಳು, ಮಾರ್ಕೆಟ್‌ಪ್ಲೇಸ್ ಬೆಂಬಲ ಮತ್ತು ಎಂಜಿನಿಯರಿಂಗ್ ಸೇರಿದಂತೆ Amazonನ ರಿಟೇಲ್ ವ್ಯವಹಾರದ ಹಲವು ವಿಭಾಗಗಳ ಉದ್ಯೋಗಿಗಳು ಉದ್ಯೋಗ ಕಡಿತಕ್ಕೆ ಒಳಗಾಗಿದ್ದಾರೆ ಎಂದು ಈ ಚರ್ಚೆಗಳಿಂದ ತಿಳಿದುಬಂದಿದೆ.ಈ ಕಡಿತಗಳು ಮೆಕ್ಸಿಕೊ ಮತ್ತು ಯುರೋಪಿನ ಇತರ ಭಾಗಗಳಿಗೂ ವಿಸ್ತರಿಸಲಿವೆಯೇ ಎಂಬ ಬಗ್ಗೆ ಕೆಲ ಉದ್ಯೋಗಿಗಳು ಪ್ರಶ್ನಿಸಿದ್ದಾರೆ ಎನ್ನಲಾಗಿದೆ.
ಹಲವು ತಿಂಗಳಿಂದ ಉದ್ಯೋಗಿಗಳಲ್ಲಿ ಆತಂಕ
Amazonನ ಕಾರ್ಪೊರೇಟ್ ಉದ್ಯೋಗಿಗಳಲ್ಲಿ ಹಲವು ತಿಂಗಳಿಂದಲೇ ಮತ್ತೊಂದು ದೊಡ್ಡ ಪ್ರಮಾಣದ ಉದ್ಯೋಗ ಕಡಿತದ ಭೀತಿ ಇತ್ತು ಎಂದು ವರದಿಗಳು ತಿಳಿಸಿವೆ.ಮುಂದಿನ ಹಲವು ತ್ರೈಮಾಸಿಕಗಳ ಯೋಜನೆಗಳಲ್ಲಿಯೂ ಕೆಲವು ಕಂಪನಿ ನಾಯಕರು ಬದಲಾವಣೆ ಮಾಡಿದ್ದಾರೆ ಎನ್ನಲಾಗಿದೆ. ತಂಡಗಳು ಅಥವಾ ಕಂಪನಿಯ ಆದ್ಯತೆಗಳಲ್ಲಿ ಬದಲಾವಣೆ ಆಗಬಹುದು ಎಂಬ ನಿರೀಕ್ಷೆಯೂ ಇದಕ್ಕೆ ಕಾರಣವಾಗಿದೆ.
AI ಕ್ಷೇತ್ರಕ್ಕೆ Amazonನಿಂದ ಭಾರಿ ಹೂಡಿಕೆ
ಇನ್ನೊಂದೆಡೆ, Amazon ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದತ್ತ ಭಾರಿ ಪ್ರಮಾಣದಲ್ಲಿ ಗಮನ ಹರಿಸುತ್ತಿದೆ.ಡೇಟಾ ಸೆಂಟರ್‌ಗಳು, ಚಿಪ್‌ಗಳು ಮತ್ತು AIಗೆ ಸಂಬಂಧಿಸಿದ ಇತರ ಮೂಲಸೌಕರ್ಯಗಳಿಗಾಗಿ ಕಂಪನಿ ದಾಖಲೆಯ ಸುಮಾರು 220 ಬಿಲಿಯನ್ ಡಾಲರ್ ಹೂಡಿಕೆ ಮಾಡಲು ಸಿದ್ಧತೆ ನಡೆಸಿದೆ ಎಂದು ವರದಿಯಾಗಿದೆ.
ಇದೇ ವೇಳೆ, ಈ ಹಿಂದೆ ಉದ್ಯೋಗ ಕಳೆದುಕೊಂಡ ಕೆಲವರನ್ನೂ ಮತ್ತೆ ನೇಮಕ ಮಾಡಿಕೊಳ್ಳಲು Amazon ಸಂಪರ್ಕಿಸಿದೆ ಎನ್ನಲಾಗಿದೆ. ವಿಶೇಷವಾಗಿ AWS ಮತ್ತು AI ವ್ಯವಹಾರಗಳಲ್ಲಿ ಖಾಲಿ ಇರುವ ಹುದ್ದೆಗಳಿಗಾಗಿ ಮಾಜಿ ಉದ್ಯೋಗಿಗಳನ್ನು ಸಂಪರ್ಕಿಸಲಾಗಿದೆ ಎಂದು ವರದಿಗಳು ತಿಳಿಸಿವೆ.
AI ಕ್ಷೇತ್ರದತ್ತ ಹೆಚ್ಚಿನ ಗಮನ ಹರಿಸುತ್ತಿರುವ ಸಂದರ್ಭದಲ್ಲಿ ಉದ್ಯೋಗ ಕಡಿತ ಮಾಡುತ್ತಿರುವುದು Amazon ಮಾತ್ರವಲ್ಲ.Meta ಸಂಸ್ಥೆ ಮೇ ತಿಂಗಳಲ್ಲಿ ಸುಮಾರು 8,000 ಉದ್ಯೋಗಗಳನ್ನು ಕಡಿತಗೊಳಿಸಿತ್ತು. ಇದೇ ವೇಳೆ ಸಾವಿರಾರು ಉದ್ಯೋಗಿಗಳನ್ನು AI ಸಂಬಂಧಿತ ಯೋಜನೆಗಳಿಗೆ ವರ್ಗಾಯಿಸಿತ್ತು.
Microsoft ಕೂಡ ಜುಲೈ ಮತ್ತು ಸೆಪ್ಟೆಂಬರ್ ಅವಧಿಯಲ್ಲಿ 5,000ಕ್ಕೂ ಹೆಚ್ಚು ಉದ್ಯೋಗಗಳನ್ನು ಕಡಿತಗೊಳಿಸಿತ್ತು. Oracle ಸಂಸ್ಥೆಯೂ ಇತ್ತೀಚಿನ ತಿಂಗಳುಗಳಲ್ಲಿ ಹಲವು ಸುತ್ತಿನ ಉದ್ಯೋಗ ಕಡಿತವನ್ನು ಘೋಷಿಸಿದೆ.
ಒಟ್ಟಿನಲ್ಲಿ, ಅಮೆಜಾನ್ನಲ್ಲಿ ನಡೆಯುತ್ತಿರುವ ಈ ಹೊಸ ಉದ್ಯೋಗ ಕಡಿತವು ರಿಟೇಲ್ ವ್ಯವಹಾರದ ಪುನರ್‌ರಚನೆಯ ಭಾಗವಾಗಿದ್ದು, ಮತ್ತೊಂದೆಡೆ AI ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಕಂಪನಿ ಭಾರಿ ಹೂಡಿಕೆಗೆ ಮುಂದಾಗಿದೆ.
