ಒಂದು ದೇಶದ ಅಭಿವೃದ್ಧಿಗೆ ಕೇವಲ ಸರ್ಕಾರಗಳ ಬದಲಾವಣೆ ಸಾಕಾಗುವುದಿಲ್ಲ; ಹೊಸ ಆಲೋಚನೆಗಳು ಮತ್ತು ಹೊಸ ಆಡಳಿತ ವಿಧಾನಗಳ ಅಗತ್ಯವಿದೆ. 25 ವರ್ಷಗಳ ಸಾರ್ವಜನಿಕ ಆಡಳಿತದ ಪಯಣದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ನೇತೃತ್ವದಲ್ಲಿ ಗುಜರಾತ್ ಹಾಗೂ ಕೇಂದ್ರ ಸರ್ಕಾರದ ಮಟ್ಟದಲ್ಲಿ ಹಲವು ವಿಭಿನ್ನ ಯೋಜನೆಗಳು ಮತ್ತು ಅಭಿಯಾನಗಳು ಜಾರಿಗೆ ಬಂದಿವೆ.
ಹೌದು. ಗುಜರಾತ್ ಮುಖ್ಯಮಂತ್ರಿಯಿಂದ ದೇಶದ ಪ್ರಧಾನಮಂತ್ರಿವರೆಗೆ 25 ವರ್ಷಗಳ ಆಡಳಿತ ಪಯಣದಲ್ಲಿ ನರೇಂದ್ರ ಮೋದಿ ಹಲವು ಹೊಸ ಆಡಳಿತ ಮಾದರಿ, ಯೋಜನೆಗಳು ಮತ್ತು ಅಭಿಯಾನಗಳಿಗೆ ಚಾಲನೆ ನೀಡಿದ್ದಾರೆ.
ವೈಬ್ರಂಟ್ ಗುಜರಾತ್‌ನಿಂದ ಯುಪಿಐವರೆಗೆ, ಮನ್ ಕೀ ಬಾತ್‌ನಿಂದ ಮೇಕ್ ಇನ್ ಇಂಡಿಯಾ, ಆತ್ಮನಿರ್ಭರ್ ಭಾರತ್, ವಂದೇ ಭಾರತ್, ಮಿಷನ್ LiFE ಹಾಗೂ ನಾರಿ ಶಕ್ತಿ ವಂದನ್ ಅಧಿನಿಯಮದವರೆಗೆ ಹಲವು ಉಪಕ್ರಮಗಳು ದೇಶದ ಆಡಳಿತ, ಆರ್ಥಿಕತೆ, ತಂತ್ರಜ್ಞಾನ, ಸಾಮಾಜಿಕ ಅಭಿವೃದ್ಧಿ ಮತ್ತು ಜಾಗತಿಕ ಗುರುತಿನ ಮೇಲೆ ಪರಿಣಾಮ ಬೀರಿವೆ. ಮೋದಿ ಅವರ 25 ವರ್ಷಗಳ ಆಡಳಿತ ಪಯಣದಲ್ಲಿ ಗಮನ ಸೆಳೆದ 25 ಪ್ರಮುಖ ಆಲೋಚನೆಗಳು ಇಲ್ಲಿವೆ.
1. ವೈಬ್ರಂಟ್ ಗುಜರಾತ್ – 2003
ಹೂಡಿಕೆದಾರರನ್ನು ನೇರವಾಗಿ ರಾಜ್ಯಕ್ಕೆ ಆಹ್ವಾನಿಸಿ ಹೂಡಿಕೆ ಆಕರ್ಷಿಸುವ ಹೊಸ ಮಾದರಿಯನ್ನು ವೈಬ್ರಂಟ್ ಗುಜರಾತ್ ರೂಪಿಸಿತು. ಬಳಿಕ ಹಲವು ರಾಜ್ಯಗಳು ಇದೇ ರೀತಿಯಲ್ಲಿ ಹೂಡಿಕೆದಾರರ ಸಮಾವೇಶಗಳನ್ನು ಆಯೋಜಿಸಲು ಮುಂದಾದವು.
2. ರಣ್ ಉತ್ಸವ
ಕಚ್‌ನ ಬಿಳಿ ಉಪ್ಪಿನ ಮರುಭೂಮಿಯನ್ನು ಪ್ರಮುಖ ಪ್ರವಾಸೋದ್ಯಮ ತಾಣವಾಗಿ ಅಭಿವೃದ್ಧಿಪಡಿಸುವ ಉದ್ದೇಶದಿಂದ ಆರಂಭವಾದ ರಣ್ ಉತ್ಸವ ಇಂದು ದೇಶ-ವಿದೇಶದ ಪ್ರವಾಸಿಗರನ್ನು ಆಕರ್ಷಿಸುವ ಪ್ರಮುಖ ಉತ್ಸವವಾಗಿದೆ.
3. ಕೃಷಿ ಮಹೋತ್ಸವ
ರೈತರಿಗೆ ಸ್ಥಳೀಯ ಪರಿಸ್ಥಿತಿಗೆ ಅನುಗುಣವಾದ ಕೃಷಿ ಸಲಹೆ, ಮಣ್ಣಿನ ಆರೋಗ್ಯ ಹಾಗೂ ಆಧುನಿಕ ಕೃಷಿ ಪದ್ಧತಿಗಳ ಕುರಿತು ನೇರ ಮಾರ್ಗದರ್ಶನ ನೀಡುವ ಪ್ರಯತ್ನಕ್ಕೆ ಕೃಷಿ ಮಹೋತ್ಸವ ವೇದಿಕೆಯಾಯಿತು.
4. ವಂಚೇ ಗುಜರಾತ್
ಓದುವ ಹವ್ಯಾಸವನ್ನು ಜನರ ಸಾಮೂಹಿಕ ಚಟುವಟಿಕೆಯನ್ನಾಗಿ ಮಾಡುವ ಉದ್ದೇಶದಿಂದ ಆರಂಭವಾದ ವಂಚೇ ಗುಜರಾತ್ ಅಭಿಯಾನವು ರಾಜ್ಯಾದ್ಯಂತ ಓದು ಸಂಸ್ಕೃತಿಗೆ ಉತ್ತೇಜನ ನೀಡಿತು.
ವಂಚೇ ಗುಜರಾತ್’ (Vanche Gujarat – ಗುಜರಾತ್ ಓದುತ್ತಿದೆ) ಎಂಬುದು ಗುಜರಾತ್‌ನ ಜನರಲ್ಲಿ, ವಿಶೇಷವಾಗಿ ಯುವ ಪೀಳಿಗೆಯಲ್ಲಿ ಓದುವ ಹವ್ಯಾಸವನ್ನು ಬೆಳೆಸಲು ಹಮ್ಮಿಕೊಳ್ಳಲಾದ ಒಂದು ಪ್ರಸಿದ್ಧ ಪುಸ್ತಕ ಓದುವ ಅಭಿಯಾನವಾಗಿದೆ. ಈ ಯೋಜನೆಯನ್ನು 2010 ರಲ್ಲಿ ಗುಜರಾತ್‌ನ ಅಂದಿನ ಮುಖ್ಯಮಂತ್ರಿಯಾಗಿದ್ದ (ಪ್ರಸ್ತುತ ಪ್ರಧಾನಿ) ನರೇಂದ್ರ ಮೋದಿ ಅವರು ‘ಸ್ವರ್ಣಿಮ್ ಗುಜರಾತ್’ (ಗುಜರಾತ್ ರಾಜ್ಯದ ಸುವರ್ಣ ಮಹೋತ್ಸವ) ಆಚರಣೆಯ ಅಂಗವಾಗಿ ಅಧಿಕೃತವಾಗಿ ಚಾಲನೆ ನೀಡಿದರು ಸಾರ್ವಜನಿಕರಲ್ಲಿ, ಶಾಲಾ-ಕಾಲೇಜು ವಿದ್ಯಾರ್ಥಿಗಳಲ್ಲಿ ಮತ್ತು ಶಿಕ್ಷಕರಲ್ಲಿ ಸಾಹಿತ್ಯ ಹಾಗೂ ಪುಸ್ತಕಗಳನ್ನು ಓದುವ ಸಂಸ್ಕೃತಿಯನ್ನು ಮರುಸೃಷ್ಟಿಸುವುದು ಇದರ ಮುಖ್ಯ ಉದ್ದೇಶವಾಗಿತ್ತು.
5. ಜನ ಭಾಗೀದಾರಿ
ಸರ್ಕಾರದ ಯೋಜನೆಗಳಲ್ಲಿ ಜನರನ್ನು ಕೇವಲ ಫಲಾನುಭವಿಗಳಾಗಿ ನೋಡದೆ, ಅಭಿವೃದ್ಧಿ ಪ್ರಕ್ರಿಯೆಯ ಭಾಗವಾಗಿಸುವ ಪರಿಕಲ್ಪನೆಗೆ ‘ಜನ ಭಾಗೀದಾರಿ’ ಒತ್ತು ನೀಡಿತು.
6. ಮನ್ ಕೀ ಬಾತ್
ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಜನರೊಂದಿಗೆ ನೇರವಾಗಿ ಸಂಪರ್ಕ ಸಾಧಿಸುವ ಮಾಸಿಕ ರೇಡಿಯೋ ಕಾರ್ಯಕ್ರಮ ‘ಮನ್ ಕೀ ಬಾತ್’ ಮೂಲಕ ಸಾಮಾನ್ಯ ನಾಗರಿಕರ ಸಾಧನೆಗಳು ಹಾಗೂ ರಾಷ್ಟ್ರೀಯ ವಿಚಾರಗಳನ್ನು ದೇಶದ ಮುಂದೆ ತರುತ್ತಿದ್ದಾರೆ.
7. ವಸಾಹತುಶಾಹಿ ಮನೋಭಾವದಿಂದ ಮುಕ್ತಿ
ಬ್ರಿಟಿಷ್ ಆಳ್ವಿಕೆಯ ಕಾಲದ ಕೆಲವು ಗುರುತುಗಳನ್ನು ಬದಲಿಸಿ ಭಾರತೀಯ ಪರಂಪರೆ, ಸಂಸ್ಕೃತಿ ಮತ್ತು ರಾಷ್ಟ್ರೀಯ ಆತ್ಮಗೌರವಕ್ಕೆ ಒತ್ತು ನೀಡುವ ಪ್ರಯತ್ನಗಳು ನಡೆದವು.
8. ‘ಗಿವ್ ಇಟ್ ಅಪ್’ ಅಭಿಯಾನ
ಎಲ್‌ಪಿಜಿ ಸಬ್ಸಿಡಿಯನ್ನು ಪಡೆಯುವ ಸಾಮರ್ಥ್ಯ ಹೊಂದಿರುವವರು ಸ್ವಯಂಪ್ರೇರಿತವಾಗಿ ಸಬ್ಸಿಡಿ ತ್ಯಜಿಸುವಂತೆ ಕರೆ ನೀಡಲಾಯಿತು. ಇದರಿಂದ ಬಡ ಕುಟುಂಬಗಳಿಗೆ, ವಿಶೇಷವಾಗಿ ಮಹಿಳೆಯರಿಗೆ ಉಜ್ವಲ ಯೋಜನೆಯಡಿ ಅಡುಗೆ ಅನಿಲ ಸಂಪರ್ಕ ಒದಗಿಸಲು ನೆರವಾಯಿತು.
9. ಅಂತಾರಾಷ್ಟ್ರೀಯ ಯೋಗ ದಿನ
ಜೂನ್ 21ರಂದು ಅಂತಾರಾಷ್ಟ್ರೀಯ ಯೋಗ ದಿನ ಆಚರಿಸುವ ಪ್ರಸ್ತಾವನೆಗೆ ವಿಶ್ವಸಂಸ್ಥೆಯ ಮಾನ್ಯತೆ ದೊರೆಯುವ ಮೂಲಕ ಯೋಗ ಜಾಗತಿಕ ವೇದಿಕೆಯಲ್ಲಿ ಮತ್ತಷ್ಟು ಪ್ರಸಿದ್ಧಿಯಾಯಿತು.
10. ಬೇಟಿ ಬಚಾವೋ, ಬೇಟಿ ಪಡಾವೋ
ಹೆಣ್ಣುಮಕ್ಕಳ ರಕ್ಷಣೆ, ಶಿಕ್ಷಣ ಮತ್ತು ಸಬಲೀಕರಣಕ್ಕೆ ಒತ್ತು ನೀಡುವ ಉದ್ದೇಶದಿಂದ ಆರಂಭವಾದ ಈ ಅಭಿಯಾನವು ಬಾಲಕಿಯರ ಅಭಿವೃದ್ಧಿಯನ್ನು ರಾಷ್ಟ್ರೀಯ ಆದ್ಯತೆಯನ್ನಾಗಿ ಮಾಡಿತು.
11. ಜನಸಾಮಾನ್ಯರ ಪದ್ಮ ಪ್ರಶಸ್ತಿಗಳು
ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಮೌನವಾಗಿ ಸೇವೆ ಸಲ್ಲಿಸುತ್ತಿರುವ ಸಾಮಾನ್ಯ ವ್ಯಕ್ತಿಗಳಿಗೂ ಪದ್ಮ ಪ್ರಶಸ್ತಿಗಳ ಮೂಲಕ ಗುರುತಿಸುವಿಕೆಗೆ ಹೆಚ್ಚಿನ ಒತ್ತು ನೀಡಲಾಯಿತು.
12. ಏಕ್ ಭಾರತ್, ಶ್ರೇಷ್ಠ ಭಾರತ್
ಭಾರತದ ವಿವಿಧ ರಾಜ್ಯಗಳ ಜನರ ನಡುವೆ ಭಾಷೆ, ಸಂಸ್ಕೃತಿ, ಆಹಾರ, ಕಲೆ ಮತ್ತು ಪರಂಪರೆಯ ವಿನಿಮಯಕ್ಕೆ ಉತ್ತೇಜನ ನೀಡುವ ಮೂಲಕ ‘ವೈವಿಧ್ಯತೆಯಲ್ಲಿ ಏಕತೆ’ಯನ್ನು ಮತ್ತಷ್ಟು ಬಲಪಡಿಸುವ ಪ್ರಯತ್ನ ನಡೆಯಿತು.
13. ಯುಪಿಐ – ಡಿಜಿಟಲ್ ಪಾವತಿ ಕ್ರಾಂತಿ
2016ರಲ್ಲಿ ಆರಂಭವಾದ ಯುನಿಫೈಡ್ ಪೇಮೆಂಟ್ಸ್ ಇಂಟರ್‌ಫೇಸ್‌ (UPI) ಇಂದು ಭಾರತದ ದೈನಂದಿನ ಡಿಜಿಟಲ್ ಪಾವತಿ ವ್ಯವಸ್ಥೆಯ ಪ್ರಮುಖ ಭಾಗವಾಗಿದೆ. ತ್ವರಿತ ಹಾಗೂ ಸುಲಭ ಹಣ ವರ್ಗಾವಣೆಯಲ್ಲಿ ಭಾರತಕ್ಕೆ ಜಾಗತಿಕ ಗುರುತನ್ನು ತಂದುಕೊಟ್ಟ ವ್ಯವಸ್ಥೆಗಳಲ್ಲಿ ಇದೂ ಒಂದು.
14. ಖೇಲೋ ಇಂಡಿಯಾ
ಗ್ರಾಮೀಣ ಹಾಗೂ ಸಣ್ಣ ಪಟ್ಟಣಗಳ ಪ್ರತಿಭೆಗಳನ್ನು ಗುರುತಿಸಿ ಅವರಿಗೆ ತರಬೇತಿ ಮತ್ತು ಸ್ಪರ್ಧಾತ್ಮಕ ವೇದಿಕೆ ಒದಗಿಸುವ ಉದ್ದೇಶದಿಂದ ಖೇಲೋ ಇಂಡಿಯಾ ಕಾರ್ಯಕ್ರಮ ಜಾರಿಗೆ ಬಂದಿದೆ.
15. ಒಂದು ಜಿಲ್ಲೆ – ಒಂದು ಉತ್ಪನ್ನ
ಪ್ರತಿ ಜಿಲ್ಲೆಯ ವಿಶಿಷ್ಟ ಉತ್ಪನ್ನಗಳಿಗೆ ಬ್ರ್ಯಾಂಡಿಂಗ್, ಮಾರುಕಟ್ಟೆ ಮತ್ತು ರಫ್ತು ಅವಕಾಶಗಳನ್ನು ಒದಗಿಸುವ ಮೂಲಕ ಸ್ಥಳೀಯ ಉತ್ಪನ್ನಗಳನ್ನು ಜಾಗತಿಕ ಮಾರುಕಟ್ಟೆಗೆ ಕೊಂಡೊಯ್ಯುವ ಪ್ರಯತ್ನಕ್ಕೆ ODOP ಉತ್ತೇಜನ ನೀಡಿದೆ.
16. ಆಕಾಂಕ್ಷಿ ಜಿಲ್ಲೆಗಳು – ವೈಬ್ರಂಟ್ ವಿಲೇಜಸ್
ಅಭಿವೃದ್ಧಿಯಲ್ಲಿ ಹಿಂದುಳಿದ ಜಿಲ್ಲೆಗಳು ಮತ್ತು ಗಡಿ ಪ್ರದೇಶಗಳ ಗ್ರಾಮಗಳನ್ನು ಗುರುತಿಸಿ ಆರೋಗ್ಯ, ಶಿಕ್ಷಣ, ಮೂಲಸೌಕರ್ಯ ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಅಭಿವೃದ್ಧಿಯ ವೇಗ ಹೆಚ್ಚಿಸುವ ಗುರಿಯನ್ನು ಈ ಯೋಜನೆಗಳು ಹೊಂದಿವೆ.
17. ಪರೀಕ್ಷಾ ಪೆ ಚರ್ಚಾ
ವಿದ್ಯಾರ್ಥಿಗಳಲ್ಲಿ ಪರೀಕ್ಷೆಯ ಒತ್ತಡ ಮತ್ತು ಆತಂಕ ಕಡಿಮೆ ಮಾಡುವ ಉದ್ದೇಶದಿಂದ ವಿದ್ಯಾರ್ಥಿಗಳು, ಪೋಷಕರು ಹಾಗೂ ಶಿಕ್ಷಕರೊಂದಿಗೆ ಪ್ರಧಾನಿ ನೇರವಾಗಿ ಸಂವಾದ ನಡೆಸುವ ವೇದಿಕೆಯಾಗಿ ‘ಪರೀಕ್ಷಾ ಪೆ ಚರ್ಚಾ’ ಗಮನ ಸೆಳೆದಿದೆ.
18. ಸ್ಟ್ಯಾಚ್ಯೂ ಆಫ್ ಯೂನಿಟಿ
182 ಮೀಟರ್ ಎತ್ತರದ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅವರ ಪ್ರತಿಮೆ ವಿಶ್ವದ ಅತಿ ಎತ್ತರದ ಪ್ರತಿಮೆಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದ್ದು, ಗುಜರಾತ್‌ನ ಪ್ರಮುಖ ಪ್ರವಾಸೋದ್ಯಮ ತಾಣವಾಗಿ ಬೆಳೆದಿದೆ.
19. ವಂದೇ ಭಾರತ್ ರೈಲು
ಸ್ವದೇಶಿ ತಂತ್ರಜ್ಞಾನ ಮತ್ತು ಆಧುನಿಕ ಸೌಲಭ್ಯಗಳನ್ನು ಹೊಂದಿರುವ ವಂದೇ ಭಾರತ್ ರೈಲುಗಳು ಭಾರತದ ರೈಲು ಪ್ರಯಾಣದ ವೇಗ, ಸೌಕರ್ಯ ಮತ್ತು ತಂತ್ರಜ್ಞಾನದಲ್ಲಿ ಹೊಸ ಅಧ್ಯಾಯಕ್ಕೆ ಕಾರಣವಾಗಿವೆ.
20. ಆತ್ಮನಿರ್ಭರ್ ಭಾರತ್
ರಕ್ಷಣಾ, ಔಷಧ, ಎಲೆಕ್ಟ್ರಾನಿಕ್ಸ್, ಸೆಮಿಕಂಡಕ್ಟರ್ ಸೇರಿದಂತೆ ಪ್ರಮುಖ ಕ್ಷೇತ್ರಗಳಲ್ಲಿ ದೇಶೀಯ ಉತ್ಪಾದನೆ ಹೆಚ್ಚಿಸಿ ಭಾರತವನ್ನು ಸ್ವಾವಲಂಬಿ ರಾಷ್ಟ್ರವನ್ನಾಗಿ ಮಾಡುವ ಉದ್ದೇಶಕ್ಕೆ ಆತ್ಮನಿರ್ಭರ್ ಭಾರತ್ ಒತ್ತು ನೀಡಿದೆ.
21. ವೋಕಲ್ ಫಾರ್ ಲೋಕಲ್
ಸ್ಥಳೀಯವಾಗಿ ತಯಾರಾಗುವ ಉತ್ಪನ್ನಗಳನ್ನು ಖರೀದಿಸಿ ಬಳಸುವಂತೆ ಜನರಿಗೆ ಕರೆ ನೀಡುವ ಮೂಲಕ ಸಣ್ಣ ಉದ್ಯಮಗಳು, ಕುಶಲಕರ್ಮಿಗಳು, ಕೈಮಗ್ಗ ಮತ್ತು ಸ್ಥಳೀಯ ಉತ್ಪಾದಕರಿಗೆ ಉತ್ತೇಜನ ನೀಡುವ ಪ್ರಯತ್ನ ನಡೆದಿದೆ.
22. ಮಿಷನ್ LiFE
ಪರಿಸರ ಸಂರಕ್ಷಣೆಯನ್ನು ಕೇವಲ ಸರ್ಕಾರದ ಜವಾಬ್ದಾರಿಯಾಗಿ ನೋಡದೆ, ಪ್ರತಿಯೊಬ್ಬರ ದೈನಂದಿನ ಜೀವನಶೈಲಿಯ ಭಾಗವಾಗಿಸುವ ಉದ್ದೇಶದಿಂದ ‘ಮಿಷನ್ LiFE’ ಪರಿಕಲ್ಪನೆಯನ್ನು ಮುಂದಿಡಲಾಯಿತು.
23. ಶ್ರೀ ಅನ್ನ – ಸಿರಿಧಾನ್ಯಗಳಿಗೆ ಉತ್ತೇಜನ
ಸಿರಿಧಾನ್ಯಗಳ ಪೌಷ್ಟಿಕತೆ ಮತ್ತು ಕಡಿಮೆ ನೀರಿನ ಅವಶ್ಯಕತೆಯನ್ನು ಗಮನದಲ್ಲಿಟ್ಟುಕೊಂಡು ಅವುಗಳ ಬಳಕೆ ಹಾಗೂ ಉತ್ಪಾದನೆಗೆ ಉತ್ತೇಜನ ನೀಡಲಾಯಿತು. 2023ನೇ ವರ್ಷವನ್ನು ಅಂತಾರಾಷ್ಟ್ರೀಯ ಸಿರಿಧಾನ್ಯಗಳ ವರ್ಷವಾಗಿ ಆಚರಿಸುವಲ್ಲಿಯೂ ಭಾರತದ ಪ್ರಮುಖ ಪಾತ್ರವಿತ್ತು.
24. ನಾರಿ ಶಕ್ತಿ ವಂದನ್ ಅಧಿನಿಯಮ
ಲೋಕಸಭೆ ಮತ್ತು ರಾಜ್ಯ ವಿಧಾನಸಭೆಗಳಲ್ಲಿ ಮಹಿಳೆಯರಿಗೆ ಶೇ.33ರಷ್ಟು ಮೀಸಲಾತಿ ಒದಗಿಸುವ ಕಾನೂನು ಮಹಿಳಾ ರಾಜಕೀಯ ಪ್ರಾತಿನಿಧ್ಯದಲ್ಲಿ ಮಹತ್ವದ ಹೆಜ್ಜೆಯಾಗಿದೆ.
25. ಅಣುಶಕ್ತಿ ಕ್ಷೇತ್ರದಲ್ಲಿ ಹೊಸ ಹೆಜ್ಜೆ
ದೀರ್ಘಕಾಲೀನ ಇಂಧನ ಭದ್ರತೆ ಮತ್ತು ಅಣುಶಕ್ತಿ ಸಾಮರ್ಥ್ಯ ವಿಸ್ತರಣೆಯ ದೃಷ್ಟಿಯಿಂದ ಭಾರತದಲ್ಲಿ ನಾಗರಿಕ ಅಣುಶಕ್ತಿ ಕ್ಷೇತ್ರಕ್ಕೆ ಹೊಸ ಹೂಡಿಕೆ ಹಾಗೂ ಸಹಭಾಗಿತ್ವದ ಅವಕಾಶಗಳನ್ನು ಕಲ್ಪಿಸುವ ದಿಕ್ಕಿನಲ್ಲಿ ಕ್ರಮಗಳು ಕೈಗೊಳ್ಳಲಾಗುತ್ತಿವೆ.
ವೈಬ್ರಂಟ್ ಗುಜರಾತ್‌ನಿಂದ ಯುಪಿಐವರೆಗೆ, ಯೋಗ ದಿನದಿಂದ ಮಿಷನ್ LiFEವರೆಗೆ, ಖೇಲೋ ಇಂಡಿಯಾದಿಂದ ನಾರಿ ಶಕ್ತಿ ವಂದನ್ ಅಧಿನಿಯಮದವರೆಗೆ ಹಲವು ಉಪಕ್ರಮಗಳು ಆಡಳಿತ, ತಂತ್ರಜ್ಞಾನ, ಆರ್ಥಿಕತೆ, ಸಾಮಾಜಿಕ ಸಬಲೀಕರಣ ಮತ್ತು ಜಾಗತಿಕ ಮಟ್ಟದಲ್ಲಿ ಭಾರತದ ಗುರುತಿಗೆ ಹೊಸ ಆಯಾಮ ನೀಡಿವೆ. ನರೇಂದ್ರ ಮೋದಿ ಅವರ 25 ವರ್ಷಗಳ ಆಡಳಿತ ಪಯಣದಲ್ಲಿ ಮೂಡಿಬಂದ ಈ ಆಲೋಚನೆಗಳು ಭಾರತದ ಅಭಿವೃದ್ಧಿಯ ದಿಕ್ಕಿನಲ್ಲಿ ಮಹತ್ವದ ಚರ್ಚೆಗೆ ಕಾರಣವಾಗಿವೆ.
