ತಿರುವನಂತಪುರಂ: ತೀವ್ರ ಹೊಟ್ಟೆನೋವು ಮತ್ತು ವಾಂತಿಯಿಂದ ಬಳಲುತ್ತಿದ್ದ 9 ವರ್ಷದ ಬಾಲಕಿಯ ಹೊಟ್ಟೆ ಹಾಗೂ ಸಣ್ಣ ಕರುಳಿನಿಂದ 1 ಕೆಜಿ ತೂಕದ ಕೂದಲಿನ ಉಂಡೆಯನ್ನು ವೈದ್ಯರು ಹೊರತೆಗೆದಿದ್ದಾರೆ. ಕೇರಳದ ತಿರುವನಂತಪುರಂ ಸಮೀಪದ ನೆಯ್ಯಾಟಿಂಕರದಲ್ಲಿರುವ ಎನ್‌ಐಎಂಎಸ್ ಮೆಡಿಸಿಟಿಯಲ್ಲಿ ಈ ಶಸ್ತ್ರಚಿಕಿತ್ಸೆ ನಡೆದಿದೆ.
ಬಾಲಕಿಗೆ ರಾಪುಂಜೆಲ್ ಸಿಂಡ್ರೋಮ್ ಇರುವುದು ಪರೀಕ್ಷೆಯಲ್ಲಿ ಪತ್ತೆಯಾಗಿತ್ತು. ಅಲ್ಟ್ರಾಸೌಂಡ್ ಮತ್ತು ಸಿಟಿ ಸ್ಕ್ಯಾನ್‌ನಲ್ಲಿ ಕರುಳಿನಲ್ಲಿ ಅಡೆತಡೆ ಕಂಡುಬಂದಿತ್ತು. ನಂತರ ಎಂಡೋಸ್ಕೋಪಿ ಮಾಡಿದಾಗ ಹೊಟ್ಟೆ ಮತ್ತು ಸಣ್ಣ ಕರುಳಿನಲ್ಲಿ ದೊಡ್ಡ ಪ್ರಮಾಣದ ಕೂದಲು ಸಂಗ್ರಹವಾಗಿರುವುದು ಗೊತ್ತಾಗಿದೆ.
ಮಕ್ಕಳ ಶಸ್ತ್ರಚಿಕಿತ್ಸಾ ವಿಭಾಗದ ಹಿರಿಯ ಸಲಹೆಗಾರ ಡಾ. ಬಿಜು ಐ.ಜಿ. ನಾಯರ್ ನೇತೃತ್ವದ ತಂಡ ಶಸ್ತ್ರಚಿಕಿತ್ಸೆ ನಡೆಸಿ ಕೂದಲಿನ ಉಂಡೆಯನ್ನು ಸಂಪೂರ್ಣವಾಗಿ ಹೊರತೆಗೆದಿದೆ.
ಬಾಲಕಿ ಚೇತರಿಕೆ
ಶಸ್ತ್ರಚಿಕಿತ್ಸೆಯ ಬಳಿಕ ಬಾಲಕಿ ಚೇತರಿಸಿಕೊಂಡಿದ್ದಾಳೆ. ಸಾಮಾನ್ಯವಾಗಿ ಆಹಾರ ಸೇವಿಸಲು ಆರಂಭಿಸಿದ ನಂತರ ಆಕೆಯನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಮಾಡಲಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.
ವೈದ್ಯರ ಪ್ರಕಾರ, ಇಂತಹ ಪ್ರಕರಣಗಳು ಬಹಳ ಅಪರೂಪ. ಜಗತ್ತಿನಾದ್ಯಂತ ಈವರೆಗೆ 100ಕ್ಕಿಂತ ಕಡಿಮೆ ರಾಪುಂಜೆಲ್ ಸಿಂಡ್ರೋಮ್ ಪ್ರಕರಣಗಳು ವರದಿಯಾಗಿವೆ.
ಹೊಟ್ಟೆಯಲ್ಲಿ ಕೂದಲು ಹೇಗೆ ಸೇರುತ್ತದೆ?
ಕೆಲವರು ತಮ್ಮ ಕೂದಲನ್ನು ಕಿತ್ತುಕೊಂಡು ನುಂಗುವ ಅಭ್ಯಾಸ ಹೊಂದಿರುತ್ತಾರೆ. ನುಂಗಿದ ಕೂದಲು ಜೀರ್ಣವಾಗುವುದಿಲ್ಲ. ಹೀಗಾಗಿ ಅದು ನಿಧಾನವಾಗಿ ಹೊಟ್ಟೆಯಲ್ಲಿ ಸಂಗ್ರಹವಾಗಿ ಗಟ್ಟಿಯಾದ ಉಂಡೆಯಾಗಿ ರೂಪುಗೊಳ್ಳುತ್ತದೆ. ಇದನ್ನು ಟ್ರೈಕೋಬಿಜೋರ್ (Trichobezoar) ಎಂದು ಕರೆಯಲಾಗುತ್ತದೆ.
ಕೆಲವೊಮ್ಮೆ ಈ ಕೂದಲಿನ ಉಂಡೆ ಹೊಟ್ಟೆಯಿಂದ ಸಣ್ಣ ಕರುಳಿನವರೆಗೂ ವಿಸ್ತರಿಸುತ್ತದೆ. ಇದರಿಂದ ಆಹಾರ ಮುಂದೆ ಸಾಗಲು ತೊಂದರೆಯಾಗಬಹುದು. ಹೊಟ್ಟೆನೋವು, ವಾಂತಿ ಮತ್ತು ಜೀರ್ಣಕ್ರಿಯೆ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.
ಏನಿದು ರಾಪುಂಜೆಲ್ ಸಿಂಡ್ರೋಮ್?
ಕೂದಲಿನ ಉಂಡೆ ಹೊಟ್ಟೆಯಿಂದ ಸಣ್ಣ ಕರುಳಿನವರೆಗೂ ವಿಸ್ತರಿಸಿದಾಗ ಅದನ್ನು ರಾಪುಂಜೆಲ್ ಸಿಂಡ್ರೋಮ್ ಎಂದು ಕರೆಯಲಾಗುತ್ತದೆ. ಈ ಸಮಸ್ಯೆ ಸಾಮಾನ್ಯವಾಗಿ ಹದಿಹರೆಯದ ಬಾಲಕಿಯರಲ್ಲಿ ಹೆಚ್ಚು ಕಂಡುಬರುತ್ತದೆ.
ಈ ಪ್ರಕರಣದಲ್ಲಿ ಡಾ. ರಾಜೇಂದ್ರನ್ ಎಸ್., ಡಾ. ನೀಹಾರ್, ಡಾ. ಇಜಾಸ್, ಡಾ. ಹಸೀನಾ ಸೇರಿದಂತೆ ವೈದ್ಯರು ಮತ್ತು ನರ್ಸಿಂಗ್ ಸಿಬ್ಬಂದಿ ಶಸ್ತ್ರಚಿಕಿತ್ಸಾ ತಂಡದಲ್ಲಿದ್ದರು.
