ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್, ಶುಕ್ರವಾರ ರಾಜ್ಯದಲ್ಲಿ ಮಹಿಳೆಯರು ಮತ್ತು ತೃತೀಯಲಿಂಗಿಗಳಿಗೆ ಜಾರಿಯಲ್ಲಿರುವ ಉಚಿತ ಬಸ್ ಪ್ರಯಾಣ ಯೋಜನೆಯನ್ನು ವಿಸ್ತರಿಸಿ, ತಾವೇ ಖುದ್ದಾಗಿ ಸರ್ಕಾರಿ ಬಸ್ ಏರಿ ಪ್ರಯಾಣಿಕರಿಗೆ ಟಿಕೆಟ್ ವಿತರಿಸುವ ಮೂಲಕ ಸಾರ್ವಜನಿಕ ಗಮನ ಸೆಳೆದಿದ್ದಾರೆ.
‘ವೆಟ್ರಿ ಪಯಣಂ’ ಯೋಜನೆ ವಿಸ್ತರಣೆ
ತಮಿಳುನಾಡು ಸರ್ಕಾರದ ಉಚಿತ ಪ್ರಯಾಣ ಯೋಜನೆಯಾದ ‘ವೆಟ್ರಿ ಪಯಣಂ’ ಯೋಜನೆಗೆ ಹೊಸ ಚಾಲನೆ ನೀಡಿದ ಸಿಎಂ ವಿಜಯ್, ಚೆನ್ನೈನ ಕೊಯಂಬೇಡು ಬಸ್ ನಿಲ್ದಾಣದಿಂದ ನಗರ ಸಾರಿಗೆ ಬಸ್‌ನಲ್ಲಿ ಪ್ರಯಾಣ ಬೆಳೆಸಿದರು. ಪ್ರಯಾಣದ ವೇಳೆ ಬಸ್‌ನ ಕಂಡಕ್ಟರ್ ರೀತಿಯಲ್ಲಿ ಸಾಗಿದ ಅವರು, ಮಹಿಳಾ ಪ್ರಯಾಣಿಕರಿಗೆ ಸ್ವತಃ ಉಚಿತ ಟಿಕೆಟ್‌ಗಳನ್ನು ವಿತರಿಸಿ, ಯೋಜನೆಯ ಕುರಿತು ಅವರ ಅಭಿಪ್ರಾಯಗಳನ್ನು ಆಲಿಸಿದರು. ಈ ವೇಳೆ ಬಸ್‌ನಲ್ಲಿದ್ದ ಕಾಲೇಜು ವಿದ್ಯಾರ್ಥಿಗಳು ಸಿಎಂ ವಿಜಯ್ ಅವರಿಗೆ ‘ಡೈರಿ ಮಿಲ್ಕ್’ ಚಾಕೊಲೇಟ್ ನೀಡಿ ಸಂತಸ ವ್ಯಕ್ತಪಡಿಸಿದರು.
ಈ ವಿಸ್ತರಿತ ಯೋಜನೆಯಡಿ ರಾಜ್ಯ ಸಾರಿಗೆ ಸಂಸ್ಥೆಯ ಬರೋಬ್ಬರಿ 12,695 ಬಸ್‌ಗಳಲ್ಲಿ ಮಹಿಳೆಯರು ಹಾಗೂ ತೃತೀಯಲಿಂಗಿಗಳು ಉಚಿತವಾಗಿ ಪ್ರಯಾಣಿಸಬಹುದು. ಎಕ್ಸ್‌ಪ್ರೆಸ್, ಡಿಲಕ್ಸ್, ಸಾಮಾನ್ಯ ಹಾಗೂ ಘಾಟ್ ಪ್ರದೇಶದ ಬಸ್‌ಗಳಿಗೂ ಈ ಸೌಲಭ್ಯವನ್ನು ವಿಸ್ತರಿಸಲಾಗಿದ್ದು, ದಿನಕ್ಕೆ ಸುಮಾರು 84.32 ಲಕ್ಷ ಮಹಿಳೆಯರು ಇದರ ಸೌಲಭ್ಯ ಪಡೆಯಲಿದ್ದಾರೆ. ಈ ಯೋಜನೆಗೆ ಯಾವುದೇ ಆದಾಯದ ಮಿತಿ ಇಲ್ಲದಿರುವುದು ಹಾಗೂ ದಿನದಲ್ಲಿ ಎಷ್ಟು ಬಾರಿ ಬೇಕಾದರೂ ಉಚಿತವಾಗಿ ಪ್ರಯಾಣಿಸಲು ಅವಕಾಶ ನೀಡಿರುವುದು ವಿಶೇಷ.
ಜನರೊಂದಿಗೆ ನಿರಂತರ ಸಂಪರ್ಕ
ಸಿಎಂ ವಿಜಯ್ ಅವರು ಸಾರ್ವಜನಿಕರೊಂದಿಗೆ ಅತ್ಯಂತ ಸರಳವಾಗಿ ಬೆರೆಯುತ್ತಿರುವುದು ಇದೇ ಮೊದಲೇನಲ್ಲ. ಜೂನ್‌ನಲ್ಲಿ ಸೆಕ್ರೆಟರಿಯೇಟ್‌ನಿಂದ ಪೆರಂಬೂರ್‌ಗೆ ಹೊಸ ಬಸ್‌ಗಳಿಗೆ ಚಾಲನೆ ನೀಡಿದಾಗಲೂ ಸಾಮಾನ್ಯ ಸೀಟಿನಲ್ಲಿ ಕುಳಿತು, ಸ್ವತಃ ಹಣ ನೀಡಿ ಟಿಕೆಟ್ ಪಡೆದು ಪ್ರಯಾಣಿಸಿದ್ದರು. ಸೆಪ್ಟೆಂಬರ್‌ನಲ್ಲಿ ಮೆಟ್ಟೂರು ಪ್ರವಾಸದಲ್ಲಿದ್ದಾಗ ರಸ್ತೆಬದಿಯ ಹಳ್ಳಿಯೊಂದಕ್ಕೆ ಭೇಟಿ ನೀಡಿ ವೃದ್ಧೆಯೊಬ್ಬರಿಗೆ ತಮ್ಮ ‘ಡಿಯೋರ್’ ಬ್ರ್ಯಾಂಡ್‌ನ ಸನ್ ಗ್ಲಾಸ್ ತೊಡಿಸಿ ಹಾರೈಸಿದ್ದ ವೀಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗಿತ್ತು.
ತಮಿಳುನಾಡು ಸರ್ಕಾರದ ‘ವೆಟ್ರಿ ಪಯಣಂ’ (ವಿಜಯದ ಪಯಣ) ಯೋಜನೆಯು ಮಹಿಳೆಯರಿಗೆ ಮತ್ತು ತೃತೀಯಲಿಂಗಿಗಳಿಗೆ ದೈನಂದಿನ ಪ್ರಯಾಣ ವೆಚ್ಚವನ್ನು ತಗ್ಗಿಸಲು ಬಹುದೊಡ್ಡ ನೆರವಾಗಲಿದೆ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.
