ನವದೆಹಲಿ: ದೇಶದ ಜಿಎಸ್‌ಟಿ (GST) ಸಂಗ್ರಹ ಸೆಪ್ಟೆಂಬರ್ ತಿಂಗಳಲ್ಲಿ ಭರ್ಜರಿ ಏರಿಕೆ ಕಂಡಿದೆ. 2026ರ ಸೆಪ್ಟೆಂಬರ್‌ನಲ್ಲಿ ಸರ್ಕಾರಕ್ಕೆ ಒಟ್ಟು ₹2,03,521 ಕೋಟಿ ಜಿಎಸ್‌ಟಿ ಆದಾಯ ಬಂದಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ₹1,77,365 ಕೋಟಿ ಸಂಗ್ರಹವಾಗಿತ್ತು. ಈ ಬಾರಿ ಶೇ.14.7ರಷ್ಟು ಹೆಚ್ಚಳ ದಾಖಲಾಗಿದೆ.ಇದರೊಂದಿಗೆ ಸತತ ಮೂರನೇ ತಿಂಗಳೂ ದೇಶದ ಮಾಸಿಕ ಜಿಎಸ್‌ಟಿ ಸಂಗ್ರಹ ₹2 ಲಕ್ಷ ಕೋಟಿ ಗಡಿ ದಾಟಿದೆ.
ರಿಫಂಡ್ ಬಳಿಕ ₹1.76 ಲಕ್ಷ ಕೋಟಿ ಆದಾಯ
ಸೆಪ್ಟೆಂಬರ್‌ನಲ್ಲಿ ಸರ್ಕಾರ ₹27,001 ಕೋಟಿ ಜಿಎಸ್‌ಟಿ ರಿಫಂಡ್ ನೀಡಿದೆ. ಇದನ್ನು ಹೊರತುಪಡಿಸಿದ ಬಳಿಕ ನಿವ್ವಳ ಜಿಎಸ್‌ಟಿ ಆದಾಯ ₹1,76,520 ಕೋಟಿ ಆಗಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ನಿವ್ವಳ ಆದಾಯದಲ್ಲಿ ಸುಮಾರು ಶೇ.18ರಷ್ಟು ಏರಿಕೆ ಕಂಡುಬಂದಿದೆ.
ರಿಫಂಡ್ ಮೊತ್ತವೂ ಕಳೆದ ವರ್ಷಕ್ಕಿಂತ ಕಡಿಮೆಯಾಗಿದೆ. 2025ರ ಸೆಪ್ಟೆಂಬರ್‌ನಲ್ಲಿ ₹27,848 ಕೋಟಿ ರಿಫಂಡ್ ನೀಡಲಾಗಿತ್ತು.
ಆಮದು GSTಯಲ್ಲಿ ಶೇ.25.9ರಷ್ಟು ಹೆಚ್ಚಳ
ಈ ಬಾರಿ ಜಿಎಸ್‌ಟಿ ಸಂಗ್ರಹ ಹೆಚ್ಚಾಗಲು ಆಮದು ಸರಕುಗಳ ಮೇಲಿನ ತೆರಿಗೆ ಸಂಗ್ರಹವೂ ಪ್ರಮುಖ ಕಾರಣವಾಗಿದೆ.ಸೆಪ್ಟೆಂಬರ್‌ನಲ್ಲಿ ಆಮದು ಸರಕುಗಳಿಂದ ₹65,525 ಕೋಟಿ ಜಿಎಸ್‌ಟಿ ಸಂಗ್ರಹವಾಗಿದೆ. ಕಳೆದ ವರ್ಷದ ಇದೇ ತಿಂಗಳಲ್ಲಿ ₹52,031 ಕೋಟಿ ಸಂಗ್ರಹವಾಗಿತ್ತು. ಅಂದರೆ ಈ ವಿಭಾಗದಲ್ಲಿ ಶೇ.25.9ರಷ್ಟು ಹೆಚ್ಚಳವಾಗಿದೆ.
ದೇಶೀಯ ವಹಿವಾಟಿನಿಂದ ₹1,37,996 ಕೋಟಿ ಜಿಎಸ್‌ಟಿ ಸಂಗ್ರಹವಾಗಿದ್ದು, ಕಳೆದ ವರ್ಷದ ಸೆಪ್ಟೆಂಬರ್‌ಗೆ ಹೋಲಿಸಿದರೆ ಶೇ.10.1ರಷ್ಟು ಏರಿಕೆಯಾಗಿದೆ.
ಸೆಪ್ಟೆಂಬರ್ GST ಸಂಗ್ರಹದ ವಿವರ
CGST: ₹37,762 ಕೋಟಿ
SGST: ₹45,363 ಕೋಟಿ
IGST: ₹1,20,396 ಕೋಟಿ
ಒಟ್ಟು GST: ₹2,03,521 ಕೋಟಿ
ರಿಫಂಡ್: ₹27,001 ಕೋಟಿ
ನಿವ್ವಳ GST: ₹1,76,520 ಕೋಟಿ
6 ತಿಂಗಳಲ್ಲಿ ₹12.46 ಲಕ್ಷ ಕೋಟಿ GST
2026-27ನೇ ಹಣಕಾಸು ವರ್ಷದ ಏಪ್ರಿಲ್‌ನಿಂದ ಸೆಪ್ಟೆಂಬರ್‌ವರೆಗಿನ ಆರು ತಿಂಗಳಲ್ಲಿ ಒಟ್ಟು ಜಿಎಸ್‌ಟಿ ಸಂಗ್ರಹ ₹12.46 ಲಕ್ಷ ಕೋಟಿ ದಾಟಿದೆ. ಈ ಅವಧಿಯಲ್ಲಿ ರಿಫಂಡ್‌ಗಳನ್ನು ಹೊರತುಪಡಿಸಿದ ನಿವ್ವಳ ಜಿಎಸ್‌ಟಿ ಆದಾಯ ₹10.66 ಲಕ್ಷ ಕೋಟಿ ದಾಖಲಾಗಿದೆ.
GST ಸಂಗ್ರಹದಲ್ಲಿ ಕರ್ನಾಟಕದ ಸಾಧನೆ
ಕರ್ನಾಟಕವೂ ಜಿಎಸ್‌ಟಿ ಸಂಗ್ರಹದಲ್ಲಿ ಉತ್ತಮ ಬೆಳವಣಿಗೆ ದಾಖಲಿಸಿದೆ. ಆಮದು ಸರಕುಗಳನ್ನು ಹೊರತುಪಡಿಸಿ ಸೆಪ್ಟೆಂಬರ್‌ನಲ್ಲಿ ರಾಜ್ಯದ ಆಂತರಿಕ ಜಿಎಸ್‌ಟಿ ಸಂಗ್ರಹ ₹13,884 ಕೋಟಿ ಆಗಿದೆ.
2025ರ ಸೆಪ್ಟೆಂಬರ್‌ನಲ್ಲಿ ರಾಜ್ಯ ₹12,001 ಕೋಟಿ ಸಂಗ್ರಹಿಸಿತ್ತು. ಹೀಗಾಗಿ ಈ ಬಾರಿ ಕರ್ನಾಟಕದ ಜಿಎಸ್‌ಟಿ ಸಂಗ್ರಹದಲ್ಲಿ ಶೇ.16ರಷ್ಟು ಹೆಚ್ಚಳವಾಗಿದೆ.
ಎಸ್‌ಜಿಎಸ್‌ಟಿ ಮತ್ತು ಐಜಿಎಸ್‌ಟಿ ಸೆಟಲ್ಮೆಂಟ್ ಸೇರಿದಂತೆ ಕರ್ನಾಟಕಕ್ಕೆ ಸೆಪ್ಟೆಂಬರ್‌ನಲ್ಲಿ ₹8,094 ಕೋಟಿ ಆದಾಯ ಬಂದಿದೆ. ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಇದು ಶೇ.14ರಷ್ಟು ಹೆಚ್ಚಳವಾಗಿದೆ.
ಹೆಚ್ಚು GST ಸಂಗ್ರಹಿಸಿದ ರಾಜ್ಯಗಳು
ಮಹಾರಾಷ್ಟ್ರ: ₹29,986 ಕೋಟಿ
ಕರ್ನಾಟಕ: ₹13,884 ಕೋಟಿ
ಗುಜರಾತ್: ₹12,222 ಕೋಟಿ
ತಮಿಳುನಾಡು: ₹10,188 ಕೋಟಿ
ಹರ್ಯಾಣ: ₹10,097 ಕೋಟಿ
ಹೆಚ್ಚು GST ಸೆಟಲ್ಮೆಂಟ್ ಪಡೆದ ರಾಜ್ಯಗಳು
ಮಹಾರಾಷ್ಟ್ರ: ₹16,881 ಕೋಟಿ
ಗುಜರಾತ್: ₹8,167 ಕೋಟಿ
ಕರ್ನಾಟಕ: ₹8,094 ಕೋಟಿ
ತಮಿಳುನಾಡು: ₹7,320 ಕೋಟಿ
ಉತ್ತರ ಪ್ರದೇಶ: ₹7,277 ಕೋಟಿ
ಹಬ್ಬದ ಸೀಸನ್‌ ಆರಂಭವಾಗಿರುವುದರಿಂದ ವ್ಯಾಪಾರ-ವಹಿವಾಟು ಹೆಚ್ಚಾಗಿರುವುದು ಜಿಎಸ್‌ಟಿ ಸಂಗ್ರಹ ಏರಿಕೆಗೆ ಕಾರಣವಾಗಿರಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ. ದೇಶೀಯ ಆರ್ಥಿಕ ಚಟುವಟಿಕೆಗಳು ಚುರುಕಾಗಿರುವುದೂ ತೆರಿಗೆ ಸಂಗ್ರಹದ ಮೇಲೆ ಪರಿಣಾಮ ಬೀರಿದೆ.
