ವಾರಾಂತ್ಯದ ದಿನಗಳಲ್ಲಿ ಅಥವಾ ವಿಶೇಷ ಸಂದರ್ಭಗಳಲ್ಲಿ ಮನೆಮಂದಿಗೆಲ್ಲಾ ಇಷ್ಟವಾಗುವಂತಹ ನಾನ್‌ವೆಜ್ ಅಡುಗೆ ಮಾಡುವುದು ಪ್ರತಿಯೊಬ್ಬರ ಆಸೆಯಾಗಿರುತ್ತದೆ. ಸದಾ ಮಾಡುವ ಚಿಕನ್ ಗ್ರೇವಿ ಅಥವಾ ಚಿಕನ್ ಸಾರಿನ ಬದಲು ವಿಭಿನ್ನ ಹಾಗೂ ರುಚಿಕರ ಖಾದ್ಯ ಮಾಡಬೇಕೆಂದರೆ ಚಿಕನ್ ಕೈಮಾ ಸಾಂಬಾರ್ ಅತ್ಯುತ್ತಮ ಆಯ್ಕೆ. ರಾಗಿ ಮುದ್ದೆ, ಚಪಾತಿ, ಪರೋಟ ಹಾಗೂ ಬಿಸಿಬಿಸಿ ಅನ್ನದೊಂದಿಗೆ ಈ ಸಾಂಬಾರ್ ಸೇವಿಸಿದರೆ ರುಚಿ ಅಪ್ರತಿಮ.
ಕೈಮಾ ಉಂಡೆಗಳು ಒಡೆಯದಂತೆ ಹಾಗೂ ಸಾಂಬಾರ್ ಸಾಂಪ್ರದಾಯಿಕ ಶೈಲಿಯಲ್ಲಿ ಘಮಘಮಿಸುವಂತೆ ಮಾಡಲು ಕೆಲವೊಂದು ಸರಳ ಕ್ರಮಗಳನ್ನು ಅನುಸರಿಸಬೇಕಾಗುತ್ತದೆ. ಈ ನಾಟಿ ಶೈಲಿಯ ಚಿಕನ್ ಕೈಮಾ ಸಾಂಬಾರ್ ಮಾಡುವ ಸಂಪೂರ್ಣ ವಿವರ ಇಲ್ಲಿದೆ.
ಬೇಕಾಗುವ ಸಾಮಗ್ರಿಗಳು:
ಕೈಮಾ ಉಂಡೆ ತಯಾರಿಸಲು:
-
ಬೋನ್ಲೆಸ್ ಚಿಕನ್ (ಸಣ್ಣದಾಗಿ ಕೊಚ್ಚಿದ್ದು ಅಥವಾ ಮಸಾಲೆ ಜಾರ್‌ನಲ್ಲಿ ರುಬ್ಬಿದ್ದು)
-
ಹುರಿಗಡಲೆ
-
ತೆಂಗಿನಕಾಯಿ ತುರಿ
-
ಹಸಿಮೆಣಸಿನಕಾಯಿ ಮತ್ತು ಕೊತ್ತಂಬರಿ ಸೊಪ್ಪು
-
ಶಂಠಿ-ಬೆಳ್ಳುಳ್ಳಿ ಪೇಸ್ಟ್
-
ಚಕ್ಕೆ, ಲವಂಗ
-
ರುಚಿಗೆ ತಕ್ಕಷ್ಟು ಉಪ್ಪು
ಸಾಂಬಾರ್ ಮಸಾಲೆಗೆ:
-
ಈರುಳ್ಳಿ ಮತ್ತು ಟೊಮೆಟೊ
-
ಧನಿಯಾ ಪುಡಿ ಹಾಗೂ ಖಾರದ ಪುಡಿ
-
ಅರಿಶಿನ ಪುಡಿ
-
ಗಸಗಸೆ ಮತ್ತು ತೆಂಗಿನಕಾಯಿ ತುರಿ
-
ಚಕ್ಕೆ, ಲವಂಗ, ಏಲಕ್ಕಿ
-
ಒಗ್ಗರಣೆಗೆ ಎಣ್ಣೆ, ಸಾಸಿವೆ, ಕರಿಬೇವು
ತಯಾರಿಸುವ ವಿಧಾನ:
ಮೊದಲಿಗೆ ಕೈಮಾ ಉಂಡೆ ತಯಾರಿಸಲು ತೆಗೆದಿರಿಸಿದ ಹುರಿಗಡಲೆ, ತೆಂಗಿನಕಾಯಿ ತುರಿ, ಚಕ್ಕೆ, ಲವಂಗ, ಹಸಿಮೆಣಸಿನಕಾಯಿ ಹಾಗೂ ಕೊತ್ತಂಬರಿ ಸೊಪ್ಪನ್ನು ನೀರು ಹಾಕದೆ ನುಣ್ಣಗೆ ರುಬ್ಬಿಕೊಳ್ಳಿ. ನಂತರ ಈ ಮಸಾಲೆಗೆ ಚಿಕನ್ ಕೈಮಾ, ಶಂಠಿ-ಬೆಳ್ಳುಳ್ಳಿ ಪೇಸ್ಟ್ ಹಾಗೂ ಉಪ್ಪು ಸೇರಿಸಿ ತರಿತರಿಯಾಗಿ ರುಬ್ಬಿ, ಸಣ್ಣ ಸಣ್ಣ ಉಂಡೆಗಳನ್ನು ಮಾಡಿ ಪಕ್ಕಕ್ಕೆ ಇಡಿ.
ಮಸಾಲೆಯ ಸಾಂಬಾರ್ ಮಾಡಲು ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಈರುಳ್ಳಿ, ಟೊಮೆಟೊ, ಶಂಠಿ, ಬೆಳ್ಳುಳ್ಳಿ ಹಾಗೂ ಸಾಂಬಾರ ಸಾಂಬಾರ ಪದಾರ್ಥಗಳನ್ನು ಹುರಿದುಕೊಳ್ಳಿ. ಆರಿದ ನಂತರ ಇದಕ್ಕೆ ತೆಂಗಿನಕಾಯಿ ತುರಿ, ಗಸಗಸೆ, ಧನಿಯಾ ಪುಡಿ, ಖಾರದ ಪುಡಿ ಹಾಗೂ ಅರಿಶಿನ ಸೇರಿಸಿ ನೀರು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ.
ಈಗ ಪಾತ್ರೆಗೆ ಎಣ್ಣೆ ಹಾಕಿ ಸಾಸಿವೆ, ಕರಿಬೇವು ಹಾಗೂ ಈರುಳ್ಳಿ ಹಾಕಿ ಒಗ್ಗರಣೆ ಮಾಡಿ. ಹುರಿದ ಒಗ್ಗರಣೆಗೆ ರುಬ್ಬಿದ ಮಸಾಲೆ ಸೇರಿಸಿ, ಅಗತ್ಯವಿರುವಷ್ಟು ನೀರು ಮತ್ತು ಉಪ್ಪು ಹಾಕಿ ಕುದಿಯಲು ಬಿಡಿ. ಸಾಂಬಾರ್ ಚೆನ್ನಾಗಿ ಕುದಿಬಂದಾಗ, ತಯಾರಿಸಿಟ್ಟ ಕೈಮಾ ಉಂಡೆಗಳನ್ನು ಒಂದೊಂದಾಗಿ ಜಾಗರೂಕತೆಯಿಂದ ಸಾಂಬಾರ್‌ಗೆ ಹಾಕಿ. ಉಂಡೆಗಳನ್ನು ಹಾಕಿದ ತಕ್ಷಣ ಸೌಟಿನಿಂದ ತಿರುಗಿಸದೆ, ಮಧ್ಯಮ ಉರಿಯಲ್ಲಿ ೧೫ ರಿಂದ ೨೦ ನಿಮಿಷಗಳ ಕಾಲ ಬೇಯಿಸಿ.
ಚಿಕನ್ ಕೈಮಾ ಉಂಡೆಗಳು ಚೆನ್ನಾಗಿ ಬೆಂದು, ಸಾಂಬಾರ್ ಮೇಲ್ಭಾಗದಲ್ಲಿ ಎಣ್ಣೆ ತೇಲಿದಾಗ ಕೊತ್ತಂಬರಿ ಸೊಪ್ಪು ಉದುರಿಸಿ ಇಳಿಸಿದರೆ ಘಮಘಮಿಸುವ ಚಿಕನ್ ಕೈಮಾ ಸಾಂಬಾರ್ ಸವಿಯಲು ಸಿದ್ಧ.
