ಮುಂಬೈನಲ್ಲಿ ನಡೆದ ಪ್ರಸಿದ್ಧ ಡಿಸೈನರ್ ಮನೀಶ್ ಮಲ್ಹೋತ್ರಾ ಅವರ ‘ಮಿಜ್ವಾನ್’ ಫ್ಯಾಷನ್ ಶೋನಲ್ಲಿ ಬಾಲಿವುಡ್ ನಟರಾದ ಅಲಿಯಾ ಭಟ್ ಹಾಗೂ ವಿಕ್ಕಿ ಕೌಶಲ್ ಶೋಸ್ಟಾಪರ್ ಆಗಿ ಹೆಜ್ಜೆಹಾಕಿ ಎಲ್ಲರ ಗಮನ ಸೆಳೆದಿದ್ದಾರೆ. ಈ ವಿಶೇಷ ಕಾರ್ಯಕ್ರಮದ ಸುಂದರ ಫೋಟೋಗಳನ್ನು ಇಬ್ಬರೂ ನಟರು ತಮ್ಮ ಇನ್ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ.
ಸಾಮಾಜಿಕ ಜಾಲತಾಣದಲ್ಲಿ ನಟ-ನಟಿಯ ಹರ್ಷ: ಫೋಟೋಗಳನ್ನು ಹಂಚಿಕೊಂಡ ಅಲಿಯಾ ಭಟ್, “ಮಿಜ್ವಾನ್ ಆಯೋಜನೆಗೆ 15 ವರ್ಷ ತುಂಬಿದೆ. ಇದು ಅತ್ಯಂತ ಅರ್ಥಪೂರ್ಣ ಹಾಗೂ ಶಕ್ತಿಶಾಲಿ ಪಯಣ. ಸ್ಥಳೀಯ ಕಲಾಕಾರರಿಗೆ ವೇದಿಕೆ ಕಲ್ಪಿಸಿಕೊಟ್ಟ ಶಬಾನಾ ಅಜ್ಮಿ ಹಾಗೂ ಮನೀಶ್ ಮಲ್ಹೋತ್ರಾ ಅವರಿಗೆ ಅಭಿನಂದನೆಗಳು. ವಿಕ್ಕಿ ಕೌಶಲ್ ಜೊತೆಗಿದ್ದರೆ ಯಾವಾಗಲೂ ಖುಷಿ ನೀಡುತ್ತದೆ” ಎಂದು ಬರೆದುಕೊಂಡಿದ್ದಾರೆ. ಈ ಶೋನಲ್ಲಿ ಅಲಿಯಾ ಮನೀಶ್ ಮಲ್ಹೋತ್ರಾ ವಿನ್ಯಾಸಗೊಳಿಸಿದ ಐವರಿ ಚಿಕನ್ಕಾರಿ ಸೀರೆಯಲ್ಲಿ ದೇವತೆಯಂತೆ ಕಂಗೊಳಿಸಿದರು.
ಇನ್ನೊಂದೆಡೆ ವಿಕ್ಕಿ ಕೌಶಲ್, “ಕೇವಲ ಫ್ಯಾಷನ್ಗಿಂತ ಮಿಗಿಲಾದ ಪ್ರಮುಖ ಉದ್ದೇಶಕ್ಕಾಗಿ ರ್ಯಾಂಪ್ ವಾಕ್ ಮಾಡಿದ್ದು ಹೆಮ್ಮೆಯ ಸಂಗತಿ. ಅಲಿಯಾ ಭಟ್ ಜೊತೆ ಈ ರ್ಯಾಂಪ್ ವಾಕ್ ಹಂಚಿಕೊಂಡದ್ದು ಈ ಕ್ಷಣವನ್ನು ಮತ್ತಷ್ಟು ವಿಶೇಷವಾಗಿಸಿತು. ಇಲ್ಲಿ ನಾವಿಬ್ಬರು ಶೋಸ್ಟಾಪರ್ಗಳಾಗಿದ್ದರೂ, ನಿಜವಾದ ಸ್ಟಾರ್ಗಳು ಎಂದರೆ ತಮ್ಮ ಕನಸುಗಳಿಗೆ ರೆಕ್ಕೆ ಕಟ್ಟುಕೊಂಡಿರುವ ಆ ಹೆಣ್ಣುಮಕ್ಕಳು” ಎಂದು ಭಾವನಾತ್ಮಕವಾಗಿ ಬರೆದುಕೊಂಡಿದ್ದಾರೆ. ವಿಕ್ಕಿ ನವಿಲು ನೀಲಿ ಹಾಗೂ ಬಿಳಿ ಬಣ್ಣದ ಚಿಕನ್ಕಾರಿ ಶೆರ್ವಾನಿ ಧರಿಸಿ ಮಿಂಚಿದರು.
ಈ ಇಬ್ಬರೂ ಪ್ರತಿಭಾವಂತ ನಟರು ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ ಮುಂಬರುವ ಬಿಗ್ ಬಜೆಟ್ ಸಿನಿಮಾ ‘ಲವ್ ಆಂಡ್ ವಾರ್’ನಲ್ಲಿ ರಣಬೀರ್ ಕಪೂರ್ ಅವರೊಂದಿಗೆ ಒಟ್ಟಿಗೆ ನಟಿಸುತ್ತಿದ್ದಾರೆ.
