ಮಧ್ಯಪ್ರದೇಶದ ಸಿಂಗ್ರೌಲಿಯಲ್ಲಿ 30 ವರ್ಷದ ಪ್ರಸಿದ್ಧ ಸೋಶಿಯಲ್ ಮೀಡಿಯಾ ಕಂಟೆಂಟ್ ಕ್ರಿಯೇಟರ್ ಹಾಗೂ ಮಾಡೆಲ್ ನಿಧಿ ತಿವಾರಿ ಅವರು ತಮ್ಮ ನಿವಾಸದಲ್ಲಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಭಾನುವಾರ ಬೆಳಿಗ್ಗೆ ಅವರ ಮೃತದೇಹ ಪತ್ತೆಯಾಗಿದ್ದು, ಪ್ರಾಣತ್ಯಾಗಕ್ಕೆ ನಿಖರವಾದ ಕಾರಣ ತಿಳಿದುಬಂದಿಲ್ಲ. ಅವರು 2024ರಲ್ಲಿ ‘ಮಿಸ್ ಪ್ರಿಟಿ ಇಂಡಿಯಾ’ ಕಿರೀಟವನ್ನು ಮುಡಿಗೇರಿಸಿಕೊಂಡಿದ್ದರು ಹಾಗೂ ಚಿತ್ರರಂಗಕ್ಕೆ ಪ್ರವೇಶಿಸುವ ಕನಸು ಹೊಂದಿದ್ದರು.
ಸಾಮಾಜಿಕ ಜಾಲತಾಣದಲ್ಲಿ ಕೊನೆಯ ಪೋಸ್ಟ್ ವೈರಲ್: ನಿಧಿ ಅವರ ನಿಧನದ ನಂತರ ಸ್ವಯಂ ಪ್ರೀತಿಯ (Self-love) ಕುರಿತು ಅವರು ಮಾಡಿದ್ದ ಕೊನೆಯ ಫೇಸ್ಬುಕ್ ಪೋಸ್ಟ್ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ. ತಮ್ಮ ಕೊನೆಯ ಪೋಸ್ಟ್ನಲ್ಲಿ ಅವರು, “ಈ ಅಪೂರ್ಣ ಹೃದಯವನ್ನು ಯಾರೂ ಪೂರ್ಣಗೊಳಿಸಲಿಲ್ಲ, ನಾನೇ ಸ್ವತಃ ಪೂರ್ಣಗೊಳಿಸಿದೆ. इसीलिए (ಅದಕ್ಕಾಗಿಯೇ) ಹೇಳುವುದು ಬೇರಾರನ್ನೋ ಪ್ರೀತಿಸುವ ಬದಲು ನಿಮ್ಮನ್ನು ನೀವೇ ಪ್ರೀತಿಸಿಕೊಳ್ಳಿ. ಕೊನೆಗೆ ಎಷ್ಟು ದಿನ ಅಂತ ಬೇರೆಯವರಲ್ಲಿ ನಿಮ್ಮನ್ನು ಹುಡುಕುತ್ತೀರಿ, ನಿಮ್ಮಲ್ಲೇ ನಿಮ್ಮನ್ನು ಹುಡುಕಿಕೊಳ್ಳಿ” ಎಂದು ಬರೆದುಕೊಂಡಿದ್ದರು.
ನಿಧಿ ಮಾಡೆಲಿಂಗ್, ಈವೆಂಟ್ ನಿರ್ವಹಣೆ ಹಾಗೂ ವಿಡಿಯೋ ಕಂಟೆಂಟ್ ಕ್ರಿಯೇಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಇನ್ಸ್ಟಾಗ್ರಾಮ್ನಲ್ಲಿ 712 ಅನುಯಾಯಿಗಳನ್ನು ಹಾಗೂ ಫೇಸ್ಬುಕ್ನಲ್ಲಿ ಸುಮಾರು 9 ಲಕ್ಷಕ್ಕೂ ಹೆಚ್ಚು ಫಾಲೋವರ್ಸ್ಗಳನ್ನು ಅವರು ಹೊಂದಿದ್ದರು.
ಕುಟುಂಬಸ್ಥರ ಆರೋಪವೇನು? ಕುಟುಂಬದ ಮೂಲಗಳ ಪ್ರಕಾರ, ಶನಿವಾರ ಸಂಜೆ ದೆಹಲಿ ಮೂಲದ ವ್ಯಕ್ತಿಯೊಬ್ಬರ ಜೊತೆ ನಿಧಿ ಫೋನ್ನಲ್ಲಿ ಮಾತನಾಡುತ್ತಿದ್ದರು. ಈ ಸಂಭಾಷಣೆಯ ವೇಳೆ ಗಲಾಟೆಯಾಗಿದ್ದು, ತಕ್ಷಣವೇ ನಿಧಿ ತಮ್ಮ ಕೊಠಡಿಯನ್ನು ಲಾಕ್ ಮಾಡಿಕೊಂಡರು. ರಾತ್ರಿಯ ಊಟವನ್ನೂ ಮಾಡದೆ, ತಾಯಿಯ ಬಳಿ ತಮ್ಮನ್ನು ಒಂಟಿಯಾಗಿ ಬಿಡುವಂತೆ ಕೇಳಿಕೊಂಡಿದ್ದರು ಎನ್ನಲಾಗಿದೆ.
ಬೆಳಿಗ್ಗೆ ವಿಷಯ ತಿಳಿಯುತ್ತಿದ್ದಂತೆ ಕುಟುಂಬಸ್ಥರು ಅವರನ್ನು ಆಸ್ಪತ್ರೆಗೆ ಕರೆದೊಯ್ದರಾದರೂ, ಪರೀಕ್ಷಿಸಿದ ವೈದ್ಯರು ಅವರು ಮೃತಪಟ್ಟಿರುವುದಾಗಿ ಘೋಷಿಸಿದರು. ಘಟನೆ ಸಂಬಂಧ ಮೊರ್ವಾ ಪೊಲೀಸ್ ಠಾಣೆಯ ಸಿಬ್ಬಂದಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ನಿಧಿ ಅವರು ತಾಯಿ ಮತ್ತು ತಂಗಿಯೊಂದಿಗೆ ಸಿಂಗ್ರೌಲಿಯಲ್ಲಿ ವಾಸಿಸುತ್ತಿದ್ದರು.
