ಹಾವೇರಿ ಜಿಲ್ಲಾಸ್ಪತ್ರೆ ಕ್ಯಾಂಟೀನ್ ತಿಂಡಿಯಲ್ಲಿ ಹಲ್ಲಿ ಪತ್ತೆ; ಕೇಸರಿಬಾತ್ ನಲ್ಲಿ ಇದ್ದ ಸತ್ತ ಹಲ್ಲಿ ಕಂಡು ಶಾಕ್ ಆದ ರೋಗಿ ಕುಟುಂಬ

ಹಾವೇರಿ: ಹಾವೇರಿ ಜಿಲ್ಲಾಸ್ಪತ್ರೆಯ ಕ್ಯಾಂಟೀನ್ ತಿಂಡಿಯಲ್ಲಿ ಹಲ್ಲಿ ಪತ್ತೆಯಾಗಿರುವ ಘಟನೆ ನಡೆದಿದ್ದು, ಸಾರ್ವಜನಿಕರು ಆಸ್ಪತ್ರೆಯ ಕ್ಯಾಂಟೀನ್ ಅವ್ಯವಸ್ಥೆ ಕಂಡು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಹಾವೇರಿ ಜಿಲ್ಲಾಸ್ಪತ್ರೆಗೆ ಅನಾರೋಗ್ಯದಿಂದ ದಾಖಲಾಗಿದ್ದ ರೋಗಿಯೊಬ್ಬರಿಗೆ ನೀಡಲಾಗಿದ್ದ ಉಪ್ಪಿಟ್ಟು- ಕೇಸರಿಬಾತ್ ತಿಡಿಯಲ್ಲಿ ಹಲ್ಲಿ ಪತ್ತೆಯಾಗಿದೆ. ಜಿಲ್ಲಾಸ್ಪತ್ರೆಯ ಕ್ಯಾಂಟೀನ್ ನಿಂದ ಪಾರ್ಸಲ್ ತೆಗೆದುಕೊಂಡಿದ್ದ ಹೋಗಿದ್ದ ಕೇಸರಿ ಬಾತ್ ನಲ್ಲಿ ಸತ್ತ ಹಲ್ಲಿ ಪತ್ತೆಯಾಗಿದ್ದು, ರೋಗಿ ಹಾಗೂ ಕುಟುಂಬಸ್ಥರು ಹೌಹಾರಿದ್ದಾರೆ.

ತಕ್ಷಣ ರೋಗಿಯ ಕುಟುಂಬದವರು ಆಸ್ಪತ್ರೆಯ ವೈದ್ಯರು ಹಾಗೂ ಆಡಳಿತ ಮಂಡಳಿ, ಕ್ಯಾಂಟೀನ್ ಮಾಲೀಕರ ಗಮನಕ್ಕೆ ತಂದಿದ್ದಾರೆ. ಆಸ್ಪತ್ರೆಗೆ ದಾಖಲಾಗಿದ್ದ ರೋಗಿಯೊಬ್ಬರ ಕುಟುಂಬದವರು ಇಂದು ಬೆಳಿಗ್ಗೆ ಜಿಲ್ಲಾಸ್ಪತ್ರೆಯ ಕ್ಯಾಂಟೀನ್ ನಲ್ಲಿ ತಿಂಡಿ ಸವಿದು, ವಾರ್ಡ್ ನಲ್ಲಿದ್ದ ರೋಗಿಗೆ ತಿಂಡಿ ಪಾರ್ಸಲ್ ತೆಗೆದುಕೊಂಡು ಹೋಗಿದ್ದರು. ಕ್ಯಾಂಟೀನ್ ನಿಂದ ತೆಗೆದುಕೊಂಡು ಹೋಗಿದ್ದ ಕೇಸರಿಬಾತ್ ನಲ್ಲಿ ಸತ್ತ ಹಲ್ಲಿ ಪತ್ತೆಯಾಗಿದ್ದು, ಶಾಕ್ ಆಗಿದ್ದಾರೆ.

ಈ ಬಗ್ಗೆ ಕ್ಯಾಂಟೀನ್ ಮಾಲೀಕರಿಗೆ ಕೇಳಿದರೆ ಏನೀ ಕಣ್ತಪ್ಪಿನಿಂದ ಹೀಗಾಗಿದೆ. ಮುಂದೆ ಹೀಗಾಗದಂತೆ ನೋಡಿಕೊಳ್ಳುತ್ತೇನೆ ಎಂದು ಸಮಜಾಯಿಷಿ ನೀಡಿದ್ದಾರೆ. ಆಕ್ರೋಶಗೊಂಡ ರೋಗಿ ಕುಟುಂಬದವರು, ಸಾರ್ವಜನಿಕರು ಕ್ಯಾಂಟೀನ್ ಒಳಗೆ ಪರಿಶೀಲಿಸಿದಾಗ ಕ್ಯಾಂಟೀನ್ ಸಂಪೂರ್ಣ ಅಸ್ವಚ್ಚತೆಯಿಂದ ಕೂಡಿದ್ದು ಎಲ್ಲಿ ನೋಡಿದ್ದರಲ್ಲಿ ಜಿಳರೆಗಳು ರಾಜಾರೋಷವಾಗಿ ಓಡಾಡುತ್ತಿರುವುದು, ಹುಳಗಳು ಇರುವುದು ಪತ್ತೆಯಾಗಿದೆ. ರೋಗಿಗಳಿಗೆ ಕೊಡುವ ಆಹಾರದ ಪ್ಲೇಟ್ ಗಳ ಮೇಲೂ ಜಿರಳೆಗಳು ಓಡಾಡುತ್ತಿದ್ದವು.

ಬಡ ರೋಗಿಗಳು ಅನಾರೋಗ್ಯದಿಂದ ಜೀವ ಉಳಿಸಿಕೊಳ್ಳು ಜಿಲ್ಲಾಸ್ಪತ್ರೆಗೆ ಬರುತ್ತಾರೆ. ಆದರೆ ಜಿಲ್ಲಾಸ್ಪತ್ರೆಯ ಕ್ಯಾಂಟೀನ್ ಗಳೇ ಜೀವ ತೆಗೆಯ್ವ ಹಂತದಲ್ಲಿದೆ ಅಷ್ಟರ ಮಟ್ಟಿಗೆ ಕ್ಯಾಂಟೀನ್ ನಲ್ಲಿ ಅಸ್ವಚ್ಚತೆ, ಜಿರಳೆ ಓಡಾಟ ಕಂಡುಬರುತ್ತಿದ್ದವು. ಇದರಿಂದ ಜನರು ರೊಚ್ಚಿಗೇಳುತ್ತಿದ್ದಂತ್ರೆ ಆಸ್ಪತ್ರೆಯ ಕ್ಯಾಂಟೀನ್ ಗೆ ಬೀಗ ಹಾಕಲಾಗಿದೆ.

ಎಐ ಕ್ಯಾಮೆರಾ ಎಡವಟ್ಟು: ಗಿಟಾರ್ ಗೆ ಹೆಲ್ಮೆಟ್ ಹಾಕಿಲ್ಲ ಎಂದು ದಂಡ ಪಾವತಿಸಲು ಸೂಚನೆ: ಸಂದೇಶ ನೋಡಿ ಶಾಕ್ ಆದ ಬೈಕ್ ಸವಾರ

ಬೆಂಗಳೂರು: ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಸಂಚಾರಿ ನಿಯಮ ನಿರ್ವಹಣೆಯ ಎಐ ಕ್ಯಾಮೆರಾ ಮಾಡಿರುವ ಎಡವಟ್ಟಿನಿಂದಾಗಿ ಬೈಕ್ ಸವಾರನೊಬ್ಬ ಪೇಚಿಗೆ ಸಿಲುಕಿರುವ ಘಟನೆ ನಡೆದಿದೆ.

ಕೃತಕ ಬುದ್ಧಿಮತ್ತೆ (ಎಐ) ಮಾಡುವ ಯಡವಟ್ಟುಗಳು ಒಮ್ಮೊಮ್ಮೆ ಸಾರ್ವಜನಿಕರನ್ನು ಸಂಕಷ್ಟಕ್ಕೆ ಸಿಲುಕಿಸುತ್ತವೆ. ಬೆಂಗಳೂರಿನಲ್ಲಿ ಇಂತದ್ದೇ ಒಂದು ವಿಚಿತ್ರ ಘಟನೆ ನಡೆದಿದೆ. ಬೆನ್ನಿಗೆ ಗಿಟಾರ್ ಬ್ಯಾಗ್ ಹಾಕಿಕೊಂಡು ಸ್ಕೂಟರ್ ಚಲಾಯಿಸುತ್ತಿದ್ದ ಸವಾರನಿಗೆ ಎಐ ಕ್ಯಾಮೆರಾ 500 ರೂ. ದಂಡ ವಿಧಿಸಿದೆ! ಮೊಬೈಲ್ ಗೆ ಬಂದ ಸಂದೇಶ ನೋಡಿ ಬೈಕ್ ಸವಾರ ಶಾಕ್ ಆಗಿದ್ದಾನೆ.

ಗಿಟಾರ್ ಬ್ಯಾಗ್ ಅನ್ನು ‘ಹಿಂಬದಿ ಸವಾರ’ ಎಂದು ತಪ್ಪಾಗಿ ಗ್ರಹಿಸಿದ ಎಐ ಕ್ಯಾಮೆರಾ, ಆ ಸವಾರ ಹೆಲ್ಮೆಟ್ ಧರಿಸಿಲ್ಲ ಎಂಬ ಕಾರಣಕ್ಕೆ ಚಲನ್ ಹಾಕಿದೆ.

ಸ್ಕೂಟರ್ ಸವಾರ ಸೌವಿಕ್ ದತ್ತಾ ಎಂಬುವವರು ಹೆಬ್ಬಾಳದಿಂದ ಟಿನ್ ಫ್ಯಾಕ್ಟರಿ ಕಡೆಗೆ ತಮ್ಮ ಹೆಂಡತಿಯ ಸ್ಕೂಟರ್‌ನಲ್ಲಿ ಪ್ರಯಾಣಿಸುತ್ತಿದ್ದರು. ಈ ವೇಳೆ ಬೆನ್ನಿಗೆ ಗಿಟಾರ್ ಬ್ಯಾಗ್ ಹಾಕಿಕೊಂಡಿದ್ದರು. ಔಟರ್ ರಿಂಗ್ ರಸ್ತೆಯಲ್ಲಿ ಅಳವಡಿಸಲಾಗಿದ್ದ ಎಐ ಆಧಾರಿತ ಟ್ರಾಫಿಕ್ ಕ್ಯಾಮೆರಾ, ಗಿಟಾರ್ ಬ್ಯಾಗ್ ಅನ್ನು ಮನುಷ್ಯನೆಂದು ಭಾವಿಸಿ ಹೆಲ್ಮೆಟ್ ರಹಿತ ಪ್ರಯಾಣದ ವಿಭಾಗದಡಿ ಫೈನ್ ಹಾಕಿದೆ. ಮರುದಿನ ಸೌವಿಕ್ ಅವರ ಪತ್ನಿಯ ಮೊಬೈಲ್‌ಗೆ ಬಂದ ದಂಡದ ಮೆಸೇಜ್ ಮತ್ತು ಫೋಟೋ ನೋಡಿ ದಂಪತಿ ಬೆಚ್ಚಿಬಿದ್ದಿದ್ದಾರೆ.

ತಮಗೆ ವಿಧಿಸಲಾದ ತಪ್ಪು ಚಲನ್ ಮತ್ತು ಫೋಟೋವನ್ನು ಎಕ್ಸ್ ಖಾತೆಯಲ್ಲಿ ಹಂಚಿಕೊಂಡ ಸೌವಿಕ್ ದತ್ತಾ, “ನಾನು ಒಬ್ಬನೇ ಗಿಟಾರ್ ಬೆನ್ನಿಗೆ ಹಾಕಿ ಸ್ಕೂಟರ್ ಚಲಾಯಿಸುತ್ತಿದ್ದೆ. ಆದರೆ ಬೆಂಗಳೂರು ಸಂಚಾರ ಪೊಲೀಸರಿಂದ ‘ಹಿಂಬದಿ ಸವಾರ ಹೆಲ್ಮೆಟ್ ಹಾಕಿಲ್ಲ’ ಎಂದು 500 ರೂ. ದಂಡ ಬಂದಿದೆ. ಎಐ ಟ್ರಾಫಿಕ್ ಸಿಸ್ಟಮ್‌ ನೈಜತೆ ಇಲ್ಲಿದೆ!” ಎಂದು ಬೆಂಗಳೂರು ಸಂಚಾರ ಪೊಲೀಸರಿಗೆ ಟ್ಯಾಗ್ ಮಾಡಿ ರದ್ದುಗೊಳಿಸುವಂತೆ ಮನವಿ ಮಾಡಿದ್ದರು.

ಘಟನೆ ವೈರಲ್ ಆಗುತ್ತಿದ್ದಂತೆ ಸ್ಪಂದಿಸಿದ ಸಂಚಾರ ವಿಭಾಗದ ಜಂಟಿ ಪೊಲೀಸ್ ಆಯುಕ್ತ ಕಾರ್ತಿಕ್ ರೆಡ್ಡಿ, ಪ್ರಕರಣವನ್ನು ಪರಿಶೀಲಿಸಿ ತಪ್ಪು ಚಲನ್ ಆಗಿದ್ದರೆ ತಕ್ಷಣವೇ ರದ್ದುಗೊಳಿಸುವುದಾಗಿ ಭರವಸೆ ನೀಡಿದ್ದಾರೆ. 2022ರಿಂದ ನಗರದಲ್ಲಿ ಜಾರಿಯಲ್ಲಿರುವ ಎಐ ಕ್ಯಾಮೆರಾಗಳು ಕೆಲವೊಮ್ಮೆ ಇಂತಹ ತಾಂತ್ರಿಕ ದೋಷಗಳನ್ನು ಮಾಡುತ್ತವೆ. ಸಾರ್ವಜನಿಕರು ದೂರು ನೀಡಿದರೆ ಪರಿಶೀಲಿಸಿ ರದ್ದುಪಡಿಸಲಾಗುವುದು ಎಂದು ಪೊಲೀಸರು ತಿಳಿಸಿದ್ದಾರೆ.