ದುಬೈ ಆಡಳಿತಗಾರ(Ruler) ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರ ಕಿರಿಯ ಸಹೋದರ ಶೇಖ್ ಅಹ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರ ನಿಧನದ ಹಿನ್ನೆಲೆಯಲ್ಲಿ ದುಬೈ 10 ದಿನಗಳ ಅಧಿಕೃತ ಶೋಕಾಚರಣೆಯನ್ನು ಘೋಷಿಸಿದೆ.
ದುಬೈ ಪೊಲೀಸ್ ಮತ್ತು ಸಾರ್ವಜನಿಕ ಭದ್ರತಾ ವಿಭಾಗದ ಉಪಾಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದ ಶೇಖ್ ಅಹ್ಮದ್ ಅವರು ಸೋಮವಾರ, ಸೆಪ್ಟೆಂಬರ್ 21 ರಂದು ನಿಧನರಾದರು.
ಶೋಕಾಚರಣೆಯ ಅವಧಿಯು ತಕ್ಷಣವೇ ಪ್ರಾರಂಭವಾಗುತ್ತದೆ ಮತ್ತು ಎಮಿರೇಟ್‌ ನಾದ್ಯಂತ ಧ್ವಜಗಳನ್ನು ಅರ್ಧಮಟ್ಟಕ್ಕೆ ಇಳಿಸಲಾಗುತ್ತದೆ ಎಂದು ಆಡಳಿತಗಾರರ ಕಚೇರಿ(ರೂಲರ್ಸ್ ಕೋರ್ಟ್) ಪ್ರಕಟಿಸಿದೆ. ಯುಎಇಯ ಉಪಾಧ್ಯಕ್ಷ ಮತ್ತು ಪ್ರಧಾನ ಮಂತ್ರಿಯೂ ಆಗಿರುವ ಶೇಖ್ ಮೊಹಮ್ಮದ್ ಅವರು ‘ಎಕ್ಸ್’ (X) ನಲ್ಲಿ ಪೋಸ್ಟ್ ಮಾಡುವ ಮೂಲಕ ತಮ್ಮ ಕಿರಿಯ ಸಹೋದರನಿಗೆ ಶ್ರದ್ಧಾಂಜಲಿ ಸಲ್ಲಿಸಿದರು. ದುಬೈನ ಯುವರಾಜ (ಕ್ರೌನ್ ಪ್ರಿನ್ಸ್), ಉಪ ಪ್ರಧಾನ ಮಂತ್ರಿ ಮತ್ತು ರಕ್ಷಣಾ ಸಚಿವರಾಗಿರುವ ಶೇಖ್ ಹಮ್ದಾನ್ ಬಿನ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಕೂಡ ತಮ್ಮ ಚಿಕ್ಕಪ್ಪನ ನಿಧನಕ್ಕೆ ಸಂತಾಪ ಸೂಚಿಸಿದರು.
ಶೇಖ್ ಮೊಹಮ್ಮದ್ ಅವರಿಂದ ತಮ್ಮ ಕಿರಿಯ ಸಹೋದರನಿಗೆ ಶ್ರದ್ಧಾಂಜಲಿ
ಶೇಖ್ ಮೊಹಮ್ಮದ್ ಅವರು ‘ಎಕ್ಸ್’ ನಲ್ಲಿನ ತಮ್ಮ ಸಂದೇಶದಲ್ಲಿ ತಮ್ಮ ಸಹೋದರನಿಗೆ ದೈವಿಕ ಕರುಣೆ ಸಿಗಲಿ ಮತ್ತು ಸ್ವರ್ಗದಲ್ಲಿ ಸ್ಥಾನ ದೊರೆಯಲಿ ಎಂದು ಪ್ರಾರ್ಥಿಸಿದ್ದಾರೆ.
“ಅಲ್ಲಾಹನು ಶೇಖ್ ಅಹ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರ ಮೇಲೆ ಕರುಣೆ ತೋರಲಿ. ಅಲ್ಲಾಹನು ನಿನ್ನ ಮೇಲೆ ಕರುಣೆ ತೋರಲಿ, ನನ್ನ ಸಹೋದರನೇ,” ಎಂದು ಶೇಖ್ ಮೊಹಮ್ಮದ್ ಬರೆದಿದ್ದಾರೆ. ಅಹ್ಮದ್ ಅವರು ಇನ್ನು ತಮ್ಮೊಂದಿಗೆ ಇಲ್ಲದಿದ್ದರೂ, ಅವರು ತಮ್ಮ ಪ್ರಾರ್ಥನೆಗಳಲ್ಲಿ ಮತ್ತು ಹೃದಯಗಳಲ್ಲಿ ಉಳಿಯುತ್ತಾರೆ ಎಂದು ಅವರು ಹೇಳಿದರು.
ಶೇಖ್ ಹಮ್ದಾನ್ ಕೂಡ ತಮ್ಮ ಚಿಕ್ಕಪ್ಪನಿಗೆ ಸಂತಾಪ ಸೂಚಿಸಿ, ಅವರ ಕ್ಷಮೆ ಮತ್ತು ದೈವಿಕ ಕರುಣೆಗಾಗಿ ಪ್ರಾರ್ಥಿಸಿದರು.
ಶೇಖ್ ಅಹ್ಮದ್ ಅವರಿಗೆ ಪ್ರಧಾನಿ ಮೋದಿ ಅವರಿಂದ ಶ್ರದ್ಧಾಂಜಲಿ
ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ಕೂಡ ‘ಎಕ್ಸ್’ ನಲ್ಲಿ ತಮ್ಮ ಸಂತಾಪವನ್ನು ವ್ಯಕ್ತಪಡಿಸಿದ್ದಾರೆ..
“ಮಹಾನ್ ವ್ಯಕ್ತಿತ್ವದ ಶೇಖ್ ಅಹ್ಮದ್ ಬಿನ್ ರಶೀದ್ ಅಲ್ ಮಕ್ತೂಮ್ ಅವರ ನಿಧನದಿಂದ ತೀವ್ರ ದುಃಖವಾಗಿದೆ. ಸಮಾಜ ಸೇವೆಗೆ ಅವರು ನೀಡಿದ ಕೊಡುಗೆಗಳನ್ನು ಮುಂದಿನ ಪೀಳಿಗೆಗಳು ಸ್ಮರಿಸುತ್ತವೆ.
ರಾಜಮನೆತನ ಮತ್ತು ದುಬೈನ ಜನರಿಗೆ ನನ್ನ ಹೃತ್ಪೂರ್ವಕ ಸಂತಾಪಗಳು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ.”
ಮೋದಿ ಅವರ ಪೋಸ್ಟ್‌ನಲ್ಲಿ ಶೇಖ್ ಮೊಹಮ್ಮದ್ ಅವರ ‘ಎಕ್ಸ್’ ಖಾತೆಯನ್ನು ಸಹ ಟ್ಯಾಗ್ ಮಾಡಲಾಗಿತ್ತು.
ಶೇಖ್ ಅಹ್ಮದ್ ಅವರ ಆರಂಭಿಕ ಜೀವನ ಮತ್ತು ವೃತ್ತಿಜೀವನ
1950 ರಲ್ಲಿ ಜನಿಸಿದ ಶೇಖ್ ಅಹ್ಮದ್, ದುಬೈನ ಮಾಜಿ ಆಡಳಿತಗಾರ ದಿವಂಗತ ಶೇಖ್ ರಶೀದ್ ಬಿನ್ ಸಯೀದ್ ಅಲ್ ಮಕ್ತೂಮ್ ಅವರ ಕಿರಿಯ ಪುತ್ರರಾಗಿದ್ದರು.
ಅವರು ರಾಯಲ್ ಮಿಲಿಟರಿ ಅಕಾಡೆಮಿ ಸ್ಯಾಂಡ್‌ ಹರ್ಸ್ಟ್‌ ನಿಂದ ಪದವಿ ಪಡೆದರು ಮತ್ತು ನಂತರ ದುಬೈನ ಸೆಂಟ್ರಲ್ ಮಿಲಿಟರಿ ಕಮಾಂಡ್‌ ಗೆ ಸೇರಿದರು, ಅಂತಿಮವಾಗಿ ಅದರ ಕಮಾಂಡರ್-ಇನ್-ಚೀಫ್ ಆದರು. ಅವರು ದುಬೈ ಪೊಲೀಸ್ ಮತ್ತು ಸಾರ್ವಜನಿಕ ಭದ್ರತೆಯ ಉಪಾಧ್ಯಕ್ಷರಾಗಿಯೂ ಸೇವೆ ಸಲ್ಲಿಸಿದರು ಮತ್ತು ದುಬೈನ ಭದ್ರತಾ ವ್ಯವಸ್ಥೆಗೆ ಸಂಬಂಧಿಸಿದ ಉನ್ನತ ಹುದ್ದೆಗಳನ್ನು ಅಲಂಕರಿಸಿದ್ದರು. ಶೇಖ್ ಅಹ್ಮದ್ ಅವರು ಎ.ಆರ್.ಎಂ. ಹೋಲ್ಡಿಂಗ್ (A.R.M. Holding) ಮತ್ತು ದುಬೈ ರಿಯಲ್ ಎಸ್ಟೇಟ್ ಸೆಂಟರ್ ಸೇರಿದಂತೆ, ಎಮಿರೇಟ್‌ನ ವ್ಯಾಪಾರ, ರಿಯಲ್ ಎಸ್ಟೇಟ್ ಮತ್ತು ಕ್ರೀಡಾ ಕ್ಷೇತ್ರಗಳೊಂದಿಗೂ ಗುರುತಿಸಿಕೊಂಡಿದ್ದರು.
ದುಬೈನಲ್ಲಿ 10 ದಿನಗಳ ಅಧಿಕೃತ ಶೋಕಾಚರಣೆ ಘೋಷಣೆ
ಶೇಖ್ ಅಹ್ಮದ್ ಅವರ ನಿಧನದ ಬೆನ್ನಲ್ಲೇ 10 ದಿನಗಳ ಶೋಕಾಚರಣೆಯ ಅವಧಿಯು ಪ್ರಾರಂಭವಾಗಲಿದೆ ಎಂದು ಆಡಳಿತಗಾರರ ಕಚೇರಿ (Ruler’s Court) ಘೋಷಿಸಿತು. ಈ ಅವಧಿಯಲ್ಲಿ, ದುಬೈನಲ್ಲಿನ ಧ್ವಜಗಳನ್ನು ಅರ್ಧಮಟ್ಟಕ್ಕೆ ಇಳಿಸಿ ಹಾರಿಸಲಾಗುತ್ತದೆ.
ಸೆಪ್ಟೆಂಬರ್ 21, ಸೋಮವಾರದಂದು ಶೇಖ್ ಅಹ್ಮದ್ ಅವರ ನಿಧನದ ವಿಷಯವನ್ನು ಪ್ರಕಟಿಸಲಾಯಿತು ಮತ್ತು ಈ ಶೋಕಾಚರಣೆಯು ಎಮಿರೇಟ್‌ನಾದ್ಯಂತ ಆಚರಿಸಲಾಗುವ ಅಧಿಕೃತ ಗೌರವ ಸೂಚಕವಾಗಿದೆ.
