ಇತ್ತೀಚೆಗೆ ಮುಂಬೈನಲ್ಲಿ ನಡೆದ ಗಣಪತಿ ಉತ್ಸವದ ವೇಳೆ ನಟಿ ಕತ್ರಿನಾ ಕೈಫ್ ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದರು. ಈ ವೇಳೆ ಹೆರಿಗೆಯ ನಂತರದ ದೇಹದ ತೂಕದ (ಪೋಸ್ಟ್‌ಪಾರ್ಟಮ್ ವೇಟ್ ಗೇನ್) ಆಧಾರದ ಮೇಲೆ ಕೆಲ ನೆಟ್ಟಿಗರು ಆಕೆಯನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಕ್ರೂರವಾಗಿ ಬಾಡಿ ಶೇಮಿಂಗ್ ಮತ್ತು ಟ್ರೋಲ್ ಮಾಡಿದ್ದರು. ಈ ಆಕ್ಷೇಪಾರ್ಹ ನಡವಳಿಕೆಯ ವಿರುದ್ಧ ಬಿಗ್ ಬಾಸ್ 20 ಕಾರ್ಯಕ್ರಮದ ‘ವೀಕೆಂಡ್ ಕಾ ವಾರ್’ ಸಂಚಿಕೆಯಲ್ಲಿ ಬಾಲಿವುಡ್ ಸೂಪರ್‌ಸ್ಟಾರ್ ಸಲ್ಮಾನ್ ಖಾನ್ ತೀವ್ರವಾಗಿ ಕಿಡಿಕಾರಿದ್ದಾರೆ. ಮಹಿಳೆಯರ ಮೇಲಿನ ಬಾಡಿ ಶೇಮಿಂಗ್, ಅಸಭ್ಯ ಪಾಪರಾಜಿ ಸಂಸ್ಕೃತಿ ಮತ್ತು ಅನಗತ್ಯ ಟ್ರೋಲಿಂಗ್ ವಿರುದ್ಧ ಅವರು ಬಹಿರಂಗವಾಗಿಯೇ ಗಂಭೀರ ಧ್ವನಿ ಎತ್ತಿದ್ದಾರೆ.
ಸಲ್ಮಾನ್ ಖಾನ್ ನೇರವಾಗಿ ಮಾತನಾಡುತ್ತಾ, “ಗರ್ಭಿಣಿಯಾದಾಗ ಅಥವಾ ಮಗುವಿಗೆ ಜನ್ಮ ನೀಡಿದಾಗ ಪ್ರತಿಯೊಬ್ಬ ಮಹಿಳೆಯೂ ತೂಕ ಹೆಚ್ಚಿಸಿಕೊಳ್ಳುವುದು ತೀರ ಸಹಜವಾದ ಪ್ರಕ್ರಿಯೆ. ಹೆರಿಗೆಯ ನಂತರ ಮಹಿಳೆಯರು ತಮ್ಮ ಮಗು ಮತ್ತು ಕುಟುಂಬದೊಂದಿಗೆ ಸಮಯ ಕಳೆಯಲು ಬಯಸುತ್ತಾರೆ. ಅವರು ಮತ್ತೆ ಸಿನಿಮಾಗಳಿಗೆ ಹಿಂತಿರುಗಿದಾಗ ಖಂಡಿತವಾಗಿಯೂ ಫಿಟ್ ಆಗುತ್ತಾರೆ. ಇಂತಹ ಸೂಕ್ಷ್ಮ ವಿಷಯಗಳಲ್ಲಿ ಟ್ರೋಲ್ ಮಾಡುವುದು ಸರಿಯಲ್ಲ” ಎಂದು ಕತ್ರಿನಾ ಕೈಫ್ ಪರವಾಗಿ ಬ್ಯಾಟ್ ಬೀಸಿದ್ದಾರೆ. ಮಾಜಿ ಗೆಳತಿಯ ಹಿತ ಕಾಯಲು ಮತ್ತು ಸರಿ ಪರವಾಗಿ ನಿಲ್ಲಲು ಧೈರ್ಯ ತೋರಿದ ಸಲ್ಮಾನ್ ಖಾನ್ ಅವರ ಈ ಉದಾರ ಗುಣವನ್ನು ಕಂಡ ನೆಟ್ಟಿಗರು ಹಾಗೂ ಜೆನ್ ಜಿ ಜನಾಂಗದವರು ಅವರನ್ನು ಪ್ರೀತಿಯಿಂದ ‘ಪೂಕಿ’ ಮತ್ತು ‘ಗ್ರೀನ್ ಫ್ಲಾಗ್’ ಎಂದು ಕರೆದು ಸೋಶಿಯಲ್ ಮೀಡಿಯಾದಲ್ಲಿ ಪ್ರಶಂಸೆಯ ಸುರಿಮಳೆ ಗೈಯುತ್ತಿದ್ದಾರೆ.
ಇದೇ ವೇಳೆ, ತಮ್ಮ ವಯಸ್ಸಿನ ಬಗ್ಗೆಯೂ ಟ್ರೋಲ್ ಮಾಡುತ್ತಿರುವ ಸೋಷಿಯಲ್ ಮೀಡಿಯಾ ಬಳಕೆದಾರರಿಗೆ ಸಲ್ಮಾನ್ ಖಾನ್ ತಮ್ಮದೇ ಶೈಲಿಯಲ್ಲಿ ಟಾಂಗ್ ಕೊಟ್ಟಿದ್ದಾರೆ. “ನನಗೆ ಈಗ 60 ವರ್ಷ ವಯಸ್ಸು. ಪ್ರತಿಯೊಬ್ಬರೂ ಪ್ರತಿ ಬಾರಿಯೂ ‘ಮೈನೆ ಪ್ಯಾರ್ ಕಿಯಾ’ ಚಿತ್ರದಲ್ಲಿದ್ದಂತೆಯೇ ಇರಲು ಸಾಧ್ಯವಿಲ್ಲ. ವಯಸ್ಸಾಗುವುದು ಪ್ರಕೃತಿಯ ನಿಯಮ” ಎಂದ ಅವರು, ಕಾರ್ಯಕ್ರಮದ ಕ್ಯಾಮೆರಾದೆದುರೇ ತಮ್ಮ ಶರ್ಟ್ ಮತ್ತು ಟೋಪಿ ತೆಗೆದು, ತಮ್ಮ ಫಿಟ್‌ನೆಸ್ ಪ್ರದರ್ಶಿಸಿ ಟ್ರೋಲರ್‌ಗಳಿಗೆ ನೇರ ಸವಾಲು ಹಾಕಿದ್ದಾರೆ. ತಮ್ಮ ಸಹೋದರ ಸೊಹೈಲ್ ಖಾನ್ ಸೇರಿದಂತೆ ಇತರ ನಟರ ಮೇಲಿನ ಟ್ರೋಲಿಂಗ್‌ನ್ನೂ ಅವರು ಖಂಡಿಸಿದ್ದಾರೆ.
ಅಲ್ಲದೆ, ನಟಿಯರನ್ನು ಹಿಂಬದಿಯಿಂದ ಅಸಭ್ಯವಾದ ಕೋನಗಳಲ್ಲಿ ವೀಡಿಯೊ ಹಾಗೂ ಫೋಟೋ ತೆಗೆಯುವ ಪಾಪರಾಜಿಗಳನ್ನು ‘ವಿಕೃತ ಮನಸ್ಥಿತಿಯವರು’ ಎಂದು ಕಟುವಾಗಿ ಟೀಕಿಸಿದ್ದಾರೆ. “ನನ್ನ ಸ್ವಂತ ಸೋದರಸೊಸೆ ನಡೆದುಕೊಂಡು ಹೋಗುವಾಗಲೂ ಹಿಂಬದಿಯಿಂದ ಫೋಟೋ ತೆಗೆದು ‘ಇವರು ಯಾರು ಗುರುತಿಸಿ’ ಎಂದು ಕ್ಯಾಪ್ಷನ್ ಹಾಕ್ತಾರೆ. ಯಾವುದೇ ನಟಿಯರಿಗೂ ಇದು ಇಷ್ಟವಾಗುವುದಿಲ್ಲ. ಇಂತಹ ಘಟನೆಗಳು ನಡೆದಾಗ ನಟಿಯರು ತಿರುಗಿಬಿದ್ದು ಗಟ್ಟಿಯಾಗಿ ಪ್ರತಿಭಟಿಸಬೇಕು” ಎಂದು ಕರೆ ನೀಡಿದ್ದಾರೆ. ಸಲ್ಮಾನ್ ಖಾನ್ ಅವರ ಈ ನೇರ ಮತ್ತು ನಿಷ್ಠುರ ಮಾತುಗಳು ಈಗ ಬಾಲಿವುಡ್‌ನಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿವೆ.
