ಬೆಂಗಳೂರು- ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರ (GBA) ವ್ಯಾಪ್ತಿಯ ಆಸ್ತಿ ಮಾಲೀಕರಿಗೆ ಇ-ಖಾತಾ ಪಡೆಯುವ ಪ್ರಕ್ರಿಯೆಯನ್ನು ಮತ್ತಷ್ಟು ಸರಳಗೊಳಿಸುವ ಉದ್ದೇಶದಿಂದ ‘ಇ-ಆಸ್ತಿ 2.0’ ನೂತನ ಇ-ಖಾತಾ ವ್ಯವಸ್ಥೆ ಸೆ.21ರಿಂದ ಸಾರ್ವಜನಿಕ ಬಳಕೆಗೆ ಬರಲಿದೆ. ಗ್ರೇಟರ್‌ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅವರು ಸೆ.21ರಂದು ವ್ಯವಸ್ಥೆಯನ್ನು ಅಧಿಕೃತವಾಗಿ ಸಾರ್ವಜನಿಕರಿಗೆ ಸಮರ್ಪಿಸಲಿದ್ದು, ನೂತನ ವ್ಯವಸ್ಥೆಯ ಮೂಲಕ ಇ-ಖಾತಾ ಸಂಬಂಧಿತ ಹಲವು ಸೇವೆಗಳನ್ನು ಒಂದೇ ವೇದಿಕೆಯಲ್ಲಿ ಪಡೆಯಲು ಅವಕಾಶ ಕಲ್ಪಿಸಲಾಗಿದೆ ಎಂದು GBA ಮುಖ್ಯ ಆಯುಕ್ತ ಮಹೇಶ್ವರ್‌ ರಾವ್‌ ತಿಳಿಸಿದ್ದಾರೆ.
ಈಗಾಗಲೇ ಇ-ಆಸ್ತಿ ವ್ಯವಸ್ಥೆಯ ಮೂಲಕ 25 ಲಕ್ಷಕ್ಕೂ ಅಧಿಕ ಆಸ್ತಿ ದಾಖಲೆಗಳನ್ನು ಡಿಜಿಟಲೀಕರಣ ಮಾಡಲಾಗಿದ್ದು, ಲಕ್ಷಾಂತರ ಆಸ್ತಿ ಮಾಲೀಕರಿಗೆ ಆನ್‌ಲೈನ್‌ ಮೂಲಕ ಇ-ಖಾತಾ ವಿತರಿಸಲಾಗಿದೆ. ಏಪ್ರಿಲ್‌ನಲ್ಲಿ GBA ವ್ಯಾಪ್ತಿಯ ಐದು ನಗರ ಪಾಲಿಕೆಗಳ ಆಸ್ತಿ ಮಾಲೀಕರಿಗೆ SAS ಆಸ್ತಿ ತೆರಿಗೆ ಗುರುತಿನ ಸಂಖ್ಯೆಯ ಆಧಾರದಲ್ಲಿ ಇ-ಖಾತಾ ಡೌನ್ಲೋಡ್ ಮಾಡುವ ವ್ಯವಸ್ಥೆಯನ್ನೂ ಜಾರಿಗೊಳಿಸಲಾಗಿತ್ತು. ಆ ಸಂದರ್ಭದಲ್ಲಿ ಸುಮಾರು 13 ಲಕ್ಷ ಇ-ಖಾತಾಗಳನ್ನು ಆನ್‌ಲೈನ್‌ನಲ್ಲಿ ಲಭ್ಯಗೊಳಿಸುವ ಗುರಿಯನ್ನು ಅಧಿಕಾರಿಗಳು ಪ್ರಕಟಿಸಿದ್ದರು.
ಹಳೆಯ ವ್ಯವಸ್ಥೆಯ ಮುಂದುವರಿದ ರೂಪ
ಹಳೆಯ ವ್ಯವಸ್ಥೆಯ ಮುಂದುವರಿದ ರೂಪ
ಈಗ ಜಾರಿಗೆ ಬರುತ್ತಿರುವ ಇ-ಆಸ್ತಿ 2.0, ಈಗಿರುವ ಇ-ಆಸ್ತಿ ವ್ಯವಸ್ಥೆಯ ಮುಂದುವರಿದ ಆವೃತ್ತಿಯಾಗಿದೆ. ಹೊಸ ವ್ಯವಸ್ಥೆಯಲ್ಲಿ ಡ್ರಾಫ್ಟ್‌ ಇ-ಖಾತಾವನ್ನು ಅಂತಿಮ ಇ-ಖಾತಾವಾಗಿ ಪರಿವರ್ತಿಸುವುದು, ಮ್ಯೂಟೇಷನ್‌ನೊಂದಿಗೆ ಅಂತಿಮ ಇ-ಖಾತಾ ವಿತರಣೆ ಹಾಗೂ ಬಿ-ಖಾತಾದಿಂದ ಎ-ಖಾತಾಗೆ ಪರಿವರ್ತನೆ ಸೇರಿದಂತೆ ಪ್ರಮುಖ ಸೇವೆಗಳನ್ನು ಪಡೆಯಬಹುದಾಗಿದೆ.
ಅರ್ಜಿ ಸಲ್ಲಿಸಿದ ಬಳಿಕ ಅದರ ಪ್ರಸ್ತುತ ಹಂತವನ್ನು ನಾಗರಿಕರು ನೈಜ-ಸಮಯದಲ್ಲಿ ಆನ್‌ಲೈನ್‌ ಮೂಲಕ ಪರಿಶೀಲಿಸುವ ಅವಕಾಶವೂ ಇರಲಿದೆ. ಇದರಿಂದ ಅರ್ಜಿ ಎಲ್ಲ ಹಂತದಲ್ಲಿದೆ ಎಂಬುದನ್ನು ತಿಳಿದುಕೊಳ್ಳಲು ಕಚೇರಿಗಳಿಗೆ ಪದೇಪದೇ ಅಲೆದಾಡುವ ಪರಿಸ್ಥಿತಿ ತಪ್ಪಲಿದೆ ಎಂದು ನಿರೀಕ್ಷಿಸಲಾಗಿದೆ. GBAಯ ಅಧಿಕೃತ ಜಾಲತಾಣದಲ್ಲಿಯೂ ಇ-ಆಸ್ತಿ ಹಾಗೂ ಬಿ-ಖಾತಾ/ಎ-ಖಾತಾ ಸೇವೆಗಳನ್ನು ಪ್ರತ್ಯೇಕವಾಗಿ ಲಭ್ಯಗೊಳಿಸಲಾಗಿದೆ.
ಕಾವೇರಿ ಜತೆ ನೇರ ಸಂಪರ್ಕ
ಕಾವೇರಿ ಜತೆ ನೇರ ಸಂಪರ್ಕ
ಇ-ಆಸ್ತಿ 2.0 ವ್ಯವಸ್ಥೆಯ ಪ್ರಮುಖ ಬದಲಾವಣೆಗಳಲ್ಲಿ ಕಾವೇರಿ ವ್ಯವಸ್ಥೆಯೊಂದಿಗೆ ಮ್ಯೂಟೇಷನ್‌ ಪ್ರಕ್ರಿಯೆಯ ನೇರ ಏಕೀಕರಣವೂ ಸೇರಿದೆ. ಆಸ್ತಿ ನೋಂದಣಿ ಮತ್ತು ಖಾತಾ ಮ್ಯೂಟೇಷನ್‌ ಪ್ರಕ್ರಿಯೆಗಳ ನಡುವೆ ಸಮನ್ವಯ ಹೆಚ್ಚಿಸುವುದು ಇದರ ಉದ್ದೇಶವಾಗಿದೆ. ಇದರಿಂದ ನೋಂದಣಿ ನಂತರ ಖಾತಾ ಬದಲಾವಣೆಗೆ ಸಂಬಂಧಿಸಿದ ಪ್ರಕ್ರಿಯೆಗಳನ್ನು ಹೆಚ್ಚು ವ್ಯವಸ್ಥಿತವಾಗಿ ನಿರ್ವಹಿಸಲು ಸಾಧ್ಯವಾಗಲಿದೆ.
ಈ ಹಿಂದೆ ಇ-ಖಾತಾ ಪಡೆಯಲು ದಾಖಲೆ ಪರಿಶೀಲನೆ, ಕಚೇರಿ ಭೇಟಿ ಹಾಗೂ ಮಧ್ಯವರ್ತಿಗಳ ಅವಲಂಬನೆ ಕುರಿತು ಸಾರ್ವಜನಿಕರಿಂದ ದೂರುಗಳು ಕೇಳಿಬಂದಿದ್ದವು. 2026ರ ಆರಂಭದಲ್ಲೇ GBA ಅಧಿಕಾರಿಗಳು ಬಹುತೇಕ ಇ-ಖಾತಾ ಅರ್ಜಿಗಳನ್ನು ಆನ್‌ಲೈನ್‌ನಲ್ಲಿ ವಿಲೇವಾರಿ ಮಾಡಲಾಗುತ್ತಿದೆ ಮತ್ತು ನಾಗರಿಕರು ಕಚೇರಿಗಳಿಗೆ ಭೇಟಿ ನೀಡುವ ಅಥವಾ ಮಧ್ಯವರ್ತಿಗಳಿಗೆ ಹಣ ನೀಡುವ ಅಗತ್ಯವಿಲ್ಲ ಎಂದು ತಿಳಿಸಿದ್ದರು.
ಮುಂದಿನ ದಿನಗಳಲ್ಲಿ ಇನ್ನಷ್ಟು ಸೇವೆ
ಮುಂದಿನ ದಿನಗಳಲ್ಲಿ ಇನ್ನಷ್ಟು ಸೇವೆ
ಇ-ಆಸ್ತಿ 2.0 ಆರಂಭವಾದ ಬಳಿಕ ಕೆಲವೇ ದಿನಗಳಲ್ಲಿ ಹೊಸ ಖಾತಾ ನೋಂದಣಿ, ಅಪಾರ್ಟ್‌ಮೆಂಟ್‌ ಮತ್ತು ಬಹುಮಹಡಿ ಕಟ್ಟಡಗಳಿಗೆ ಬಲ್ಕ್‌ ಖಾತಾ ಪ್ರಕ್ರಿಯೆ, ಅಂತಿಮ ಇ-ಖಾತಾದಲ್ಲಿನ ತಿದ್ದುಪಡಿ, ನಿವೇಶನ ವಿಭಜನೆ ಹಾಗೂ ವಿಲೀನ ಸೇರಿದಂತೆ ಹೆಚ್ಚುವರಿ ಸೇವೆಗಳನ್ನು ಪರಿಚಯಿಸಲು GBA ಉದ್ದೇಶಿಸಿದೆ.
ಸರಳ ಹಾಗೂ ಬಳಕೆದಾರ ಸ್ನೇಹಿ ವಿನ್ಯಾಸದೊಂದಿಗೆ ವ್ಯವಸ್ಥೆಯನ್ನು ರೂಪಿಸಲಾಗಿದ್ದು, ಹೆಚ್ಚಿನ ಸೇವೆಗಳನ್ನು ಸ್ವಯಂಚಾಲಿತಗೊಳಿಸುವ ಮೂಲಕ ಅರ್ಜಿಗಳ ವಿಲೇವಾರಿ ವೇಗಗೊಳಿಸುವ ಗುರಿಯನ್ನು ಹೊಂದಲಾಗಿದೆ.
ಡಿಜಿಟಲ್ ಖಾತಾ ವ್ಯವಸ್ಥೆಗೆ ಮತ್ತೊಂದು ಹೆಜ್ಜೆ
ಡಿಜಿಟಲ್ ಖಾತಾ ವ್ಯವಸ್ಥೆಗೆ ಮತ್ತೊಂದು ಹೆಜ್ಜೆ
ಬೃಹತ್ ಬೆಂಗಳೂರು ವ್ಯಾಪ್ತಿಯನ್ನು ಹೊಸ ಆಡಳಿತ ವ್ಯವಸ್ಥೆಯಡಿ ಐದು ನಗರ ಪಾಲಿಕೆಗಳಾಗಿ ರೂಪಿಸುವ ಪ್ರಕ್ರಿಯೆಯ ನಡುವೆ ಇ-ಆಸ್ತಿ 2.0 ಜಾರಿಯಾಗುತ್ತಿರುವುದು ಆಸ್ತಿ ದಾಖಲೆಗಳ ಡಿಜಿಟಲೀಕರಣದ ಮುಂದಿನ ಹಂತವೆಂದು ಪರಿಗಣಿಸಲಾಗಿದೆ. GBAಯ ಅಧಿಕೃತ ಪೋರ್ಟಲ್‌ನಲ್ಲಿ ಈಗಾಗಲೇ ಇ-ಆಸ್ತಿ, ಬಿ-ಖಾತಾದಿಂದ ಎ-ಖಾತಾ ಪರಿವರ್ತನೆ, ಆಸ್ತಿ ತೆರಿಗೆ ಸೇರಿದಂತೆ ಹಲವು ನಾಗರಿಕ ಸೇವೆಗಳನ್ನು ಒಂದೇ ಡಿಜಿಟಲ್ ವೇದಿಕೆಯಲ್ಲಿ ಒದಗಿಸಲಾಗುತ್ತಿದೆ.
ಆದರೆ ಇ-ಖಾತಾ ಡಿಜಿಟಲೀಕರಣ ಹೆಚ್ಚಾದಂತೆ ದಾಖಲೆಗಳ ನಿಖರತೆ, ಮಾಲೀಕತ್ವದ ವಿವರ, ಮ್ಯೂಟೇಷನ್‌, ನೋಂದಣಿ ದಾಖಲೆಗಳು ಹಾಗೂ ಆಸ್ತಿ ತೆರಿಗೆ ಮಾಹಿತಿಗಳ ಸಮನ್ವಯವೂ ಮಹತ್ವ ಪಡೆಯಲಿದೆ. ಏಪ್ರಿಲ್‌ನಲ್ಲಿ ಆನ್‌ಲೈನ್‌ ಇ-ಖಾತಾ ಡೌನ್ಲೋಡ್ ವ್ಯವಸ್ಥೆ ಪರಿಚಯಿಸಿದಾಗ, ಅಸ್ತಿತ್ವದಲ್ಲಿರುವ ದಾಖಲೆಗಳ ಆಧಾರದ ಮೇಲೆ ನೀಡುವ ಇ-ಖಾತಾಗಳನ್ನು ಪೂರ್ಣಗೊಳಿಸಲು ಆಧಾರ್‌ ಇ-ಕೆವೈಸಿ, ನೋಂದಾಯಿತ ಮಾರಾಟ ಪತ್ರ, GPS ಮತ್ತು ಆಸ್ತಿ ಛಾಯಾಚಿತ್ರ ಹಾಗೂ ಅಗತ್ಯವಿದ್ದಲ್ಲಿ BESCOM ವಿವರಗಳನ್ನು ನವೀಕರಿಸಬೇಕಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದರು.
ಸೆ.21ರಿಂದ ಹೊಸ ವ್ಯವಸ್ಥೆ ಕಾರ್ಯಾರಂಭ ಮಾಡಲಿರುವ ಹಿನ್ನೆಲೆಯಲ್ಲಿ ನಾಗರಿಕರು ಹಂತ ಹಂತವಾಗಿ ಹೊಸ ವ್ಯವಸ್ಥೆಗೆ ಹೊಂದಿಕೊಳ್ಳುವಂತೆ ಮತ್ತು ಅಧಿಕೃತ ಡಿಜಿಟಲ್ ವೇದಿಕೆಯನ್ನೇ ಬಳಸುವಂತೆ ಮುಖ್ಯ ಆಯುಕ್ತ ಮಹೇಶ್ವರ್‌ ರಾವ್‌ ಮನವಿ ಮಾಡಿದ್ದಾರೆ. ಹೊಸ ವ್ಯವಸ್ಥೆ ಪರಿಣಾಮಕಾರಿಯಾಗಿ ಜಾರಿಯಾದರೆ, ಇ-ಖಾತಾ ಪಡೆಯುವ ಪ್ರಕ್ರಿಯೆಯಲ್ಲಿ ಕಚೇರಿ ಸುತ್ತಾಟ ಕಡಿಮೆ, ಅರ್ಜಿ ಸ್ಥಿತಿಯ ಪಾರದರ್ಶಕತೆ ಹೆಚ್ಚಳ ಹಾಗೂ ನೋಂದಣಿ–ಮ್ಯೂಟೇಷನ್‌ ಪ್ರಕ್ರಿಯೆಗಳ ನಡುವೆ ಉತ್ತಮ ಸಮನ್ವಯ ಸಾಧಿಸುವ ನಿರೀಕ್ಷೆ ಮೂಡಿದೆ.
