ನವದೆಹಲಿ: ₹2,000ಕ್ಕಿಂತ ಹೆಚ್ಚಿನ UPI ವಹಿವಾಟುಗಳಿಗೆ ಹೊಸ ಮರ್ಚೆಂಟ್ ಡಿಸ್ಕೌಂಟ್ ರೇಟ್ (MDR) ಜಾರಿಗೆ ಬರುತ್ತಿರುವ ಹಿನ್ನೆಲೆಯಲ್ಲಿ, ಅದರ ಹೊರೆ ಗ್ರಾಹಕರ ಮೇಲೆ ಬೀಳದಂತೆ ನೋಡಿಕೊಳ್ಳಲು ಕೇಂದ್ರ ಸರ್ಕಾರ ಪೇಮೆಂಟ್ ಅಗ್ರಿಗೇಟರ್‌ಗಳು ಹಾಗೂ UPI ವ್ಯವಸ್ಥೆಯ ಇತರ ಪಾಲುದಾರರೊಂದಿಗೆ ಚರ್ಚೆ ಆರಂಭಿಸಿದೆ ಎಂದು ಮೂಲಗಳು ತಿಳಿಸಿವೆ.
ಹಣಕಾಸು ಸಚಿವಾಲಯವು ವ್ಯಾಪಾರಿಗಳು ಈ ಶುಲ್ಕವನ್ನು ಗ್ರಾಹಕರ ಮೇಲೆ ವರ್ಗಾಯಿಸದಂತೆ ನೋಡಿಕೊಳ್ಳಲು ಮೇಲ್ವಿಚಾರಣಾ ವ್ಯವಸ್ಥೆಯನ್ನೂ ಸಿದ್ಧಪಡಿಸುತ್ತಿದೆ. ದೊಡ್ಡ ಮೊತ್ತದ UPI ಪಾವತಿಗಳಿಗೆ ಹೊಸ ಶುಲ್ಕದಿಂದ ಗ್ರಾಹಕರ ವೆಚ್ಚ ಹೆಚ್ಚಾಗಬಹುದು ಎಂಬ ಆತಂಕದ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
₹2,000ಕ್ಕಿಂತ ಹೆಚ್ಚಿನ UPI ವಹಿವಾಟಿಗೆ 0.4% MDR
ಹೊಸ ನಿಯಮಗಳ ಪ್ರಕಾರ, ಅಕ್ಟೋಬರ್ 15ರಿಂದ ₹2,000ಕ್ಕಿಂತ ಹೆಚ್ಚಿನ ವ್ಯಕ್ತಿಯಿಂದ ವ್ಯಾಪಾರಿಗೆ (Person-to-Merchant) ನಡೆಯುವ UPI ವಹಿವಾಟುಗಳಿಗೆ ಶೇ.0.4ರ MDR ಅನ್ವಯವಾಗಲಿದೆ. ಈ ಶುಲ್ಕವನ್ನು ಗ್ರಾಹಕರಿಂದ ಪಡೆಯದೆ ವ್ಯಾಪಾರಿಗಳೇ ಪಾವತಿಸಬೇಕು.
₹75,000 ಅಥವಾ ಅದಕ್ಕಿಂತ ಹೆಚ್ಚಿನ ವಹಿವಾಟುಗಳಿಗೆ MDR ಶುಲ್ಕವನ್ನು ಗರಿಷ್ಠ ₹300ಕ್ಕೆ ಮಿತಿಗೊಳಿಸಲಾಗಿದೆ.
ಗ್ರಾಹಕರಿಗೆ ಶುಲ್ಕ ಬೀಳದಂತೆ ಸರ್ಕಾರದ ಕ್ರಮ
MDR ಕುರಿತು ಪೇಮೆಂಟ್ ಅಗ್ರಿಗೇಟರ್‌ಗಳು ಹಾಗೂ UPI ವ್ಯವಸ್ಥೆಯ ಇತರ ಸಂಸ್ಥೆಗಳೊಂದಿಗೆ ಸಚಿವಾಲಯ ಈಗಾಗಲೇ ಚರ್ಚೆ ನಡೆಸುತ್ತಿದೆ. ಗ್ರಾಹಕರಿಂದ ಈ ಶುಲ್ಕವನ್ನು ವಸೂಲಿ ಮಾಡದಂತೆ ವ್ಯಾಪಾರಿಗಳಿಗೆ ತಿಳಿಸುವುದು ಮತ್ತು ಅದರ ಅನುಷ್ಠಾನವನ್ನು ಗಮನಿಸುವುದು ಸರ್ಕಾರದ ಉದ್ದೇಶವಾಗಿದೆ.
ವ್ಯಾಪಾರಿಗಳು MDR ಮೊತ್ತವನ್ನು ಸರಕುಗಳ ಬೆಲೆ ಹೆಚ್ಚಿಸುವ ಮೂಲಕ ಅಥವಾ UPI ಪಾವತಿಗೆ ಪ್ರತ್ಯೇಕ ಶುಲ್ಕ ವಿಧಿಸುವ ಮೂಲಕ ಗ್ರಾಹಕರ ಮೇಲೆ ಹಾಕಬಹುದು ಎಂಬ ಆತಂಕವೂ ಇದೆ.
ಆದರೆ, ಈ ಕ್ರಮದಿಂದ UPI ಬಳಕೆಯಲ್ಲಿ ದೊಡ್ಡ ಪ್ರಮಾಣದ ಕುಸಿತವಾಗಲಿದೆ ಎಂದು ಸರ್ಕಾರ ನಿರೀಕ್ಷಿಸುತ್ತಿಲ್ಲ. ಒಟ್ಟು UPI ವಹಿವಾಟುಗಳ ಪ್ರಮಾಣದಲ್ಲಿ ಸುಮಾರು 4%ರಷ್ಟು ವಹಿವಾಟುಗಳು ಮಾತ್ರ ಹೊಸ MDRನಿಂದ ಪ್ರಭಾವಿತವಾಗಬಹುದು ಎಂದು ಮೂಲಗಳು ತಿಳಿಸಿವೆ.
UPI ಬಳಕೆದಾರರು ನಗದಿನತ್ತ ಮರಳುವ ಸಾಧ್ಯತೆ ಕಡಿಮೆ
ಹೊಸ ಶುಲ್ಕದಿಂದ ಗ್ರಾಹಕರು ಮತ್ತೆ ನಗದು ವ್ಯವಹಾರಗಳತ್ತ ಹೆಚ್ಚಿನ ಪ್ರಮಾಣದಲ್ಲಿ ತಿರುಗುವ ಸಾಧ್ಯತೆ ಇಲ್ಲ ಎಂದು ಮೂಲಗಳು ಹೇಳಿದ್ದಾರೆ. ವಹಿವಾಟಿನ ಮೊತ್ತ ಎಷ್ಟೇ ಇದ್ದರೂ RuPay ಡೆಬಿಟ್ ಕಾರ್ಡ್ ವಹಿವಾಟುಗಳು ಉಚಿತವಾಗಿಯೇ ಮುಂದುವರಿಯಲಿವೆ.
ಹೊಸ MDRನಿಂದ ಹಣದುಬ್ಬರದ ಮೇಲೂ ಗಮನಾರ್ಹ ಪರಿಣಾಮ ಉಂಟಾಗುವ ಸಾಧ್ಯತೆ ಇಲ್ಲ. ಏಕೆಂದರೆ MDR ಅನ್ವಯವಾಗುವ ವಹಿವಾಟುಗಳು ಒಟ್ಟು UPI ಪಾವತಿಗಳಲ್ಲಿ ಸಣ್ಣ ಪ್ರಮಾಣದಲ್ಲಿವೆ ಎಂದು ಮೂಲಗಳು ತಿಳಿಸಿದ್ದಾರೆ.
ಅಮೆರಿಕದ ಒತ್ತಡದ ಆರೋಪ ತಳ್ಳಿಹಾಕಿದ ಹಣಕಾಸು ಸಚಿವಾಲಯ
ಇದೇ ವೇಳೆ, MDR ಜಾರಿಗೆ ಅಮೆರಿಕದ ಒತ್ತಡ ಕಾರಣ ಎಂಬ ಆರೋಪವನ್ನು ಹಣಕಾಸು ಸಚಿವಾಲಯ ತಳ್ಳಿಹಾಕಿದೆ.
ಸೆಪ್ಟೆಂಬರ್ 15ರಂದು NPCI ಹೊರಡಿಸಿರುವ ಸುತ್ತೋಲೆಯಲ್ಲಿ ಅಂತರರಾಷ್ಟ್ರೀಯ ಕ್ರೆಡಿಟ್ ಕಾರ್ಡ್‌ಗಳಿಗೆ RuPayಗಿಂತ ಯಾವುದೇ ವಿಶೇಷ ಅನುಕೂಲ ನೀಡಲಾಗಿಲ್ಲ ಎಂದು ಹಣಕಾಸು ಸೇವೆಗಳ ಇಲಾಖೆ (DFS) ಸ್ಪಷ್ಟಪಡಿಸಿದೆ.
UPI ಮೂಲಕ ಕ್ರೆಡಿಟ್ ವಹಿವಾಟು ನಡೆಸಲು ಪ್ರಸ್ತುತ ವ್ಯವಸ್ಥೆಯಲ್ಲಿ RuPay ಕ್ರೆಡಿಟ್ ಕಾರ್ಡ್‌ಗಳಿಗೆ ಮಾತ್ರ ಅವಕಾಶವಿದೆ ಎಂದು ಇಲಾಖೆ ತಿಳಿಸಿದೆ.
ಅಮೆರಿಕದ ಎಲೆಕ್ಟ್ರಾನಿಕ್ ಪಾವತಿ ಸೇವಾ ಸಂಸ್ಥೆಗಳಿಗೆ UPI ಕ್ರೆಡಿಟ್ ವಹಿವಾಟುಗಳಲ್ಲಿ RuPayಗೆ ಸಮಾನ ಅವಕಾಶ ಸಿಗುತ್ತಿಲ್ಲ ಎಂಬ 2026ರ ಅಮೆರಿಕದ ಟ್ರೇಡ್ ರೆಪ್ರಸೆಂಟೇಟಿವ್ ವರದಿಯಲ್ಲಿನ ಕಳವಳದ ಹಿನ್ನೆಲೆಯಲ್ಲಿ ಈ ಸ್ಪಷ್ಟನೆ ನೀಡಲಾಗಿದೆ.
ಡಿಜಿಟಲ್ ಪಾವತಿ ವ್ಯವಸ್ಥೆಗೆ ದೀರ್ಘಕಾಲಿಕ ಮತ್ತು ಸುಸ್ಥಿರ ಆದಾಯ ವ್ಯವಸ್ಥೆ ರೂಪಿಸುವ ಉದ್ದೇಶದಿಂದ MDR ಜಾರಿಗೆ ತರಲಾಗಿದೆ. ಆದರೆ ವ್ಯಕ್ತಿಯಿಂದ ವ್ಯಕ್ತಿಗೆ (P2P) ನಡೆಯುವ ಪಾವತಿಗಳು ಹಾಗೂ ಬಹುತೇಕ ದೈನಂದಿನ
