ಪ್ರತಿಯೊಬ್ಬ ವಯಸ್ಕ ವ್ಯಕ್ತಿಗೂ ದಿನಕ್ಕೆ ಕನಿಷ್ಠ ಎಂಟು ಗಂಟೆಗಳ ನಿದ್ರೆ ಅತ್ಯಗತ್ಯ ಎಂಬುದು ದಶಕಗಳಿಂದ ಕೇಳಿಬರುತ್ತಿರುವ ಸಾಮಾನ್ಯ ನಂಬಿಕೆ. ಆದರೆ, ಎಲ್ಲರಿಗೂ ಎಂಟು ಗಂಟೆ ನಿದ್ರೆಯ ಅಗತ್ಯವಿಲ್ಲ ಮತ್ತು ಪ್ರತಿಯೊಬ್ಬ ವ್ಯಕ್ತಿಯ ನಿದ್ರೆಯ ಪ್ರಮಾಣ ಒಂದೇ ಆಗಿರಲು ಸಾಧ್ಯವಿಲ್ಲ ಎಂದು ಟೆಕ್ಸಾಸ್ ಎ&ಎಂ ವಿಶ್ವವಿದ್ಯಾಲಯದ ಜೀವಶಾಸ್ತ್ರ ಪ್ರಾಧ್ಯಾಪಕ ಹಾಗೂ ನಿದ್ರೆಯ ಜೆನೆಟಿಕ್ಸ್ ಕುರಿತು ಸಂಶೋಧನೆ ನಡೆಸುತ್ತಿರುವ ಪ್ರೊಫೆಸರ್ ಅಲೆಕ್ಸ್ ಕೀನ್ ಸ್ಪಷ್ಟಪಡಿಸಿದ್ದಾರೆ.
ಪ್ರೊಫೆಸರ್ ಕೀನ್ ಅವರ ಪ್ರಕಾರ, ನಿದ್ರೆಯ ಅಗತ್ಯತೆಯು ವ್ಯಕ್ತಿಯಿಂದ ವ್ಯಕ್ತಿಗೆ ಸಂಪೂರ್ಣವಾಗಿ ಭಿನ್ನವಾಗಿರುತ್ತದೆ. ಪ್ರತಿಯೊಬ್ಬರ ದೇಹ ಪ್ರಕೃತಿ ಒಂದೇ ರೀತಿ ಇರುವುದಿಲ್ಲ. ಕೆಲವರಿಗೆ ದಿನಕ್ಕೆ ಕೇವಲ ನಾಲ್ಕು ಗಂಟೆಗಳ ನಿದ್ರೆಯೇ ಸಾಕಾದರೆ, ಇನ್ನು ಕೆಲವರಿಗೆ ಎಂಟು ಗಂಟೆಗಳಿಗಿಂತಲೂ ಹೆಚ್ಚು ನಿದ್ರೆ ಅತ್ಯಗತ್ಯವಾಗಿರುತ್ತದೆ. ವಿಜ್ಞಾನಿಗಳು ನಡೆಸಿರುವ ಸಂಶೋಧನೆಗಳಲ್ಲಿ, ಕೆಲವರಲ್ಲಿರುವ ನಿರ್ದಿಷ್ಟ ಜೀನ್ ರೂಪಾಂತರಗಳು (Genetic mutations) ನೈಸರ್ಗಿಕವಾಗಿಯೇ ಅವರಿಗೆ ಕಡಿಮೆ ನಿದ್ರೆಯಿದ್ದರೂ ಸಕ್ರಿಯವಾಗಿರಲು ನೆರವಾಗುತ್ತವೆ ಎಂಬುದು ಸಾಬೀತಾಗಿದೆ. ಈ ವಂಶವಾಹಿಗಳನ್ನು ಪ್ರಾಣಿಗಳಲ್ಲಿ (ನೊಣ ಅಥವಾ ಇಲಿಗಳಲ್ಲಿ) ಪ್ರಯೋಗಿಸಿದಾಗಲೂ ಅವುಗಳಿಗೆ ಕಡಿಮೆ ನಿದ್ರೆ ಸಾಕೆಂಬ ಫಲಿತಾಂಶ ಕಂಡುಬಂದಿದೆ.
ಮಾನವ ದೇಹದಲ್ಲಿ ನೂರಾರು ಅಥವಾ ಸಾವಿರಾರು ವಂಶವಾಹಿಗಳು ನಿದ್ರೆಯ ನಿಯಂತ್ರಣದಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಆದ್ದರಿಂದ ಒಬ್ಬ ವ್ಯಕ್ತಿಗೆ ಎಷ್ಟು ಗಂಟೆಗಳ ನಿದ್ರೆ ಆರೋಗ್ಯಕರ ಎಂಬುದನ್ನು ಅವರ ದೇಹದ ಆಂತರಿಕ ಅಗತ್ಯವೇ ನಿರ್ಧರಿಸುತ್ತದೆ. ಕೇವಲ ಸಮಯದ ಅವಧಿ ಮಾತ್ರವಲ್ಲದೆ, ಮಾನಸಿಕ ಒತ್ತಡವೂ ನಿದ್ರೆಯ ಪ್ರಮಾಣ ಮತ್ತು ಅದರ ಗುಣಮಟ್ಟದ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ ಎಂದು ಸಂಶೋಧಕರು ಎಚ್ಚರಿಸಿದ್ದಾರೆ.
ರಾತ್ರಿಯ ವೇಳೆ ಮೊಬೈಲ್ ಮತ್ತು ಟಿವಿ ಪರದೆಗಳಿಂದ ದೂರವಿರುವುದು ಹಾಗೂ ಮಧ್ಯಾಹ್ನದ ನಂತರ ಕಾಫಿ-ಟೀ ಸೇವನೆ ಕಡಿಮೆ ಮಾಡುವುದು ಉತ್ತಮ ನಿದ್ರೆಗೆ ಪೂರಕವಾದರೂ, ಎಲ್ಲರಿಗೂ ಅನ್ವಯವಾಗುವ ಏಕರೂಪದ ನಿದ್ರೆಯ ದಿನಚರಿ ಇರುವುದಿಲ್ಲ. ಪ್ರತಿಯೊಬ್ಬರೂ ತಮ್ಮ ದೇಹಕ್ಕೆ ಸೂಕ್ತವಾದ ಮತ್ತು ಹಿತವೆನಿಸುವ ನಿದ್ರೆಯ ಅಭ್ಯಾಸವನ್ನು ಕಂಡುಕೊಳ್ಳುವುದು ಮುಖ್ಯ. ನಿದ್ರೆಯ ಸಮಯ ವ್ಯಕ್ತಿಯಿಂದ ವ್ಯಕ್ತಿಗೆ ಬದಲಾಗಬಹುದಾದರೂ, ಉತ್ತಮ ದೈಹಿಕ ಮತ್ತು ಮಾನಸಿಕ ಆರೋಗ್ಯಕ್ಕೆ ಗುಣಮಟ್ಟದ ನಿದ್ರೆ ಅತ್ಯಗತ್ಯ ಎಂದು ಪ್ರೊಫೆಸರ್ ಕೀನ್ ತಿಳಿಸಿದ್ದಾರೆ.
