ಸೋನಿಪತ್‌ ನಲ್ಲಿ ಪಿಟ್ ಬುಲ್ ನಾಯಿ ದಾಳಿಯಿಂದ 6 ತಿಂಗಳ ಮಗುವಿಗೆ ಗಂಭೀರ ಗಾಯವಾಗಿದ್ದು, ಸಿಸಿಟಿವಿಯಲ್ಲಿ ಭಯಾನಕ ದೃಶ್ಯ ಸೆರೆಯಾಗಿದೆ.
ಸೋನಿಪತ್‌ ನ ಸಿಕ್ಕಾ ಕಾಲೋನಿಯಲ್ಲಿ ಪಿಟ್ ಬುಲ್ ನಾಯಿಯೊಂದು ಆರು ತಿಂಗಳ ಮಗುವಿನ ಮೇಲೆ ದಾಳಿ ನಡೆಸಿದ ಪರಿಣಾಮ ಮಗು ಗಂಭೀರವಾಗಿ ಗಾಯಗೊಂಡಿದೆ. ಈ ಘಟನೆಯು ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ದೃಶ್ಯಾವಳಿಗಳಲ್ಲಿ ಮನೆಯೊಂದರಿಂದ ಎರಡು ನಾಯಿಗಳು ಹೊರಬರುವುದು ಮತ್ತು ಅವುಗಳಲ್ಲಿ ಒಂದು ಇದ್ದಕ್ಕಿದ್ದಂತೆ ಮಗುವಿನ ಮೇಲೆ ಎರಗುವುದು ಕಂಡುಬಂದಿದೆ.
ಆ ಸಮಯದಲ್ಲಿ ಮಗುವನ್ನು ಎತ್ತಿಕೊಂಡಿದ್ದ ಮಗುವಿನ ಅತ್ತೆ, ದಾಳಿಯನ್ನು ತಡೆಯಲು ಪ್ರಯತ್ನಿಸುವಾಗ ಗಾಯಗೊಂಡರು. ಮಗು ತೀವ್ರವಾಗಿ ಗಾಯಗೊಂಡಿದ್ದು, ಪ್ರಸ್ತುತ ಪಿಜಿಐ ರೋಹ್ಟಕ್‌ ನಲ್ಲಿ ಚಿಕಿತ್ಸೆ ಪಡೆಯುತ್ತಿದೆ; ಮಗುವಿನ ಸ್ಥಿತಿ ಗಂಭೀರವಾಗಿದೆ ಎಂದು ವರದಿಯಾಗಿದೆ. ಈ ಘಟನೆಯು ನಾಯಿಯ ಮಾಲೀಕರ ನಿರ್ಲಕ್ಷ್ಯದ ಬಗ್ಗೆಯೂ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
6 ತಿಂಗಳ ಮಗುವಿನ ಮೇಲೆ ಪಿಟ್ ಬುಲ್ ನಾಯಿ ಭೀಕರ ದಾಳಿ ನಡೆಸುವ ದೃಶ್ಯ ಸಿಸಿಟಿವಿಯಲ್ಲಿ ಸೆರೆ
ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಆ ಪ್ರದೇಶದ ಮನೆಯೊಂದರಿಂದ ಎರಡು ನಾಯಿಗಳು ಹೊರಬರುವುದು ಕಾಣಿಸುತ್ತದೆ. ಕೆಲವೇ ಕ್ಷಣಗಳಲ್ಲಿ, ನಾಯಿಗಳಲ್ಲಿ ಒಂದು ಮಗುವಿನತ್ತ ಸಾಗಿ ಅದರ ಮೇಲೆ ದಾಳಿ ಮಾಡುತ್ತದೆ. ಪಿಟ್ ಬುಲ್ ಮಗುವಿನ ಮೇಲೆ ಎರಗಿ ಗಂಭೀರವಾಗಿ ಗಾಯಗೊಳಿಸುವ ದೃಶ್ಯವು ಸ್ಪಷ್ಟವಾಗಿ ಸೆರೆಯಾಗಿದೆ.
ಮಗುವನ್ನು ತಮ್ಮ ತೋಳುಗಳಲ್ಲಿ ಹಿಡಿದಿದ್ದ ಮಗುವಿನ ಅತ್ತೆಗೂ ದಾಳಿಯಲ್ಲಿ ಗಾಯಗಳಾಗಿವೆ. ನಂತರ ಮಗುವನ್ನು ಚಿಕಿತ್ಸೆಗಾಗಿ ಕರೆದೊಯ್ಯಲಾಯಿತು ಮತ್ತು ಪ್ರಸ್ತುತ ಪಿಜಿಐ ರೋಹ್ಟಕ್‌ ನಲ್ಲಿ ಗಂಭೀರ ಸ್ಥಿತಿಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.
ನಾಯಿ ದಾಳಿಯ ನಂತರ ಮಾಲೀಕರ ನಿರ್ಲಕ್ಷ್ಯದ ಬಗ್ಗೆ ಪ್ರಶ್ನೆಗಳು
ಸಿಕ್ಕಾ ಕಾಲೋನಿಯಲ್ಲಿ ನಡೆದ ಈ ಘಟನೆಯು ಸ್ಥಳೀಯರನ್ನು ಬೆಚ್ಚಿಬೀಳಿಸಿದೆ ಮತ್ತು ಆ ಪ್ರದೇಶದಲ್ಲಿ ಭಯದ ವಾತಾವರಣವನ್ನು ಸೃಷ್ಟಿಸಿದೆ. ನಾಯಿ ಮಗುವಿನ ಮೇಲೆ ದಾಳಿ ಮಾಡಲು ಕಾರಣವಾದ ಮಾಲೀಕರ ಜವಾಬ್ದಾರಿ ಮತ್ತು ನಿರ್ಲಕ್ಷ್ಯದ ಬಗ್ಗೆಯೂ ಪ್ರಶ್ನೆಗಳನ್ನು ಎತ್ತಲಾಗಿದೆ.
ಈ ಘಟನೆಗೆ ಸಂಬಂಧಿಸಿದಂತೆ ಕುಟುಂಬವು ಇನ್ನೂ ಪೊಲೀಸರಿಗೆ ದೂರು ನೀಡಿಲ್ಲ. ಏತನ್ಮಧ್ಯೆ, ಆರು ತಿಂಗಳ ಮಗು ರೋಹ್ಟಕ್‌ ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಕುಟುಂಬವು ಮಗುವಿನ ಆರೋಗ್ಯ ಸುಧಾರಣೆಗಾಗಿ ಕಾಯುತ್ತಿದೆ.
ಕಳೆದ ತಿಂಗಳು ಪಟಿಯಾಲದಲ್ಲಿ ದಂಪತಿಗಳ ಮೇಲೆ ಸಾಕು ಪಿಟ್ ಬುಲ್ ದಾಳಿ
ಸೋನಿಪತ್‌ ನಲ್ಲಿ ನಡೆದ ಈ ದಾಳಿಯು, ಕಳೆದ ತಿಂಗಳು ಪಂಜಾಬ್‌ ನ ಪಟಿಯಾಲದಲ್ಲಿ ನಡೆದ ಇದೇ ರೀತಿಯ ಘಟನೆಯ ನಂತರ ಸಂಭವಿಸಿದೆ. ಅಲ್ಲಿ ಕುಂಭಾರ್ ನಗರ ಪ್ರದೇಶದಲ್ಲಿ ಸಾಕು ಪಿಟ್ ಬುಲ್ ನಾಯಿಯೊಂದು ದಂಪತಿಗಳ ಮೇಲೆ ದಾಳಿ ನಡೆಸಿದ ಪರಿಣಾಮ ಅವರು ಗಂಭೀರವಾಗಿ ಗಾಯಗೊಂಡಿದ್ದರು.
ಪತಿ ಮತ್ತು ಪತ್ನಿ ಬಾಡಿಗೆಗೆ ಲಭ್ಯವಿದ್ದ ಮನೆಯನ್ನು ನೋಡಲು ಸ್ಥಳೀಯ ಆಸ್ತಿ ಮಾರಾಟಗಾರರೊಂದಿಗೆ(property dealer) ಹೋಗಿದ್ದರು. ಅವರು ಡೋರ್‌ ಬೆಲ್ ಬಾರಿಸುತ್ತಿದ್ದಂತೆಯೇ, ನಾಯಿ ವೇಗವಾಗಿ ಹೊರಗೆ ಬಂದು ಅವರ ಮೇಲೆ ದಾಳಿ ಮಾಡಿತು. ಹತ್ತಿರದಲ್ಲಿದ್ದ ಜನರು ಮಧ್ಯಪ್ರವೇಶಿಸಲು ಪ್ರಯತ್ನಿಸಿದರೂ, ನಾಯಿಯನ್ನು ನಿಯಂತ್ರಣಕ್ಕೆ ತರುವಷ್ಟರಲ್ಲಿ ದಂಪತಿಗಳು ನಾಯಿಯ ಕಡಿತದಿಂದಾಗಿ ಹಲವು ಗಾಯಗಳಿಗೆ ಒಳಗಾದರು. ಇಬ್ಬರನ್ನೂ ಪಟಿಯಾಲದ ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತು, ಅಲ್ಲಿ ಅವರಿಗೆ ಗಾಯಗಳಿಗೆ ಚಿಕಿತ್ಸೆ ನೀಡಲಾಯಿತು. ಈ ಘಟನೆಯನ್ನು ತೋರಿಸುವ ವೀಡಿಯೊವನ್ನು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ಹಂಚಿಕೊಳ್ಳಲಾಗಿದೆ.
2024 ರಲ್ಲಿ ಕೇಂದ್ರವು 23 ಕ್ರೂರ ನಾಯಿ ತಳಿಗಳ ನಿಷೇಧ ಪ್ರಸ್ತಾಪಿಸಿತು
ಮಾರ್ಚ್ 2024 ರಲ್ಲಿ, ಮಾನವ ಜೀವಕ್ಕೆ ಅಪಾಯಕಾರಿ ಎಂದು ಪರಿಗಣಿಸಲಾದ 23 ನಾಯಿ ತಳಿಗಳ ಮಾರಾಟ, ಸಂತಾನೋತ್ಪತ್ತಿ ಮತ್ತು ಸಾಕಣೆಯನ್ನು ನಿಷೇಧಿಸಲು ಕೇಂದ್ರವು ಪ್ರಸ್ತಾಪಿಸಿತು. ಸಾರ್ವಜನಿಕ ಸುರಕ್ಷತಾ ಕಾಳಜಿಯನ್ನು ಉಲ್ಲೇಖಿಸಿ, ಪಶುಸಂಗೋಪನಾ ಸಚಿವಾಲಯವು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಪ್ರಸ್ತಾವಿತ ನಿರ್ಬಂಧಗಳನ್ನು ಜಾರಿಗೊಳಿಸಲು ನಿರ್ದೇಶನ ನೀಡಿತು.
ರಾಟ್ ವೀಲರ್‌ ಗಳು, ಪಿಟ್ ಬುಲ್ ಗಳು ಮತ್ತು ಅಮೇರಿಕನ್ ಬುಲ್ ಡಾಗ್‌ ಗಳು ಸೇರಿದಂತೆ ತಳಿಗಳು ಪರಿಶೀಲನೆಗೆ ಒಳಪಟ್ಟಿವೆ. ಮತ್ತಷ್ಟು ಸಂತಾನೋತ್ಪತ್ತಿಯನ್ನು ತಡೆಗಟ್ಟಲು ಈಗಾಗಲೇ ಸಾಕುಪ್ರಾಣಿಗಳಾಗಿ ಸಾಕಿರುವ ಅಂತಹ ನಾಯಿಗಳನ್ನು ನಿಯಂತ್ರಿಸಬೇಕೆಂದು ಸರ್ಕಾರ ನಿರ್ದೇಶಿಸಿದೆ.
