ಕೈತುಂಬಾ ಸಂಬಳ, ಪ್ರತಿಷ್ಠಿತ ಕಂಪನಿಯ ಉದ್ಯೋಗ, ಬೆಂಗಳೂರಿನ ನೆಮ್ಮದಿಯ ಜೀವನ… ಇವೆಲ್ಲವನ್ನೂ ಬದಿಗಿಟ್ಟು ಉದ್ಯಮದ ಕನಸು ಕಂಡ ವ್ಯಕ್ತಿಯೊಬ್ಬರು ಇಂದು ಕೋಟ್ಯಂತರ ರೂಪಾಯಿ ವ್ಯವಹಾರ ನಡೆಸುತ್ತಿದ್ದಾರೆ. Oracleನಲ್ಲಿ ತಿಂಗಳಿಗೆ ಸುಮಾರು ₹1 ಲಕ್ಷ ಸಂಬಳ ಪಡೆಯುತ್ತಿದ್ದ ಪ್ರದೀಪ್ ಕಣ್ಣನ್ 2019ರಲ್ಲಿ ಕೆಲಸ ತೊರೆದು ತಮಿಳುನಾಡಿನ ಕರೂರ್‌ಗೆ ಮರಳಿ ಕೇವಲ 10×10 ಅಡಿ ಕಿಯೋಸ್ಕ್‌ನಲ್ಲಿ ಫಾಲೂಡಾ ಮಾರಾಟ ಆರಂಭಿಸಿದರು. ಇಂದು ಅದೇ ಉದ್ಯಮ ‘ದಿ ಫಾಲೂಡಾ ಶಾಪ್’ ಎಂಬ ಬ್ರ್ಯಾಂಡ್ ಆಗಿ ಬೆಳೆದು, ಭಾರತ ಮತ್ತು ದುಬೈನಲ್ಲಿ ಮಳಿಗೆಗಳನ್ನು ಹೊಂದಿದ್ದು, ವಾರ್ಷಿಕ ₹9 ಕೋಟಿಗೂ ಅಧಿಕ ಆದಾಯ ಗಳಿಸುತ್ತಿದೆ.
ಹೌದು. ಮನಸಿದ್ದರೆ ಮಾರ್ಗ ಎಂಬುದಕ್ಕೆ ಈ ಸ್ಟೋರಿಯೇ ನಿದರ್ಶನ ಬೆಂಗಳೂರಿನಲ್ಲಿ ನೆಮ್ಮದಿಯ ಜೀವನ , ಆಕರ್ಷಕ ಸಂಬಳ ಇದ್ದರೂ ಅದು ಪ್ರದೀಪ್ ಕಣ್ಣನ್ ಅವರಿಗೆ ಸಾಕಾಗಲಿಲ್ಲ. 2019ರಲ್ಲಿ Oracle India ಸಂಸ್ಥೆಯಲ್ಲಿ ಕೆಲಸ ಮಾಡುತ್ತಿದ್ದ ಅವರು ತಮ್ಮ ಉದ್ಯೋಗವನ್ನು ತೊರೆದು ತಮಿಳುನಾಡಿನ ಕರೂರ್‌ನಲ್ಲಿರುವ ತಮ್ಮ ಊರಿಗೆ ಮರಳಿದರು. ಅಲ್ಲಿ ಫಾಲೂಡಾ ಮಾರಾಟದ ಸಣ್ಣ ಉದ್ಯಮವನ್ನು ಆರಂಭಿಸಿದರು.
ಆರು ವರ್ಷಗಳ ಬಳಿಕ, ಅವರು ಆರಂಭಿಸಿದ ಸಣ್ಣ ಉದ್ಯಮ ಇದೀಗ ‘ದಿ ಫಾಲೂಡಾ ಶಾಪ್’ ಎಂಬ ಡೆಸರ್ಟ್ ಆಧಾರಿತ ಕ್ವಿಕ್ ಸರ್ವಿಸ್ ರೆಸ್ಟೋರೆಂಟ್ (QSR) ಬ್ರ್ಯಾಂಡ್ ಆಗಿ ಬೆಳೆದಿದೆ. ಭಾರತ ಮತ್ತು ದುಬೈನಲ್ಲಿ ಇದರ ಮಳಿಗೆಗಳಿವೆ.ಫಲೂಡಾ ಎನ್ನುವುದು ಹಾಲು, ಸಬ್ಜಾ ಬೀಜಗಳು, ಶ್ಯಾವಿಗೆ (ನೂಡಲ್ಸ್), ಗುಲಾಬಿ ಸಿರಪ್ ಅಥವಾ ವಿವಿಧ ಹಣ್ಣಿನ ರಸಗಳು ಮತ್ತು ಐಸ್‌ಕ್ರೀಮ್ ಬಳಸಿ ತಯಾರಿಸುವ ಅತ್ಯಂತ ಜನಪ್ರಿಯ ಮತ್ತು ರುಚಿಕರವಾದ ತಣ್ಣನೆಯ ಸಿಹಿ ಪಾನೀಯವಾಗಿದೆ
10×10 ಅಡಿ ಕಿಯೋಸ್ಕ್‌ನಿಂದ ಆರಂಭ
ಕಣ್ಣನ್ ಅವರ ವೃತ್ತಿಜೀವನ ಆಹಾರ ಅಥವಾ ಹಾಸ್ಪಿಟಾಲಿಟಿ ಕ್ಷೇತ್ರದಿಂದ ಆರಂಭವಾಗಿರಲಿಲ್ಲ. ಅವರು ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಫ್ಯಾಷನ್ ಟೆಕ್ನಾಲಜಿ (NIFT)ಯಲ್ಲಿ ಬ್ಯಾಚುಲರ್ ಆಫ್ ಫ್ಯಾಷನ್ ಟೆಕ್ನಾಲಜಿ ಪದವಿ ಪಡೆದಿದ್ದರು. ಬಳಿಕ ಪೋಸ್ಟ್‌ಗ್ರಾಜುಯೇಟ್ ಮ್ಯಾನೇಜ್‌ಮೆಂಟ್ ಕಾರ್ಯಕ್ರಮವನ್ನೂ ಪೂರ್ಣಗೊಳಿಸಿದ್ದರು.
ಅವರ ವೃತ್ತಿಜೀವನದಲ್ಲಿ ಅಪ್ಯಾರಲ್ ಆಪರೇಷನ್ಸ್, ಸಪ್ಲೈ ಚೈನ್ ಮ್ಯಾನೇಜ್‌ಮೆಂಟ್, ದುಬೈನಲ್ಲಿ ಕೆಲಸ, Genpactನಲ್ಲಿ ಬಿಸಿನೆಸ್ ಅನಾಲಿಸಿಸ್ ಹಾಗೂ ನಂತರ Oracle Indiaನಲ್ಲಿ ಆಪರೇಷನ್ಸ್ ಲೀಡರ್‌ಶಿಪ್ ಹುದ್ದೆಗಳು ಸೇರಿದ್ದವು.
ಆದರೆ ಉದ್ಯಮ ಆರಂಭಿಸುವ ಆಲೋಚನೆ ಅವರಿಗೆ ಹೊಸದೇನಲ್ಲ. ‘ದಿ ಫಾಲೂಡಾ ಶಾಪ್’ ಆರಂಭಿಸುವ ಮೊದಲು ಬೆಂಗಳೂರಿನಲ್ಲಿ ಕುಲ್ಫಿ ಉದ್ಯಮವೊಂದನ್ನು ಪ್ರಯತ್ನಿಸಿದ್ದರು. ಒಂದು ಮಳಿಗೆ ಮುಚ್ಚಬೇಕಾದ ಪರಿಸ್ಥಿತಿ ಸೇರಿದಂತೆ ಹಲವು ಸವಾಲುಗಳಿಂದ ಆ ಉದ್ಯಮ ಕೊನೆಗೆ ಸ್ಥಗಿತಗೊಂಡಿತ್ತು.
ಆ ಅನುಭವದಿಂದ ಆಹಾರ ಉದ್ಯಮದಲ್ಲಿ ಸ್ಥಳದ ಆಯ್ಕೆ, ದಾಸ್ತಾನು ನಿರ್ವಹಣೆ, ಗ್ರಾಹಕರ ಬೇಡಿಕೆ ಹಾಗೂ ಉತ್ಪನ್ನದ ಗುಣಮಟ್ಟವನ್ನು ಒಂದೇ ರೀತಿಯಲ್ಲಿ ಕಾಯ್ದುಕೊಳ್ಳುವ ಸವಾಲುಗಳ ಬಗ್ಗೆ ಅವರಿಗೆ ಪ್ರಾಯೋಗಿಕ ಅರಿವು ದೊರೆಯಿತು.
2019ರಲ್ಲಿ ಮತ್ತೊಮ್ಮೆ ಪೂರ್ಣಾವಧಿಯಾಗಿ ಉದ್ಯಮಕ್ಕೆ ಇಳಿಯಲು ನಿರ್ಧರಿಸಿದರು. ಪತ್ನಿಯೊಂದಿಗೆ ಕರೂರ್‌ಗೆ ಮರಳಿದ ಅವರು ತಮ್ಮ ಉಳಿತಾಯ ಮತ್ತು ಕುಟುಂಬದ ಆಸ್ತಿಯನ್ನು ಉದ್ಯಮದಲ್ಲಿ ಹೂಡಿಕೆ ಮಾಡಿದರು. ಗಾಂಧಿಗ್ರಾಮ್ ಸಮೀಪ ಕೇವಲ 10×10 ಅಡಿ ಜಾಗದಲ್ಲಿ ಮೊದಲ ಕಿಯೋಸ್ಕ್ ಆರಂಭಿಸಿದರು.
ಉದ್ಯೋಗ ತೊರೆದಿದ್ದಕ್ಕೆ ಕೆಲವರು ತಮ್ಮನ್ನು ನೋಡಿ ನಕ್ಕಿದ್ದರು ಎಂದು ಕಣ್ಣನ್ ಅವರು Xನಲ್ಲಿ ಹಂಚಿಕೊಂಡ ಪೋಸ್ಟ್‌ನಲ್ಲಿ ಹೇಳಿದ್ದರು. ಉತ್ತಮ ಸಂಬಳ ಹಾಗೂ ಆರಾಮದಾಯಕ ಕುಟುಂಬ ಜೀವನವಿದ್ದರೂ ತಮ್ಮೊಳಗೆ ಏನೋ ಕೊರತೆಯಿತ್ತು ಎಂದು ಅವರು ವಿವರಿಸಿದ್ದರು.
ಫಲೂಡಾ ಮಾರಾಟಕ್ಕಿಂತ ದೊಡ್ಡದಾಗಿತ್ತು ಅವರ ಕನಸು
ಫಲೂಡಾ ಸಾಮಾನ್ಯ ಉತ್ಪನ್ನವಾಗಿದ್ದರೂ, ಕಣ್ಣನ್ ಅವರ ಉದ್ದೇಶ ಒಂದೇ ಅಂಗಡಿಗೆ ಸೀಮಿತವಾಗಿರಲಿಲ್ಲ. ವಿವಿಧ ಸ್ಥಳಗಳಲ್ಲಿ ಪುನರಾವರ್ತಿಸಬಹುದಾದಂತಹ ಒಂದು ಬ್ರ್ಯಾಂಡ್ ನಿರ್ಮಿಸುವುದು ಅವರ ಗುರಿಯಾಗಿತ್ತು.
‘ದಿ ಫಲೂಡಾ ಶಾಪ್’ ತನ್ನ ಅಧಿಕೃತ ವೆಬ್‌ಸೈಟ್‌ನಲ್ಲಿ ಭಾರತೀಯ ರುಚಿಗಳನ್ನು ಆಧರಿಸಿದ ಡೆಸರ್ಟ್-ಫಸ್ಟ್ QSR ಬ್ರ್ಯಾಂಡ್ ಎಂದು ವಿವರಿಸಿಕೊಂಡಿದೆ. ಕ್ಲಾಸಿಕ್ ಮತ್ತು ಲೇಯರ್ಡ್ ಫಾಲೂಡಾಗಳ ಜೊತೆಗೆ ಪಾನೀಯಗಳು, ವಿವಿಧ ಡೆಸರ್ಟ್‌ಗಳು ಹಾಗೂ ಕ್ಯಾನ್‌ನಲ್ಲಿ ಸಿದ್ಧವಾಗಿ ದೊರೆಯುವ ಫಾಲೂಡಾ ಉತ್ಪನ್ನಗಳನ್ನೂ ಬ್ರ್ಯಾಂಡ್ ನೀಡುತ್ತಿದೆ.
ಒಂದು ಅಂಗಡಿಯಿಂದ ದೊಡ್ಡ ಬ್ರ್ಯಾಂಡ್ ಆಗಿ ಬೆಳೆಯಲು ಕೇವಲ ಜನಪ್ರಿಯ ರೆಸಿಪಿ ಸಾಕಾಗಲಿಲ್ಲ. ಒಂದೇ ರೀತಿಯ ತಯಾರಿಕಾ ವಿಧಾನ, ಕಾರ್ಯಾಚರಣಾ ಕ್ರಮಗಳು, ಸಿಬ್ಬಂದಿ ತರಬೇತಿ ಮತ್ತು ಸರಬರಾಜು ವ್ಯವಸ್ಥೆಗಳನ್ನು ರೂಪಿಸುವುದು ಅಗತ್ಯವಾಯಿತು.
2020ರಲ್ಲಿ ಕರೂರ್‌ನಲ್ಲಿ ಮೊದಲ ಫ್ರಾಂಚೈಸಿ ಮಳಿಗೆ ಆರಂಭವಾಯಿತು ಎಂದು ಹಿಂದಿನ ಮಾಧ್ಯಮ ವರದಿಗಳಲ್ಲಿ ತಿಳಿಸಲಾಗಿದೆ. ನಂತರ ಫ್ರಾಂಚೈಸಿ ಮಾದರಿಯ ಮೂಲಕ ಬ್ರ್ಯಾಂಡ್ ತನ್ನ ತವರು ಪ್ರದೇಶದಾಚೆಗೂ ವಿಸ್ತರಿಸಿ, ಅಂತಿಮವಾಗಿ ದುಬೈಗೂ ತಲುಪಿತು.
ಫ್ರಾಂಚೈಸಿ ಮಾದರಿ ಹೇಗೆ ಕಾರ್ಯನಿರ್ವಹಿಸುತ್ತದೆ?
‘ದಿ ಫಾಲೂಡಾ ಶಾಪ್’ FOFO (Franchise Owned, Franchise Operated) ಮಾದರಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಅಂದರೆ ಫ್ರಾಂಚೈಸಿದಾರರು ಮಳಿಗೆಯ ಮಾಲೀಕರಾಗಿದ್ದು, ಅದನ್ನು ಸ್ವತಃ ನಿರ್ವಹಿಸುತ್ತಾರೆ. ಬ್ರ್ಯಾಂಡ್‌ನ ವ್ಯವಸ್ಥೆ, ತರಬೇತಿ ಮತ್ತು ಬೆಂಬಲವನ್ನು ಬಳಸಿಕೊಳ್ಳುತ್ತಾರೆ.
ಕಂಪನಿಯ ಫ್ರಾಂಚೈಸಿ ಮಾಹಿತಿಯ ಪ್ರಕಾರ, QSR ಮಳಿಗೆಗೆ ಸಾಮಾನ್ಯವಾಗಿ 300ರಿಂದ 500 ಚದರ ಅಡಿ ಜಾಗ ಬೇಕಾಗುತ್ತದೆ. ಹೂಡಿಕೆ ಸುಮಾರು ₹19–22 ಲಕ್ಷ ಎಂದು ತಿಳಿಸಲಾಗಿದೆ. ಸರಾಸರಿ ಆದಾಯದ ವ್ಯಾಪ್ತಿ ₹5–8 ಲಕ್ಷ ಎಂದು ಕಂಪನಿ ಹೇಳಿಕೊಂಡಿದ್ದು, ಹೂಡಿಕೆಯ ಮೇಲಿನ ಪ್ರತಿಫಲ ಪಡೆಯಲು 24–36 ತಿಂಗಳು ಬೇಕಾಗಬಹುದು ಎಂದು ತಿಳಿಸಿದೆ.
ಆದರೆ ಇವು ಕಂಪನಿ ನೀಡಿರುವ ಅಂಕಿ-ಅಂಶಗಳಾಗಿದ್ದು, ಸ್ವತಂತ್ರವಾಗಿ ಪರಿಶೀಲಿಸಲಾದ ಆದಾಯದ ಖಾತರಿಗಳಲ್ಲ.ಪ್ರತಿ ಹೊಸ ಮಳಿಗೆಯನ್ನೂ ಕಂಪನಿಯೇ ನಿರ್ವಹಿಸುವ ಬದಲು ಫ್ರಾಂಚೈಸಿ ಮೂಲಕ ವಿಸ್ತರಿಸುವುದು ಕಣ್ಣನ್ ಅವರಿಗೆ ವೇಗವಾಗಿ ಬೆಳೆಯಲು ನೆರವಾಯಿತು. ಇದರ ಜೊತೆಗೆ ಎಲ್ಲ ಮಳಿಗೆಗಳಲ್ಲೂ ಒಂದೇ ರೀತಿಯ ಗುಣಮಟ್ಟ ಮತ್ತು ಕಾರ್ಯವಿಧಾನವನ್ನು ಕಾಯ್ದುಕೊಳ್ಳುವುದು ಪ್ರಮುಖವಾಯಿತು.
ಈಗ D2C ಐಸ್‌ಕ್ರೀಂ ಬ್ರ್ಯಾಂಡ್‌ನತ್ತ ಹೆಜ್ಜೆ
ಕಣ್ಣನ್ ಅವರ ಉದ್ಯಮದ ಗುರಿ ಇದೀಗ ಭೌತಿಕ ಡೆಸರ್ಟ್ ಮಳಿಗೆಗಳಿಗೆ ಮಾತ್ರ ಸೀಮಿತವಾಗಿಲ್ಲ.ಅವರ X ಪ್ರೊಫೈಲ್‌ನಲ್ಲಿ, ತಾವು ಜಾಗತಿಕ D2C (Direct-to-Consumer) ಐಸ್‌ಕ್ರೀಂ ಬ್ರ್ಯಾಂಡ್ ಅನ್ನು ಆರಂಭದಿಂದ ನಿರ್ಮಿಸುತ್ತಿರುವುದಾಗಿ ತಿಳಿಸಿದ್ದಾರೆ. ‘ದಿ ಫಾಲೂಡಾ ಶಾಪ್’ ವೆಬ್‌ಸೈಟ್‌ನಲ್ಲೂ ಸಿದ್ಧವಾಗಿ ಸೇವಿಸಬಹುದಾದ ಕ್ಯಾನ್ ಫಾಲೂಡಾ ಉತ್ಪನ್ನವನ್ನು ಪರಿಚಯಿಸಿರುವುದಾಗಿ ಹೇಳಲಾಗಿದೆ.
ಉದ್ಯೋಗ ತೊರೆದು ಕನಸನ್ನು ಬೆನ್ನಟ್ಟಿದ ಕಥೆಯಾಗಿ ಕಣ್ಣನ್ ಅವರ ಪ್ರಯಾಣವನ್ನು ಸಾಮಾನ್ಯವಾಗಿ ಬಿಂಬಿಸಲಾಗುತ್ತದೆ. ಆದರೆ ಅವರ ಯಶಸ್ಸಿನ ಮತ್ತೊಂದು ಪ್ರಮುಖ ಅಂಶವೆಂದರೆ ಉದ್ಯೋಗದಲ್ಲಿ ಗಳಿಸಿದ ಅನುಭವವನ್ನು ಉದ್ಯಮದಲ್ಲಿ ಬಳಸಿಕೊಂಡಿರುವುದು.Oracleನಲ್ಲಿ ಗಳಿಸಿದ ಆಪರೇಷನ್ಸ್, ಬೇಡಿಕೆ ಯೋಜನೆ, ಸಪ್ಲೈ ಚೈನ್ ಮತ್ತು ಪ್ರಕ್ರಿಯೆ ನಿರ್ವಹಣೆಯಂತಹ ಕೌಶಲ್ಯಗಳು ಆಹಾರ ಉದ್ಯಮವನ್ನು ದೊಡ್ಡ ಮಟ್ಟದಲ್ಲಿ ವಿಸ್ತರಿಸಲು ಅವರಿಗೆ ನೆರವಾಗಿವೆ.
ಕರೂರ್‌ನ ಸಣ್ಣ ಕಿಯೋಸ್ಕ್‌ನಲ್ಲಿ ಆರಂಭವಾದ ಉದ್ಯಮ ಇದೀಗ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಮಳಿಗೆ ಹೊಂದಿರುವ ಡೆಸರ್ಟ್ ಬ್ರ್ಯಾಂಡ್ ಆಗಿ ಬೆಳೆದಿದೆ. ಈಗ ಫ್ರಾಂಚೈಸಿ ಮಳಿಗೆಗಳಿಂದ ಗ್ರಾಹಕ ಉತ್ಪನ್ನಗಳತ್ತ ಹಾಗೂ ಜಾಗತಿಕ ಮಾರುಕಟ್ಟೆಯತ್ತ ಹೆಜ್ಜೆ ಇಡುವುದು ಕಣ್ಣನ್ ಅವರ ಮುಂದಿನ ಗುರಿಯಾಗಿದೆ. 2025ರ ಡಿಸೆಂಬರ್‌ನಲ್ಲಿ ‘ದಿ ಫಾಲೂಡಾ ಶಾಪ್’ ವಾರ್ಷಿಕವಾಗಿ ₹9 ಕೋಟಿಗೂ ಅಧಿಕ ಆದಾಯ ಗಳಿಸುತ್ತಿತ್ತು.
