ಲಾಸ್ ಏಂಜಲೀಸ್: ಅಮೆರಿಕದ ಲಾಸ್ ಏಂಜಲೀಸ್‌ನಲ್ಲಿ ಭೀಕರ ಅಪಘಾತವೊಂದು ಸಂಭವಿಸಿದೆ. ಮಾರಣಾಂತಿಕ ಮೆಟ್ರೋ ಬಸ್ ಅಪಘಾತದ ಕುರಿತು ಲೈವ್ ಕವರೇಜ್ ನೀಡುತ್ತಿದ್ದ ವೇಳೆ ಟಿವಿ ನ್ಯೂಸ್ ಹೆಲಿಕಾಪ್ಟರ್ ಪತನಗೊಂಡಿದ್ದು, ಘಟನೆಯಲ್ಲಿ ಮೂವರು ಮೃತಪಟ್ಟಿದ್ದಾರೆ. ಮೃತರಲ್ಲಿ ನೆಲದ ಮೇಲಿದ್ದ ಒಬ್ಬ ವ್ಯಕ್ತಿಯೂ ಸೇರಿದ್ದಾರೆ ಎಂದು ಲಾಸ್ ಏಂಜಲೀಸ್ ಅಗ್ನಿಶಾಮಕ ಇಲಾಖೆ (LAFD) ತಿಳಿಸಿದೆ.
ಅಪಘಾತದಲ್ಲಿ ಗಾಯಗೊಂಡ ಮತ್ತೊಬ್ಬ ವ್ಯಕ್ತಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗಿದೆ. ಹೆಲಿಕಾಪ್ಟರ್‌ನಲ್ಲಿದ್ದ ಸಿಬ್ಬಂದಿಯ ಬಗ್ಗೆ ಸದ್ಯಕ್ಕೆ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಎರಡು ಕಟ್ಟಡಗಳ ನಡುವೆ ಪತನ
NBC Los Angeles (KNBC-TV)ಗೆ ಸೇರಿದ ಹೆಲಿಕಾಪ್ಟರ್‌ವು ಸ್ಯಾನ್ ಫೆರ್ನಾಂಡೊ ವ್ಯಾಲಿಯ ನಾರ್ತಾಫ್ ಸ್ಟ್ರೀಟ್ ಮತ್ತು ಡಿ ಸೋಟೊ ಅವೆನ್ಯೂ ಜಂಕ್ಷನ್‌ ಬಳಿ ಪತನಗೊಂಡಿದೆ. ಇದೇ ಪ್ರದೇಶದಲ್ಲಿ ಕೆಲವೇ ಸಮಯದ ಹಿಂದೆ ಮೆಟ್ರೋ ಬಸ್ ಮತ್ತು SUV ನಡುವೆ ಅಪಘಾತ ಸಂಭವಿಸಿತ್ತು.ಹೆಲಿಕಾಪ್ಟರ್ ಎರಡು ಕಟ್ಟಡಗಳ ನಡುವಿನ ಪ್ರದೇಶಕ್ಕೆ ಪತನಗೊಂಡಿದ್ದು, ಎರಡು ಶಿಪ್ಪಿಂಗ್ ಕಂಟೇನರ್‌ಗಳು ಹಾಗೂ ಅಲ್ಲಿದ್ದ ಹಲವು ವಾಹನಗಳ ಮೇಲೆ ಬಿದ್ದಿದೆ ಎಂದು ವರದಿಯಾಗಿದೆ. ಹೆಲಿಕಾಪ್ಟರ್ ಪತನದ ಬಳಿಕ ಸ್ಥಳದಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡಿದ್ದು, ಲಾಸ್ ಏಂಜಲೀಸ್ ಅಗ್ನಿಶಾಮಕ ಸಿಬ್ಬಂದಿ ಸ್ಥಳಕ್ಕೆ ಧಾವಿಸಿ ಬೆಂಕಿ ನಂದಿಸುವ ಕಾರ್ಯಾಚರಣೆ ನಡೆಸಿದರು.
ಬಸ್ ಅಪಘಾತದ ಕವರೇಜ್ ನೀಡುತ್ತಿದ್ದ ಹೆಲಿಕಾಪ್ಟರ್
ಪತನಗೊಂಡ ಹೆಲಿಕಾಪ್ಟರ್‌ವು ಕೆಲವೇ ಸಮಯದ ಹಿಂದೆ ಸಂಭವಿಸಿದ್ದ ಮೆಟ್ರೋ ಬಸ್ ಅಪಘಾತದ ವೈಮಾನಿಕ ದೃಶ್ಯಗಳನ್ನು ಸೆರೆಹಿಡಿಯುತ್ತಿತ್ತು. ನಾರ್ತಾಫ್ ಸ್ಟ್ರೀಟ್ ಮತ್ತು ಡಿ ಸೋಟೊ ಅವೆನ್ಯೂ ಬಳಿ ಮೆಟ್ರೋ ಬಸ್ ಮತ್ತು SUV ನಡುವೆ ಡಿಕ್ಕಿ ಸಂಭವಿಸಿತ್ತು.
ಈ ಬಸ್ ಅಪಘಾತದಲ್ಲಿ ಕನಿಷ್ಠ ಇಬ್ಬರು ಮೃತಪಟ್ಟಿದ್ದು, ಹಲವರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ. ಅಪಘಾತದ ಬಳಿಕ ಬಸ್‌ನಲ್ಲಿ ಸಿಲುಕಿದ್ದವರನ್ನು ರಕ್ಷಿಸಲು ಅಗ್ನಿಶಾಮಕ ಸಿಬ್ಬಂದಿ ಕಾರ್ಯಾಚರಣೆ ನಡೆಸುತ್ತಿದ್ದರು.
ಅಪಘಾತದ ಕಾರಣದ ಬಗ್ಗೆ ತನಿಖೆ
ಹೆಲಿಕಾಪ್ಟರ್ ಪತನಕ್ಕೆ ನಿಖರ ಕಾರಣ ಇನ್ನೂ ತಿಳಿದುಬಂದಿಲ್ಲ. ಘಟನೆಗೆ ಸಂಬಂಧಿಸಿದಂತೆ ಅಧಿಕಾರಿಗಳು ತನಿಖೆ ಆರಂಭಿಸಿದ್ದಾರೆ.ಈ ಹೆಲಿಕಾಪ್ಟರ್‌ನ್ನು NBC Los Angeles, ಅಂದರೆ NBC4 ಅಥವಾ KNBC-TV ನಿರ್ವಹಿಸುತ್ತಿತ್ತು. KNBCಯನ್ನು NBCಯ ಪಶ್ಚಿಮ ಕರಾವಳಿಯ ಪ್ರಮುಖ ಸ್ಟೇಷನ್ ಎಂದು ಗುರುತಿಸಲಾಗಿದೆ. ಹೆಲಿಕಾಪ್ಟರ್‌ನಲ್ಲಿದ್ದ ಸಿಬ್ಬಂದಿಯ ಸ್ಥಿತಿ ಸೇರಿದಂತೆ ಘಟನೆಯ ಸಂಪೂರ್ಣ ವಿವರಗಳನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.
ಮಹಿಳೆಗೆ ಕಾರು ಡಿಕ್ಕಿ
ಗುರುಗ್ರಾಮ್‌ನ ಗಾಲ್ಫ್ ಕೋರ್ಸ್ ರಸ್ತೆಯಲ್ಲಿ ಬೈಕ್‌ನಲ್ಲಿ ತೆರಳುತ್ತಿದ್ದ ಮಹಿಳೆಗೆ ಕಾರು ಡಿಕ್ಕಿ ಹೊಡೆದು ಪರಾರಿಯಾದ ಆರೋಪಕ್ಕೆ ಸಂಬಂಧಿಸಿದಂತೆ ಆರೋಪಿ ಕಲ್ಯಾಣ್ ಬೈನ್ಸ್ಲಾನನ್ನು ರಾಜಸ್ಥಾನದ ದೌಸಾದಲ್ಲಿ ಗುರುಗ್ರಾಮ್ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಪ್ರಕರಣದಲ್ಲಿ ಇದೀಗ ಕೊಲೆ ಯತ್ನದ ಆರೋಪವನ್ನೂ ಸೇರ್ಪಡೆ ಮಾಡಲಾಗಿದೆ.
ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆದ ಬಳಿಕ ಪೊಲೀಸರು ಸ್ವಯಂಪ್ರೇರಿತವಾಗಿ ಪ್ರಕರಣ ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದರು. ಸಿಸಿಟಿವಿ ದೃಶ್ಯಾವಳಿಗಳ ಪರಿಶೀಲನೆ ಬಳಿಕ ಕೊಲೆ ಯತ್ನದ ಆರೋಪವನ್ನು ಸೇರಿಸಲಾಗಿದೆ. ಕಲ್ಯಾಣ್ ಬೈನ್ಸ್ಲಾನನ್ನು ಹೆಚ್ಚಿನ ವಿಚಾರಣೆಗಾಗಿ ಗುರುಗ್ರಾಮ್ ಪೊಲೀಸರು ದೌಸಾದಿಂದ ಗುರುಗ್ರಾಮ್‌ಗೆ ಕರೆತರಲಿದ್ದಾರೆ.
ಕೊಲೆ ಯತ್ನದ ಸೆಕ್ಷನ್ 109 ಅಡಿ ಪ್ರಕರಣ
ಪೊಲೀಸರು ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 109 ಅಡಿಯಲ್ಲಿ ಕೊಲೆ ಯತ್ನದ ಆರೋಪ ದಾಖಲಿಸಿದ್ದಾರೆ. ಈ ಸೆಕ್ಷನ್ ಅಡಿ ಗರಿಷ್ಠ 10 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸಬಹುದಾಗಿದೆ.
ಈ ಪ್ರಕರಣದಲ್ಲಿ ಆರಂಭದಲ್ಲಿ BNS ಸೆಕ್ಷನ್ 281 (ಅಜಾಗರೂಕ/ಅಪಾಯಕಾರಿ ಚಾಲನೆ) ಮತ್ತು ಸೆಕ್ಷನ್ 125 (ಗಾಯ ಉಂಟುಮಾಡುವುದು) ಅಡಿಯಲ್ಲಿ ಪ್ರಕರಣ ದಾಖಲಾಗಿತ್ತು. ಆರೋಪಿಯನ್ನು ಬಂಧಿಸಲು ಮೂರು ಪೊಲೀಸ್ ತಂಡಗಳನ್ನು ರಚಿಸಲಾಗಿತ್ತು.
ಮಹಿಳಾ ಬೈಕರ್‌ಗೆ ಕಾರು ಡಿಕ್ಕಿ
ಈ ಘಟನೆ ಭಾನುವಾರ ಗಾಲ್ಫ್ ಕೋರ್ಸ್ ರಸ್ತೆಯಲ್ಲಿ ನಡೆದಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಸಿಯಾ ಎಂಬ ಹೆಸರಿನಿಂದ ಗುರುತಿಸಿಕೊಂಡಿರುವ ಮಹಿಳೆ ಏಪ್ರಿಲಿಯಾ RS 457 ಬೈಕ್‌ನಲ್ಲಿ ಇತರ ಬೈಕರ್‌ಗಳೊಂದಿಗೆ ತೆರಳುತ್ತಿದ್ದರು.
ಬೈಕ್‌ಗಳಿಗೆ ಅಳವಡಿಸಲಾಗಿದ್ದ ಕ್ಯಾಮೆರಾಗಳಲ್ಲಿ ಸೆರೆಯಾದ ದೃಶ್ಯಗಳ ಪ್ರಕಾರ, ಕಾರೊಂದು ಬೈಕರ್‌ಗಳ ಗುಂಪಿನ ಸಮೀಪ ಬಂದು ಸಿಯಾ ಅವರ ಬೈಕ್‌ಗೆ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ರಭಸಕ್ಕೆ ಅವರು ಬೈಕ್‌ನಿಂದ ಕೆಳಗೆ ಬಿದ್ದು ರಸ್ತೆಯಲ್ಲಿ ಹಲವು ಮೀಟರ್‌ಗಳಷ್ಟು ದೂರ ಜಾರಿದ್ದಾರೆ.
ಸಿಯಾಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ದೈಹಿಕ ನೋವಿನ ಜೊತೆಗೆ ಘಟನೆಯ ಆಘಾತದಿಂದ ಮಾನಸಿಕವಾಗಿಯೂ ತೊಂದರೆ ಅನುಭವಿಸುತ್ತಿರುವುದಾಗಿ ಅವರು ಹೇಳಿದ್ದಾರೆ.
CNN-News18ಗೆ ಮಾತನಾಡಿದ ಸಿಯಾ, “ನನ್ನ ಮೊಣಕಾಲುಗಳು ನೋಯುತ್ತಿವೆ. ಇಡೀ ದೇಹ ನೋಯುತ್ತಿದೆ. ನಾನು ಶೀಘ್ರ ಗುಣಮುಖರಾಗಲು ಬಯಸುತ್ತೇನೆ. ನಾನು ತೀವ್ರ ಆಘಾತಕ್ಕೊಳಗಾಗಿದ್ದೇನೆ” ಎಂದು ಹೇಳಿದ್ದಾರೆ.
ಘಟನೆಗೂ ಮುನ್ನ ಕಾರಿನ ಚಾಲಕನ ವರ್ತನೆಯ ಬಗ್ಗೆಯೂ ಅವರು ಮಾತನಾಡಿದ್ದಾರೆ.
“ಗಾಲ್ಫ್ ಕೋರ್ಸ್ ರಸ್ತೆಯಲ್ಲಿ ಕಾರು ಯಾವಾಗ ನಮ್ಮ ಬಳಿ ಬಂತು ಎಂಬುದೇ ನನಗೆ ಗೊತ್ತಿಲ್ಲ. ಮೊದಲು ಆತ ಥಂಬ್ಸ್‌ಅಪ್ ತೋರಿಸಿದ. ನಂತರ ವಿಚಿತ್ರ ಸನ್ನೆಗಳನ್ನು ಮಾಡುತ್ತಿದ್ದ” ಎಂದು ಸಿಯಾ ಹೇಳಿದ್ದಾರೆ.
ಕಾರಿನಲ್ಲಿದ್ದವರು ತಮ್ಮ ಗುಂಪನ್ನು ಹಿಂಬಾಲಿಸಿ ಬೈಕ್ ಸಮೀಪ ಬಂದಿದ್ದರು. ಕಾರು ಚಾಲಕನಿಗೆ ಅಂತರ ಕಾಯ್ದುಕೊಳ್ಳುವಂತೆ ಹೇಳಿದಾಗ ನಿಲ್ಲಿಸುವಂತೆ ಸೂಚಿಸಿ ಅಸಭ್ಯವಾಗಿ ವರ್ತಿಸಿದ್ದರು ಎಂದು ಸಿಯಾ ಸಾಮಾಜಿಕ ಜಾಲತಾಣದಲ್ಲಿ ಆರೋಪಿಸಿದ್ದರು. ಅಲ್ಲದೆ, ಕಾರಿನಲ್ಲಿದ್ದವರು ಮದ್ಯದ ಅಮಲಿನಲ್ಲಿದ್ದಂತೆ ಕಂಡುಬಂದಿದ್ದರು ಎಂದೂ ಅವರು ಆರೋಪಿಸಿದ್ದರು.
ವಿಡಿಯೋದಲ್ಲಿ ಕಾರು ಸಿಯಾ ಅವರ ಬೈಕ್‌ಗೆ ಡಿಕ್ಕಿ ಹೊಡೆದು ಬಳಿಕ ಅಲ್ಲಿಂದ ತೆರಳಿರುವುದು ಕಾಣಿಸುತ್ತದೆ.
ಡಿಕ್ಕಿಯಾಗಿರುವುದನ್ನು ಒಪ್ಪಿಕೊಂಡ ಆರೋಪಿ; ಉದ್ದೇಶಪೂರ್ವಕವಲ್ಲ ಎಂದ ವಾದ
ಜಿಮ್ ಮಾಲೀಕರಾಗಿರುವ ಹಾಗೂ ತಾನು ಅಂತಾರಾಷ್ಟ್ರೀಯ ಕಬಡ್ಡಿ ಆಟಗಾರ ಎಂದು ಹೇಳಿಕೊಂಡಿರುವ ಕಲ್ಯಾಣ್ ಬೈನ್ಸ್ಲಾ, ಕಾರಿಗೆ ಡಿಕ್ಕಿಯಾಗಿರುವುದು ನಿಜ ಎಂದು ಒಪ್ಪಿಕೊಂಡಿದ್ದರೂ, ಉದ್ದೇಶಪೂರ್ವಕವಾಗಿ ಬೈಕ್‌ಗೆ ಡಿಕ್ಕಿ ಹೊಡೆದಿಲ್ಲ ಎಂದು ಹೇಳಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಅವರು, ಘಟನೆ ನಡೆದಾಗ ತಮ್ಮ ಸಹೋದರಿ ಹಾಗೂ ಇಬ್ಬರು ಸಂಬಂಧಿಕರು ಕಾರಿನಲ್ಲಿದ್ದರು ಎಂದು ತಿಳಿಸಿದ್ದಾರೆ.
“ನಾನು ಕುಟುಂಬದವರೊಂದಿಗೆ ಪ್ರಯಾಣಿಸುತ್ತಿದ್ದೆ. ಯುವತಿಗೆ ನಾನು ಯಾವುದೇ ಸನ್ನೆ ಮಾಡಿಲ್ಲ. ಬೈಕ್ ಅನ್ನು ನಿಧಾನವಾಗಿ ಚಲಾಯಿಸುವಂತೆ ಮಾತ್ರ ಹೇಳಿದ್ದೆ. ಡಿಕ್ಕಿ ಸಂಭವಿಸಿರುವುದನ್ನು ಒಪ್ಪಿಕೊಳ್ಳುತ್ತೇನೆ. ಆಗಲೇ ನಾನು ಕಾರು ನಿಲ್ಲಿಸಿದ್ದರೆ, ಆ ಜನರು ನಮ್ಮನ್ನು ಹೊಡೆಯುತ್ತಿದ್ದರು” ಎಂದು ಬೈನ್ಸ್ಲಾ ಹೇಳಿದ್ದಾರೆ.
ಸುಮಾರು 20ರಿಂದ 22 ಮಂದಿ ಬೈಕರ್‌ಗಳು ತಮ್ಮ ಕಾರನ್ನು ಹಿಂದಿಕ್ಕಿದ್ದರು. ಅವರಲ್ಲಿ ಮಹಿಳೆಯೊಬ್ಬರು ಇದ್ದಾರೆ ಎಂಬುದು ಆರಂಭದಲ್ಲಿ ಗಮನಕ್ಕೆ ಬಂದಿರಲಿಲ್ಲ ಎಂದು ಅವರು ಹೇಳಿದ್ದಾರೆ.
“ಅವರು ಮಿರರ್ ನೋಡದೆ ಬೈಕ್ ತಿರುಗಿಸುತ್ತಿದ್ದರು. ಯೂ-ಟರ್ನ್ ಬಳಿ ನಾನು ಕಾರಿನ ನಿಯಂತ್ರಣ ಕಳೆದುಕೊಂಡೆ. ಆಗ ಡಿಕ್ಕಿ ಸಂಭವಿಸಿತು. ಅದು ನನ್ನ ತಪ್ಪು, ನಾನು ಒಪ್ಪಿಕೊಳ್ಳುತ್ತೇನೆ” ಎಂದು ಅವರು ಹೇಳಿದ್ದಾರೆ.
ಡಿಕ್ಕಿಯ ಬಳಿಕ ಕಾರು ನಿಲ್ಲಿಸುವ ಬಗ್ಗೆ ಯೋಚಿಸಿದ್ದೆ. ಆದರೆ ಬೈಕರ್‌ಗಳು ನಿಂದಿಸಿದ್ದರಿಂದ ನಿಲ್ಲಿಸದೆ ತೆರಳಲು ನಿರ್ಧರಿಸಿದೆ ಎಂದು ಬೈನ್ಸ್ಲಾ ತಿಳಿಸಿದ್ದಾರೆ.“ನನ್ನ ಕುಟುಂಬದವರು ನನ್ನೊಂದಿಗೆ ಇದ್ದರು. ನಾವು ನಿಂತರೆ ಅವರು ನಮ್ಮನ್ನು ಹೊಡೆಯಬಹುದು ಎಂಬ ಭಯವಿತ್ತು. ಕೆಂಪು ಸಿಗ್ನಲ್‌ನಲ್ಲಿ ನಾನು ಕಾರು ನಿಲ್ಲಿಸಿ ಅವರೊಂದಿಗೆ ಮಾತನಾಡಲು ಪ್ರಯತ್ನಿಸಿದ್ದೆ. ಇದು ನನ್ನ ತಪ್ಪಲ್ಲ ಎಂದು ವಿವರಿಸಿದ್ದೆ. ನಂತರ ನನ್ನ ಸಹೋದರ ಅಲ್ಲಿ ನಿಲ್ಲಲು ನಿರಾಕರಿಸಿದ” ಎಂದು ಹೇಳಿದ್ದಾರೆ.
“ನನ್ನ ವಿರುದ್ಧ ಈ ಹಿಂದೆ ಒಂದೇ ಒಂದು ಪ್ರಕರಣವೂ ಇಲ್ಲ. ಈಗ ನನ್ನನ್ನು ಕಿರುಕುಳ ನೀಡಲಾಗುತ್ತಿದೆ” ಎಂದೂ ಅವರು ಹೇಳಿದ್ದಾರೆ.
ಮಹಿಳೆ 140-170 ಕಿ.ಮೀ ವೇಗದಲ್ಲಿ ಬೈಕ್ ಚಲಾಯಿಸುತ್ತಿದ್ದರು: ಆರೋಪಿ ಪರ ವಕೀಲ
ಬೈನ್ಸ್ಲಾ ಪರ ವಕೀಲ ನವೀನ್ ಬೈನ್ಸ್ಲಾ ಮಾತನಾಡಿ, ಘಟನೆ ನಡೆದಾಗ ತಮ್ಮ ಕಕ್ಷಿದಾರರು ಕುಟುಂಬದವರೊಂದಿಗೆ ದೆಹಲಿಯ ಸಂಬಂಧಿಕರ ಮನೆಯಿಂದ ವಾಪಸ್ ಬರುತ್ತಿದ್ದರು ಎಂದು ಹೇಳಿದ್ದಾರೆ.
“ಸುಮಾರು 25 ಮಂದಿ ಬೈಕ್ ಸವಾರರು ನಿರಂತರವಾಗಿ ನನ್ನ ಕಕ್ಷಿದಾರರ ಕಾರನ್ನು ಹಿಂದಿಕ್ಕುತ್ತಿದ್ದರು. ಮಹಿಳೆ ಗಂಟೆಗೆ 140ರಿಂದ 170 ಕಿ.ಮೀ ವೇಗದಲ್ಲಿ ಬೈಕ್ ಚಲಾಯಿಸುತ್ತಿದ್ದರು. ಅವರು ಬಲಕ್ಕೆ ತಿರುಗಿದಾಗ ನನ್ನ ಕಕ್ಷಿದಾರ ಎಡಕ್ಕೆ ತಿರುಗಿದರು. ಇದರಿಂದ ಡಿಕ್ಕಿ ಸಂಭವಿಸಿತು” ಎಂದು ವಕೀಲರು ಹೇಳಿದ್ದಾರೆ.
ಕಾರಿನ ಮಾಲೀಕ ಸೇನೆಯಲ್ಲಿರುವ ವ್ಯಕ್ತಿ
ಘಟನೆಯಲ್ಲಿ ಬಳಸಲಾದ ಕಾರು ಮನೀಶ್ ಎಂಬವರ ಹೆಸರಿನಲ್ಲಿ ನೋಂದಣಿಯಾಗಿದೆ. ಆದರೆ ಘಟನೆ ವೇಳೆ ತಾವು ಕಾರು ಚಲಾಯಿಸುತ್ತಿರಲಿಲ್ಲ ಎಂದು ಅವರು ಹೇಳಿದ್ದಾರೆ.“ನಾನು ಸೇನೆಯಲ್ಲಿ ಕೆಲಸ ಮಾಡುತ್ತೇನೆ. ಹೌದು, ಅದು ನನ್ನ ವಾಹನ. ನಾನು ಕೆಲಸದಲ್ಲಿದ್ದೆ. ನನ್ನ ಸ್ನೇಹಿತ ಕಲ್ಯಾಣ್ ಸಿಂಗ್ ನನ್ನ ಕಾರನ್ನು ತೆಗೆದುಕೊಂಡು ಹೋಗಿದ್ದ” ಎಂದು ಮನೀಶ್ ಹೇಳಿದ್ದಾರೆ.
ಮನೀಶ್ ಅವರ ಚಿಕ್ಕಪ್ಪ ಕರ್ತಾರ್ ಪೊಸ್ವಾಲ್ ಕೂಡ ಬೈನ್ಸ್ಲಾ ಕಾರನ್ನು ತೆಗೆದುಕೊಂಡು ಹೋಗಿದ್ದರು ಎಂದು ಹೇಳಿದ್ದಾರೆ. ಅವರು ಎಲ್ಲಿದ್ದಾರೆ ಎಂಬ ಮಾಹಿತಿ ಕುಟುಂಬದವರಿಗೆ ಇರಲಿಲ್ಲ ಎಂದು ತಿಳಿಸಿದ್ದಾರೆ.
