ದೆಹಲಿ ಪ್ರೀಮಿಯರ್ ಲೀಗ್ (ಡಿಪಿಎಲ್) 2026ರ ಮಹಿಳಾ ಟೂರ್ನಿಯ ಉದ್ಘಾಟನಾ ಪಂದ್ಯದಲ್ಲೇ ಯುವ ಲೆಗ್ ಸ್ಪಿನ್ನರ್ ಮೇಧಾವಿ ಬಿಧುರಿ ತಮ್ಮ ಅದ್ಭುತ ಬೌಲಿಂಗ್ ಹಾಗೂ ವಿಶಿಷ್ಟವಾದ ಸಂಭ್ರಮಾಚರಣೆಯ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಸದ್ದು ಮಾಡುತ್ತಿದ್ದಾರೆ. ಸೆಂಟ್ರಲ್ ಡೆಲ್ಲಿ ಕ್ವೀನ್ಸ್ ತಂಡವನ್ನು ಪ್ರತಿನಿಧಿಸುತ್ತಿರುವ 20 ವರ್ಷದ ಈ ಆಟಗಾರ್ತಿ, ದಕ್ಷಿಣ ಡೆಲ್ಲಿ ಸೂಪರ್‌ಸ್ಟಾರ್ಸ್ ವಿರುದ್ಧದ ಪಂದ್ಯದಲ್ಲಿ ವಿಕೆಟ್ ಪಡೆದ ನಂತರ ಮಾಡಿದ ‘6-7’ ಹಸ್ತಮುದ್ರೆ ವೈರಲ್ ಆಗಿದ್ದು, ಕ್ರೀಡಾಭಿಮಾನಿಗಳ ಗಮನ ಸೆಳೆದಿದೆ.
ಆಗಸ್ಟ್ 20 ರಂದು ನಡೆದ ಪಂದ್ಯದಲ್ಲಿ ದಕ್ಷಿಣ ಡೆಲ್ಲಿ ಸೂಪರ್‌ಸ್ಟಾರ್ಸ್ ಬ್ಯಾಟರ್ ನಿಶಿಕಾ ಸಿಂಗ್ ಅವರ ವಿಕೆಟ್ ಪಡೆದ ಮೇಧಾವಿ, ಎರಡು ಕೈಗಳನ್ನು ಮೇಲಕ್ಕೆ ಕೆಳಕ್ಕೆ ಆಡಿಸುತ್ತಾ ‘ಸಿಕ್ಸ್-ಸೆವೆನ್’ ಎಂದು ಆಚರಿಸಿದರು. ಈ ಪಂದ್ಯದಲ್ಲಿ ಅವರು 24 ರನ್ ನೀಡಿ 2 ಪ್ರಮುಖ ವಿಕೆಟ್ ಕಸಿದುಕೊಂಡರು. ಪಂದ್ಯವನ್ನು ದಕ್ಷಿಣ ಡೆಲ್ಲಿ ತಂಡ 29 ರನ್‌ಗಳಿಂದ ಗೆದ್ದುಕೊಂಡರೂ, ಮೇಧಾವಿ ಅವರ ಈ ಆಚರಣೆ ಮಾತ್ರ ಇಂಟರ್ನೆಟ್‌ನಲ್ಲಿ ತೀವ್ರ ಸಂಚಲನ ಮೂಡಿಸಿದೆ.
ಯಾರು ಈ ಮೇಧಾವಿ ಬಿಧುರಿ?
ಮೇಧಾವಿ ಬಿಧುರಿ ದೆಹಲಿ ದೇಶೀಯ ಕ್ರಿಕೆಟ್‌ನಲ್ಲಿ ಹೊಸಬರೇನಲ್ಲ. ದೆಹಲಿ ಮತ್ತು ಜಿಲ್ಲಾ ಕ್ರಿಕೆಟ್ ಸಂಸ್ಥೆಯ (ಡಿಡಿಸಿಎ) ನಿಯಮಿತ ಆಟಗಾರ್ತಿಯಾಗಿರುವ ಇವರು ಬಲಗೈ ಲೆಗ್ ಸ್ಪಿನ್ನರ್ ಆಗಿ ಗುರುತಿಸಿಕೊಂಡಿದ್ದಾರೆ. ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯೂಪಿಎಲ್) 2024ರ ಹರಾಜು ಪಟ್ಟಿಯಲ್ಲೂ ಇವರ ಹೆಸರಿತ್ತು. ಕಳೆದ ವರ್ಷದ ಡಿಪಿಎಲ್ 2025 ರ ಫೈನಲ್ ಪಂದ್ಯದಲ್ಲಿ ದಕ್ಷಿಣ ಡೆಲ್ಲಿ ಸೂಪರ್‌ಸ್ಟಾರ್ಸ್ ಪರ ಆಡಿದ್ದ ಇವರು, 26 ರನ್ ನೀಡಿ 3 ವಿಕೆಟ್ ಕಬಳಿಸಿ ಮಿಂಚಿದ್ದರು.
ಏನಿದು ‘6-7’ ಸಂಭ್ರಮಾಚರಣೆ?
ಸಾಮಾಜಿಕ ಜಾಲತಾಣಗಳಲ್ಲಿ ಜೆನ್ ಝೀ ಮತ್ತು ಜೆನ್ ಆಲ್ಫಾ ಯುವಜನರ ನಡುವೆ ‘6-7′ ಎಂಬುದು ಅತ್ಯಂತ ಜನಪ್ರಿಯ ಮೀಮ್ ಆಗಿದೆ. ಯಾವುದೇ ನಿರ್ದಿಷ್ಟ ಅರ್ಥವಿಲ್ಲದಿದ್ದರೂ, ಎರಡೂ ಕೈಗಳನ್ನು ಸೀಸಾದಂತೆ ಮೇಲಕ್ಕೆ ಕೆಳಕ್ಕೆ ಚಲಿಸುವ ಈ ಶೈಲಿಯನ್ನು ಈಗಾಗಲೇ ಕೆವಿನ್ ಪೀಟರ್ಸನ್, ಡೇವಿಡ್ ವಾರ್ನರ್ ಮತ್ತು ಕ್ಯಾಸೆಮಿರೊ ಅವರಂತಹ ಅಂತರರಾಷ್ಟ್ರೀಯ ಕ್ರೀಡಾಪಟುಗಳು ಬಳಸಿದ್ದಾರೆ. ಆದರೆ ಮೇಧಾವಿ ಬಿಧುರಿ ಅವರ ಜೆರ್ಸಿ ಸಂಖ್ಯೆ ’67’ ಆಗಿರುವುದರಿಂದ, ಈ ಜಾಗತಿಕ ಟ್ರೆಂಡ್ ಅವರಿಗೆ ತೀರಾ ಸೂಕ್ತವಾಗಿ ಒಪ್ಪಿದ್ದು, ಟೂರ್ನಿಯ ಮೊದಲ ದಿನವೇ ಅಭಿಮಾನಿಗಳ ಮನಗೆದ್ದಿದೆ.
