ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅವರಿಗೆ ತಮ್ಮ ಮಾತೃಭಾಷೆ ಕನ್ನಡದ ಮೇಲಿರುವ ಪ್ರೀತಿ ಮತ್ತು ಗೌರವ ಅಪಾರ. ಜಾಗತಿಕ ಮಟ್ಟದಲ್ಲಿ ಕನ್ನಡ ಚಿತ್ರರಂಗದ ಹಿರಿಮೆಯನ್ನು ಎತ್ತಿಹಿಡಿದಿರುವ ಯಶ್, ಯಾವುದೇ ರಾಷ್ಟ್ರೀಯ ಅಥವಾ ಅಂತಾರಾಷ್ಟ್ರೀಯ ವೇದಿಕೆಯಾಗಿದ್ದರೂ ಭಾಷೆಯ ಉಚ್ಚಾರಣೆಯ ವಿಷಯದಲ್ಲಿ ಎಂದೂ ರಾಜಿ ಮಾಡಿಕೊಂಡವರಲ್ಲ. ಇತ್ತೀಚೆಗೆ ದೇಶದ ಪ್ರಸಿದ್ಧ ಆಪ್ ಕೀ ಅದಾಲತ್ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾಗ ಇಂತಹದೇ ಒಂದು ಆಸಕ್ತಿಕರ ಪ್ರಸಂಗ ನಡೆದಿದೆ.
ಕನ್ನಡ ಭಾಷೆಯ ಹೆಸರನ್ನು ಯಾರೇ ತಪ್ಪಾಗಿ ಉಚ್ಚರಿಸಿದರೂ ಯಶ್ ಅವರು ಸುಮ್ಮನೆ ಕೂರುವುದಿಲ್ಲ. ಸಿಟ್ಟು ಮಾಡಿಕೊಳ್ಳದೆ, ಅತ್ಯಂತ ಪ್ರೀತಿಯಿಂದಲೇ ಎದುರಿಗಿದ್ದವರಿಗೆ ಅದನ್ನು ತಿದ್ದಿ ಹೇಳುವ ಗುಣ ಅವರದ್ದು.
ರಜತ್ ಶರ್ಮಾ ಅವರನ್ನೇ ಪ್ರೀತಿಯಿಂದ ತಿದ್ದಿದ ಯಶ್
ಆಪ್ ಕಿ ಅದಾಲತ್ ಕಾರ್ಯಕ್ರಮದ ನಿರೂಪಕ ಹಾಗೂ ಹಿರಿಯ ಪತ್ರಕರ್ತ ರಜತ್ ಶರ್ಮಾ ಅವರು ಯಶ್ ಅವರನ್ನು ಪ್ರಶ್ನಿಸುವಾಗ ‘ಕನ್ನಡ್ ಸಿನಿಮಾಗಳು…’ (Kannad) ಎಂದು ಉಚ್ಚರಿಸಿದರು.
ಕೂಡಲೇ ಮಧ್ಯಪ್ರವೇಶಿಸಿದ ಯಶ್, ನಗುಮುಖದಿಂದಲೇ “ಸಾರ್ ಅದು ಕನ್ನಡ್ ಅಲ್ಲ, ಕನ್ನಡ” ಎಂದು ಪ್ರೀತಿಯಿಂದ ತಿದ್ದಿದರು. ಯಶ್ ಅವರ ಈ ಪ್ರೀತಿಯ ತಿದ್ದುವಿಕೆಯನ್ನು ಸ್ವೀಕರಿಸಿದ ರಜತ್ ಶರ್ಮಾ ಅವರು ನಗುತ್ತಾ, “ಸರಿ ಕನ್ನಡ” ಎಂದು ತಮ್ಮ ಉಚ್ಚಾರಣೆಯನ್ನು ಸರಿಪಡಿಸಿಕೊಂಡರು.
ನಂತರ ಯಶ್ ಅವರು ಹಿಂದಿಯಲ್ಲೇ ಮುಗುಳುನಗುತ್ತಾ, “ಎಲ್ಲರೂ ಕೇಳಿಸಿಕೊಳ್ಳಿ, ಅದು ಕನ್ನಡ್ ಅಲ್ಲ ಕನ್ನಡ… ಭಾವನೆಗಳನ್ನು ಅರ್ಥಮಾಡಿಕೊಳ್ಳಿ” ಎಂದು ಹಾಸ್ಯದ ರೀತಿಯಲ್ಲೇ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.
ಸೋಶಿಯಲ್ ಮೀಡಿಯಾದಲ್ಲಿ ಕನ್ನಡಿಗರ ಮೆಚ್ಚುಗೆ
ರಾಷ್ಟ್ರೀಯ ಮಟ್ಟದ ದೊಡ್ಡ ವೇದಿಕೆಯಲ್ಲೂ ತಮ್ಮ ಮಾತೃಭಾಷೆಯ ಸರಿಯಾದ ಉಚ್ಚಾರಣೆ ಮತ್ತು ಗೌರವಕ್ಕಾಗಿ ಯಶ್ ಅವರು ತೋರಿಸಿದ ಈ ಕಾಳಜಿಗೆ ಅಭಿಮಾನಿಗಳು ಹಾಗೂ ಕನ್ನಡಿಗರು ಸಾಮಾಜಿಕ ಜಾಲತಾಣಗಳಲ್ಲಿ ಶ್ಲಾಘನೆ ವ್ಯಕ್ತಪಡಿಸುತ್ತಿದ್ದಾರೆ.
ಇನ್ನು ಕಾರ್ಯಕ್ರಮ ಆರಂಭವಾಗುವ ಮುನ್ನವೇ ಯಶ್ ಅವರು, “ಎಲ್ಲಾ ಭಾಷೆಗಳನ್ನೂ ಗೌರವಿಸಬೇಕು. ಒಂದು ವೇಳೆ ನಾನು ಹಿಂದಿ ತಪ್ಪಾಗಿ ಮಾತನಾಡಿದ್ದರೆ ಕ್ಷಮಿಸಿ” ಎಂದು ವಿನಂತಿಸಿಕೊಂಡಿದ್ದರು. ಆದರೆ ಯಶ್ ಅವರ ಸ್ಪಷ್ಟ ಹಿಂದಿ ಸಂಭಾಷಣೆ ಹಾಗೂ ಮಾತಿನ ಶೈಲಿಗೆ ನಿರೂಪಕ ರಜತ್ ಶರ್ಮಾ ಅವರೇ ಫಿದಾ ಆಗಿದ್ದು ವಿಶೇಷವಾಗಿತ್ತು.
https://x.com/TeamYashFC/status/2089029696931668229
