ಮೂಲ ಆಸ್ತಿ ಪತ್ರ ಕಳೆದುಹೋಯ್ತಾ? ಟೆನ್ಶನ್ ಬೇಡ, ನಕಲು ಪತ್ರ ಪಡೆಯಲು ಇಲ್ಲಿದೆ ಸುಲಭ ವಿಧಾನ

ಆಸ್ತಿ ಎಂಬುದು ಪ್ರತಿಯೊಬ್ಬರ ಜೀವನದ ಬಹುದೊಡ್ಡ ಕನಸು. ಅದು ಮನೆಯಿರಲಿ, ಖಾಲಿ ನಿವೇಶನವಿರಲಿ ಅಥವಾ ಕೃಷಿ ಭೂಮಿಯೇ ಇರಲಿ, ಅದರ ಮಾಲೀಕತ್ವವನ್ನು ಸಾಬೀತುಪಡಿಸುವ ಏಕೈಕ ಕಾನೂನುಬದ್ಧ ದಾಖಲೆಯೆಂದರೆ ‘ಮೂಲ ಆಸ್ತಿ ಪತ್ರ’ ಆದರೆ, ಈ ಅಮೂಲ್ಯವಾದ ದಾಖಲೆ ಅನಿರೀಕ್ಷಿತವಾಗಿ ಕಳೆದುಹೋದಾಗ ಅಥವಾ ನಾಶವಾದಾಗ ಮಾಲೀಕರು ಆಸ್ತಿಯೇ ಕೈತಪ್ಪಿ ಹೋಯಿತೇನೋ ಎಂದು ಗಾಬರಿಯಾಗುವುದು ಸಹಜ.

ಆದರೆ ನೆನಪಿಡಿ, ಪತ್ರ ಕಳೆದುಹೋದ ತಕ್ಷಣ ಆಸ್ತಿಯ ಮೇಲಿನ ನಿಮ್ಮ ಕಾನೂನುಬದ್ಧ ಹಕ್ಕು ರದ್ದಾಗುವುದಿಲ್ಲ. ಸರ್ಕಾರದ ದಾಖಲೆಗಳಲ್ಲಿ ನಿಮ್ಮ ಹೆಸರೇ ಮುಂದುವರಿಯುತ್ತದೆ. ಸರಿಯಾದ ಕಾನೂನು ಪ್ರಕ್ರಿಯೆ ಅನುಸರಿಸಿದರೆ, ಸಬ್-ರಿಜಿಸ್ಟ್ರಾರ್ ಕಚೇರಿಯಿಂದ ಮೂಲ ಪತ್ರಕ್ಕೆ ಸಮಾನವಾದ ‘ದೃಢೀಕೃತ ನಕಲು ಪತ್ರ’ (Certified Copy) ಪಡೆಯಬಹುದು.

ಆಸ್ತಿ ಪತ್ರ ಕಳೆದುಹೋದಾಗ ಅನುಸರಿಸಬೇಕಾದ 4 ಪ್ರಮುಖ ಹಂತಗಳು:

ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿ (FIR / Lost Report):

ದಾಖಲೆ ಕಳೆದುಹೋದ ತಕ್ಷಣವೇ ನಿಮ್ಮ ವ್ಯಾಪ್ತಿಯ ಪೊಲೀಸ್ ಠಾಣೆಗೆ ತೆರಳಿ ದೂರು ನೀಡಬೇಕು. ಆಸ್ತಿಗೆ ಸಂಬಂಧಿಸಿದ ಸರ್ವೇ ನಂಬರ್, ನೋಂದಣಿ ಸಂಖ್ಯೆ ಹಾಗೂ ಮಾಲೀಕರ ಹೆಸರನ್ನು ದೂರಿನಲ್ಲಿ ಸ್ಪಷ್ಟವಾಗಿ ನಮೂದಿಸಿ. ಕರ್ನಾಟಕ ಪೊಲೀಸ್ ಇಲಾಖೆಯ ಅಧಿಕೃತ ವೆಬ್‌ಸೈಟ್ ಅಥವಾ ಆಪ್ ಮೂಲಕ ಆನ್‌ಲೈನ್‌ನಲ್ಲೂ ‘Lost Report’ ದಾಖಲಿಸಬಹುದು. ದೂರು ದಾಖಲಿಸಿದ ನಂತರ ನೀಡುವ ಸ್ವೀಕೃತಿ ಪ್ರತಿ (Acknowledgement / FIR copy) ಅತ್ಯಂತ ಮುಖ್ಯ.

ಶಪಥ ಪತ್ರ (Affidavit) ಸಿದ್ಧಪಡಿಸಿ:

ವಕೀಲರ ನೆರವಿನಿಂದ ಛಾಪಾ ಕಾಗದದ ಮೇಲೆ ಶಪಥ ಪತ್ರ ತಯಾರಿಸಿ. ಇದರಲ್ಲಿ ಆಸ್ತಿಯ ಸಂಪೂರ್ಣ ವಿವರ, ದಾಖಲೆ ಕಳೆದುಹೋದ ಸಂದರ್ಭ ಹಾಗೂ ಪೊಲೀಸ್ ದೂರಿನ ವಿವರಗಳನ್ನು ಉಲ್ಲೇಖಿಸಬೇಕು. “ಭವಿಷ್ಯದಲ್ಲಿ ಮೂಲ ಪತ್ರ ಸಿಕ್ಕರೆ ಅದನ್ನು ಸರ್ಕಾರಕ್ಕೆ ಒಪ್ಪಿಸುತ್ತೇನೆ” ಎಂದು ಸ್ವಯಂ ಘೋಷಣೆ ನೀಡಿ, ನೋಟರಿ ಅಧಿಕಾರಿಯಿಂದ (Notary) ದೃಢೀಕರಿಸಬೇಕು.

ದಿನಪತ್ರಿಕೆಗಳಲ್ಲಿ ಸಾರ್ವಜನಿಕ ಪ್ರಕಟಣೆ ನೀಡಿ (Public Notice):

ಒಂದು ಪ್ರಮುಖ ಕನ್ನಡ ಹಾಗೂ ಒಂದು ಇಂಗ್ಲಿಷ್ ದಿನಪತ್ರಿಕೆಯಲ್ಲಿ ಆಸ್ತಿ ಪತ್ರ ಕಳೆದುಹೋಗಿರುವ ಬಗ್ಗೆ ‘ಸಾರ್ವಜನಿಕ ಪ್ರಕಟಣೆ’ ನೀಡಬೇಕು. ಆಸ್ತಿ ವಿವರ ನಮೂದಿಸಿ, “ಯಾರಿಗಾದರೂ ಈ ಪತ್ರ ಸಿಕ್ಕರೆ ತಕ್ಷಣ ಸಂಪರ್ಕಿಸಿ” ಎಂದು 15ದಿನಗಳ ಕಾಲಾವಕಾಶ ನೀಡಬೇಕು. ಆ ಪತ್ರಿಕಾ ಪ್ರಕಟಣೆಯ ಕಟಿಂಗ್ ಅನ್ನು ಸುರಕ್ಷಿತವಾಗಿಟ್ಟುಕೊಳ್ಳಿ.

ಕಾವೇರಿ 2.0 ಪೋರ್ಟಲ್ ಮೂಲಕ ‘Certified Copy’ ಗೆ ಅರ್ಜಿ ಸಲ್ಲಿಸಿ:

ಮೇಲಿನ ಎಲ್ಲಾ ದಾಖಲೆಗಳು ಸಿದ್ಧವಾದ ನಂತರ, ಕರ್ನಾಟಕ ಸರ್ಕಾರದ ನೋಂದಣಿ ಇಲಾಖೆಯ ‘ಕಾವೇರಿ 2.0’ (Kaveri 2.0) ಪೋರ್ಟಲ್ ಮೂಲಕ ಅಧಿಕೃತ ನಕಲು ಪ್ರತಿಯನ್ನು ಪಡೆಯಬಹುದು.

ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸುವ ಸರಳ ವಿಧಾನ:

1. ಕಾವೇರಿ ೨.೦ ಅಧಿಕೃತ ವೆಬ್‌ಸೈಟ್‌ಗೆ ([https://kaveri.karnataka.gov.in](https://kaveri.karnataka.gov.in)) ಭೇಟಿ ನೀಡಿ ಲಾಗಿನ್ ಆಗಿ.

ಸ್ಟೆಪ್ ೨: ‘Certified Copy’ ಅಥವಾ ‘Online CC’ ಆಯ್ಕೆಯನ್ನು ಕ್ಲಿಕ್ ಮಾಡಿ, ನಿಮ್ಮ ಆಸ್ತಿಯ ವಿವರಗಳನ್ನು ನಮೂದಿಸಿ.

3 ಪೊಲೀಸ್ ದೂರಿನ ಪ್ರತಿ (FIR), ಪತ್ರಿಕಾ ಜಾಹೀರಾತು ಕಟಿಂಗ್, ನೋಟರೈಸ್ಡ್ ಅಫಿಡವಿಟ್ ಮತ್ತು ಋಣಭಾರ ಪ್ರಮಾಣ ಪತ್ರವನ್ನು (EC) ಸ್ಕ್ಯಾನ್ ಮಾಡಿ ಅಪ್‌ಲೋಡ್ ಮಾಡಿ.

4 ನಿಗದಿತ ಸರ್ಕಾರಿ ಶುಲ್ಕವನ್ನು ಆನ್‌ಲೈನ್‌ನಲ್ಲೇ ಪಾವತಿಸಿ.

ದಾಖಲೆಗಳ ಪರಿಶೀಲನೆ ಮುಗಿದ ನಂತರ, ೩ ರಿಂದ ೧೦ ಕೆಲಸದ ದಿನಗಳ ಒಳಗೆ ಡಿಜಿಟಲ್ ಸಹಿ ಹೊಂದಿರುವ ಆಸ್ತಿ ಪತ್ರದ ನಕಲು ನಿಮ್ಮ ಲಾಗಿನ್ ಐಡಿಯಲ್ಲಿ ಲಭ್ಯವಾಗುತ್ತದೆ. ಇದನ್ನು ಡೌನ್‌ಲೋಡ್ ಮಾಡಿ ಮುದ್ರಿಸಿಕೊಳ್ಳಬಹುದು. ಈ ಪತ್ರಕ್ಕೆ ಮೂಲ ದಾಖಲೆಯಷ್ಟೇ ಕಾನೂನು ಮಾನ್ಯತೆ ಇರುತ್ತದೆ.

ಹೆಚ್ಚುವರಿ ಮುನ್ನೆಚ್ಚರಿಕೆಯ ಕ್ರಮಗಳು:

ಇ-ಖಾತಾ ಮತ್ತು ಆರ್.ಟಿ.ಸಿ: ಬಿಬಿಎಂಪಿ ಅಥವಾ ಪುರಸಭೆ ವ್ಯಾಪ್ತಿಯ ಆಸ್ತಿಯಾಗಿದ್ದರೆ ಸಕಾಲ ಪೋರ್ಟಲ್ ಮೂಲಕ ಇ-ಖಾತಾ ಪಡೆಯಬಹುದು. ಗ್ರಾಮೀಣ ಪ್ರದೇಶದ ಆಸ್ತಿಯಾಗಿದ್ದರೆ ‘ಭೂಮಿ’ ಪೋರ್ಟಲ್ ಮೂಲಕ ಪಹಣಿ (RTC) ನಕಲು ಪಡೆಯಬಹುದು.

ಬ್ಯಾಂಕ್‌ನಲ್ಲಿ ಕಳೆದುಹೋದರೆ: ಒಂದು ವೇಳೆ ಬ್ಯಾಂಕ್‌ನಲ್ಲಿ ಸಾಲಕ್ಕಾಗಿ ನೀಡಿದ್ದಾಗ ಮೂಲ ದಾಖಲೆ ಕಳೆದುಹೋದರೆ, ದೃಢೀಕೃತ ನಕಲು ಪತ್ರವನ್ನು ಒದಗಿಸುವ ಸಂಪೂರ್ಣ ಜವಾಬ್ದಾರಿ ಆಯಾ ಬ್ಯಾಂಕ್‌ಗೆ ಸೇರುತ್ತದೆ.

ಸುರಕ್ಷತಾ ಸಲಹೆ: ನಿಮ್ಮ ಆಸ್ತಿಯ ಮೂಲ ದಾಖಲೆಗಳನ್ನು ಬ್ಯಾಂಕ್ ಲಾಕರ್‌ನಲ್ಲಿಡುವುದು ಸುರಕ್ಷಿತ. ಜೊತೆಗೆ ಎಲ್ಲಾ ದಾಖಲೆಗಳ ಜೆರಾಕ್ಸ್ ಪ್ರತಿಯನ್ನು ಹಾಗೂ ಡಿಜಿಟಲ್ ಪ್ರತಿಗಳನ್ನು (DigiLocker ಅಥವಾ Google Drive ನಲ್ಲಿ) ಕಡ್ಡಾಯವಾಗಿ ಸೇವ್ ಮಾಡಿಟ್ಟುಕೊಳ್ಳಿ.