ಬೆಂಗಳೂರು: ರಾಜ್ಯಾದ್ಯಂತ ಪ್ರಸ್ತುತ ‘ವಿಶೇಷ ತೀವ್ರ ಮತದಾರರ ಪಟ್ಟಿ ಪರಿಷ್ಕರಣೆ’ (Special Intensive Revision – SIR) ಪ್ರಕ್ರಿಯೆ ಭರದಿಂದ ಸಾಗುತ್ತಿದೆ. ಈ ನಡುವೆ ಮತದಾರರ ಪಟ್ಟಿಯಲ್ಲಿ ನನ್ನ ಹೆಸರಿದೆಯೋ ಅಥವಾ ರದ್ದಾಗಿದೆಯೋ ಎಂಬ ಆತಂಕ ಲಕ್ಷಾಂತರ ಜನರನ್ನು ಕಾಡುತ್ತಿದೆ. ಆದರೆ, ಸಾರ್ವಜನಿಕರು ಆತಂಕಪಡುವ ಅಗತ್ಯವಿಲ್ಲ. ಮತದಾರರ ಪಟ್ಟಿಯಲ್ಲಿ ನಿಮ್ಮ ಹೆಸರಿನ ಸ್ಥಿತಿಗತಿಯನ್ನು ಪರಿಶೀಲಿಸಲು ಚುನಾವಣಾ ಆಯೋಗ ಮತ್ತು ಸಂಬಂಧಿತ ಸಂಸ್ಥೆಗಳು ಆನ್ಲೈನ್ ವ್ಯವಸ್ಥೆ ಕಲ್ಪಿಸಿವೆ.
ಏನಿದು ASDDO ಪಟ್ಟಿ?
ರಾಜ್ಯದಲ್ಲಿ ಪರಿಷ್ಕರಣೆಯ ವೇಳೆ ಸುಮಾರು 1.11 ಕೋಟಿ ಮತದಾರರು ASDDO ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ.
ASDDO ಅಂದರೆ:
A – Absentee (ಸ್ಥಳದಲ್ಲಿ ಇಲ್ಲದಿರುವವರು)
S – Shifted (ವಲಸೆ ಹೋದವರು / ವಾಸಸ್ಥಳ ಬದಲಾಯಿಸಿದವರು)
D – Dead (ಮೃತರಾದವರು)
D – Duplicate (ಒಂದಕ್ಕಿಂತ ಹೆಚ್ಚು ಕಡೆ ಹೆಸರಿರುವವರು)
O – Others (ಇತರ ಕಾರಣಗಳು)
ಒಂದು ವೇಳೆ ನಿಮ್ಮ ಹೆಸರು ಈ ಪಟ್ಟಿಯಲ್ಲಿದ್ದರೆ ಮತದಾನದ ಹಕ್ಕು ಹೋಯಿತು ಎಂದು ಭಯಪಡಬೇಕಿಲ್ಲ. ಸ್ಥಳೀಯ ಬೂತ್ ಮಟ್ಟದ ಅಧಿಕಾರಿಗಳನ್ನು (BLO) ಸಂಪರ್ಕಿಸಿ ಅಥವಾ ಆನ್ಲೈನ್ನಲ್ಲಿ ಸೂಕ್ತ ದಾಖಲೆ ಸಲ್ಲಿಸಿ ಹೆಸರನ್ನು ಪುನಃ ಸರಿಪಡಿಸಿಕೊಳ್ಳಬಹುದು.
ASDDO ಪಟ್ಟಿಯಲ್ಲಿ ಹೆಸರು ಪರಿಶೀಲಿಸುವುದು ಹೇಗೆ?
ನಿಮ್ಮ ವೋಟರ್ ಐಡಿ (ಎಪಿಕ್ ನಂಬರ್) ರದ್ದಾದ ಪಟ್ಟಿಯಲ್ಲಿದೆಯೇ ಎಂದು ತಿಳಿಯಲು ಈ ಹಂತಗಳನ್ನು ಅನುಸರಿಸಿ:
ನಿಮ್ಮ ಮೊಬೈಲ್ನಲ್ಲಿ https://karnataka-asddo-lookup.vercel.app/ ವೆಬ್ಸೈಟ್ಗೆ ಭೇಟಿ ನೀಡಿ.
ಅಲ್ಲಿ ನೀಡಲಾದ ಜಾಗದಲ್ಲಿ ನಿಮ್ಮ EPIC Number (ವೋಟರ್ ಐಡಿ ಸಂಖ್ಯೆ) ನಮೂದಿಸಿ.
ಸಂಖ್ಯೆ ನಮೂದಿಸಿದ ತಕ್ಷಣ, “ಈ ಗುರುತಿನ ಚೀಟಿ ತೆಗೆದುಹಾಕಿದ ಪಟ್ಟಿಯಲ್ಲಿ ಇಲ್ಲ” ಎಂಬ ಸಂದೇಶ ಬಂದರೆ ನಿಮ್ಮ ಹೆಸರು ಸುರಕ್ಷಿತವಾಗಿದೆ ಎಂದರ್ಥ.
(ಗಮನಿಸಿ: ಈ ವೆಬ್ಸೈಟ್ ಕೇವಲ ಪಟ್ಟಿಯಿಂದ ಕೈಬಿಡಲಾದ ಹೆಸರಿನ ವಿವರಗಳನ್ನು ಮಾತ್ರ ತೋರಿಸುತ್ತದೆ. ಹಾಲಿ ಚಾಲ್ತಿಯಲ್ಲಿರುವ ಮತದಾರರ ಪಟ್ಟಿಯಲ್ಲಿ ಹೆಸರು ಸರಿಯಾಗಿದೆಯೇ ಎಂದು ಖಚಿತಪಡಿಸಿಕೊಳ್ಳಲು ಆಯೋಗದ ಅಧಿಕೃತ ವೆಬ್ಸೈಟ್ voters.eci.gov.in ನೋಡಿ ಅಥವಾ ನಿಮ್ಮ ವ್ಯಾಪ್ತಿಯ BLO ಅಧಿಕಾರಿಯನ್ನು ವಿಚಾರಿಸಬಹುದು).
ಹೆಸರು ರದ್ದಾಗಿದ್ದರೆ ಏನು ಮಾಡಬೇಕು?
ಪರಿಶೀಲನೆ ವೇಳೆ ನಿಮ್ಮ ಹೆಸರು ಪಟ್ಟಿಯಿಂದ ಕೈಬಿಡಲ್ಪಟ್ಟಿದ್ದರೆ ಅಥವಾ ASDDO ಗೆ ಸೇರಿದ್ದರೆ, ಫಾರ್ಮ್ – 6 (Form 6) ಭರ್ತಿ ಮಾಡಿ ಹೊಸದಾಗಿ ಮತದಾರರ ಪಟ್ಟಿಗೆ ಹೆಸರು ಸೇರ್ಪಡೆಗೆ ಅರ್ಜಿ ಸಲ್ಲಿಸಬಹುದು.
ಸಾರ್ವಜನಿಕರು ಕೇಂದ್ರ ಚುನಾವಣಾ ಆಯೋಗದ https://voters.eci.gov.in/ ವೆಬ್ಸೈಟ್ ಮೂಲಕ ಸ್ವತಃ ಆನ್ಲೈನ್ನಲ್ಲೇ ಫಾರ್ಮ್-6 ಭರ್ತಿ ಮಾಡಬಹುದು ಅಥವಾ ಬಿಎಲ್ಒ (BLO) ಅಧಿಕಾರಿಗಳಿಗೆ ಅರ್ಜಿ ನೀಡಿ ತಮ್ಮ ಮತದಾನದ ಹಕ್ಕನ್ನು ಕಾಯ್ದುಕೊಳ್ಳಬಹುದು.
