ಖ್ಯಾತ ಕಿರುತೆರೆ ನಟಿ ಜೆನ್ನಿಫರ್ ವಿಂಗೆಟ್ ತಮ್ಮ ಮದುವೆಯ ಸಂಭ್ರಮದ ಮೂಲಕ ಪ್ರೇಕ್ಷಕರ ಮತ್ತು ಅಭಿಮಾನಿಗಳ ಗಮನ ಸೆಳೆದಿದ್ದಾರೆ. ಉದ್ಯಮಿ ವಿಲಿಯಂ ಇಶ್ಮಾಯೆಲ್ ಅವರೊಂದಿಗೆ ಇತ್ತೀಚೆಗಷ್ಟೇ ಸರಳವಾಗಿ ವಿವಾಹವಾಗಿದ್ದ ಜೆನ್ನಿಫರ್, ಇದೀಗ ತಮ್ಮ ಹಳದಿ ಶಾಸ್ತ್ರದ (ಹಲ್ದಿ ಸಮಾರಂಭ) ಸುಂದರ ಕ್ಷಣಗಳ ವಿಶೇಷ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ.
ಸಂಪ್ರದಾಯ ಮುರಿದು ಹೊಸ ಮೆರುಗು ತಂದ ನಟಿ
ಸಾಮಾನ್ಯವಾಗಿ ಹಳದಿ ಶಾಸ್ತ್ರದ ವೇಳೆ ಎಲ್ಲರೂ ಹಳದಿ ಬಣ್ಣದ ಉಡುಪುಗಳನ್ನು ಧರಿಸುವುದು ಸಂಪ್ರದಾಯ. ಆದರೆ ಜೆನ್ನಿಫರ್ ಈ ಸಾಂಪ್ರದಾಯಿಕ ಶೈಲಿಗೆ ಕೊಂಚ ಭಿನ್ನವಾಗಿ, ತಿಳಿ ಹಸಿರು (ಸೇಜ್ ಗ್ರೀನ್) ಬಣ್ಣದ ಲೆಹೆಂಗಾ ಧರಿಸಿ ಎಲ್ಲರ ಕಣ್ಣು ಕೋರೈಸಿದ್ದಾರೆ. ಹೂವಿನ ವಿನ್ಯಾಸ ಹೊಂದಿರುವ ಈ ಲೆಹೆಂಗಾಗೆ ಹೊಂದುವಂತೆ ಆಲೀವ್ ಗ್ರೀನ್ ವೆಲ್ವೆಟ್ ಬ್ಲೌಸ್ ಹಾಗೂ ಸಿಂಪಲ್ ಶೀರ್ ದುಪಟ್ಟಾ ಧರಿಸಿದ್ದು, ಅವರ ಸಾಂಪ್ರದಾಯಿಕ ಲುಕ್ಗೆ ಮತ್ತಷ್ಟು ಮೆರುಗು ನೀಡಿದೆ.
ಇದರ ಜೊತೆಗೆ ಕೆಂಪು-ಹಸಿರು ಹರಳಿನ ಕುಂದನ್ ಆಭರಣಗಳು ಹಾಗೂ ಕೈಗೆ ಹಸಿರು ಬಳೆಗಳನ್ನು ಧರಿಸಿ ಕಂಪ್ಲೀಟ್ ಬ್ರೈಡಲ್ ಲುಕ್ನಲ್ಲಿ ಕಂಗೊಳಿಸಿದ್ದಾರೆ.
ಸ್ನೇಹಿತರಿಗಾಗಿ ಭಾವುಕ ಸಾಲುಗಳು
ಸ್ನೇಹಿತರ ದಿನಾಚರಣೆಯಂದೇ ಈ ಸುಂದರ ಫೋಟೋಗಳನ್ನು ಹಂಚಿಕೊಂಡಿರುವ ನಟಿ, ತಮ್ಮ ಆತ್ಮೀಯ ಗೆಳೆಯರ ಬಳಗಕ್ಕೆ ವಿಶೇಷ ಧನ್ಯವಾದ ಅರ್ಪಿಸಿದ್ದಾರೆ. “ನನ್ನ ಹಳದಿ ಸಮಾರಂಭ ಬರಿ ಸಂಭ್ರಮವಾಗಿರಲಿಲ್ಲ, ಅದರಲ್ಲಿ ಅಪಾರ ಪ್ರೀತಿ ತುಂಬಿತ್ತು. ಈ ಫೋಟೋಗಳನ್ನು ನೋಡಿದಾಗಲೆಲ್ಲಾ ಸ್ನೇಹಿತರ ನಗೆ, ಅಪ್ಪುಗೆ ಮತ್ತು ಬೆಂಬಲ ನೆನಪಾಗುತ್ತದೆ. ಇಂತಹ ಒಳ್ಳೆಯ ಸ್ನೇಹಿತರನ್ನು ಪಡೆಯಲು ನಾನು ನಿಜಕ್ಕೂ ಅದೃಷ್ಟ ಮಾಡಿದ್ದೇನೆ” ಎಂದು ಭಾವುಕರಾಗಿ ಬರೆದುಕೊಂಡಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಇದೀಗ ಜೆನ್ನಿಫರ್ ಅವರ ಈ ವಿಭಿನ್ನ ಫ್ಯಾಷನ್ ಶೈಲಿ ಹಾಗೂ ಹಳದಿ ಶಾಸ್ತ್ರದ ಫೋಟೋಗಳು ಭಾರಿ ವೈರಲ್ ಆಗುತ್ತಿವೆ.
