2026ರ FIH ಹಾಕಿ ವಿಶ್ವಕಪ್ ಹಿನ್ನೆಲೆಯಲ್ಲಿ ಭಾರತೀಯ ಪುರುಷರ ಹಾಕಿ ತಂಡದ ಸಾಂಪ್ರದಾಯಿಕ ನೀಲಿ ಜರ್ಸಿಯನ್ನು ಬದಲಿಸಿ, ಪ್ರಮುಖವಾಗಿ ಕೇಸರಿ ಬಣ್ಣದ ಜರ್ಸಿ ಪರಿಚಯಿಸಿರುವ ನಿರ್ಧಾರಕ್ಕೆ ಅಭಿಮಾನಿಗಳು ಹಾಗೂ ಮಾಜಿ ಆಟಗಾರರಿಂದ ತೀವ್ರ ಟೀಕೆ ವ್ಯಕ್ತವಾದ ಬೆನ್ನಲ್ಲೇ ಹಾಕಿ ಇಂಡಿಯಾ ಸ್ಪಷ್ಟನೆ ನೀಡಿದೆ.
ಮಾಜಿ ಭಾರತ ನಾಯಕ ವಿರೇನ್ ರಸ್ಕಿನ್ಹಾ ಈ ಬದಲಾವಣೆಯನ್ನು “ನಾಚಿಕೆಗೇಡಿನ ನಿರ್ಧಾರ” ಎಂದು ಟೀಕಿಸಿ, ಭಾರತೀಯ ಹಾಕಿಯ ಗುರುತಾಗಿರುವ ನೀಲಿ ಜರ್ಸಿಯನ್ನು ಬದಲಿಸುವ ಅಗತ್ಯವೇ ಇರಲಿಲ್ಲ ಎಂದು ಪ್ರಶ್ನಿಸಿದ್ದರು. ಸಾಮಾಜಿಕ ಜಾಲತಾಣಗಳಲ್ಲಿಯೂ ಈ ನಿರ್ಧಾರದ ವಿರುದ್ಧ ವ್ಯಾಪಕ ಚರ್ಚೆ ನಡೆದಿತ್ತು.
ಜರ್ಸಿ ಬದಲಾವಣೆಗೆ ಕಾರಣವೇನು?
ಈ ಬಗ್ಗೆ ಪ್ರಕಟಣೆ ನೀಡಿರುವ ಹಾಕಿ ಇಂಡಿಯಾ, ಜರ್ಸಿಯ ಬಣ್ಣ ಬದಲಾವಣೆ ಯಾವುದೇ ರಾಜಕೀಯ ಅಥವಾ ಸೌಂದರ್ಯದ ದೃಷ್ಟಿಯಿಂದಲ್ಲ, ತಾಂತ್ರಿಕ ಕಾರಣಗಳಿಂದ ತೆಗೆದುಕೊಳ್ಳಲಾದ ನಿರ್ಧಾರ ಎಂದು ತಿಳಿಸಿದೆ.
“ಆಟಗಾರರು, ಕೋಚ್‌ಗಳು ಹಾಗೂ ಸಹಾಯಕ ಸಿಬ್ಬಂದಿಯ ಸಲಹೆ ಮತ್ತು ಸುದೀರ್ಘ ಚರ್ಚೆಯ ಬಳಿಕ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಈಗ ಅಂತರರಾಷ್ಟ್ರೀಯ ಹಾಕಿ ಪಂದ್ಯಗಳು ಹೆಚ್ಚಾಗಿ ನೀಲಿ ಬಣ್ಣದ ಸಿಂಥೆಟಿಕ್ ಟರ್ಫ್‌ಗಳಲ್ಲಿ ನಡೆಯುತ್ತಿವೆ. ನೀಲಿ ಜರ್ಸಿ ಮತ್ತು ಮೈದಾನದ ಬಣ್ಣ ಒಂದೇ ರೀತಿಯಾಗಿರುವುದರಿಂದ ಆಟಗಾರರಿಗೆ ಪರಸ್ಪರರನ್ನು ಗುರುತಿಸುವುದು ಹಾಗೂ ಸ್ಪಷ್ಟವಾಗಿ ಕಾಣುವುದು ಕಷ್ಟವಾಗುತ್ತಿತ್ತು,” ಎಂದು ಹಾಕಿ ಇಂಡಿಯಾ ತಿಳಿಸಿದೆ.
ಕೇಸರಿ ಬಣ್ಣವನ್ನೇ ಏಕೆ ಆಯ್ಕೆ ಮಾಡಲಾಯಿತು?
ನೀಲಿ ಜರ್ಸಿಗೆ ಬದಲಾಗಿ ಹಳದಿ ಮತ್ತು ಕೇಸರಿ ಬಣ್ಣಗಳ ಆಯ್ಕೆಯನ್ನು ಪರಿಗಣಿಸಲಾಗಿತ್ತು. ಕೊನೆಗೆ ಕೇಸರಿ ಬಣ್ಣವನ್ನು ಆಯ್ಕೆ ಮಾಡಲಾಗಿದೆ ಎಂದು ಹಾಕಿ ಇಂಡಿಯಾ ಹೇಳಿದೆ.ಸಂಘದ ಪ್ರಕಾರ, ಕೇಸರಿ ಬಣ್ಣವು ಕೇವಲ ತಾಂತ್ರಿಕ ಸಮಸ್ಯೆಗೆ ಪರಿಹಾರವಷ್ಟೇ ಅಲ್ಲ, ಭಾರತದ ರಾಷ್ಟ್ರಧ್ವಜದ ಪ್ರಮುಖ ಬಣ್ಣಗಳಲ್ಲಿ ಒಂದಾಗಿದ್ದು ಧೈರ್ಯ, ತ್ಯಾಗ ಮತ್ತು ರಾಷ್ಟ್ರೀಯ ಹೆಮ್ಮೆಯ ಸಂಕೇತವಾಗಿದೆ.
ಇದು ಮೊದಲ ಬದಲಾವಣೆ ಅಲ್ಲ
ಭಾರತದ ರಾಷ್ಟ್ರೀಯ ತಂಡದ ಜರ್ಸಿಯಲ್ಲಿ ಇದೇ ಮೊದಲ ಬಾರಿ ಬದಲಾವಣೆ ಆಗುತ್ತಿಲ್ಲ ಎಂದು ಹಾಕಿ ಇಂಡಿಯಾ ಸ್ಪಷ್ಟಪಡಿಸಿದೆ. 2014ರ FIH ವಿಶ್ವಕಪ್‌ನಲ್ಲಿ ಭಾರತ ತಂಡ ಹಳದಿ ಬಣ್ಣದ ಜರ್ಸಿ ಧರಿಸಿತ್ತು. ನಂತರ 2018ರ ವಿಶ್ವಕಪ್‌ನಲ್ಲಿ ಆಕಾಶ ನೀಲಿ (Sky Blue) ಬಣ್ಣದ ಹೊಸ ಜರ್ಸಿಯನ್ನು ಪರಿಚಯಿಸಲಾಗಿತ್ತು.
ವಿಶ್ವಕಪ್‌ಗೆ ಭಾರತದ ಸಿದ್ಧತೆ
ನಾಯಕ ಹರ್ಮನ್‌ಪ್ರೀತ್ ಸಿಂಗ್ ನೇತೃತ್ವದ ಭಾರತ ತಂಡ, ಇತ್ತೀಚಿನ FIH ಪ್ರೊ ಲೀಗ್ನಲ್ಲಿ ಉತ್ತಮ ಪ್ರದರ್ಶನ ನೀಡಿದ ಆತ್ಮವಿಶ್ವಾಸದೊಂದಿಗೆ 2026ರ ವಿಶ್ವಕಪ್‌ಗೆ ಸಜ್ಜಾಗಿದೆ. ಬೆಲ್ಜಿಯಂ ಮತ್ತು ನೆದರ್‌ಲ್ಯಾಂಡ್ಸ್ನಲ್ಲಿ ನಡೆಯಲಿರುವ ಈ ಟೂರ್ನಿಯಲ್ಲಿ ಭಾರತ, 51 ವರ್ಷಗಳ ಬಳಿಕ ಎರಡನೇ ಪುರುಷರ ಹಾಕಿ ವಿಶ್ವಕಪ್ ಪ್ರಶಸ್ತಿ ಗೆಲ್ಲುವ ಗುರಿಯೊಂದಿಗೆ ಕಣಕ್ಕಿಳಿಯಲಿದೆ.
