ಹ್ಯಾಕರ್ ಹೈ ಭಾಯ್ ಹ್ಯಾಕರ್: ಪೋಲೀಸ್ ವ್ಯಾನ್ ಬಾಗಿಲು ತೆರೆದು ಪ್ರತಿಭಟನಾಕಾರರನ್ನು ಪರಾರಿಗೊಳಿಸಿದ ಯುವಕ: ವೀಡಿಯೊ ವೈರಲ್

ಮುಂಬೈ: ದೆಹಲಿ ಮತ್ತು ಮುಂಬೈನಲ್ಲಿ ನೀಟ್ (NEET) ಪರೀಕ್ಷೆ ಅಕ್ರಮ ಖಂಡಿಸಿ ಸಿಜೆಪಿ ಹಾಗೂ ಹೋರಾಟಗಾರ ಸೊನಮ್ ವಾಂಗ್ಚುಕ್ ನೇತೃತ್ವದಲ್ಲಿ ನಡೆಯುತ್ತಿರುವ ಪ್ರತಿಭಟನೆಗಳು ತೀವ್ರ ಸ್ವರೂಪ ಪಡೆದುಕೊಳ್ಳುತ್ತಿವೆ. ಇದರ ನಡುವೆಯೇ, ಮುಂಬೈನಲ್ಲಿ ವಶಕ್ಕೆ ಪಡೆಯಲಾಗಿದ್ದ ಪ್ರತಿಭಟನಾಕಾರರನ್ನು ಪೊಲೀಸರ ವಾಹನದಿಂದಲೇ ಅತ್ಯಂತ ಚಾಣಾಕ್ಷತನದಿಂದ ಪರಾರಿಗೊಳಿಸಿದ ವಿಚಿತ್ರ ಹಾಗೂ ಆಶ್ಚರ್ಯಕರ ವೀಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.

ಪೋಲೀಸ್ ವ್ಯಾನ್’ ಬಾಗಿಲು ತೆಗೆದ ಯುವಕ

ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವೀಡಿಯೊದಲ್ಲಿ, ಪೋಲೀಸ್ ವಾಹನದ ಹಿಂಭಾಗದ ಬಾಗಿಲನ್ನು ಯುವಕನೊಬ್ಬ ಅತ್ಯಂತ ಚಾಣಾಕ್ಷತನದಿಂದ ತೆರೆಯುವುದು ಕಂಡುಬರುತ್ತದೆ. ಬಾಗಿಲು ತೆರೆಯುತ್ತಿದ್ದಂತೆ, ವಾಹನದ ಒಳಗಿದ್ದ ಹಲವು ಪ್ರತಿಭಟನಾಕಾರರು ಒಂದೊಂದಾಗಿ ಕೆಳಗಿಳಿದು ಓಡಿಹೋಗುತ್ತಾರೆ. ಈ ದೃಶ್ಯವನ್ನು ನೋಡಿದ ಅಲ್ಲಿದ್ದ ಜನರು ಚಪ್ಪಾಳೆ ತಟ್ಟಿ ಸಂಭ್ರಮಿಸಿದ್ದಾರೆ.

ಸಿಜೆಪಿ (CJP) ಪಕ್ಷದ ಅಧಿಕೃತ ‘X’ ಖಾತೆಯು ಈ ವೀಡಿಯೊವನ್ನು ಹಂಚಿಕೊಂಡು “ಹ್ಯಾಕರ್ ಹೈ ಭಾಯ್ ಹ್ಯಾಕರ್” (Hacker hai bhai hacker) ಎಂದು ಬಾಗಿಲು ತೆರೆದ ಯುವಕನನ್ನು ಉದ್ದೇಶಿಸಿ ವ್ಯಂಗ್ಯವಾಗಿ ಶೀರ್ಷಿಕೆ ನೀಡಿದೆ. ಆದಾಗ್ಯೂ, ಈ ವೀಡಿಯೊದ ನೈಜತೆ ಹಾಗೂ ಇದು ದಾಖಲಾದ ಖಚಿತ ಸನ್ನಿವೇಶವನ್ನು ಸ್ವತಂತ್ರವಾಗಿ ದೃಢೀಕರಿಸಲು ಸಾಧ್ಯವಾಗಿಲ್ಲ.

ತೀವ್ರಗೊಂಡ ನೀಟ್ ಅಕ್ರಮ ವಿರುದ್ಧದ ಹೋರಾಟ:

ಸಾಮಾಜಿಕ ಹೋರಾಟಗಾರ ಸೊನಮ್ ವಾಂಗ್ಚುಕ್ ಹಾಗೂ ಸಿಜೆಪಿ ನೇತೃತ್ವದಲ್ಲಿ ದೆಹಲಿಯಲ್ಲಿ ನಡೆದ ಸಂಸತ್ ಚಲೋ’ ಪ್ರತಿಭಟನೆ ಹಿಂಸಾಚಾರಕ್ಕೆ ತಿರುಗಿದ ಬೆನ್ನಲ್ಲೇ ಈ ಮುಂಬೈ ವೀಡಿಯೊ ಮುನ್ನೆಲೆಗೆ ಬಂದಿದೆ. ನೀಟ್ ಪರೀಕ್ಷಾ ಅಕ್ರಮಗಳ ವಿರುದ್ಧ ಸೂಕ್ತ ತನಿಖೆಯಾಗಬೇಕು ಮತ್ತು ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ರಾಜೀನಾಮೆ ನೀಡಬೇಕು ಎಂದು ಆಗ್ರಹಿಸಿ ಸೊನಮ್ ವಾಂಗ್ಚುಕ್ ಆಸ್ಪತ್ರೆಯಲ್ಲಿದ್ದುಕೊಂಡೇ ತಮ್ಮ ಉಪವಾಸ ಸತ್ಯಾಗ್ರಹವನ್ನು ಮುಂದುವರಿಸಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ನೆಟ್ಟಿಗರ ಮಿಶ್ರ ಪ್ರತಿಕ್ರಿಯೆ:

ಈ ವೈರಲ್ ವೀಡಿಯೊ ಸೋಷಿಯಲ್ ಮೀಡಿಯಾದಲ್ಲಿ ಹಾಸ್ಯ, ಪ್ರಶಂಸೆ ಹಾಗೂ ವಿಮರ್ಶೆಗಳ ಮಿಶ್ರ ಪ್ರತಿಕ್ರಿಯೆಗೆ ಕಾರಣವಾಗಿದೆ:

ಚಾಣಾಕ್ಷತನಕ್ಕೆ ಸಬ್ಬಾಷ್: ಕಾಕ್ರೋಚ್ ಹೈ ಭಾಯ್ ಕಾಕ್ರೋಚ್, ಇದು ಜೆನ್-ಝೀ (Gen Z) ಜಾಣತನ ಹಾಗೂ ಪರಿಫೆಕ್ಟ್ ಟೈಮಿಂಗ್ ಎಂದು ಹಲವು ಯುವಕರು ಈ ನಡೆಯನ್ನು ಕೊಂಡಾಡಿದ್ದಾರೆ.

ಶಿಸ್ತಿನ ಕರೆ ಮತ್ತು ಎಚ್ಚರಿಕೆ: ಇನ್ನೊಂದೆಡೆ ಕೆಲ ನೆಟ್ಟಿಗರು ಪ್ರತಿಭಟನಾಕಾರರ ನಡವಳಿಕೆಯನ್ನು ಪ್ರಶ್ನಿಸಿದ್ದು, ಹೋರಾಟದಲ್ಲಿ ಶಿಸ್ತು ಕಾಯ್ದುಕೊಳ್ಳುವಂತೆ ಮನವಿ ಮಾಡಿದ್ದಾರೆ.

ಮುಂಬೈ ಪೊಲೀಸ್ ವರ್ಸಸ್ ದೆಹಲಿ ಪೊಲೀಸ್: ಬಳಕೆದಾರರೊಬ್ಬರು, “ಮುಂಬೈ ಪೊಲೀಸರು ಹಾರ್ಟ್‌ಫುಲ್ ಆಗಿರ್ತಾರೆ, ಇಂತಹ ವಿಷಯಗಳನ್ನು ದೊಡ್ಡದು ಮಾಡುವುದಿಲ್ಲ. ಆದರೆ ದೆಹಲಿಯಲ್ಲಿ ಜವಾಬ್ದಾರಿಯಿಲ್ಲದೆ ವರ್ತಿಸುವವರು ಇಡೀ ಹೋರಾಟದ ಘನತೆಗೆ ಧಕ್ಕೆ ತರುತ್ತಿದ್ದಾರೆ,” ಎಂದು ಕಮೆಂಟ್ ಮಾಡಿದ್ದಾರೆ.ಈ ವೈರಲ್ ಘಟನೆ ಕುರಿತು ಮುಂಬೈ ಪೊಲೀಸ್ ಇಲಾಖೆಯಿಂದ ಈವರೆಗೆ ಯಾವುದೇ ಅಧಿಕೃತ ಸ್ಪಷ್ಟನೆ ಅಥವಾ ಹೇಳಿಕೆ ಹೊರಬಿದ್ದಿಲ್ಲ.