ಬೆಂಗಳೂರು: ಸಾಕಷ್ಟು ಟಿವಿ ನೋಡಿದ್ದು ಆಯ್ತು, ಬಂದ್ ಮಾಡು ಮೆದುಳು ಹಾಳಾಗುತ್ತದೆ ದಶಕಗಳಿಂದ ಪ್ರತಿಯೊಂದು ಮನೆಯಲ್ಲೂ ಹಿರಿಯರು ಮಕ್ಕಳಿಗೆ ಹಾಗೂ ಯುವಕರಿಗೆ ಹೇಳುತ್ತಿದ್ದ ಈ ಮಾತು ಬರಿ ಗದರಿಕೆಯಲ್ಲ, ಬದಲಿಗೆ ಅದರ ಹಿಂದೆ ಆಳವಾದ ವೈಜ್ಞಾನಿಕ ಸತ್ಯವಿದೆ ಎಂಬುದನ್ನು ಅಮೆರಿಕದ ಪ್ರಸಿದ್ಧ USC ಡಾರ್ನ್ಸೈಫ್ (USC Dornsife) ಸಂಸ್ಥೆಯ ಸಂಶೋಧಕರು ಕಂಡುಕೊಂಡಿದ್ದಾರೆ.
ಅಂತರರಾಷ್ಟ್ರೀಯ ವೈದ್ಯಕೀಯ ನಿಯತಕಾಲಿಕೆ ಆಲ್ಝೈಮರ್ಸ್ ಅಂಡ್ ಡಿಮೆನ್ಷಿಯಾ ಜರ್ನಲ್ನಲ್ಲಿ ಪ್ರಕಟವಾಗಿರುವ ಹೊಸ ಸಂಶೋಧನಾ ವರದಿಯ ಪ್ರಕಾರ, ಮಧ್ಯವಯಸ್ಸಿನಲ್ಲಿ ಅತಿಯಾಗಿ ಟಿವಿ ನೋಡುವ ಅಭ್ಯಾಸವು ವಯಸ್ಸಾದಂತೆ ನೆನಪಿನ ಶಕ್ತಿ, ಗ್ರಹಿಕೆ ಹಾಗೂ ದೃಷ್ಟಿ ವಿಶ್ಲೇಷಣೆಯನ್ನು ನಿಯಂತ್ರಿಸುವ ಮೆದುಳಿನ ಭಾಗಗಳನ್ನು ಕುಗ್ಗಿಸುತ್ತದೆ ಎಂದು ಆತಂಕಕಾರಿ ವಿಷಯವನ್ನು ಬಹಿರಂಗಪಡಿಸಲಾಗಿದೆ.
20 ವರ್ಷಗಳ ಸುದೀರ್ಘ ಅಧ್ಯಯನ ಮತ್ತು ಎಂಆರ್ಐ ಸ್ಕ್ಯಾನ್ ರಹಸ್ಯ
ಅಮೆರಿಕದ ARIC ಯೋಜನೆಯಡಿ ಸರಾಸರಿ 53 ವರ್ಷ ವಯಸ್ಸಿನ ಸುಮಾರು 1,700 ವಯಸ್ಕರ ದಿನಚರಿಯನ್ನು ಸಂಶೋಧಕರು ದೀರ್ಘಕಾಲ ಅಧ್ಯಯನ ಮಾಡಿದರು.
ಅವರ ಟಿವಿ ವೀಕ್ಷಣೆ ಹಾಗೂ ಕುಳಿತು ಕೆಲಸ ಮಾಡುವ ಸಮಯವನ್ನು ವಿಶ್ಲೇಷಿಸಿ, ಬರೋಬ್ಬರಿ 20 ವರ್ಷಗಳ ನಂತರ ಅವರ ಮೆದುಳಿನ ಎಂಆರ್ಐ (MRI) ಸ್ಕ್ಯಾನ್ ಕೈಗೊಂಡಾಗ ದೈತ್ಯ ಬದಲಾವಣೆಗಳು ಕಂಡುಬಂದವು:
ನೆನಪಿನ ಶಕ್ತಿ ಕ್ಷೀಣತೆ: ವಿರಳವಾಗಿ ಟಿವಿ ನೋಡುವವರಿಗೆ ಹೋಲಿಸಿದರೆ, ನಿರಂತರವಾಗಿ ಟಿವಿ ವೀಕ್ಷಿಸುವವರ ಮೆದುಳಿನಲ್ಲಿ ಆಲ್ಝೈಮರ್ಸ್ ಕಾಯಿಲೆಯ ಆರಂಭಿಕ ಲಕ್ಷಣಗಳನ್ನು ಸೂಚಿಸುವ ಭಾಗಗಳ ಗಾತ್ರ ಕಡಿಮೆಯಾಗಿತ್ತು.
ಫ್ರಂಟಲ್ ಮತ್ತು ಆಕ್ಸಿಪಿಟಲ್ ಲೋಬ್ ಕುಗ್ಗುವಿಕೆ: ನಿರ್ಧಾರ ಕೈಗೊಳ್ಳುವ ಫ್ರಂಟಲ್ ಲೋಬ್ ಹಾಗೂ ದೃಶ್ಯಗಳನ್ನು ಗ್ರಹಿಸುವ ‘ಆಕ್ಸಿಪಿಟಲ್ ಲೋಬ್’ ಭಾಗಗಳು ಗಣನೀಯವಾಗಿ ಸಣ್ಣದಾಗಿದ್ದವು.
ವೈಟ್ ಮ್ಯಾಟರ್ ಹಾನಿ : ಪಾರ್ಶ್ವವಾಯು, ನೆನಪಿನ ಶಕ್ತಿ ನಷ್ಟ ಹಾಗೂ ಡಿಮೆನ್ಷಿಯಾಗೆ ಕಾರಣವಾಗುವ ವೈಟ್ ಮ್ಯಾಟರ್ ಹಾನಿಯ ಪ್ರಮಾಣ ಹೆಚ್ಚಾಗಿತ್ತು.
ವೈದ್ಯಕೀಯ ಲೋಕಕ್ಕೆ ಹೊಸ ಹಾದಿ ತೋರಿದ ಅಧ್ಯಯನ
ಇದುವರೆಗೆ ವೈದ್ಯರು ರೋಗಿಗಳಿಗೆ ದೈಹಿಕವಾಗಿ ಸಕ್ರಿಯರಾಗಿರಿ, ಹೆಚ್ಚು ಕೂರಬೇಡಿ ಎಂದು ಮಾತ್ರ ಸಲಹೆ ನೀಡುತ್ತಿದ್ದರು. ಆದರೆ ಈ ಸಂಶೋಧನೆಯ ನಂತರ, ಡಾ. ನಾಥನ್ ಫೇಟರ್ ಹೇಳುವಂತೆ:
ಮುಂದಿನ ದಿನಗಳಲ್ಲಿ ವೈದ್ಯರು ಕೇವಲ ಕೂರಬೇಡಿ ಎಂದು ಹೇಳುವ ಬದಲಿಗೆ, ಕುಳಿತಾಗ ಟಿವಿ ನೋಡುವ ಬದಲು ಮೆದುಳಿಗೆ ಸವಾಲು ನೀಡುವ ಪುಸ್ತಕ ಓದುವುದು, ಸುಡೋಕು ಅಥವಾ ಒಗಟು ಬಿಡಿಸುವುದರಲ್ಲಿ ನಿರತರಾಗಿ ಎಂದು ಸಲಹೆ ನೀಡಲಿದ್ದಾರೆ.
ದೈಹಿಕ ವ್ಯಾಯಾಮ, ಧೂಮಪಾನ, ಮದ್ಯಪಾನ, ಮಧುಮೇಹ ಮತ್ತು ದೇಹದ ತೂಕದಂತಹ ಅಂಶಗಳನ್ನು ನಿಯಂತ್ರಣದಲ್ಲಿಟ್ಟಿದ್ದರೂ ಸಹ, ಅತಿಯಾದ ಟಿವಿ ವೀಕ್ಷಣೆಯು ಮೆದುಳಿನ ಮೇಲೆ ನೇರವಾದ ಅಡ್ಡಪರಿಣಾಮ ಬೀರಿದೆ ಎಂದು ಈ ವರದಿ ಸ್ಪಷ್ಟಪಡಿಸಿದೆ.
ಮೆದುಳನ್ನು ಚುರುಕಾಗಿಡಲು ತಜ್ಞರ ಸಿಂಪಲ್ ಟಿಪ್ಸ್:
ಮಧ್ಯವಯಸ್ಸಿನಲ್ಲಿ ಮೆದುಳಿನ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಅತ್ಯಂತ ನಿರ್ಣಾಯಕ. ಅದಕ್ಕಾಗಿ ತಜ್ಞರು ನೀಡುವ ಸಲಹೆಗಳು ಹೀಗಿವೆ:
ಬುದ್ಧಿಗೆ ಕೆಲಸ ಕೊಡಿ: ದಿನವೂ ಪುಸ್ತಕ ಓದುವುದು, ಒಗಟು ಅಥವಾ ಸುಡೋಕು ಬಿಡಿಸುವುದು, ಹೊಸ ಭಾಷೆ ಅಥವಾ ವಾದ್ಯಗಳನ್ನು ಕಲಿಯಲು ಪ್ರಯತ್ನಿಸಿ.
ದೈಹಿಕವಾಗಿ ಸಕ್ರಿಯರಾಗಿರಿ: ಪ್ರತಿದಿನ ಕನಿಷ್ಠ 30 ನಿಮಿಷಗಳ ಕಾಲ ವ್ಯಾಯಾಮ ಅಥವಾ ವೇಗದ ನಡಿಗೆ ಮಾಡಿ.
ಸಾಮಾಜಿಕ ಸಂವಹನ: ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ಕೇವಲ ಮೆಸೇಜ್ ಬದಲಿಗೆ ನೇರವಾಗಿ ಅರ್ಥಪೂರ್ಣ ಸಂಭಾಷಣೆ ನಡೆಸಿ.
