ಬೆಂಗಳೂರು: ಬಿಎಂಟಿಸಿ ಬಸ್ ಗಳ ವ್ಯವಸ್ಥೆ ಕುರಿತಂತೆ ಪರಿಶೀಲನೆ ನಡೆಸಲು ಸಾರಿಗೆ ಸಚಿವ ಬೈರತಿ ಸುರೇಶ್ ಮಾಸ್ಕ್ ಧರಿಸಿ ಪ್ರಯಾಣಿಸಿದ್ದಾರೆ. ಈ ವೇಳೆ ಚಾಲಕರು, ನಿರ್ವಾಹಕರ ನಿರ್ಲಕ್ಷ್ಯ ಪತ್ತೆ ಮಾಡಿ ಅವರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಅಧಿಕಾರಿಗಳಿಗೆ ಸ್ಥಳದಲ್ಲೇ ಸೂಚನೆ ನೀಡಿದ್ದಾರೆ.
ಶನಿವಾರ ಸಂಜೆ 7 ಗಂಟೆಯಿಂದ ರಾತ್ರಿ 9.10ರವರೆಗೆ ಸಚಿವ ಬೈರತಿ ಸುರೇಶ್ ಅವರು ಅಧಿಕಾರಿಗಳಿಗೂ ಮಾಹಿತಿ ನೀಡದೆ ಮಾಸ್ಕ್ ಧರಿಸಿ ಗುರುತು ಸಿಗದಂತೆ ಬಿಎಂಟಿಸಿ ಬಸ್ ಗಳಲ್ಲಿ ಪ್ರಯಾಣಿಸಿದ್ದಾರೆ, ಬೆಂಗಳೂರಿನ ಜಯಮಹಲ್ ಹೆಣ್ಣೂರು ಡಿಪೋ ವ್ಯಾಪ್ತಿಯ ಬಸ್ ಗಳಲ್ಲಿ ಪ್ರಯಾಣಿಸಿದ್ದುಮ ಸಾಮಾನ್ಯ ಪ್ರಯಾಣಿಕರಂತೆ ರಶ್ ನಲ್ಲಿಯೇ ನಿಂತುಕೊಂಡು ಸಚಿವರು ಪ್ರಯಾಣಿಸಿದ್ದಾರೆ.
ಈ ವೇಳೆ ಚಾಲಕರು, ನಿರ್ವಾಹಕರು ಪ್ರಯಾಣಿಕರೊಂದಿಗೆ ನಿರ್ಲಕ್ಷ್ಯದಿಂದ ವರ್ತಿಸುತ್ತಿರುವುದು ಸಚಿವರ ಗಮನಕ್ಕೆ ಬಂದಿದೆ. ಭೂಪಸಂದ್ರದಿಂದ ಹೆಬ್ಬಾಳಕ್ಕೆ ಬಸ್ ನಲ್ಲಿ ಸಂಚರಿಸುವಾಗ ಸಚಿವರು ಎರಡು ಟಿಕೆಟ್ ನೀಡುವಂತೆ ನಿರ್ವಾಹಕರಿಗೆ 100 ರೂ. ನೀಡಿದ್ದಾರೆ. ನಿರ್ವಾಹಕ 12 ರೂ. ಚಿಲ್ಲರೆ ಕೊಡುವಂತೆ ಸೂಚಿಸಿದ್ದು, ಮಾಸ್ಕ್ ಧರಿಸಿದ್ದ ಸಚಿವರ ಗುರುತು ನಿರ್ವಾಹಕರಿಗೆ ಸಿಗಲಿಲ್ಲ. ಚಿಲ್ಲರೆ ಇಲ್ಲವೆಂದು ಸಚಿವರು ತಿಳಿಸುತ್ತಿದ್ದಂತೆ ಹಾಗಾದರೆ ಬಸ್ ನಿಂದ ಕೆಳಗಿಳಿಯಿರಿ ಎಂದು ನಿರ್ವಾಹಕರು ತಾಕೀತು ಮಾಡಿದ್ದಾರೆ. ಆಗ ಸಚಿವರು ಬಸ್ ನಿಂದ ಕೆಳಗೆ ಇಳಿದಿದ್ದಾರೆ.
ಪ್ರಯಾಣಿಕರಿಗೆ ಕೂಡ ಚಿಲ್ಲರೆ ವಿಚಾರಕ್ಕೆ ಬಸ್ ನಿಂದ ಕೆಳಗಿಳಿಸಲಾಗುತ್ತಿದೆ ಎಂಬುದನ್ನು ಅರಿತ ಸಚಿವ ಬೈರತಿ ಸುರೇಶ್ ನಿರ್ವಾಹಕರ ವಿರುದ್ಧ ಕ್ರಮ ಸೂಚನೆ ನೀಡಿದ್ದಾರೆ. ಉಳಿದಂತೆ ನಿಗದಿತ ಸ್ಥಳ ಬದಲಿಗೆ ಬೇರೆ ಕಡೆ ಬಸ್ ನಿಲ್ಲಿಸುವುದು, ವೇಗದ ಚಾಲನೆ, ಪ್ರಯಾಣಿಕರೊಂದಿಗೆ ನಿರ್ಲಕ್ಷ್ಯದಿಂದ ವರ್ತನೆ, ಚಿಲ್ಲರೆ ನೀಡದೆ ಇರುವುದು, ಅನೇಕ ಸಮಸ್ಯೆಗಳನ್ನು ಸಚಿವರು ಖುದ್ದಾಗಿ ತಿಳಿದು ಕ್ರಮ ಕೈಗೊಳ್ಳುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.
