ಬೆಂಗಳೂರು: ಭಾರತೀಯ ಆಟೋಮೊಬೈಲ್ ಮಾರುಕಟ್ಟೆಯು ಜೂನ್ 2026ರಲ್ಲಿ ಭಾರಿ ಪ್ರಗತಿ ಕಂಡಿದೆ. ಈ ಒಂದೇ ತಿಂಗಳಿನಲ್ಲಿ ದೇಶದಲ್ಲಿ ಬರೋಬ್ಬರಿ 4 ಲಕ್ಷ ಕಾರುಗಳು ಮಾರಾಟವಾಗಿದ್ದು, ಕಳೆದ ವರ್ಷದ ಜೂನ್ ತಿಂಗಳ ಮಾರಾಟಕ್ಕೆ ಹೋಲಿಸಿದರೆ ಶೇ.24 ರಷ್ಟು ಭರ್ಜರಿ ವೃದ್ಧಿ ದಾಖಲಾಗಿದೆ. ಹೊಸ ಮಾಡೆಲ್‌ಗಳ ಬಿಡುಗಡೆ, ಸಿಎನ್‌ಜಿ ಮತ್ತು ಎಲೆಕ್ಟ್ರಿಕ್ ವಾಹನಗಳಿಗೆ (EV) ಹೆಚ್ಚುತ್ತಿರುವ ಬೇಡಿಕೆಯೇ ಈ ದಾಖಲೆಯ ಜಿಗಿತಕ್ಕೆ ಪ್ರಮುಖ ಕಾರಣಗಳಾಗಿವೆ.ಇನ್ನು ಜೂನ್ ತಿಂಗಳ ಮಾರಾಟ ಪಟ್ಟಿಯಲ್ಲಿ ಪ್ರಮುಖ ಕಾರು ತಯಾರಿಕಾ ಸಂಸ್ಥೆಗಳ ಸ್ಥಾನಪಲ್ಲಟವಾಗಿದ್ದು, ರೇಸ್‌ನಲ್ಲಿ ಟಾಟಾ ಮೋಟಾರ್ಸ್ ಭರ್ಜರಿ ಮುನ್ನಡೆ ಸಾಧಿಸಿದೆ.
ಅಗ್ರಸ್ಥಾನದಲ್ಲೇ ಮುಂದುವರಿದ ಮಾರುತಿ ಸುಜುಕಿ
ಭಾರತದ ಅತಿ ದೊಡ್ಡ ಕಾರು ತಯಾರಿಕಾ ಸಂಸ್ಥೆ ಮಾರುತಿ ಸುಜುಕಿ ತನ್ನ ನಂಬರ್ ಒನ್ ಸ್ಥಾನವನ್ನು ಯಶಸ್ವಿಯಾಗಿ ಕಾಯ್ದುಕೊಂಡಿದೆ.
ದೇಶೀಯ ಮಾರಾಟ: ಜೂನ್ 2026 ರಲ್ಲಿ ಒಟ್ಟು 1,50,150 ಕಾರುಗಳನ್ನು ಮಾರಾಟ ಮಾಡಿದೆ (ಜೂನ್ 2025 ರಲ್ಲಿ 1,21,339 ಯುನಿಟ್‌ಗಳಷ್ಟಿತ್ತು).
ಯಶಸ್ಸಿನ ರಹಸ್ಯ: ಕಂಪನಿಯ ಹೊಸ ವಿಕ್ಟೋರಿಸ್ (Victoris) ಕಾರಿನಲ್ಲಿ ಪರಿಚಯಿಸಲಾದ ಅಂಡರ್‌ಬಾಡಿ ಸಿಎನ್‌ಜಿ (Underbody CNG System) ತಂತ್ರಜ್ಞಾನಕ್ಕೆ ಗ್ರಾಹಕರು ಮುಗಿಬಿದ್ದಿದ್ದಾರೆ.
ಭರ್ಜರಿ ರಫ್ತು: ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನ ವಾತಾವರಣವಿದ್ದರೂ, ದೀರ್ಘ ಸಮುದ್ರ ಮಾರ್ಗಗಳ ಮೂಲಕ ಮಾರುತಿ ಜೂನ್‌ನಲ್ಲಿ 42,768 ವಾಹನಗಳನ್ನು ರಫ್ತು ಮಾಡಿ ಶೇ.13ರಷ್ಟು ಪ್ರಗತಿ ಕಂಡಿದೆ.
ಮಹೀಂದ್ರಾಗೆ ಶಾಕ್ ನೀಡಿ 2ನೇ ಸ್ಥಾನಕ್ಕೇರಿದ ಟಾಟಾ ಮೋಟಾರ್ಸ್
ಜೂನ್ ತಿಂಗಳ ಕಾರು ಮಾರುಕಟ್ಟೆಯ ಅತ್ಯಂತ ದೊಡ್ಡ ಬದಲಾವಣೆ ಕಂಡುಬಂದಿದ್ದು ಎರಡನೇ ಸ್ಥಾನದಲ್ಲಿ.
ಟಾಟಾ ಸಾಧನೆ: ಜೂನ್‌ನಲ್ಲಿ 62,076 ಕಾರುಗಳನ್ನು ಮಾರಾಟ ಮಾಡುವ ಮೂಲಕ ಟಾಟಾ 2ನೇ ಸ್ಥಾನವನ್ನು ಅಲಂಕರಿಸಿದೆ. ಕಳೆದ ವರ್ಷ ಜೂನ್‌ನಲ್ಲಿ ಟಾಟಾ ಕೇವಲ 37,083 ವಾಹನ ಮಾರಾಟ ಮಾಡಿತ್ತು. ಕಂಪನಿಯ ಪಂಚ್ (Punch), ನೆಕ್ಸಾನ್ (Nexon) ಮತ್ತು ಸಿಯೆರಾ (Sierra) ಕಾರುಗಳ ಜನಪ್ರಿಯತೆ ಇದಕ್ಕೆ ಕಾರಣ.
3ನೇ ಸ್ಥಾನದಲ್ಲಿ ಮಹೀಂದ್ರಾ: ಮಹೀಂದ್ರಾ & ಮಹೀಂದ್ರಾ ಈ ಬಾರಿ ಮೂರನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದು, 60,393 ಪ್ರಯಾಣಿಕ ವಾಹನಗಳನ್ನು ಮಾರಾಟ ಮಾಡಿದೆ. ಆದರೆ, ವಾಣಿಜ್ಯ ವಾಹನಗಳೂ ಸೇರಿದಂತೆ ಒಟ್ಟಾರೆ 1,06,207 ಯುನಿಟ್‌ಗಳನ್ನು ಮಾರಾಟ ಮಾಡಿ ಶೇ.37 ರಷ್ಟು ವಾರ್ಷಿಕ ಬೆಳವಣಿಗೆ ಕಾಯ್ದುಕೊಂಡಿದೆ.
ಹುಂಡೈಗೆ ಭಾರಿ ಮುಖಭಂಗ; ಟೊಯೋಟಾ ಮುನ್ನಡೆ
ದಕ್ಷಿಣ ಕೊರಿಯಾದ ಪ್ರಮುಖ ಕಾರು ಸಂಸ್ಥೆ ಹುಂಡೈಗೆ ಜೂನ್ ತಿಂಗಳು ನಿರಾಸೆ ಮೂಡಿಸಿದೆ. ಪ್ರಮುಖ ಬಿಡಿಭಾಗಗಳ ಸರಬರಾಜುದಾರರ ಫ್ಯಾಕ್ಟರಿಯಲ್ಲಿ ಸಂಭವಿಸಿದ ಅಗ್ನಿ ದುರಂತದಿಂದಾಗಿ ಉತ್ಪಾದನೆ ಕುಂಠಿತಗೊಂಡು, ಹುಂಡೈ ದೇಶೀಯ ಮಾರಾಟ ಶೇ.10ರಷ್ಟು ಕುಸಿದು 39,635 ಯುನಿಟ್‌ಗಳಿಗೆ ತಲುಪಿದೆ.
ಮತ್ತೊಂದೆಡೆ, ಜಪಾನ್ ಮೂಲದ ಟೊಯೋಟಾ ಕಂಪನಿಯು ಇನೋವಾ ಕ್ರಿಸ್ಟಾ ಕಾರಿನ ಬಲದಿಂದ ಜೂನ್‌ನಲ್ಲಿ 28,441 ವಾಹನಗಳನ್ನು ಮಾರಾಟ ಮಾಡಿ ಉತ್ತಮ ಪ್ರದರ್ಶನ ನೀಡಿದೆ.
ಇತರ ಸಣ್ಣ ಕಾರು ತಯಾರಕರ ಮಾರಾಟದ ವಿವರ:
ಕಿಯಾ ಇಂಡಿಯಾ: 24,552 ಕಾರುಗಳು
JSW ಎಂಜಿ ಮೋಟಾರ್: 7,568 ವಾಹನಗಳು
ನಿಸ್ಸಾನ್ ಸಂಸ್ಥೆ: 3,006 ಕಾರುಗಳು (ಮ್ಯಾಗ್ನೈಟ್ ಮಾಡೆಲ್‌ಗೆ ಸ್ಥಿರ ಬೇಡಿಕೆ)
ವಾಹನಗಳ ದಾಖಲೆಯ ಮಾರಾಟದ ಹಿನ್ನೆಲೆಯಲ್ಲಿ ಹೂಡಿಕೆದಾರರು ನಿಫ್ಟಿ ಆಟೋ ಷೇರುಗಳ ಮೇಲೆ ತೀವ್ರ ನಿಗಾ ಇಟ್ಟಿದ್ದಾರೆ. ಮಾರುತಿ ಮತ್ತು ಟಾಟಾ ಮೋಟಾರ್ಸ್‌ನ ಭರ್ಜರಿ ಪ್ರದರ್ಶನ ಇಂದಿನ ಟ್ರೇಡಿಂಗ್ ಸೆಷನ್‌ನಲ್ಲಿ ನಿಫ್ಟಿ ಆಟೋ ಇಂಡೆಕ್ಸ್ ಮೇಲೆ ಸಕಾರಾತ್ಮಕ ಪ್ರಭಾವ ಬೀರಿದೆ. ಇದರ ಜೊತೆಗೆ ಉತ್ಪಾದನೆ ಹೆಚ್ಚಿರುವುದರಿಂದ ಸಂವರ್ಧನ ಮದರ್‌ಸನ್ ಮತ್ತು ಬಾಷ್‌ನಂತಹ ಆಟೋ ಬಿಡಿಭಾಗ ಹಾಗೂ ಟೈರ್ ತಯಾರಿಕಾ ಕಂಪನಿಗಳ ಷೇರುಗಳು ಕೂಡ ಹೂಡಿಕೆದಾರರ ಗಮನ ಸೆಳೆಯುತ್ತಿವೆ.
