ಯುರೋಪ್‌ ಖಂಡವು ಇತಿಹಾಸದಲ್ಲೇ ಕಂಡಿರದ ತೀವ್ರ ಬಿಸಿಗಾಳಿಯ (Heatwave) ಸಂಕಷ್ಟವನ್ನು ಎದುರಿಸುತ್ತಿದೆ. ಹಲವು ದೇಶಗಳಲ್ಲಿ ತಾಪಮಾನ 40 ಡಿಗ್ರಿ ಸೆಲ್ಸಿಯಸ್‌ ದಾಟಿದ್ದು, ರಸ್ತೆಗಳು ಕರಗುವುದು, ಟ್ರಾಮ್‌ ಹಳಿಗಳು ಬಾಗುವುದು, ವಿದ್ಯುತ್‌ ವ್ಯವಸ್ಥೆಗಳು ಕುಸಿಯುವುದು ಸೇರಿದಂತೆ ಹಲವು ಗಂಭೀರ ಸಮಸ್ಯೆಗಳು ಎದುರಾಗಿವೆ. ಈ ಬಿಸಿಗಾಳಿಯಿಂದ ಸಾವಿರಾರು ಮಂದಿ ಆಸ್ಪತ್ರೆಗೆ ದಾಖಲಾಗಿದ್ದು, ಜೂನ್‌ 21ರಿಂದ ಇದುವರೆಗೆ 1,300ಕ್ಕೂ ಹೆಚ್ಚು ಹೆಚ್ಚುವರಿ ಸಾವುಗಳು ಸಂಭವಿಸಿರುವುದಾಗಿ ವಿಶ್ವ ಆರೋಗ್ಯ ಸಂಸ್ಥೆ (WHO) ತಿಳಿಸಿದೆ.
ದಾಖಲೆ ಮಟ್ಟದ ಉಷ್ಣಾಂಶ
ಕಳೆದ ವಾರ ಪಶ್ಚಿಮ ಯುರೋಪ್‌ನಲ್ಲಿ ಆರಂಭವಾದ ಬಿಸಿಗಾಳಿ ಈಗ ಪೂರ್ವ ಯುರೋಪ್‌ಗೂ ವ್ಯಾಪಿಸಿದೆ. ಜರ್ಮನಿ, ಪೋಲೆಂಡ್‌, ಚೆಕ್‌ ಗಣರಾಜ್ಯ ಸೇರಿದಂತೆ ಹಲವು ದೇಶಗಳಲ್ಲಿ ಹೊಸ ತಾಪಮಾನ ದಾಖಲೆಗಳು ನಿರ್ಮಾಣವಾಗಿವೆ.ಬಿಸಿಗಾಳಿಯ ಅಬ್ಬರಕ್ಕೆ ಟಾರ್ ರಸ್ತೆಗಳು ಕೂಡ ಕರಗಿ ಹರಿಯುತ್ತಿದೆ ಎಂಬ ಸುದ್ದಿ ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದೆ.
- ಜರ್ಮನಿ – 41°Cಕ್ಕೂ ಹೆಚ್ಚು
- ಚೆಕ್‌ ಗಣರಾಜ್ಯ – 40°C ದಾಟಿತು
- ಸ್ವಿಟ್ಜರ್‌ಲ್ಯಾಂಡ್‌ನ ಬಾಸೆಲ್ – 38.8°C (ದಾಖಲೆ)
- ಡೆನ್ಮಾರ್ಕ್ – 1874ರಿಂದಲೂ ಅತ್ಯಧಿಕ ಉಷ್ಣಾಂಶ
- ಬ್ರಿಟನ್ – ಜೂನ್‌ ತಿಂಗಳಲ್ಲೇ ಅತ್ಯಧಿಕ ತಾಪಮಾನ
- ಸ್ಲೋವಾಕಿಯಾ – 41°C ಹೊಸ ದಾಖಲೆ
- ಹಂಗೇರಿ – 41.8°C ದಾಖಲೆ ಸಮೀಪ
WHO ಎಚ್ಚರಿಕೆ
ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಜೂನ್‌ 21ರಿಂದ ತೀವ್ರ ಬಿಸಿಯ ಕಾರಣ 1,300ಕ್ಕೂ ಹೆಚ್ಚು ಹೆಚ್ಚುವರಿ ಸಾವುಗಳು ದಾಖಲಾಗಿವೆ. ಇದರಲ್ಲಿ ಲಾಕ್ ಮಾಡಿದ ಕಾರುಗಳಲ್ಲಿ ಸಿಲುಕಿ ಮೃತಪಟ್ಟ ಮಕ್ಕಳು ಹಾಗೂ ತಂಪಿಗಾಗಿ ನದಿಗಳು, ಕೆರೆಗಳಲ್ಲಿ ಈಜಲು ಹೋಗಿ ಮುಳುಗಿ ಸಾವನ್ನಪ್ಪಿದ ಯುವಕರೂ ಸೇರಿದ್ದಾರೆ.
ಫ್ರಾನ್ಸ್‌ನಲ್ಲಿ ಪರಿಸ್ಥಿತಿ ಗಂಭೀರ
ಫ್ರಾನ್ಸ್‌ನಲ್ಲಿ ಬಿಸಿಗಾಳಿಯಿಂದ ಸಾವಿನ ಸಂಖ್ಯೆ ಹೆಚ್ಚಾಗಿರುವುದರಿಂದ ಶವಾಗಾರಗಳು ಹಾಗೂ ಅಂತ್ಯಸಂಸ್ಕಾರ ಕೇಂದ್ರಗಳ ಮೇಲೆ ಒತ್ತಡ ಹೆಚ್ಚಾಗಿದೆ. ಜೂನ್‌ 18ರಿಂದ ಕನಿಷ್ಠ 74 ಮಂದಿ ಮುಳುಗಿ ಸಾವನ್ನಪ್ಪಿದ್ದಾರೆ. ಪ್ರಸ್ತುತ ತಾಪಮಾನ ಇಳಿಕೆಯಾಗುತ್ತಿದ್ದರೂ, ಜುಲೈನಲ್ಲಿ ಮತ್ತೊಂದು ಬಿಸಿಗಾಳಿ ಅಪ್ಪಳಿಸುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಎಚ್ಚರಿಸಿದೆ.
ಉಕ್ರೇನ್‌ನಲ್ಲಿ ವಿದ್ಯುತ್‌ ಸಂಕಷ್ಟ
ಯುದ್ಧದಿಂದ ಈಗಾಗಲೇ ಹಾನಿಗೊಳಗಾಗಿರುವ ಉಕ್ರೇನ್‌ನ ವಿದ್ಯುತ್‌ ಜಾಲವು ತೀವ್ರ ಬಿಸಿಯಿಂದ ಮತ್ತಷ್ಟು ಒತ್ತಡಕ್ಕೆ ಸಿಲುಕಿದೆ. 35°C ರಿಂದ 38°C ತಾಪಮಾನ ಮುನ್ಸೂಚನೆ ಹಿನ್ನೆಲೆಯಲ್ಲಿ ತುರ್ತು ವಿದ್ಯುತ್‌ ಕಡಿತ ಜಾರಿಗೊಳಿಸಲಾಗಿದೆ.
ವೈರಲ್ ಆಗಿರುವ ದೃಶ್ಯಗಳು
ಸಾಮಾಜಿಕ ಜಾಲತಾಣಗಳಲ್ಲಿ ಬಿಸಿಗಾಳಿಯ ಭೀಕರತೆಯನ್ನು ತೋರಿಸುವ ಹಲವು ವಿಡಿಯೋಗಳು ವೈರಲ್ ಆಗಿವೆ.ಬಿಸಿಲಿನಲ್ಲಿ ಕೆಲವೇ ನಿಮಿಷಗಳಲ್ಲಿ ಮೊಟ್ಟೆ ಹಾಗೂ ಬೇಕನ್‌ ಬೇಯಿಸಿದ ದೃಶ್ಯ. ಜರ್ಮನಿಯಲ್ಲಿ ರಸ್ತೆಗಳು ಕರಗಿ ಟ್ರಾಮ್‌ ಹಳಿಗಳು ಬಾಗಿರುವ ವಿಡಿಯೋ. ನೆದರ್‌ಲ್ಯಾಂಡ್ಸ್‌ನಲ್ಲಿ ಕಾರಿನ ಪ್ಲಾಸ್ಟಿಕ್‌ ಭಾಗಗಳು, ಶಾಪಿಂಗ್‌ ಟ್ರಾಲಿ ಹಾಗೂ ಚಪ್ಪಲಿಗಳು ಬಿಸಿಯಿಂದ ಕರಗಿದ ದೃಶ್ಯಗಳು. ಬರ್ಲಿನ್‌ನಲ್ಲಿ ಜನರಿಗೆ ತಂಪು ನೀಡಲು ಪೊಲೀಸರು ವಾಟರ್‌ ಕ್ಯಾನನ್‌ ಮೂಲಕ ನೀರು ಸಿಂಪಡಿಸಿದ ವಿಡಿಯೋ. ಈ ವೈರಲ್ ವಿಡಿಯೋಗಳ ಸತ್ಯಾಸತ್ಯತೆಯನ್ನು ಸ್ವತಂತ್ರವಾಗಿ ಪರಿಶೀಲಿಸಲಾಗಿಲ್ಲ.
