ನವದೆಹಲಿ: ದೇಶದಾದ್ಯಂತ ಸ್ವಂತ ಮನೆ ಕನಸು ಕಾಣುವ ಮಧ್ಯಮ ವರ್ಗದ ಮನೆ ಖರೀದಿದಾರರ ಹಕ್ಕುಗಳ ರಕ್ಷಣೆಗೆ ಸಂಬಂಧಿಸಿದಂತೆ ಭಾರತದ ಸುಪ್ರೀಂ ಕೋರ್ಟ್ ಮಹತ್ವದ ಐತಿಹಾಸಿಕ ತೀರ್ಪು ನೀಡಿದೆ.
ರಿಯಲ್ ಎಸ್ಟೇಟ್ ಯೋಜನೆಗಳಲ್ಲಿ ಬಿಲ್ಡರ್‌ಗಳು ಅಥವಾ ಹೌಸಿಂಗ್ ಸೊಸೈಟಿಗಳು ಫ್ಲಾಟ್ ನಿರ್ಮಾಣ ಹಾಗೂ ಹಸ್ತಾಂತರದಲ್ಲಿ ವಿಳಂಬ ಮಾಡಿದರೆ, ಖರೀದಿದಾರರು ಫ್ಲಾಟ್‌ನ ಸ್ವಾಧೀನ (Possession) ಪಡೆದ ಬಳಿಕವೂ ಆ ವಿಳಂಬಕ್ಕೆ ಸಂಬಂಧಿಸಿದಂತೆ ಬಿಲ್ಡರ್‌ನಿಂದ ಪರಿಹಾರ (Compensation) ಕೇಳುವ ಸಂಪೂರ್ಣ ಹಕ್ಕು ಹೊಂದಿರುತ್ತಾರೆ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ. ಕೇವಲ ಫ್ಲಾಟ್‌ನ ಕೀಲಿಯನ್ನು ಪಡೆದುಕೊಂಡಿದ್ದರಿಂದ ಪರಿಹಾರ ಕೇಳುವ ಹಕ್ಕು ರದ್ದಾಗುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ. ಈ ತೀರ್ಪು ರಿಯಲ್ ಎಸ್ಟೇಟ್ ಕ್ಷೇತ್ರದಲ್ಲಿ ಗ್ರಾಹಕರ ಹಕ್ಕುಗಳನ್ನು ಮತ್ತಷ್ಟು ಬಲಪಡಿಸಿದೆ.
ಎನ್‌ಸಿಡಿಆರ್‌ಸಿ ತೀರ್ಪನ್ನು ತಳ್ಳಿಹಾಕಿದ ಸುಪ್ರೀಂ ಕೋರ್ಟ್
ನ್ಯಾಯಮೂರ್ತಿಗಳಾದ ಜಸ್ಟಿಸ್ ವಿಕ್ರಮ್ ನಾಥ್ ಹಾಗೂ ಜಸ್ಟಿಸ್ ವಿ. ಮಹಾದೇವನ್ ಮೋಹನ್ ಅವರನ್ನೊಳಗೊಂಡ ದ್ವಿಸಭ್ಯ ಪೀಠ ಈ ಮಹತ್ವದ ಆದೇಶ ಹೊರಡಿಸಿದೆ. ಈ ವೇಳೆ 2016ರಲ್ಲಿ ರಾಷ್ಟ್ರೀಯ ಗ್ರಾಹಕ ವಿವಾದ ಪರಿಹಾರ ಆಯೋಗ (NCDRC) ನೀಡಿದ್ದ ತೀರ್ಪನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿದೆ.
ನಿರ್ಮಾಣ ವಿಳಂಬಕ್ಕೆ ಸಂಬಂಧಿಸಿದ ಪರಿಹಾರವು ಫ್ಲಾಟ್ ಹಸ್ತಾಂತರಕ್ಕೂ ಮುಂಚಿನ ಅವಧಿಗೆ (Pre-possession period) ಅನ್ವಯಿಸುತ್ತದೆ. ಖರೀದಿದಾರರು ಫ್ಲಾಟ್ ಸ್ವಾಧೀನ ಪಡೆದಿದ್ದಾರೆ ಎಂಬ ಕಾರಣಕ್ಕೆ ನಿರ್ಮಾಣ ವಿಳಂಬಕ್ಕೆ ಪರಿಹಾರ ಕೇಳುವ ಕಾನೂನುಬದ್ಧ ಹಕ್ಕು ಕಳೆದುಹೋಗುವುದಿಲ್ಲ. ಗ್ರಾಹಕರ ಹಿತಾಸಕ್ತಿಗೆ ಧಕ್ಕೆ ಉಂಟುಮಾಡುವ ರೀತಿಯಲ್ಲಿ ಷರತ್ತುಗಳನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.
21 ವರ್ಷಗಳ ಹಳೆಯ ಪ್ರಕರಣದಲ್ಲಿ ಮಹತ್ವದ ತೀರ್ಪು
ಈ ತೀರ್ಪು ದೆಹಲಿಯ ಟಿ.ಕೆ.ಎ. ಪದ್ಮನಾಭನ್ ಅವರು ಅಭಿಯಾನ್ ಕೋ-ಆಪರೇಟಿವ್ ಗ್ರೂಪ್ ಹೌಸಿಂಗ್ ಸೊಸೈಟಿ ವಿರುದ್ಧ 2005ರಲ್ಲಿ ದಾಖಲಿಸಿದ್ದ ಪ್ರಕರಣದ ವಿಚಾರಣೆ ವೇಳೆ ಹೊರಬಂದಿದೆ.ಫ್ಲಾಟ್ ಹಸ್ತಾಂತರದಲ್ಲಿ ಸೊಸೈಟಿ ತೀವ್ರ ವಿಳಂಬ ಮಾಡಿದ್ದರಿಂದ ಪದ್ಮನಾಭನ್ ಗ್ರಾಹಕರ ವೇದಿಕೆಯನ್ನು (Consumer Forum) ಸಂಪರ್ಕಿಸಿದ್ದರು. ಆದರೆ ಬಿಲ್ಡರ್ ಹಾಗೂ ಸೊಸೈಟಿ, ಒಪ್ಪಂದದಲ್ಲಿದ್ದ ಆರ್ಬಿಟ್ರೇಷನ್ ಕ್ಲಾಸ್ (Arbitration Clause) ಆಧರಿಸಿ ಪ್ರಕರಣವನ್ನು ಖಾಸಗಿ ಮಧ್ಯಸ್ಥಿಕೆಗೆ ಕಳುಹಿಸುವಂತೆ ವಾದಿಸಿತ್ತು. ಕೆಳಹಂತದ ನ್ಯಾಯಮಂಡಳಿಗಳು ಕೂಡ ಈ ವಾದವನ್ನು ಒಪ್ಪಿಕೊಂಡಿದ್ದವು.
ಆದರೆ ಸುಪ್ರೀಂ ಕೋರ್ಟ್ ಈ ವಾದವನ್ನು ಸಂಪೂರ್ಣವಾಗಿ ತಳ್ಳಿಹಾಕಿದೆ. ಗ್ರಾಹಕರ ಸಂರಕ್ಷಣಾ ಕಾಯ್ದೆ (Consumer Protection Act) ಖಾಸಗಿ ಮಧ್ಯಸ್ಥಿಕೆ ಒಪ್ಪಂದಗಳಿಗಿಂತ ಮೇಲಿನ ಸ್ಥಾನದಲ್ಲಿದ್ದು, ಗ್ರಾಹಕರಿಗೆ ಹೆಚ್ಚುವರಿ ಕಾನೂನು ರಕ್ಷಣೆ ಒದಗಿಸುತ್ತದೆ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.ಇದಲ್ಲದೆ, ಕಳೆದ 21 ವರ್ಷಗಳಿಂದ ಬಾಕಿ ಉಳಿದಿರುವ ಈ ಪ್ರಕರಣವನ್ನು ಒಂದು ವರ್ಷದೊಳಗೆ ಇತ್ಯರ್ಥಪಡಿಸಬೇಕು ಎಂದು ದೆಹಲಿಯ ದ್ವಾರಕ ಜಿಲ್ಲಾ ಗ್ರಾಹಕರ ವೇದಿಕೆಗೆ ಸುಪ್ರೀಂ ಕೋರ್ಟ್ ನಿರ್ದೇಶನ ನೀಡಿದೆ.
