ಮುಂಬರುವ ಬಹುನಿರೀಕ್ಷಿತ ಆಕ್ಷನ್ ಚಿತ್ರ ‘ಆಲ್ಫಾ’ ಬಿಡುಗಡೆಗೆ ದಿನಗಣನೆ ಆರಂಭವಾಗಿದ್ದು, ಚಿತ್ರದ ಮುಖ್ಯ ಭೂಮಿಕೆಯಲ್ಲಿರುವ ಆಲಿಯಾ ಭಟ್ ಮತ್ತು ಶರ್ವರಿ ಅದಕ್ಕಾಗಿ ಭರ್ಜರಿ ಸಿದ್ಧತೆ ನಡೆಸುತ್ತಿದ್ದಾರೆ. ಆಕ್ಷನ್ ಹೀರೋಗಳಾಗಿ ಪರದೆಯ ಮೇಲೆ ಮಿಂಚಲು ಇವರಿಬ್ಬರು ಎಷ್ಟು ಕಷ್ಟಪಡುತ್ತಿದ್ದಾರೆ ಎಂಬುದಕ್ಕೆ ಅವರು ಇತ್ತೀಚೆಗೆ ಹಂಚಿಕೊಂಡಿರುವ ಫಿಟ್ನೆಸ್ ವಿಡಿಯೋ ಸಾಕ್ಷಿಯಾಗಿದೆ. ಶಿಸ್ತು, ಕಠಿಣ ಪರಿಶ್ರಮ ಮತ್ತು ಧೃಡ ಸಂಕಲ್ಪದೊಂದಿಗೆ ಜಿಮ್‌ನಲ್ಲಿ ಕಸರತ್ತು ನಡೆಸುತ್ತಿರುವ ಇವರಿಬ್ಬರ ಸಾಹಸಮಯ ತಯಾರಿ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಧೂಳೆಬ್ಬಿಸುತ್ತಿದೆ.
ಖಡಕ್ ತರಬೇತಿ ಮತ್ತು ಕಠಿಣ ವರ್ಕೌಟ್
ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಳ್ಳಲಾದ ವಿಡಿಯೋದಲ್ಲಿ ಆಲಿಯಾ ಮತ್ತು ಶರ್ವರಿ ಒಂದೇ ರೀತಿಯ ವರ್ಕೌಟ್ ಉಡುಪುಗಳನ್ನು ಧರಿಸಿ, ಅತ್ಯಂತ ಕಠಿಣವಾದ ತರಬೇತಿ ಪಡೆಯುತ್ತಿರುವುದು ಕಂಡುಬಂದಿದೆ. ದೇಹದ ಶಕ್ತಿ, ಸಹಿಷ್ಣುತೆ ಮತ್ತು ಚುರುಕುತನವನ್ನು ಹೆಚ್ಚಿಸಿಕೊಳ್ಳಲು ಇಬ್ಬರು ನಟಿಯರು ವಿವಿಧ ರೀತಿಯ ದೈಹಿಕ ಕಸರತ್ತುಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.
ಮೊದಲಿಗೆ ಸ್ಟೆಪ್-ಅಪ್ಸ್ ವ್ಯಾಯಾಮದ ಮೂಲಕ ಕಾಲುಗಳ ಸ್ನಾಯುಗಳನ್ನು ಬಲಪಡಿಸಿಕೊಳ್ಳುವ ಮತ್ತು ದೇಹದ ಸಮತೋಲನವನ್ನು ಕಾಯ್ದುಕೊಳ್ಳುವ ತರಬೇತಿ ನಡೆಸಿದರು. ಆ ನಂತರ ಇಬ್ಬರೂ ಬಾಕ್ಸಿಂಗ್ ತರಬೇತಿಯಲ್ಲಿ ನಿರತರಾಗಿ ವೇಗವಾಗಿ ಪಂಚ್‌ಗಳನ್ನು ನೀಡುವ ಮೂಲಕ ಗಮನ ಸೆಳೆದರು. ಬಾಕ್ಸಿಂಗ್ ಮಾಡುವುದರಿಂದ ದೇಹದ ದಣಿವು ದೂರವಾಗುವುದರ ಜೊತೆಗೆ, ಕೈಗಳ ಶಕ್ತಿ ಮತ್ತು ದೇಹದ ಸ್ಟ್ಯಾಮಿನಾ ಹೆಚ್ಚುತ್ತದೆ.
ದೇಹದ ಬಲವರ್ಧನೆಗೆ ಆದ್ಯತೆ
ಚಿತ್ರದಲ್ಲಿ ಭರ್ಜರಿ ಆಕ್ಷನ್ ದೃಶ್ಯಗಳಿರುವುದರಿಂದ ಶಕ್ತಿ ವರ್ಧಕ ವ್ಯಾಯಾಮಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. ನಟಿಯರಿಬ್ಬರೂ ಪುಶ್-ಅಪ್ಸ್ ಮಾಡುವ ಮೂಲಕ ಎದೆ, ಹೆಗಲು ಮತ್ತು ಕೋರ್ ಸ್ನಾಯುಗಳ ಬಲವನ್ನು ಪ್ರದರ್ಶಿಸಿದರು. ಇದರೊಂದಿಗೆ ಕೆಟಲ್‌ಬೆಲ್ ಸ್ವಿಂಗ್ಸ್ ವ್ಯಾಯಾಮವನ್ನು ಸಹ ಮಾಡಿದ್ದು, ಇದು ಇಡೀ ದೇಹದ ಹಿಂಭಾಗದ ಸ್ನಾಯುಗಳನ್ನು ಗಟ್ಟಿಮುಟ್ಟಾಗಿಸಲು ಸಹಾಯ ಮಾಡುತ್ತದೆ. ಅಷ್ಟೇ ಅಲ್ಲದೆ, ತೂಕದ ದೊಡ್ಡ ಟೈರ್‌ಗಳನ್ನು ಬಳಸಿ ಕಠಿಣವಾದ ಟೈರ್ ಟ್ರೈನಿಂಗ್ ಪಡೆಯುವ ಮೂಲಕ ಇಬ್ಬರೂ ಸಿನೆಮಾ ಮೇಲಿರುವ ತಮ್ಮ ಬದ್ಧತೆಯನ್ನು ತೋರಿಸಿದ್ದಾರೆ. ಇದು ಅವರ ತೋಳಿನ ಶಕ್ತಿ ಮತ್ತು ಇಡೀ ದೇಹದ ಸಾಮರ್ಥ್ಯವನ್ನು ಹೆಚ್ಚಿಸಲು ಸಹಕಾರಿಯಾಗಿದೆ.
ಕಾರ್ಡಿಯೋ ಮೂಲಕ ಸ್ಟ್ಯಾಮಿನಾ ವೃದ್ಧಿ
ತಮ್ಮ ವರ್ಕೌಟ್ ತೀವ್ರತೆಯನ್ನು ಕಾಯ್ದುಕೊಳ್ಳಲು ಆಲಿಯಾ ಮತ್ತು ಶರ್ವರಿ ಸ್ಕಿಪ್ಪಿಂಗ್ ಅಂದರೆ ಹಗ್ಗ ಜಿಗಿತದ ಮೊರೆ ಹೋಗಿದ್ದಾರೆ. ಹೃದಯದ ಆರೋಗ್ಯ ಕಾಪಾಡಿಕೊಳ್ಳಲು ಮತ್ತು ಚುರುಕುತನ ಹೆಚ್ಚಿಸಿಕೊಳ್ಳಲು ಇದು ಅತ್ಯುತ್ತಮ ವ್ಯಾಯಾಮವಾಗಿದೆ. ಕೊನೆಯದಾಗಿ ಒಂದೇ ಜಾಗದಲ್ಲಿ ನಿಂತು ಓಡುವ (ರನ್ನಿಂಗ್ ಆನ್ ದಿ ಸ್ಪಾಟ್) ಮೂಲಕ ತಮ್ಮ ಸ್ಟ್ಯಾಮಿನಾವನ್ನು ಮತ್ತಷ್ಟು ಹೆಚ್ಚಿಸಿಕೊಂಡಿದ್ದಾರೆ. ಒಟ್ಟಾರೆಯಾಗಿ ‘ಆಲ್ಫಾ’ ಚಿತ್ರಕ್ಕಾಗಿ ಈ ಇಬ್ಬರು ಸುಂದರಿಯರು ಸಿಕ್ಕಾಪಟ್ಟೆ ಬೆವರಿಳಿಸುತ್ತಿದ್ದು, ಬೆಳ್ಳಿಪರದೆ ಮೇಲೆ ಹೊಸ ಇತಿಹಾಸ ಸೃಷ್ಟಿಸಲು ಸಜ್ಜಾಗುತ್ತಿದ್ದಾರೆ.
