ನಾನ್‌ವೆಜ್ ಪ್ರಿಯರ ಸಂಡೇ ಮೆನುವಿನಲ್ಲಿ ಚಿಕನ್ ಖಾದ್ಯಗಳು ಇರಲೇಬೇಕು. ಅದರಲ್ಲೂ ಸ್ಟಾರ್ಟರ್ಸ್ ವಿಷಯಕ್ಕೆ ಬಂದರೆ ಎಲ್ಲರ ಮೊದಲ ಆಯ್ಕೆ ಕ್ರಿಸ್ಪಿ ಚಿಕನ್ ಕಬಾಬ್. ಹೊರಗಡೆ ರೆಸ್ಟೋರೆಂಟ್‌ಗಳಲ್ಲಿ ಸಿಗುವ ಅದೇ ರುಚಿ ಮತ್ತು ಕುರುಕುಲು ತನವನ್ನು ಮನೆಯಲ್ಲಿಯೇ ತರಲು ಸಾಧ್ಯವಿಲ್ಲ ಎಂದು ಹಲವರು ಭಾವಿಸುತ್ತಾರೆ. ಆದರೆ ಕೆಲವು ಸರಳ ಹಂತಗಳನ್ನು ಅನುಸರಿಸುವ ಮೂಲಕ ಹೋಟೆಲ್ ಶೈಲಿಯ ಅತ್ಯಂತ ರುಚಿಕರವಾದ ಕಬಾಬ್ ಅನ್ನು ನಿಮ್ಮ ಅಡುಗೆ ಮನೆಯಲ್ಲಿಯೇ ಸಿದ್ಧಪಡಿಸಬಹುದು.
ಬೇಕಾಗುವ ಪ್ರಮುಖ ಸಾಮಗ್ರಿಗಳು
ಅರ್ಧ ಕೆಜಿ ಮೂಳೆ ರಹಿತ ಅಥವಾ ಮೂಳೆ ಸಹಿತ ಚಿಕನ್, ಎರಡು ಚಮಚ ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಖಾರಕ್ಕೆ ತಕ್ಕಷ್ಟು ಅಚ್ಚ ಅಚ್ಚಖಾರದ ಪುಡಿ, ಅರ್ಧ ಚಮಚ ಗರಂ ಮಸಾಲಾ, ರುಚಿಗೆ ತಕ್ಕಷ್ಟು ಉಪ್ಪು, ಎರಡು ದೊಡ್ಡ ಚಮಚ ಕಾರ್ನ್ ಫ್ಲೋರ್, ಒಂದು ಚಮಚ ಮೈದಾ ಹಿಟ್ಟು, ಒಂದು ಮೊಟ್ಟೆ, ಅರ್ಧ ನಿಂಬೆಹಣ್ಣಿನ ರಸ ಮತ್ತು ಕರಿಯಲು ಅಗತ್ಯವಿರುವಷ್ಟು ಎಣ್ಣೆ.
ತಯಾರಿಸುವ ಸರಳ ವಿಧಾನ
ಮೊದಲು ಚಿಕನ್ ತುಂಡುಗಳನ್ನು ಸ್ವಚ್ಛವಾಗಿ ತೊಳೆದು ನೀರಿಲ್ಲದಂತೆ ಸಂಪೂರ್ಣವಾಗಿ ಒಣಗಿಸಿಕೊಳ್ಳಬೇಕು. ಒಂದು ಪಾತ್ರೆಯಲ್ಲಿ ತೊಳೆದ ಚಿಕನ್ ತೆಗೆದುಕೊಂಡು ಅದಕ್ಕೆ ಉಪ್ಪು, ಶುಂಠಿ ಬೆಳ್ಳುಳ್ಳಿ ಪೇಸ್ಟ್, ಅಚ್ಚಖಾರದ ಪುಡಿ, ಗರಂ ಮಸಾಲಾ ಮತ್ತು ನಿಂಬೆ ರಸವನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಈ ಮಸಾಲೆಯು ಚಿಕನ್ ತುಂಡುಗಳಿಗೆ ಸರಿಯಾಗಿ ಹಿಡಿಯುವಂತೆ ಕಲಸಿ ಕನಿಷ್ಠ ಅರ್ಧ ಗಂಟೆಯಿಂದ ಒಂದು ಗಂಟೆಯವರೆಗೆ ನೆನೆಯಲು ಬಿಡಿ.
ನಂತರ ಈ ಮಿಶ್ರಣಕ್ಕೆ ಕಾರ್ನ್ ಫ್ಲೋರ್, ಮೈದಾ ಹಿಟ್ಟು ಮತ್ತು ಒಂದು ಮೊಟ್ಟೆಯನ್ನು ಒಡೆದು ಹಾಕಿ ಮತ್ತೊಮ್ಮೆ ಸರಿಯಾಗಿ ಕೈಯಾಡಿಸಿ. ಹಿಟ್ಟು ಚಿಕನ್ ಮೇಲ್ಭಾಗದಲ್ಲಿ ಹಗುರವಾದ ಕೋಟಿಂಗ್ ತರಹ ಇರಬೇಕು.
ಬಾಣಲೆಯಲ್ಲಿ ಕಬಾಬ್ ಕರಿಯಲು ಎಣ್ಣೆಯನ್ನು ಸರಿಯಾಗಿ ಕಾಯಿಸಿಕೊಳ್ಳಿ. ಎಣ್ಣೆ ಚೆನ್ನಾಗಿ ಕಾದ ನಂತರ ಉರಿಯನ್ನು ಮಧ್ಯಮ ಮಟ್ಟಕ್ಕೆ ಇಟ್ಟುಕೊಂಡು, ಮಸಾಲೆಯಲ್ಲಿ ನೆನೆಸಿಟ್ಟ ಚಿಕನ್ ತುಂಡುಗಳನ್ನು ಒಂದೊಂದಾಗಿ ಎಣ್ಣೆಗೆ ಹಾಕಿ. ಚಿಕನ್ ಒಳಗಿನಿಂದ ಸರಿಯಾಗಿ ಬೇಯಲು ಮತ್ತು ಹೊರಗಡೆ ಕ್ರಿಸ್ಪಿಯಾಗಲು ಮಧ್ಯಮ ಉರಿಯಲ್ಲಿ ಕರಿಯುವುದು ಅತ್ಯಗತ್ಯ. ಎರಡೂ ಬದಿಗಳಲ್ಲಿ ಗೋಲ್ಡನ್ ಬ್ರೌನ್ ಬಣ್ಣ ಬರುವವರೆಗೆ ಚೆನ್ನಾಗಿ ಕರೆದು ಎಣ್ಣೆಯಿಂದ ಹೊರಗೆ ತೆಗೆದರೆ ಬಿಸಿಬಿಸಿಯಾದ ಕ್ರಿಸ್ಪಿ ಚಿಕನ್ ಕಬಾಬ್ ಸವಿಯಲು ಸಿದ್ಧವಾಗುತ್ತದೆ.
ಇದನ್ನು ಬಿಸಿ ಇರುವಾಗಲೇ ಈರುಳ್ಳಿ ಸ್ಲೈಸ್ ಮತ್ತು ನಿಂಬೆಹಣ್ಣಿನ ರಸದೊಂದಿಗೆ ಸರ್ವ್ ಮಾಡಿದರೆ ಇದರ ರುಚಿ ಮತ್ತಷ್ಟು ಹೆಚ್ಚುತ್ತದೆ. ವೀಕೆಂಡ್ ಸಮಯದಲ್ಲಿ ನಿಮ್ಮ ಕುಟುಂಬದವರಿಗೆ ಈ ಸುಲಭ ವಿಧಾನದ ಮೂಲಕ ಕಬಾಬ್ ಮಾಡಿಕೊಟ್ಟು ಅಡುಗೆಯ ಸಂಭ್ರಮವನ್ನು ಹೆಚ್ಚಿಸಿಕೊಳ್ಳಬಹುದು.
