ಹಿಮಾಚಲದ ರಸ್ತೆಯಲ್ಲೇ ವಿದೇಶಿ ಮಹಿಳೆಗೆ ಘೋರ ಅವಮಾನ ವಿಕೃತಿ ಮೆರೆದ ಯುವಕನ ಸಿಸಿಟಿವಿ ದೃಶ್ಯಾವಳಿ ವೈರಲ್: ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾದ ಕಿರಾತಕ

ಶಿಮ್ಲಾ: ದೇವಭೂಮಿ ಎಂದೇ ಖ್ಯಾತಿಯಾಗಿರುವ ಹಿಮಾಚಲ ಪ್ರದೇಶದಿಂದ ಇಡೀ ದೇಶವೇ ತಲೆತಗ್ಗಿಸುವಂತಹ ಭೀಕರ ಘಟನೆಯೊಂದು ಬೆಳಕಿಗೆ ಬಂದಿದೆ. ಪ್ರಸಿದ್ಧ ಪ್ರವಾಸಿ ತಾಣವೊಂದರ ಸಾರ್ವಜನಿಕ ರಸ್ತೆಯಲ್ಲೇ ವಿದೇಶಿ ಮಹಿಳಾ ಪ್ರವಾಸಿಗರೊಬ್ಬರಿಗೆ ಯುವಕನೊಬ್ಬ ಅಸಭ್ಯವಾಗಿ ಸ್ಪರ್ಶಿಸಿ (Inappropriate Touch) ಕಿರುಕುಳ ನೀಡಿರುವ ಸಿಸಿಟಿವಿ (CCTV) ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿವೆ.

ಜೂನ್ 4, 2026 ರಂದು ಈ ಘಟನೆ ನಡೆದಿದೆ ಎಂದು ವರದಿಯಾಗಿದ್ದು, ದಿ ಮಾಡರ್ನ್ ಹಿಮಾಚಲ್ (The Modern Himachal) ಎಂಬ ಎಕ್ಸ್ (ಟ್ವಿಟರ್) ಪೇಜ್ ಈ ವಿಡಿಯೋವನ್ನು ಹಂಚಿಕೊಳ್ಳುವ ಮೂಲಕ ಆರೋಪಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದೆ.

ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಯ್ತು ಕಿರಾತಕರ ಅಸಲಿ ಮುಖ

ವೈರಲ್ ಆಗಿರುವ ಸಿಸಿಟಿವಿ ದೃಶ್ಯಾವಳಿಗಳಲ್ಲಿ ಘಟನೆಯ ಭೀಕರತೆ ಸ್ಪಷ್ಟವಾಗಿ ಕಂಡುಬಂದಿದೆ,ಕಟ್ಟಡವೊಂದರ ಹೊರಭಾಗದಲ್ಲಿ ಕೆಲವು ಸ್ಥಳೀಯ ಯುವಕರ ಗುಂಪೊಂದು ನಿಂತಿರುತ್ತದೆ. ಅದೇ ಸಮಯದಲ್ಲಿ ಇಬ್ಬರು ವಿದೇಶಿ ಪ್ರವಾಸಿಗರು ಆ ರಸ್ತೆಯ ಮೂಲಕ ನಡೆದುಕೊಂಡು ಹೋಗುತ್ತಿರುತ್ತಾರೆ.

ಅವರು ದಾಟುವ ಕೇವಲ ಕೆಲವೇ ಸೆಕೆಂಡುಗಳಲ್ಲಿ, ಆ ಗುಂಪಿನಲ್ಲಿದ್ದ ಒಬ್ಬ ಯುವಕ ಮುಖಮೂತಿ ನೋಡದೆ ಆ ವಿದೇಶಿ ಮಹಿಳೆಗೆ ಅತ್ಯಂತ ಅಸಭ್ಯವಾಗಿ ಮತ್ತು ಅಪ್ರಾಮಾಣಿಕವಾಗಿ ಸ್ಪರ್ಶಿಸುತ್ತಾನೆ.

ಇದರಿಂದ ಆಘಾತಕ್ಕೊಳಗಾದ ಮಹಿಳೆ ತನ್ನ ಜೊತೆಗಿದ್ದ ಪ್ರವಾಸಿಯೊಂದಿಗೆ ಅಲ್ಲಿಂದ ಮುಂದೆ ಹೆಜ್ಜೆ ಹಾಕುತ್ತಾಳೆ.

“ಭಾರತದ ಗೌರವಕ್ಕೆ ಧಕ್ಕೆ ತಂದ ಕೃತ್ಯ” – ಜಾಲತಾಣಗಳಲ್ಲಿ ಆಕ್ರೋಶದ ಮಹಾಪೂರ:

ಈ ಲಜ್ಜೆಗೆಟ್ಟ ವಿಡಿಯೋವನ್ನು ಹಂಚಿಕೊಂಡಿರುವ ‘ದಿ ಮಾಡರ್ನ್ ಹಿಮಾಚಲ್’ ಪೇಜ್, ಹಿಮಾಚಲ ಪ್ರದೇಶದ ಪೊಲೀಸರನ್ನು ಟ್ಯಾಗ್ ಮಾಡಿ ಕಟುವಾದ ಶಬ್ದಗಳಲ್ಲಿ ಖಂಡಿಸಿದೆ:

“ಆಕೆ ತನ್ನ ಸ್ನೇಹಿತನೊಂದಿಗೆ ಹಿಮಾಚಲದ ಸೌಂದರ್ಯ ಮತ್ತು ಪ್ರಕೃತಿಯ ಶಾಂತಿಯನ್ನು ಸವಿಯಲು ಬೆಟ್ಟದ ಪ್ರದೇಶಗಳಲ್ಲಿ ಪ್ರಯಾಣಿಸುತ್ತಿದ್ದಳು. ಆದರೆ ಅಪರಿಚಿತನೊಬ್ಬನ ಅಸಭ್ಯ ಸ್ಪರ್ಶ ಆಕೆಯ ಸುರಕ್ಷತೆಯ ಭಾವನೆಯನ್ನೇ ಸಂಪೂರ್ಣವಾಗಿ ಧೂಳೀಪಟ ಮಾಡಿದೆ. ಇಂತಹ ಕೃತ್ಯಗಳು ಕೇವಲ ಪ್ರವಾಸಿಗರ ನೆಮ್ಮದಿಯನ್ನಷ್ಟೇ ಹಾಳು ಮಾಡುವುದಿಲ್ಲ, ಬದಲಿಗೆ ಪ್ರವಾಸಿಗರಿಗೆ ಭಾರತವು ಸುರಕ್ಷಿತ ತಾಣ ಎಂಬ ದೇಶದ ಜಾಗತಿಕ ಇಮೇಜ್ ಮತ್ತು ಗೌರವಕ್ಕೆ ದೊಡ್ಡ ಧಕ್ಕೆ ತರುತ್ತವೆ” ಎಂದು ಬರೆದುಕೊಂಡಿದೆ.

ವಿಡಿಯೋ ರೆಕಾರ್ಡ್ ಮಾಡುತ್ತಿರುವ ವ್ಯಕ್ತಿಯೂ ಹಿನ್ನೆಲೆಯಲ್ಲಿ ಇವರ ವರ್ತನೆಯನ್ನು ತೀವ್ರವಾಗಿ ನಿಂದಿಸಿದ್ದು, “ಇವರ ನಡವಳಿಕೆಯನ್ನು ಒಮ್ಮೆ ನೋಡಿ. ಇಂತಹ ಕೆಲವೇ ಕೆಲವು ವ್ಯಕ್ತಿಗಳ ವಿಕೃತ ಬುದ್ಧಿಯಿಂದ ಇಡೀ ಪ್ರದೇಶ ಹಾಗೂ ಸ್ಥಳೀಯ ನಿವಾಸಿಗಳಿಗೆ ಕೆಟ್ಟ ಹೆಸರು ಬರುತ್ತದೆ,” ಎಂದು ಕಳವಳ ವ್ಯಕ್ತಪಡಿಸಿದ್ದಾರೆ.

ತನಿಖೆ ಬಾಕಿ; ಕಠಿಣ ಶಿಕ್ಷೆಗೆ ಸಾರ್ವಜನಿಕರ ಆಗ್ರಹ

ಸದ್ಯ ಈ ವಿಡಿಯೋದ ಸತ್ಯಾಸತ್ಯತೆ ಮತ್ತು ನಿಖರವಾದ ಸ್ಥಳದ ಬಗ್ಗೆ ಹಿಮಾಚಲ ಪ್ರದೇಶದ ಪೊಲೀಸರಿಂದ ಯಾವುದೇ ಅಧಿಕೃತ ಹೇಳಿಕೆ ಹೊರಬಿದ್ದಿಲ್ಲ. ಆದರೆ, ವಿಡಿಯೋ ವೈರಲ್ ಬೆನ್ನಲ್ಲೇ ನೆಟ್ಟಿಗರು ಕಿಡಿಕಾರುತ್ತಿದ್ದು, ಪ್ರವಾಸಿ ತಾಣಗಳಲ್ಲಿ ಮಹಿಳೆಯರ ಸುರಕ್ಷತೆಗಾಗಿ ಕಠಿಣ ಕಣ್ಗಾವಲು ಇಡಬೇಕು ಮತ್ತು ಈ ಕಾಮುಕನನ್ನು ತಕ್ಷಣವೇ ಗುರುತಿಸಿ ಕಠಿಣ ಕಾನೂನು ಶಿಕ್ಷೆ ನೀಡಬೇಕು ಎಂದು ಒತ್ತಾಯಿಸುತ್ತಿದ್ದಾರೆ