ಮನೆಯಲ್ಲೇ ಏನಾದರೂ ವಿಶೇಷವಾಗಿ ಮಾಡಬೇಕು ಎಂದು ಯೋಚಿಸುತ್ತಿದ್ದರೆ, ಈ ಬಾರಿ ಪಿಸ್ತಾ ಜಾಮ್ ರಾಕ್ ಕುಕೀಸ್ ಪ್ರಯತ್ನಿಸಿ. ನೋಡಲು ಅತ್ಯಂತ ಆಕರ್ಷಕವಾಗಿ ಹಾಗೂ ತಿನ್ನಲು ಗರಿಗರಿಯಾಗಿರುವ ಈ ಕುಕೀಸ್ ಮಕ್ಕಳಿಗಂತೂ ತುಂಬಾ ಇಷ್ಟವಾಗುತ್ತದೆ. ಹಬ್ಬದ ದಿನಗಳಲ್ಲಿ ಅತಿಥಿಗಳಿಗೆ ನೀಡಲು ಮತ್ತು ಮಕ್ಕಳ ಸ್ನ್ಯಾಕ್ಸ್ ಬಾಕ್ಸ್‌ಗೆ ಹಾಕಿಕೊಡಲು ಇದು ಅತ್ಯುತ್ತಮ ತಿನಿಸು. ಈ ರುಚಿಕರವಾದ ಕುಕೀಸ್ ಮಾಡುವ ಸರಳ ವಿಧಾನ ಇಲ್ಲಿದೆ.
ಬೇಕಾಗುವ ಪದಾರ್ಥಗಳು
ಕುಕೀಸ್ ತಯಾರಿಸಲು:
- ಸಕ್ಕರೆ – ಅರ್ಧ ಕಪ್
- ಬೆಣ್ಣೆ (ಮೃದುವಾಗಿರಲಿ) – ಅರ್ಧ ಕಪ್
- ಮೊಟ್ಟೆ – 1
- ವೆನಿಲ್ಲಾ ಎಸೆನ್ಸ್ – 1 ಚಮಚ
- ಮೈದಾ ಹಿಟ್ಟು – ಒಂದೂವರೆ ಕಪ್
- ಮೊಟ್ಟೆಯ ಮಿಶ್ರಣ (ಎಗ್ ವಾಶ್) – 1 ಮೊಟ್ಟೆ (ಚೆನ್ನಾಗಿ ಬೀಟ್ ಮಾಡಿದ್ದು)
ಪಿಸ್ತಾ ಜಾಮ್ ತಯಾರಿಸಲು:
- ಅಮೆರಿಕನ್ ಪಿಸ್ತಾ (ಪುಡಿ ಮಾಡಿದ್ದು) – ಅರ್ಧ ಕಪ್
- ಸಕ್ಕರೆ – ಅರ್ಧ ಕಪ್
- ಬೆಣ್ಣೆ – 2 ಚಮಚ
- ಗ್ಲುಕೋಸ್ ಸಿರಪ್ – 1 ಚಮಚ
- ಫ್ರೆಶ್ ಕ್ರೀಮ್ – ಕಾಲು ಕಪ್
ಅಲಂಕಾರಕ್ಕಾಗಿ:
- ಪಿಸ್ತಾ ಪುಡಿ – 2 ಚಮಚ
ಕುಕೀಸ್ ಮಾಡುವ ವಿಧಾನ
ಮೊದಲಿಗೆ ಒಂದು ಪಾತ್ರೆಯಲ್ಲಿ ಮೃದುವಾದ ಬೆಣ್ಣೆ ಮತ್ತು ಸಕ್ಕರೆಯನ್ನು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ ಕ್ರೀಮ್‌ನಂತೆ ಮಾಡಿಕೊಳ್ಳಿ. ಇದಕ್ಕೆ ಒಂದು ಮೊಟ್ಟೆ ಮತ್ತು ವೆನಿಲ್ಲಾ ಎಸೆನ್ಸ್ ಸೇರಿಸಿ ಮತ್ತೊಮ್ಮೆ ಚೆನ್ನಾಗಿ ಕೈಯಾಡಿಸಿ. ನಂತರ ಮೈದಾ ಹಿಟ್ಟನ್ನು ಹಾಕಿ, ಎಲ್ಲವನ್ನೂ ಒಟ್ಟಿಗೆ ಸೇರಿಸಿ ಮೃದುವಾದ ಹಿಟ್ಟಿನ ಹದಕ್ಕೆ ತರಬೇಕು. ಈ ಹಿಟ್ಟನ್ನು ಚಪಾತಿಯಂತೆ ಲಟ್ಟಿಸಿ, ಕುಕಿ ಕಟರ್ ಬಳಸಿ ನಿಮಗೆ ಬೇಕಾದ ಆಕಾರಕ್ಕೆ ಕತ್ತರಿಸಿಕೊಳ್ಳಿ. ಅದರಲ್ಲಿ ಅರ್ಧದಷ್ಟು ಕುಕೀಸ್‌ಗಳ ಮಧ್ಯಭಾಗದಲ್ಲಿ ಸಣ್ಣದಾಗಿ ಒತ್ತಿ (ಹಳ್ಳದಂತೆ) ವಿನ್ಯಾಸ ಮಾಡಿ. ಈಗ ಎಲ್ಲಾ ಕುಕೀಸ್‌ಗಳ ಮೇಲೆ ಬೀಟ್ ಮಾಡಿದ ಮೊಟ್ಟೆಯ ಮಿಶ್ರಣವನ್ನು ಸವರಬೇಕು. ನಂತರ ಓವನ್‌ನಲ್ಲಿ 180 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ 12 ರಿಂದ 15 ನಿಮಿಷಗಳ ಕಾಲ ಬೇಕ್ ಮಾಡಿ.
ಪಿಸ್ತಾ ಜಾಮ್ ತಯಾರಿಸುವ ವಿಧಾನ
ಒಂದು ಪಾತ್ರೆಯಲ್ಲಿ ಸಕ್ಕರೆಯನ್ನು ಹಾಕಿ ಸಣ್ಣ ಉರಿಯಲ್ಲಿ ಕರಗಿಸಿ ಕೆರಮೆಲ್ ಮಾಡಿಕೊಳ್ಳಿ. ಸಕ್ಕರೆ ಕರಗಿ ಚಿನ್ನದ ಬಣ್ಣಕ್ಕೆ ತಿರುಗಿದಾಗ ಬೆಣ್ಣೆ ಸೇರಿಸಿ ಮಿಕ್ಸ್ ಮಾಡಿ. ನಂತರ ಗ್ಲುಕೋಸ್ ಸಿರಪ್ ಮತ್ತು ಫ್ರೆಶ್ ಕ್ರೀಮ್ ಹಾಕಿ ಚೆನ್ನಾಗಿ ಕೈಯಾಡಿಸಿ. ಕೊನೆಯದಾಗಿ ಪುಡಿ ಮಾಡಿಟ್ಟ ಅಮೆರಿಕನ್ ಪಿಸ್ತಾವನ್ನು ಸೇರಿಸಿ, ಮಿಶ್ರಣವು ಜಾಮ್ ಹದಕ್ಕೆ ಬರುವವರೆಗೆ ಬೇಯಿಸಿ ಒಲೆಯಿಂದ ಇಳಿಸಿ.
ಕುಕೀಸ್ ಜೋಡಣೆ
ಮೊದಲು ಬೇಕ್ ಮಾಡಿದ ಸಾಮಾನ್ಯ ಕುಕೀಸ್ ಮೇಲೆ ಸಿದ್ಧಪಡಿಸಿದ ಪಿಸ್ತಾ ಜಾಮ್ ಅನ್ನು ಸವರಿ. ಅದರ ಮೇಲೆ ಮಧ್ಯಭಾಗದಲ್ಲಿ ವಿನ್ಯಾಸ ಮಾಡಿದ (ಹಳ್ಳವಿರುವ) ಮತ್ತೊಂದು ಕುಕೀಯನ್ನು ಇಟ್ಟು ಲಘುವಾಗಿ ಒತ್ತಿ. ಕೊನೆಯದಾಗಿ ಕುಕೀಯ ಮಧ್ಯಭಾಗಕ್ಕೆ ಸ್ವಲ್ಪ ಪಿಸ್ತಾ ಪುಡಿಯನ್ನು ಉದುರಿಸಿ ಅಲಂಕರಿಸಿದರೆ, ಗರಿಗರಿಯಾದ ಮತ್ತು ನಾಲಿಗೆಯಲ್ಲಿ ಕರಗುವ ಪಿಸ್ತಾ ಜಾಮ್ ರಾಕ್ ಕುಕೀಸ್ ಸವಿಯಲು ಸಿದ್ಧ.
