ಹೊಸಪೇಟೆ: ಸಾವಿನಲ್ಲಿಯೂ ಅಕ್ಕ, ತಮ್ಮ ಒಂದಾಗಿದ್ದಾರೆ. ತನ್ನ ಸಹೋದರ ಅಪಘಾತದಲ್ಲಿ ಮೃತಪಟ್ಟ ಸುದ್ದಿ ಕೇಳಿ ಅವರ ಅಕ್ಕ ಹೃದಯಾಘಾತದಿಂದ ಮೃತಪಟ್ಟ ಘಟನೆ ವಿಜಯನಗರ ಜಿಲ್ಲೆಯ ಮುಂಡರಗಿ ಬೂದಿಹಾಳದಲ್ಲಿ ನಡೆದಿದೆ.
ಒಡಹುಟ್ಟಿದವರಿಬ್ಬರ ಅಂತ್ಯಕ್ರಿಯೆ ಭಾನುವಾರ ಒಂದೇ ಸ್ಮಶಾನದಲ್ಲಿ ನಡೆದಿದೆ. ಹಿರೇಮಲ್ಲನಕೆರೆ ಲೈನ್ ಮೆನ್ ಎಸ್. ನಿಂಗಪ್ಪ(35) ಶನಿವಾರ ಕರ್ತವ್ಯ ಮುಗಿಸಿ ಬೈಕ್ ನಲ್ಲಿ ವಾಪಸ್ ತೆರಳುವಾಗ ಕಾಗನೂರು ಸಮೀಪ ನಾಯಿ ಅಡ್ಡ ಬಂದಿದೆ. ನಿಯಂತ್ರಣ ತಪ್ಪಿ ಬೈಕ್ ನಿಂದ ಬಿದ್ದಿದ್ದ ಅವರು ಗಂಭೀರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಕಾರಿಯಾಗದೆ ಮೃತಪಟ್ಟಿದ್ದಾರೆ.
ನಿಂಗಪ್ಪ ಅವರ ಅಕ್ಕ ಮಲ್ಲಮ್ಮ(48) ಹೂವಿನಹಡಗಲಿ ತಹಶೀಲ್ದಾರ್ ಕಚೇರಿಯಲ್ಲಿ ದ್ವಿತೀಯ ದರ್ಜೆ ಸಹಾಯಕಿಯಾಗಿದ್ದು, ಅನಾರೋಗ್ಯದ ಕಾರಣ ರಜೆಯಲ್ಲಿದ್ದರು. ಸಹೋದರ ಅಪಘಾತದಲ್ಲಿ ಮೃತಪಟ್ಟ ಸುದ್ದಿ ತಿಳಿದ ಮಲ್ಲಮ್ಮ ಅವರು ತೀವ್ರ ಹೃದಯಾಘಾತದಿಂದ ಕೊನೆಯುಸಿರೆಳೆದಿದ್ದಾರೆ.
ಆನಾರೋಗ್ಯದ ಕಾರಣ ಅಕ್ಕನನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದ ನಿಂಗಪ್ಪ ನಂತರ ಬೂದಿಹಾಳದ ನಿವಾಸಕ್ಕೆ ಕರೆ ತಂದಿದ್ದರು. ಕೆಲಸಕ್ಕೆ ತೆರಳಿದ್ದ ಅವರು ಅಕ್ಕನ ಆರೋಗ್ಯ ವಿಚಾರಿಸಲು ಹೋಗುವಾಗಲೇ ಅಪಘಾತದಲ್ಲಿ ಸಾವನ್ನಪ್ಪಿದ್ದಾರೆ. ಒಂದೇ ದಿನ ಅಕ್ಕ, ತಮ್ಮನ ನಿಧನದಿಂದ ಕುಟುಂಬ ಕಂಗಾಲಾಗಿದೆ. ಗ್ರಾಮಸ್ಥರು ಕಂಬನಿ ಮಿಡಿದಿದ್ದಾರೆ.
