ಬೆಂಗಳೂರು: ಜಾಗತಿಕ ರಾಜಕೀಯ ವಲಯ ಮತ್ತು ಹಣಕಾಸು ಮಾರುಕಟ್ಟೆಯಲ್ಲಿ ಕ್ಷಣಕ್ಷಣಕ್ಕೂ ಭಾರಿ ಬದಲಾವಣೆಗಳು ಕಂಡುಬರುತ್ತಿವೆ. ಕಳೆದ ಕೆಲವು ದಿನಗಳಿಂದ ತೀವ್ರ ಆತಂಕ ಸೃಷ್ಟಿಸಿದ್ದ ಅಮೆರಿಕ ಮತ್ತು ಇರಾನ್ ನಡುವಿನ ಮಿಲಿಟರಿ ಸಂಘರ್ಷವು ಸದ್ಯಕ್ಕೆ ತಣ್ಣಗಾಗುವ ಲಕ್ಷಣಗಳು ಕಾಣಿಸುತ್ತಿವೆ. ಉಭಯ ದೇಶಗಳ ನಡುವೆ ತಾತ್ಕಾಲಿಕ ಶಾಂತಿ ಒಪ್ಪಂದ ಏರ್ಪಟ್ಟಿದೆ ಎಂಬ ಸುದ್ದಿಯ ಬೆನ್ನಲ್ಲೇ ಜಾಗತಿಕ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲದ ಬೆಲೆ ಇಳಿಕೆಯಾಗಿದೆ. ಆದರೆ, ಹೂಡಿಕೆದಾರರನ್ನು ಆಶ್ಚರ್ಯಚಕಿತಗೊಳಿಸುವಂತೆ ಬಂಗಾರ ಮತ್ತು ಬೆಳ್ಳಿಯ ದರಗಳು ದಿಢೀರ್ ಭಾರಿ ಜಂಪ್ ಕಂಡಿವೆ
ನಿನ್ನೆ ಗುರುವಾರವಷ್ಟೇ ಯುಎಸ್‌ ಫೆಡ್ ಬ್ಯಾಂಕ್‌ನ ಹಣದುಬ್ಬರ ಭೀತಿಯ ಮುನ್ಸೂಚನೆಗಳಿಂದಾಗಿ ಭಾರೀ ಕುಸಿತ ಕಂಡಿದ್ದ ಚಿನ್ನದ ದರ, ಇಂದು ಒಂದೇ ದಿನದಲ್ಲಿ ಮತ್ತೆ ಆ ನಷ್ಟವನ್ನೆಲ್ಲಾ ಭರ್ತಿ ಮಾಡಿಕೊಂಡು ಭರ್ಜರಿಯಾಗಿ ಏರಿಕೆಯ ಹಾದಿ ಹಿಡಿದಿದೆ. ಕಳೆದ ಮೂರು ದಿನಗಳಿಂದ ಸತತವಾಗಿ ಇಳಿಕೆ ಕಂಡು ನಿಟ್ಟುಸಿರು ಬಿಡುವಂತೆ ಮಾಡಿದ್ದ ಹಳದಿ ಲೋಹ, ಇಂದು ಶುಕ್ರವಾರ ಗ್ರಾಹಕರಿಗೆ ಮತ್ತೆ ಬಿಗ್ ಶಾಕ್ ನೀಡಿದೆ.
ಬೆಂಗಳೂರಿನ ಇಂದಿನ ಚಿನ್ನ ಮತ್ತು ಬೆಳ್ಳಿಯ ಕಂಪ್ಲೀಟ್ ದರ ವಿವರ ಇಲ್ಲಿದೆ:
ಬೆಂಗಳೂರಲ್ಲಿ ಇಂದು ಶುಕ್ರವಾರ ಚಿನ್ನದ ಬೆಲೆ ವಿವರ (ಮೇ 29, 2026):
24 ಕ್ಯಾರೆಟ್ ಅಪರಂಜಿ ಚಿನ್ನ (Pure Gold): 24 ಕ್ಯಾರೆಟ್ ಶುದ್ಧ ಚಿನ್ನದ ದರದಲ್ಲಿ ಇಂದು ಬರೋಬ್ಬರಿ ₹1,580 ಹೆಚ್ಚಳವಾಗಿದೆ! ಇದರೊಂದಿಗೆ ಪ್ರತಿ 10 ಗ್ರಾಂ ಅಪರಂಜಿ ಚಿನ್ನದ ಬೆಲೆ ₹1,57,640 ಕ್ಕೆ ತಲುಪಿದೆ. ಇನ್ನು 1 ಗ್ರಾಂ ಚಿನ್ನದ ಬೆಲೆ ಇಂದು ₹158 ರಷ್ಟು ಹೆಚ್ಚಳವಾಗಿ ₹15,764 ದಾಖಲಾಗಿದೆ.
22 ಕ್ಯಾರೆಟ್ ಆಭರಣ ಚಿನ್ನ (Jewellery Gold): ಆಭರಣ ಚಿನ್ನದ ದರದಲ್ಲೂ ಇಂದು ಒಂದೇ ದಿನದಲ್ಲಿ ₹1,450 ಭಾರಿ ಏರಿಕೆ ಕಂಡುಬಂದಿದೆ. ಇದರೊಂದಿಗೆ ಬೆಂಗಳೂರಲ್ಲಿ ಪ್ರತಿ 10 ಗ್ರಾಂ 22 ಕ್ಯಾರೆಟ್ ಚಿನ್ನದ ದರ ₹1,44,500 ಮುಟ್ಟಿದೆ. (ನಿನ್ನೆ ಗುರುವಾರದಂದು ಇದು ₹2,050 ರಷ್ಟು ಭಾರೀ ಕುಸಿತ ಕಂಡಿತ್ತು ಎಂಬುದು ಗಮನಾರ್ಹ). ಪ್ರಸ್ತುತ 1 ಗ್ರಾಂ ಆಭರಣ ಚಿನ್ನದ ಬೆಲೆ ₹14,450 ಆಗಿದೆ.
ಬೆಳ್ಳಿ ದರದಲ್ಲೂ ಭಾರಿ ಹೆಚ್ಚಳ
ಚಿನ್ನದ ಬೆನ್ನಲ್ಲೇ ಬೆಳ್ಳಿಯ ದರದಲ್ಲೂ ಇಂದು ಭಾರಿ ಜಂಪ್ ಕಂಡುಬಂದಿದೆ. ಇಂದು ಒಂದೇ ದಿನದಲ್ಲಿ ಪ್ರತಿ ಗ್ರಾಂ ಬೆಳ್ಳಿಯ ಬೆಲೆ ₹5 ರಷ್ಟು ಹೆಚ್ಚಳವಾಗಿದ್ದು, ಕೆಜಿ ಬೆಳ್ಳಿಯ ದರದಲ್ಲಿ ಬರೋಬ್ಬರಿ ₹5,000 ಏರಿಕೆಯಾಗಿದೆ! ಇದರೊಂದಿಗೆ ಮಾರುಕಟ್ಟೆಯಲ್ಲಿ ಪ್ರಸ್ತುತ 1 ಕೆಜಿ ಬೆಳ್ಳಿಯ ಬೆಲೆ ₹2,80,000 ಎಂಬ ಸಾರ್ವಕಾಲಿಕ ಗರಿಷ್ಠ ಮಟ್ಟಕ್ಕೆ ದಾಖಲಾಗಿದೆ.
ಜಾಗತಿಕ ಮಾರುಕಟ್ಟೆಯಲ್ಲಿ ದಿಢೀರ್ ಬದಲಾವಣೆಗೆ ಅಸಲಿ ಕಾರಣಗಳೇನು?
ಕಸದನ ವಿರಾಮ ಒಪ್ಪಂದ: ಅಮೆರಿಕ ಮತ್ತು ಇರಾನ್ ನಡುವಿನ ಕದನ ವಿರಾಮ ಮತ್ತಷ್ಟು ಮುಂದೂಡಿಕೆಯಾಗುವ ಮುನ್ಸೂಚನೆಗಳು ಸಿಕ್ಕ ಕಾರಣಕ್ಕೆ ಕಚ್ಚಾತೈಲ ಬೆಲೆ ಸ್ವಲ್ಪ ಇಳಿಕೆಯಾಗಿದೆ. ಷರತ್ತಿಗೆ ಒಪ್ಪಿ 60 ದಿನಗಳ ಕಾಲ ಕದನ ವಿರಾಮ ಮುಂದೂಡಿಕೆಯಾಗಿವೆ ಎಂಬ ವರದಿಗಳು ಇವೆ.
ಹರ್ಮುಜ್ ಬಿಕ್ಕಟ್ಟು ಸಡಿಲ: ಅಂತರರಾಷ್ಟ್ರೀಯ ಮಟ್ಟದಲ್ಲಿ ತೀವ್ರ ಆತಂಕ ಮೂಡಿಸಿದ್ದ ಹಾರ್ಮುಜ್ ಜಲಸಂಧಿಯ ಬಿಕ್ಕಟ್ಟು (Hormuz Strait Crisis) ಈಗ ಸಡಿಲವಾಗಲಿದ್ದು, ಸಮಸ್ಯೆ ಪರಿಹಾರವಾಗುವ ನಿರೀಕ್ಷೆ ಹೂಡಿಕೆದಾರರಲ್ಲಿ ಮೂಡಿದೆ.
ಜೆಡಿ ವ್ಯಾನ್ಸ್ ಹೇಳಿಕೆ ಎಫೆಕ್ಟ್: ಉಭಯ ದೇಶಗಳ ನಡುವಿನ ಸಂಧಾನ ಸಭೆಯು ಮುಕ್ತಾಯದ ಹತ್ತಿರಕ್ಕೆ ಬಂದಿದೆ ಎಂದು ಜೆಡಿ ವ್ಯಾನ್ಸ್ (JD Vance) ಮಹತ್ವದ ಹೇಳಿಕೆ ಕೊಟ್ಟ ಬೆನ್ನಲ್ಲೇ ಜಾಗತಿಕವಾಗಿ ತೈಲಬೆಲೆಗಳು ಇಳಿದಿವೆ. ಆದರೆ ಇದೇ ಹಣದುಬ್ಬರದ ಭೀತಿ ಕಡಿಮೆಯಾದ ಕಾರಣ, ಹೂಡಿಕೆದಾರರು ಸುರಕ್ಷಿತ ಹೂಡಿಕೆಯಾಗಿ ಚಿನ್ನ ಮತ್ತು ಬೆಳ್ಳಿಯತ್ತ ಮುಖ ಮಾಡಿದ್ದರಿಂದ ಲೋಹಗಳ ಬೆಲೆ ಭಾರಿ ಏರಿಕೆಯಾಗಿದೆ.
