ರಷ್ಯಾ ವಿಜ್ಞಾನಿಗಳು ಎಬೋಲಾ ವೈರಸ್‌ನ ಹೊಸ ಸ್ಟ್ರೈನ್ ವಿರುದ್ಧ ಲಸಿಕೆಯನ್ನು ಅಭಿವೃದ್ಧಿಪಡಿಸಿದ್ದಾರೆ ಎಂದು ದಕ್ಷಿಣ ಆಫ್ರಿಕಾದಲ್ಲಿರುವ ರಷ್ಯಾ ರಾಯಭಾರ ಕಚೇರಿ ತಿಳಿಸಿದೆ.ರಷ್ಯಾದ ಆರೋಗ್ಯ ಸಚಿವ ಮಿಖಾಯಿಲ್ ಮುರಾಶ್ಕೊ ಅವರು ಈ ವಿಷಯವನ್ನು ಪ್ರಕಟಿಸಿದ್ದಾರೆ ಎಂದು ರಾಯಭಾರ ಕಚೇರಿ ತಿಳಿಸಿದೆ. ರಷ್ಯಾ ವಿಜ್ಞಾನಿಗಳನ್ನು ಉಲ್ಲೇಖಿಸಿರುವ ರಾಯಭಾರ ಕಚೇರಿಯು, ಈ ಲಸಿಕೆಯು ಕಾಂಗೋದಲ್ಲಿನ ಸಾಂಕ್ರಾಮಿಕ ರೋಗಕ್ಕೆ ಕಾರಣವಾದ ಅಪರೂಪದ ‘ಬುಂಡಿಬುಗ್ಯೋ’ (Bundibugyo) ಸ್ಟ್ರೈನ್ ವಿರುದ್ಧವೂ ರಕ್ಷಣೆ ನೀಡಬಲ್ಲದು ಎಂದು ಹೇಳಿದೆ.
ಏತನ್ಮಧ್ಯೆ, ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ (DRC) ಮತ್ತು ಉಗಾಂಡಾದಲ್ಲಿ ವರದಿಯಾಗಿರುವ ಎಬೋಲಾ ರೋಗದ ಹಿನ್ನೆಲೆಯಲ್ಲಿ, ಅಂತರರಾಷ್ಟ್ರೀಯ ಆರೋಗ್ಯ ನಿಯಮಾವಳಿ (IHR) ೨೦೦೫ ರ ಅಡಿಯಲ್ಲಿ, ವಿಶ್ವ ಆರೋಗ್ಯ ಸಂಸ್ಥೆಯು (WHO) ಮೇ ೧೭ ರಂದು ಈ ಪರಿಸ್ಥಿತಿಯನ್ನು “ಅಂತರರಾಷ್ಟ್ರೀಯ ಕಾಳಜಿಯ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ” (PHEIC) ಎಂದು ಘೋಷಿಸಿದೆ.
ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಹೊರಡಿಸಿದ ಪತ್ರಿಕಾ ಪ್ರಕಟಣೆಯ ಪ್ರಕಾರ, ಆಫ್ರಿಕಾ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ (Africa CDC) ಸಹ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ ಮತ್ತು ಉಗಾಂಡಾದಲ್ಲಿ ಹರಡುತ್ತಿರುವ ಬುಂಡಿಬುಗ್ಯೋ ಸ್ಟ್ರೈನ್ ಎಬೋಲಾ ವೈರಸ್ ಕಾಯಿಲೆಯ ಸಾಂಕ್ರಾಮಿಕವನ್ನು “ಖಂಡದ ಭದ್ರತೆಯ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿ” (PHECS) ಎಂದು ಅಧಿಕೃತವಾಗಿ ಘೋಷಿಸಿದೆ.
ಹೆಚ್ಚುವರಿಯಾಗಿ, ಮೇ ೨೨ ರಂದು WHO ನ IHR ತುರ್ತು ಸಮಿತಿಯು ತಾತ್ಕಾಲಿಕ ಶಿಫಾರಸುಗಳನ್ನು ನೀಡಿದೆ. ಅದರಂತೆ, “ಬುಂಡಿಬುಗ್ಯೋ ವೈರಸ್ ಪತ್ತೆಯಾದ ಪ್ರದೇಶಗಳಿಂದ ಆಗಮಿಸುವ, ವಿವರಿಸಲಾಗದ ಜ್ವರದಿಂದ ಬಳಲುತ್ತಿರುವ ಪ್ರಯಾಣಿಕರನ್ನು ಪತ್ತೆಹಚ್ಚಲು, ಮೌಲ್ಯಮಾಪನ ಮಾಡಲು, ವರದಿ ಮಾಡಲು ಮತ್ತು ನಿರ್ವಹಿಸಲು” ಪ್ರವೇಶ ಕೇಂದ್ರಗಳಲ್ಲಿ ರೋಗದ ಕಣ್ಗಾವಲು ಬಲಪಡಿಸಲು ಮತ್ತು “ಬುಂಡಿಬುಗ್ಯೋ ವೈರಸ್ ಪತ್ತೆಯಾದ ಪ್ರದೇಶಗಳಿಗೆ ಪ್ರಯಾಣಿಸುವುದನ್ನು ನಿರುತ್ಸಾಹಗೊಳಿಸಲು” ಸೂಚಿಸಲಾಗಿದೆ.ಪತ್ರಿಕಾ ಪ್ರಕಟಣೆಯ ಪ್ರಕಾರ, ದಕ್ಷಿಣ ಸುಡಾನ್ ಸೇರಿದಂತೆ ಡೆಮಾಕ್ರಟಿಕ್ ರಿಪಬ್ಲಿಕ್ ಆಫ್ ಕಾಂಗೋ ಮತ್ತು ಉಗಾಂಡಾದ ಗಡಿಯಲ್ಲಿರುವ ದೇಶಗಳಲ್ಲಿ ರೋಗ ಹರಡುವ ಅಪಾಯ ಹೆಚ್ಚಿದೆ ಎಂದು ಅಂದಾಜಿಸಲಾಗಿದೆ.
ಎಬೋಲಾ ಕಾಯಿಲೆಯು ಎಬೋಲಾ ವೈರಸ್‌ನ ಬುಂಡಿಬುಗ್ಯೋ ಸ್ಟ್ರೈನ್‌ನಿಂದ ಉಂಟಾಗುವ ವೈರಲ್ ಹೆಮರಾಜಿಕ್ ಜ್ವರವಾಗಿದೆ. ಇದು ಹೆಚ್ಚಿನ ಮರಣ ಪ್ರಮಾಣವನ್ನು ಹೊಂದಿರುವ ಗಂಭೀರ ಕಾಯಿಲೆಯಾಗಿದೆ. ಪ್ರಸ್ತುತ, ಬುಂಡಿಬುಗ್ಯೋ ವೈರಸ್ ಸ್ಟ್ರೈನ್‌ನಿಂದ ಉಂಟಾಗುವ ಎಬೋಲಾ ಕಾಯಿಲೆಯನ್ನು ತಡೆಗಟ್ಟಲು ಅಥವಾ ಚಿಕಿತ್ಸೆ ನೀಡಲು ಯಾವುದೇ ಲಸಿಕೆಗಳು ಅಥವಾ ನಿರ್ದಿಷ್ಟ ಚಿಕಿತ್ಸೆಗಳು ಅನುಮೋದಿಸಲ್ಪಟ್ಟಿಲ್ಲ.
