UPI ಆಟೋ-ಪೇ ಸೇವೆಗಳು ಪಾವತಿಯನ್ನು ಸುಲಭಗೊಳಿಸುತ್ತಿವೆಯಾದರೂ, ಮರೆತ ಸಬ್‌ಸ್ಕ್ರಿಪ್‌ಷನ್‌ಗಳು ಬಳಕೆದಾರರ ಖಾತೆಯಿಂದ ನಿರಂತರವಾಗಿ ಹಣ ಕಡಿತಗೊಳ್ಳುವ ಅಪಾಯವನ್ನು ಹೆಚ್ಚಿಸುತ್ತಿವೆ. ಸಕ್ರಿಯವಾಗಿರುವ ‘ಮ್ಯಾಂಡೇಟ್’ಗಳನ್ನು (Active Mandates) ಆಗಾಗ್ಗೆ ಪರಿಶೀಲಿಸಿ, ಅನಗತ್ಯ ಆಟೋ-ಡೆಬಿಟ್ ಸೇವೆಗಳನ್ನು ತಕ್ಷಣವೇ ರದ್ದುಗೊಳಿಸಬೇಕೆಂದು ತಜ್ಞರು ಸಲಹೆ ನೀಡಿದ್ದಾರೆ.
ಡಿಜಿಟಲ್ ಪಾವತಿಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, UPI ಆಧಾರಿತ ಆಟೋ-ಪೇ ಸೇವೆಗಳು ಜನರ ಜೀವನವನ್ನು ಸುಲಭಗೊಳಿಸಿವೆ. OTT ಪ್ಲಾಟ್‌ಫಾರ್ಮ್‌ಗಳು, ವಿದ್ಯುತ್ ಬಿಲ್‌ಗಳು, ವಿಮಾ ಪ್ರೀಮಿಯಂಗಳು, ಮೊಬೈಲ್ ರೀಚಾರ್ಜ್‌ಗಳು ಮತ್ತು ಆಪ್ ಸಬ್‌ಸ್ಕ್ರಿಪ್‌ಷನ್‌ಗಳಂತಹ ಮರುಕಳಿಸುವ ಪಾವತಿಗಳನ್ನು (Recurring Payments) ಸ್ವಯಂಚಾಲಿತವಾಗಿ ನಿರ್ವಹಿಸಲು ಇದು ಸಹಕಾರಿಯಾಗಿದೆ. ಒಮ್ಮೆ ಬಳಕೆದಾರರು ಅನುಮತಿ ನೀಡಿದ ನಂತರ, ನಿಗದಿತ ದಿನಾಂಕದಂದು ಬ್ಯಾಂಕ್ ಖಾತೆಯಿಂದ ಹಣ ಸ್ವಯಂಚಾಲಿತವಾಗಿ ಕಡಿತಗೊಳ್ಳುತ್ತದೆ.
ಸಣ್ಣ ಮೊತ್ತದ ದೊಡ್ಡ ಹೊರೆ:
ಈ ಸೌಲಭ್ಯವು ಕೆಲವು ಸಂದರ್ಭಗಳಲ್ಲಿ ಹೆಚ್ಚುವರಿ ಆರ್ಥಿಕ ಹೊರೆಯನ್ನು ಹೊರಿಸುತ್ತಿದೆ. ವಿಶೇಷವಾಗಿ ಉಚಿತ ಟ್ರಯಲ್ (Free Trial) ಮೂಲಕ ಆರಂಭವಾದ ಸೇವೆಗಳನ್ನು ರದ್ದುಗೊಳಿಸಲು ಮರೆತಾಗ, ಸಣ್ಣ ಮೊತ್ತಗಳು ತಿಂಗಳುಗಟ್ಟಲೆ ಖಾತೆಯಿಂದ ಕಡಿತಗೊಳ್ಳುತ್ತಿರುತ್ತವೆ. ಪ್ರತಿಯೊಂದು ಸಬ್‌ಸ್ಕ್ರಿಪ್‌ಷನ್ ಮೊತ್ತವು ಕಡಿಮೆಯಿರುವುದರಿಂದ, ಅನೇಕರು ಅದನ್ನು ಗಮನಿಸುವುದಿಲ್ಲ. ಪರಿಣಾಮವಾಗಿ, ಬಳಸದ ಸೇವೆಗಳಿಗೂ ಹಣ ಪಾವತಿಸಬೇಕಾಗುತ್ತದೆ.
ಆಟೋ-ಪೇ ಮ್ಯಾಂಡೇಟ್ ಎಂದರೇನು?
UPI ಆಟೋ-ಪೇ ಮ್ಯಾಂಡೇಟ್ ಎಂದರೆ ಬಳಕೆದಾರರು ಮುಂಚಿತವಾಗಿ ನೀಡುವ ಅನುಮತಿ. ಇದರ ಮೂಲಕ ವ್ಯಾಪಾರಿಗಳು ನಿಗದಿತ ಅವಧಿಯಲ್ಲಿ ಖಾತೆಯಿಂದ ಹಣವನ್ನು ಡೆಬಿಟ್ ಮಾಡಿಕೊಳ್ಳಬಹುದು. ಒಮ್ಮೆ ಇದು ಸಕ್ರಿಯವಾದರೆ, ಪ್ರತಿ ಬಾರಿ ಪ್ರತ್ಯೇಕ ಅನುಮತಿಯ ಅಗತ್ಯವಿರುವುದಿಲ್ಲ.
ಏನು ಮಾಡಬೇಕು?
- ಹೆಚ್ಚಿನ UPI ಆಪ್‌ಗಳಲ್ಲಿ “Mandates” ಅಥವಾ “AutoPay” ಎಂಬ ವಿಭಾಗವಿರುತ್ತದೆ. ಇದರಲ್ಲಿ ಸಕ್ರಿಯವಾಗಿರುವ ಎಲ್ಲಾ ಮ್ಯಾಂಡೇಟ್‌ಗಳು, ಪಾವತಿ ದಿನಾಂಕಗಳು ಮತ್ತು ವ್ಯಾಪಾರಿಯ ವಿವರಗಳು ಕಾಣಿಸುತ್ತವೆ. ಬಳಕೆದಾರರು ಈ ವಿಭಾಗವನ್ನು ಆಗಾಗ್ಗೆ ಪರಿಶೀಲಿಸಿ, ಅನಗತ್ಯ ಸಬ್‌ಸ್ಕ್ರಿಪ್‌ಷನ್‌ಗಳನ್ನು ಗುರುತಿಸಬೇಕು.
- ಬ್ಯಾಂಕ್ ಸ್ಟೇಟ್‌ಮೆಂಟ್‌ಗಳಲ್ಲಿ ಆಗುವ ಪುನರಾವರ್ತಿತ ಡೆಬಿಟ್‌ಗಳನ್ನು ಪರಿಶೀಲಿಸುವುದು ಒಳ್ಳೆಯದು.
- ಯಾವುದೇ ಮ್ಯಾಂಡೇಟ್ ರದ್ದುಗೊಳಿಸಲು, UPI ಆಪ್‌ನಲ್ಲಿರುವ ಆ ಮ್ಯಾಂಡೇಟ್ ಆಯ್ಕೆ ಮಾಡಿ “Cancel” ಅಥವಾ “Revoke” ಆಪ್ಶನ್ ಕ್ಲಿಕ್ ಮಾಡಬೇಕು. ಗಮನಿಸಿ: ಕೆಲವು ಸೇವೆಗಳಲ್ಲಿ UPI ಮ್ಯಾಂಡೇಟ್ ರದ್ದುಗೊಳಿಸುವುದರ ಜೊತೆಗೆ, ಆಯಾ ಆಪ್ ಅಥವಾ ಸೇವಾ ಪೂರೈಕೆದಾರರ ಬಳಿಯೂ ಸಬ್‌ಸ್ಕ್ರಿಪ್‌ಷನ್ ಪ್ರತ್ಯೇಕವಾಗಿ ನಿಲ್ಲಿಸಬೇಕಾಗುತ್ತದೆ.
ತಜ್ಞರ ಪ್ರಕಾರ, ಆಟೋ-ಡೆಬಿಟ್ ಸೌಲಭ್ಯ ಅನುಕೂಲಕರವಾಗಿದ್ದರೂ, ಬಳಕೆದಾರರು ತಮ್ಮ ಬ್ಯಾಂಕ್ ಖಾತೆಗಳ ಮೇಲೆ ನಿಗಾ ಇಡುವುದು ಅತ್ಯಗತ್ಯ. ಇಲ್ಲದಿದ್ದರೆ, ಸಣ್ಣ ಮೊತ್ತದ ರೂಪದಲ್ಲಿ ಅನಗತ್ಯ ಖರ್ಚುಗಳು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ಎಚ್ಚರಿಸಿದ್ದಾರೆ.
