ಫ್ರಾನ್ಸ್‌ನಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ 79ನೇ ಕಾನ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಬಾಲಿವುಡ್ ನಟಿ ಜಾಕ್ವೆಲಿನ್ ಫರ್ನಾಂಡಿಸ್ ಮತ್ತೊಮ್ಮೆ ಜಾಗತಿಕ ವೇದಿಕೆಯಲ್ಲಿ ಗಮನ ಸೆಳೆದಿದ್ದಾರೆ. ವಿಶ್ವದ ಅತ್ಯಂತ ಜನಪ್ರಿಯ ಲಕ್ಸುರಿ ಜ್ಯುವೆಲ್ಲರಿ ಬ್ರ್ಯಾಂಡ್ ಆದ ಚೋಪಾರ್ಡ್ ಆಯೋಜಿಸಿದ್ದ ಮಿರಾಕಲ್ ಪ್ರದರ್ಶನದಲ್ಲಿ ಪಾಲ್ಗೊಳ್ಳುವ ಮೂಲಕ ಜಾಕ್ವೆಲಿನ್ ಪ್ರೇಕ್ಷಕರ ಮತ್ತು ಮಾಧ್ಯಮಗಳ ಕಣ್ಣು ಕೋರೈಸಿದ್ದಾರೆ.
ಈ ಭವ್ಯ ಸಂಜೆಯ ಸುಂದರ ಕ್ಷಣಗಳ ಫೋಟೋಗಳನ್ನು ಜಾಕ್ವೆಲಿನ್ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಪರ್ಪಲ್ ಕಾರ್ಪೆಟ್ ಮೇಲೆ ಕಪ್ಪು ಬಣ್ಣದ ಆಕರ್ಷಕ ಮಿನಿ ಡ್ರೆಸ್ ಧರಿಸಿ ಅವರು ನಡೆದು ಬರುತ್ತಿರುವ ಫೋಟೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ಡೈಮಂಡ್ ನೆಕ್ಲೇಸ್ ಹಾಗೂ ಮ್ಯಾಚಿಂಗ್ ಬ್ರೇಸ್‌ಲೆಟ್ ಧರಿಸಿದ್ದ ಜಾಕ್ವೆಲಿನ್, ಹಾಲಿವುಡ್ ಶೈಲಿಯ ಕೇಶವಿನ್ಯಾಸದೊಂದಿಗೆ ಮಿಂಚಿದ್ದಾರೆ.
ಸತತ ಮೂರನೇ ಬಾರಿ ಕಾನ್ ವೇದಿಕೆಯಲ್ಲಿ ಮಿಂಚು ಮೇ 12 ರಿಂದ ಆರಂಭವಾಗಿರುವ ಈ ಬಾರಿಯ ಕಾನ್ ಚಿತ್ರೋತ್ಸವವು ಜಾಕ್ವೆಲಿನ್ ಪಾಲಿಗೆ ಸತತ ಮೂರನೇ ವರ್ಷದ ಹಾಜರಾತಿಯಾಗಿದೆ. 2024 ರಲ್ಲಿ ದಿ ಸಬ್‌ಸ್ಟೆನ್ಸ್ ಚಿತ್ರದ ಪ್ರೀಮಿಯರ್ ಶೋನಲ್ಲಿ ಭಾರತವನ್ನು ಪ್ರತಿನಿಧಿಸಿದ್ದ ಅವರು, ಕಳೆದ 2025 ರ ಚಿತ್ರೋತ್ಸವದಲ್ಲಿ ರೆಡ್ ಸೀ ಫಿಲ್ಮ್ ಫೌಂಡೇಶನ್‌ನಿಂದ ವುಮೆನ್ ಇನ್ ಸಿನಿಮಾ ಗೌರವಕ್ಕೆ ಪಾತ್ರರಾಗಿದ್ದರು. ಈ ಬಾರಿ ಚೋಪಾರ್ಡ್ ಬ್ರ್ಯಾಂಡ್‌ನ ವಿಶೇಷ ಆಹ್ವಾನಿತರಾಗಿ ಭಾಗವಹಿಸಿ ಕರಾವಳಿ ತೀರದ ರೆಡ್ ಕಾರ್ಪೆಟ್ ಮೆರುಗನ್ನು ಹೆಚ್ಚಿಸಿದ್ದಾರೆ.
ಚಿತ್ರರಂಗದಲ್ಲಿ ಜಾಕ್ವೆಲಿನ್ ಬ್ಯುಸಿ ಸದ್ಯ ಸೋನು ಸೂದ್ ನಿರ್ದೇಶನದ ಫತೇಹ್ ಹಾಗೂ ಮಲ್ಟಿಸ್ಟಾರರ್ ಚಿತ್ರ ಹೌಸ್‌ಫುಲ್ 5 ಸಿನಿಮಾಗಳಲ್ಲಿ ಕಾಣಿಸಿಕೊಂಡಿರುವ ಜಾಕ್ವೆಲಿನ್, ಮುಂದಿನ ದಿನಗಳಲ್ಲಿ ಬಹುನಿರೀಕ್ಷಿತ ವೆಲ್‌ಕಮ್ ಟು ದಿ ಜಂಗಲ್ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಅಹಮದ್ ಖಾನ್ ನಿರ್ದೇಶನದ ಈ ಕಾಮಿಡಿ ಚಿತ್ರದಲ್ಲಿ ಅಕ್ಷಯ್ ಕುಮಾರ್, ಸುನಿಲ್ ಶೆಟ್ಟಿ ಮತ್ತು ಪರೇಶ್ ರಾವಲ್ ಪ್ರಮುಖ ಪಾತ್ರಗಳಲ್ಲಿದ್ದಾರೆ.
