ಬೆಂಗಳೂರು: ಸಿಲಿಕಾನ್ ಸಿಟಿ ಬೆಂಗಳೂರು ಅದೆಷ್ಟೋ ನವೋದ್ಯಮಗಳ ಕಾಶಿ. ಇಲ್ಲಿನ ದಂಪತಿಗಳಾದ ಜುವೋಲಾ ಮತ್ತು ಅರ್ಶಿನ್ ತಮ್ಮ ವಿಭಿನ್ನ ಐಡಿಯಾದ ಮೂಲಕ ಐಫೋನ್ ಆಕ್ಸೆಸರಿಸ್ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ. 2025ರಲ್ಲಿ ಇವರು ಆರಂಭಿಸಿದ ಕಿಯೋಕೊ (Kyoko) ಎಂಬ ಲೈಫ್‌ಸ್ಟೈಲ್ ಬ್ರ್ಯಾಂಡ್ ಇಂದು ಬಾಲಿವುಡ್ ಸೆಲೆಬ್ರಿಟಿಗಳ ನೆಚ್ಚಿನ ಫೋನ್ ಕೇಸ್ ಬ್ರ್ಯಾಂಡ್ ಆಗಿ ಹೊರಹೊಮ್ಮಿದೆ.
ಚೀನಾದಿಂದ ಶುರುವಾದ ಉದ್ಯಮದ ಕನಸು
ಸಹ-ಸಂಸ್ಥಾಪಕಿ ಜುವೋಲಾ ಅವರು ವೈದ್ಯಕೀಯ ಶಿಕ್ಷಣಕ್ಕಾಗಿ ಚೀನಾಕ್ಕೆ ಹೋಗಿದ್ದರು. ಆದರೆ ಅಲ್ಲಿನ ಆಕರ್ಷಕ ಫೋನ್ ಕೇಸ್‌ಗಳು ಮತ್ತು ಮಾರುಕಟ್ಟೆಯನ್ನು ನೋಡಿ ಅವರಿಗೆ ಉದ್ಯಮದತ್ತ ಆಸಕ್ತಿ ಮೂಡಿತು. ಕೋವಿಡ್ ಸಮಯದಲ್ಲಿ ಭಾರತಕ್ಕೆ ಮರಳಿದ ಅವರು, ಪತಿ ಅರ್ಶಿನ್ ಜೊತೆಗೂಡಿ 5 ಲಕ್ಷ ರೂಪಾಯಿ ಹೂಡಿಕೆಯೊಂದಿಗೆ ಈ ಬ್ರ್ಯಾಂಡ್ ಆರಂಭಿಸಿದರು.
ಜಾನ್ವಿ ಕಪೂರ್, ಆಲಿಯಾ ಕಶ್ಯಪ್ ಇವರ ಗ್ರಾಹಕರು
ಈ ಬ್ರ್ಯಾಂಡ್ ರಾತ್ರೋರಾತ್ರಿ ಪ್ರಸಿದ್ಧಿಯಾಗಲು ಕಾರಣ ಬಾಲಿವುಡ್ ತಾರೆಯರ ಆಕರ್ಷಣೆ. ನಟಿ ಜಾನ್ವಿ ಕಪೂರ್, ಖುಷಿ ಕಪೂರ್ ಮತ್ತು ಆಲಿಯಾ ಕಶ್ಯಪ್ ಅವರಂತಹ ಸೆಲೆಬ್ರಿಟಿಗಳು ಈ ಬ್ರ್ಯಾಂಡ್‌ನ ಫೋನ್ ಕೇಸ್‌ಗಳನ್ನು ಬಳಸುತ್ತಿದ್ದಾರೆ. ವಿಶೇಷವೆಂದರೆ, ಜಾನ್ವಿ ಕಪೂರ್ ಸ್ವತಃ ಸೋಶಿಯಲ್ ಮೀಡಿಯಾದಲ್ಲಿ ಕಾಮೆಂಟ್ ಮಾಡಿ ಇವರ ಕೇಸ್‌ಗಳನ್ನು ಕೇಳಿದ್ದು ಇವರ ಯಶಸ್ಸಿಗೆ ಮೈಲಿಗಲ್ಲಾಯಿತು.
ಇನ್‌ಸ್ಟಾಗ್ರಾಮ್ ರೀಲ್ಸ್ ಮೂಲಕವೇ ಗೆಲುವು
ಯಾವುದೇ ಪೇಯ್ಡ್ ಜಾಹೀರಾತು ನೀಡದೆ, ಕೇವಲ ತಮ್ಮ ಆರ್ಡರ್ ಪ್ಯಾಕಿಂಗ್ ಮತ್ತು ಕಚೇರಿಯ ದಿನಚರಿಯ ‘ಮಿನಿ ವ್ಲಾಗ್‌’ಗಳನ್ನು ಹಂಚಿಕೊಳ್ಳುವ ಮೂಲಕ ಇವರು ಗ್ರಾಹಕರನ್ನು ತಲುಪಿದ್ದಾರೆ. ಈ ಆರ್ಗಾನಿಕ್ ಮಾರ್ಕೆಟಿಂಗ್ ಅಸ್ತ್ರದಿಂದ ಒಂದೇ ದಿನದಲ್ಲಿ ನೂರಕ್ಕೂ ಹೆಚ್ಚು ಆರ್ಡರ್‌ಗಳು ಇವರನ್ನು ಹುಡುಕಿಕೊಂಡು ಬರಲಾರಂಭಿಸಿವೆ.
ಆರು ತಿಂಗಳ ಆದಾಯದ ರಿಪೋರ್ಟ್:
ಆರಂಭ: 2025ರ ಅಕ್ಟೋಬರ್‌ನಲ್ಲಿ ₹1.1 ಲಕ್ಷ ಆದಾಯ.
ಜಿಗಿತ: 2026ರ ಮಾರ್ಚ್ ವೇಳೆಗೆ ಮಾಸಿಕ ₹8.2 ಲಕ್ಷಕ್ಕೆ ಏರಿಕೆ.
ಒಟ್ಟು ಆದಾಯ: ಕೇವಲ 6 ತಿಂಗಳಲ್ಲಿ ₹16 ಲಕ್ಷ ಆದಾಯ (Revenue).
ಲಾಭಾಂಶ: ಶೇ. 25 ರಷ್ಟು ಲಾಭದೊಂದಿಗೆ ಕಂಪನಿ ಮುನ್ನುಗ್ಗುತ್ತಿದೆ.
ಮುಂದಿನ ಗುರಿ ಏನು?
ಸದ್ಯ ಕೇವಲ ಐಫೋನ್ ಕೇಸ್‌ಗಳಿಗೆ ಸೀಮಿತವಾಗಿರುವ ಕಿಯೋಕೊ, ಶೀಘ್ರದಲ್ಲೇ ಆಂಡ್ರಾಯ್ಡ್ ಫೋನ್‌ಗಳು, ಏರ್‌ಪಾಡ್ಸ್ ಮತ್ತು ಟ್ಯಾಬ್ಲೆಟ್ ಕೇಸ್‌ಗಳನ್ನು ಮಾರುಕಟ್ಟೆಗೆ ತರಲು ಸಿದ್ಧತೆ ನಡೆಸುತ್ತಿದೆ. “ಉದ್ಯಮದಲ್ಲಿ ಗೆಲ್ಲಲು ಹುಚ್ಚುತನದ ತಾಳ್ಮೆ ಮುಖ್ಯ” ಎನ್ನುತ್ತಾರೆ ಈ ಯುವ ದಂಪತಿ.
