ಚಂಡೀಗಢ: ಪಂಜಾಬ್ ಮುಖ್ಯಮಂತ್ರಿ ಭಗವಂತ್ ಮಾನ್ ಅವರ ಸೋದರ ಸಂಬಂಧಿ ಸೋಮವಾರ ಭಾರತೀಯ ಜನತಾ ಪಕ್ಷ(ಬಿಜೆಪಿ) ಸೇರ್ಪಡೆಗೊಂಡರು, ಇದು 2027 ರ ವಿಧಾನಸಭಾ ಚುನಾವಣೆಗೆ ಮುನ್ನ ಆಮ್ ಆದ್ಮಿ ಪಕ್ಷಕ್ಕೆ (ಎಎಪಿ) ಹಿನ್ನಡೆಯಾಗಬಹುದು ಎನ್ನಲಾಗಿದೆ.
ಹರಿಯಾಣ ಮುಖ್ಯಮಂತ್ರಿ ನಯಾಬ್ ಸಿಂಗ್ ಸೈನಿ ಮತ್ತು ಪಂಜಾಬ್ ಬಿಜೆಪಿ ಮುಖ್ಯಸ್ಥ ಸುನಿಲ್ ಜಾಖರ್ ಅವರ ಸಮ್ಮುಖದಲ್ಲಿ ಜಿಯಾನ್ ಸಿಂಗ್ ಮಾನ್ ಪಕ್ಷ ಸೇರಿದರು. ಸೇರ್ಪಡೆಯಾದ ನಂತರ, ಮಾನ್ ಅವರು ಎಎಪಿ ಸರ್ಕಾರವನ್ನು ಟೀಕಿಸಿದರು, ಭಗವಂತ್ ಮಾನ್ ಅವರ ನಾಯಕತ್ವದಲ್ಲಿ ಪಕ್ಷವು “ಖಾಸ್ ಆದ್ಮಿ ಪಕ್ಷ” (ಗಣ್ಯರ ಪಕ್ಷ) ಆಗಿದೆ ಎಂದು ಆರೋಪಿಸಿದರು.
ತಮ್ಮ ಸೋದರಸಂಬಂಧಿಯೊಂದಿಗೆ ದೀರ್ಘಕಾಲ ಸಂಬಂಧ ಹೊಂದಿರುವುದಾಗಿ ಮತ್ತು ಪಂಜಾಬ್ ಪೀಪಲ್ಸ್ ಪಾರ್ಟಿಯಲ್ಲಿದ್ದ ದಿನಗಳಿಂದ, ಲೋಕಸಭೆಯಲ್ಲಿನ ತಮ್ಮ ಅಧಿಕಾರಾವಧಿಯವರೆಗೆ ಮತ್ತು ಮುಖ್ಯಮಂತ್ರಿಯಾಗುವವರೆಗೂ ಅವರನ್ನು ಬೆಂಬಲಿಸಿರುವುದಾಗಿ ಮಾನ್ ಹೇಳಿದರು. ಆದಾಗ್ಯೂ, ಪಂಜಾಬ್ ಈಗ ಮಾದಕ ದ್ರವ್ಯ ಸೇವನೆ, ನಿರುದ್ಯೋಗ ಮತ್ತು ಭ್ರಷ್ಟಾಚಾರ ಸೇರಿದಂತೆ ಗಂಭೀರ ಸವಾಲುಗಳನ್ನು ಎದುರಿಸುತ್ತಿದೆ ಎಂದು ಅವರು ದೂರಿದ್ದಾರೆ.
ಎಎಪಿ ರಾಷ್ಟ್ರೀಯ ಸಂಚಾಲಕ ಅರವಿಂದ್ ಕೇಜ್ರಿವಾಲ್ ಮತ್ತು ಅವರ ಆಪ್ತ ಸಹಾಯಕರನ್ನು ಉಲ್ಲೇಖಿಸಿ, ದೆಹಲಿಯಲ್ಲಿ ನೆಲೆಸಿರುವ ನಾಯಕರು ರಾಜ್ಯವನ್ನು ನಡೆಸುತ್ತಿದ್ದಾರೆ. “ಪಂಜಾಬ್ ಅನ್ನು ಮತ್ತೆ ಹಳಿಗೆ ತರುವ ಸಾಮರ್ಥ್ಯ ಬಿಜೆಪಿಗೆ ಮಾತ್ರ ಇದೆ” ಎಂದು ಹೇಳಿದ್ದಾರೆ.
