ಬೆಂಗಳೂರು: ಬೆಳಗಿನ ಉಪಹಾರಕ್ಕೆ ದೋಸೆ ಅಂದ್ರೆ ಯಾರಿಗೆ ತಾನೇ ಇಷ್ಟವಿಲ್ಲ? ಆದರೆ ಕೆಲಸದ ಒತ್ತಡದಲ್ಲಿ ವಾರಕ್ಕೆ ಆಗುವಷ್ಟು ದೋಸೆ ಹಿಟ್ಟನ್ನು ಒಟ್ಟಿಗೆ ರುಬ್ಬಿ (Grinding) ಫ್ರಿಡ್ಜ್ನಲ್ಲಿ ಎತ್ತಿಟ್ಟುಕೊಳ್ಳುವ ಅಭ್ಯಾಸ ನಿಮಗಿದ್ದರೆ ಈ ಲೇಖನ ಓದಲೇಬೇಕು. ನೀವು ಅಮೃತ ಅಂದುಕೊಂಡು ತಿನ್ನುತ್ತಿರುವ ದೋಸೆ ನಿಮ್ಮ ಆರೋಗ್ಯವನ್ನು ಮೆಲ್ಲಗೆ ಹಾಳು ಮಾಡುತ್ತಿರಬಹುದು!
3-4 ದಿನ ಮೀರಿದರೆ ಅಪಾಯ ಖಂಡಿತ
ಬೆಂಗಳೂರಿನಂತಹ ಹವಾಮಾನದಲ್ಲಿ ಹಿಟ್ಟು ಬೇಗ ಹುಳಿಯಾಗುತ್ತದೆ. ಸಾಮಾನ್ಯವಾಗಿ ಹಿಟ್ಟನ್ನು 3 ರಿಂದ 4 ದಿನಗಳ ಕಾಲ ಬಳಸಬಹುದು. ಆದರೆ ವಾರಕ್ಕಿಂತ ಹೆಚ್ಚು ಕಾಲ ಇಟ್ಟ ಹಿಟ್ಟಿನಲ್ಲಿ ಬ್ಯಾಕ್ಟೀರಿಯಾಗಳ ಸಂತತಿ ಮಿತಿ ಮೀರಿ ಹೆಚ್ಚಾಗುತ್ತದೆ. ಇದು ಆಹಾರದ ಗುಣಮಟ್ಟವನ್ನು ಕೆಡಿಸಿ ಫುಡ್ ಪಾಯಿಸನಿಂಗ್’ಗೆ ನೇರ ದಾರಿಯಾಗುತ್ತದೆ.
ಹಿಟ್ಟು ವಿಷವಾಗ್ತಿದೆ ಎಂದು ತಿಳಿಯುವುದು ಹೇಗೆ?
ಬಣ್ಣ ಬದಲಾವಣೆ: ಹಿಟ್ಟಿನ ಮೇಲೆ ಕಪ್ಪು ಅಥವಾ ಬೂದು ಬಣ್ಣದ ಪದರ ಕಾಣಿಸಿಕೊಂಡರೆ ಅದನ್ನು ಬಳಸಬೇಡಿ.
ವಾಸನೆ: ಹಿಟ್ಟಿನಿಂದ ಕೆಟ್ಟ ವಾಸನೆ (Bad Odor) ಬರಲು ಶುರುವಾದರೆ ಅದು ಕೆಟ್ಟಿದೆ ಎಂದರ್ಥ.
ಅತಿಯಾದ ಹುಳಿ: 5 ದಿನ ಕಳೆದ ನಂತರ ಅದರಲ್ಲಿ ಲ್ಯಾಕ್ಟಿಕ್ ಆಸಿಡ್ ಪ್ರಮಾಣ ಅತಿಯಾಗಿ ಅದು ಜೀರ್ಣಾಂಗವ್ಯೂಹದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ.
ಹಳೇ ಹಿಟ್ಟಿನಿಂದ ಆಗುವ ಆರೋಗ್ಯ ಸಮಸ್ಯೆಗಳು:
ಜೀರ್ಣಕ್ರಿಯೆ ತೊಂದರೆ: ತಕ್ಷಣಕ್ಕೆ ವಾಂತಿ, ಭೇದಿ ಮತ್ತು ಹೊಟ್ಟೆ ನೋವು ಕಾಣಿಸಿಕೊಳ್ಳಬಹುದು.
ಗ್ಯಾಸ್ಟ್ರಿಕ್ ಸಮಸ್ಯೆ: ಅತಿಯಾದ ಆಮ್ಲೀಯತೆಯಿಂದ ಎದೆನೋವು ಕೂಡ ಬರಬಹುದು.
ಲಿವರ್ ಹಾನಿ: ಫ್ರಿಡ್ಜ್ನಲ್ಲಿಟ್ಟರೂ ಗಾಳಿಯ ಸಂಪರ್ಕದಿಂದ ಫಂಗಸ್ (Fungus) ಬೆಳೆಯುವ ಸಾಧ್ಯತೆ ಇರುತ್ತದೆ, ಇದು ಲಿವರ್ ಮತ್ತು ಕರುಳಿನ ಆರೋಗ್ಯವನ್ನು ದೀರ್ಘಕಾಲದವರೆಗೆ ಹಾಳು ಮಾಡುತ್ತದೆ.
