ಚೆನ್ನೈ: ತಮಿಳುನಾಡು ವಿಧಾನಸಭಾ ಚುನಾವಣಾ ಕಣ ದಿನದಿಂದ ದಿನಕ್ಕೆ ರಂಗೇರುತ್ತಿದ್ದು, ಕಾಂಗ್ರೆಸ್ ಅಭ್ಯರ್ಥಿಗಳ ಪರವಾಗಿ ಕರ್ನಾಟಕದ ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಅಬ್ಬರದ ಪ್ರಚಾರ ನಡೆಸುತ್ತಿದ್ದಾರೆ. ಪೊನ್ನೇರಿಯಲ್ಲಿ ನಡೆದ ಬೃಹತ್ ಚುನಾವಣಾ ರ್‍ಯಾಲಿಯಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಪ್ರಾದೇಶಿಕ ಭಾಷೆ ಮತ್ತು ಸಂಸ್ಕೃತಿಯ ರಕ್ಷಣೆಯ ಬಗ್ಗೆ ಭಾವನಾತ್ಮಕವಾಗಿ ಮಾತನಾಡಿದರು.
ಈ ದೇಶದ ಇತಿಹಾಸ ಬಹಳ ಮಹತ್ವದ್ದು. ಡಿಎಂಕೆಗೆ ಸುದೀರ್ಘ ಇತಿಹಾಸವಿದೆ, ಹಾಗೆಯೇ ಕಾಂಗ್ರೆಸ್‌ಗೂ ಕೂಡ ಸಮೃದ್ಧವಾದ ಇತಿಹಾಸವಿದೆ. ನಾನು ನನ್ನ ಭಾಷಣದಲ್ಲಿ ಹೇಳಿದಂತೆ, ತಮಿಳುನಾಡಿನ ಇತಿಹಾಸದಲ್ಲಿ ಒಂದು ವಿಶೇಷತೆಯಿದೆ—ಬ್ರಿಟಿಷರು ಈ ದೇಶವನ್ನು ಬಿಟ್ಟು ಹೋಗುವಾಗ, ಅವರು ಮಕ್ಕಳನ್ನು ಅವರ ‘ತಾಯ್ನುಡಿ’ಯನ್ನು ತಿಳಿಸಲು ಕೇಳಿದರೇ ಹೊರತು ‘ತಂದೆಯ ನುಡಿ’ಯನ್ನಲ್ಲ. ಇಲ್ಲಿ ತಾಯ್ನುಡಿ ಎಂದರೆ ಅದು ತಮಿಳು…”
“ಈ ರಾಜ್ಯವು ಯಾವಾಗಲೂ ತಮಿಳು ಮತ್ತು ಅದರ ಭಾಷೆಗೆ ಹೆಚ್ಚಿನ ಆದ್ಯತೆ ನೀಡುತ್ತಾ ಬಂದಿದೆ. ಆದರೆ, ಈಗ ತಮಿಳು ಮತ್ತು ಪ್ರಾದೇಶಿಕ ಭಾಷಾ ನೀತಿಯನ್ನು ಹತ್ತಿಕ್ಕುವ ಪ್ರಯತ್ನಗಳು ನಡೆಯುತ್ತಿವೆ. ಇದೇ ಕಾರಣಕ್ಕೆ ರಾಹುಲ್ ಗಾಂಧಿ ಅವರು ಈ ಮಾತನ್ನು ಹೇಳಿದ್ದಾರೆ ಮತ್ತು ನಾವೆಲ್ಲರೂ ಇದನ್ನು ನಂಬುತ್ತೇವೆ. ನಾವು ನಮ್ಮ ತಾಯ್ನುಡಿಯನ್ನು ರಕ್ಷಿಸಬೇಕು ಮತ್ತು ಉಳಿಸಬೇಕು.”
ತಾಯ್ನುಡಿಯೇ ಸರ್ವ ಶ್ರೇಷ್ಠ: ಬ್ರಿಟಿಷರ ಕಾಲದ ಇತಿಹಾಸವನ್ನು ಉಲ್ಲೇಖಿಸಿದ ಡಿ.ಕೆ. ಶಿವಕುಮಾರ್, “ಬ್ರಿಟಿಷರು ಈ ದೇಶ ಬಿಟ್ಟು ಹೋಗುವಾಗ ಮಕ್ಕಳನ್ನು ಅವರ ‘ತಾಯ್ನುಡಿ’ (Mother Tongue) ಯಾವುದು ಎಂದು ಕೇಳಿದರೇ ಹೊರತು ‘ತಂದೆಯ ನುಡಿ’ಯನ್ನಲ್ಲ. ತಮಿಳುನಾಡಿನಲ್ಲಿ ತಾಯ್ನುಡಿ ಎಂದರೆ ಅದು ತಮಿಳು. ಈ ಮಣ್ಣಿನಲ್ಲಿ ಭಾಷೆಗೆ ಸದಾ ಮೊದಲ ಆದ್ಯತೆ,” ಎಂದು ಹೇಳಿದರು.
ಭಾಷಾ ನೀತಿಯ ಮೇಲೆ ದಾಳಿ: ಪ್ರಸ್ತುತ ಪ್ರಾದೇಶಿಕ ಭಾಷೆಗಳನ್ನು ಮತ್ತು ಭಾಷಾ ನೀತಿಯನ್ನು ಹತ್ತಿಕ್ಕುವ ಪ್ರಯತ್ನಗಳು ನಡೆಯುತ್ತಿವೆ ಎಂದು ಅವರು ಆರೋಪಿಸಿದರು. ಇದೇ ಕಾರಣಕ್ಕೆ ರಾಹುಲ್ ಗಾಂಧಿ ಅವರು ಭಾಷಾ ಅಸ್ಮಿತೆಯ ಪರವಾಗಿ ಧ್ವನಿ ಎತ್ತಿದ್ದಾರೆ ಮತ್ತು ನಾವೆಲ್ಲರೂ ಅದನ್ನು ಬೆಂಬಲಿಸುತ್ತೇವೆ ಎಂದು ತಿಳಿಸಿದರು. ಡಿಎಂಕೆ ಮತ್ತು ಕಾಂಗ್ರೆಸ್ ಪಕ್ಷಗಳು ಸುದೀರ್ಘ ಇತಿಹಾಸವನ್ನು ಹೊಂದಿವೆ. ಈ ಮೈತ್ರಿಯು ತಮಿಳುನಾಡಿನ ಸಂಸ್ಕೃತಿ ಮತ್ತು ಹಿತಾಸಕ್ತಿಯನ್ನು ಕಾಪಾಡಲು ಬದ್ಧವಾಗಿದೆ ಎಂದು ಭರವಸೆ ನೀಡಿದರು. ನಮ್ಮ ಮಾತೃಭಾಷೆಯನ್ನು ರಕ್ಷಿಸುವುದು ಪ್ರತಿಯೊಬ್ಬರ ಕರ್ತವ್ಯ. ಪ್ರಾದೇಶಿಕ ಭಾಷೆಗಳ ಅಸ್ತಿತ್ವಕ್ಕೆ ಧಕ್ಕೆ ತರುವ ಯಾವುದೇ ಶಕ್ತಿಗಳ ವಿರುದ್ಧ ಒಗ್ಗಟ್ಟಿನಿಂದ ಹೋರಾಡಬೇಕೆಂದು ಅವರು ಕರೆ ನೀಡಿದರು.
