ಮುಂಬೈ: 90ರ ದಶಕದ ಬಾಲಿವುಡ್‌ನ ಬೋಲ್ಡ್ ನಟಿ ಮಮತಾ ಕುಲಕರ್ಣಿ ಅವರ ಜೀವನದಲ್ಲಿ ಮತ್ತೊಂದು ದೊಡ್ಡ ತಿರುವು ಕಂಡುಬಂದಿದೆ. ಕಳೆದ ಹಲವು ವರ್ಷಗಳಿಂದ ಆಧ್ಯಾತ್ಮದ ಹಾದಿ ಹಿಡಿದು, ಕಿನ್ನರ್ ಅಖಾಡದ ‘ಮಹಾ ಮಂಡಲೇಶ್ವರ’ ಆಗಿ ಗುರುತಿಸಿಕೊಂಡಿದ್ದ ಮಮತಾ, ಈಗ ಮತ್ತೆ ತಮ್ಮ ಹಳೆಯ ಗ್ಲಾಮರ್ ಜೀವನಕ್ಕೆ ಮರಳಿದಂತೆ ಕಾಣುತ್ತಿದೆ. ಇತ್ತೀಚೆಗೆ ಗೋವಾ ಪ್ರವಾಸ ಮುಗಿಸಿ ವಾಪಸಾದ ಅವರ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡುತ್ತಿದೆ.
ವೈರಲ್ ವಿಡಿಯೋದಲ್ಲಿ ಏನಿದೆ? ವೈರಲ್ ಆಗಿರುವ ವಿಡಿಯೋದಲ್ಲಿ ಮಮತಾ ಕುಲಕರ್ಣಿ ಅವರು ಕೇಸರಿ ವಸ್ತ್ರಗಳನ್ನು ತ್ಯಜಿಸಿ, ಕೆಂಪು ಬಣ್ಣದ ಸ್ಟೈಲಿಶ್ ವೆಸ್ಟರ್ನ್ ಉಡುಪು ಮತ್ತು ಕಪ್ಪು ಬಣ್ಣದ ಕೂಲಿಂಗ್ ಗ್ಲಾಸ್ ಧರಿಸಿ ಮಿಂಚುತ್ತಿದ್ದಾರೆ. ಗೋವಾ ವಿಮಾನ ನಿಲ್ದಾಣದಲ್ಲಿ ತಮ್ಮ ಸ್ನೇಹಿತರು ಮತ್ತು ಕುಟುಂಬದವರೊಂದಿಗೆ ಕಾಣಿಸಿಕೊಂಡಿರುವ ಅವರು, 90ರ ದಶಕದ ತಮ್ಮ ಹಳೆಯ ಖದರ್ ಅನ್ನು ನೆನಪಿಸುವಂತಿದ್ದಾರೆ. ಸನ್ಯಾಸತ್ವದ ಜೀವನಕ್ಕೆ ಗುಡ್‌ಬೈ ಹೇಳಿ ಮತ್ತೆ ಚಿತ್ರರಂಗದತ್ತ ಮುಖ ಮಾಡುತ್ತಿದ್ದಾರೆಯೇ ಎಂಬ ಚರ್ಚೆ ಈಗ ಶುರುವಾಗಿದೆ.
ಕಿರುತೆರೆಗೆ ಭರ್ಜರಿ ಎಂಟ್ರಿ: ಇತ್ತೀಚೆಗಷ್ಟೇ ಮಮತಾ ಕುಲಕರ್ಣಿ ಅವರು ಜನಪ್ರಿಯ ರಿಯಾಲಿಟಿ ಶೋ ‘ಲಾಫ್ಟರ್ ಚೆಫ್’ (Laughter Chef) ಸೀಸನ್ 3ರಲ್ಲಿ ಕಾಣಿಸಿಕೊಳ್ಳುವ ಮೂಲಕ ಕಿರುತೆರೆಗೆ ಮರಳಿದ್ದಾರೆ. ಈ ಶೋನಲ್ಲಿ ಅವರ ಸೂಪರ್ ಹಿಟ್ ಚಿತ್ರಗಳಾದ ‘ಕರಣ್ ಅರ್ಜುನ್’ ಮತ್ತು ‘ಆಶಿಕ್ ಆವಾರಾ’ ಹಾಡುಗಳ ಮೂಲಕ ಅವರಿಗೆ ವಿಶೇಷ ಗೌರವ ಸಲ್ಲಿಸಲಾಯಿತು. ಇದನ್ನು ಕಂಡು ಭಾವುಕರಾದ ಮಮತಾ, “ಚಿತ್ರರಂಗ ನೀಡಿದ ಈ ಪ್ರೀತಿಯನ್ನು ನಾನು ಮರೆಯಲು ಸಾಧ್ಯವಿಲ್ಲ” ಎಂದು ಮನಬಿಚ್ಚಿ ಮಾತನಾಡಿದ್ದಾರೆ.
ಅಖಾಡದಿಂದ ಹೊರಬಂದು ಮತ್ತೆ ಗ್ಲಾಮರ್ ಲೋಕಕ್ಕೆ ಮರಳುತ್ತಿರುವ ಮಮತಾ ಅವರ ಈ ಬದಲಾವಣೆ ಅಭಿಮಾನಿಗಳಲ್ಲಿ ಅಚ್ಚರಿ ಮತ್ತು ಸಂಭ್ರಮ ಎರಡನ್ನೂ ಮೂಡಿಸಿದೆ. ಆಧ್ಯಾತ್ಮಿಕ ಜೀವನದ ಶಿಸ್ತು ಮತ್ತು ಚಿತ್ರರಂಗದ ಸ್ಟೈಲ್ ಎರಡನ್ನೂ ಸಮತೋಲನದಲ್ಲಿ ಕೊಂಡೊಯ್ಯಲು ಅವರು ನಿರ್ಧರಿಸಿದಂತಿದೆ.
