ಮುಂಬೈ: ಪದವೀಧರರು ಕೆಲಸಕ್ಕಾಗಿ ಅಲೆಯುತ್ತಿರುವ ಈ ಕಾಲದಲ್ಲಿ, ರಸ್ತೆಬದಿಯ ಪಾನಿಪುರಿ ವ್ಯಾಪಾರಿಯೊಬ್ಬರ ತಿಂಗಳ ಆದಾಯ ಕೇಳಿ ಇಡೀ ಸೋಷಿಯಲ್ ಮೀಡಿಯಾ ದಂಗಾಗಿದೆ. ಡಿಜಿಟಲ್ ಕಂಟೆಂಟ್ ಕ್ರಿಯೇಟರ್ ಕ್ಯಾಸಿ ಪರೇರಾ ಅವರು ಈ ವ್ಯಾಪಾರಿಯ ಬಳಿ ಒಂದು ದಿನ ಸಹಾಯಕನಾಗಿ ಕೆಲಸ ಮಾಡಿ, ಅವರ ಒಂದು ದಿನದ ಹಾಗೂ ಒಂದು ತಿಂಗಳ ಒಟ್ಟು ಗಳಿಕೆಯನ್ನು ಬಹಿರಂಗಪಡಿಸಿದ್ದಾರೆ. ಆ ವ್ಯಾಪಾರಿಯ ತಿಂಗಳ ಆದಾಯ ಬರೋಬ್ಬರಿ 90,000 ರೂಪಾಯಿಗಳು!
ಕ್ಯಾಸಿ ಪರೇರಾ ಅವರು ಈ ಪಾನಿಪುರಿ ಗಾಡಿಯಲ್ಲಿ ಆಲೂಗಡ್ಡೆ ಸುಲಿಯುವುದರಿಂದ ಹಿಡಿದು ಗ್ರಾಹಕರಿಗೆ ಸರ್ವ್ ಮಾಡುವವರೆಗೆ ಎಲ್ಲಾ ಕೆಲಸಗಳನ್ನು ಮಾಡಿದರು. ಈ ವೇಳೆ ಅವರಿಗೆ ತಿಳಿದುಬಂದ ವಿಷಯವೇನೆಂದರೆ, ಕೇವಲ ಒಂದು ಗಂಟೆಯಲ್ಲಿ ಆ ವ್ಯಾಪಾರಿ ಸುಮಾರು 120ಕ್ಕೂ ಹೆಚ್ಚು ಪುರಿಗಳನ್ನು ಮಾರಾಟ ಮಾಡುತ್ತಾರೆ. ಸಂಜೆ 4 ಗಂಟೆಯಿಂದ ರಾತ್ರಿ 10 ಗಂಟೆಯವರೆಗೆ ಈ ವ್ಯಾಪಾರ ನಡೆಯಲಿದ್ದು, ಒಂದು ಪ್ಲೇಟ್ ಪಾನಿಪುರಿಗೆ 30 ರೂಪಾಯಿ ದರವಿದೆ.
ಆದಾಯದ ಲೆಕ್ಕಾಚಾರ ಹೀಗಿದೆ: ದಿನಕ್ಕೆ ಸರಾಸರಿ 80 ರಿಂದ 100 ಪ್ಲೇಟ್‌ಗಳು ಮಾರಾಟವಾಗುತ್ತವೆ. ಅಂದರೆ ದಿನಕ್ಕೆ ಅಂದಾಜು 3,000 ರೂಪಾಯಿ ಸಂಪಾದನೆಯಾಗುತ್ತದೆ. ಈ ಲೆಕ್ಕಾಚಾರದ ಪ್ರಕಾರ ತಿಂಗಳಿಗೆ 90,000 ರೂಪಾಯಿ ಮತ್ತು ವರ್ಷಕ್ಕೆ ಸುಮಾರು 10.8 ಲಕ್ಷ ರೂಪಾಯಿ ಆದಾಯ ಬರುತ್ತದೆ. ಇದನ್ನು ಕೇಳಿದ ನೆಟ್ಟಿಗರು, “ನಾನು ಬಿ.ಕಾಂ ಓದಿ ಪಡೆಯುವ ಸಂಬಳಕ್ಕಿಂತ ಈತನ ಆದಾಯವೇ ಹೆಚ್ಚಿದೆ” ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಇನ್ನು ಕೆಲವರು “ಬಿ.ಕಾಂ ಪದವೀಧರರಿಗೆ ಈ ವಿಡಿಯೋ ಶೇರ್ ಮಾಡಿ” ಎಂದು ತಮಾಷೆ ಮಾಡಿದ್ದಾರೆ.
ಜಿಎಸ್‌ಟಿ ಹದ್ದಿನ ಕಣ್ಣು: ಇದೇ ರೀತಿಯ ಘಟನೆಯೊಂದು ಕಳೆದ ವರ್ಷ ತಮಿಳುನಾಡಿನಲ್ಲಿ ನಡೆದಿತ್ತು. ಅಲ್ಲಿನ ಪಾನಿಪುರಿ ವ್ಯಾಪಾರಿಯೊಬ್ಬರು ವರ್ಷಕ್ಕೆ 40 ಲಕ್ಷ ರೂಪಾಯಿಗೂ ಹೆಚ್ಚು ಆನ್‌ಲೈನ್ ಪಾವತಿ ಪಡೆದಿದ್ದಕ್ಕಾಗಿ ಜಿಎಸ್‌ಟಿ ಅಧಿಕಾರಿಗಳು ನೋಟಿಸ್ ನೀಡಿದ್ದರು. ನಿಯಮದ ಪ್ರಕಾರ, ವರ್ಷಕ್ಕೆ 40 ಲಕ್ಷಕ್ಕಿಂತ ಹೆಚ್ಚು ವಹಿವಾಟು ನಡೆಸುವ ಯಾವುದೇ ವ್ಯಾಪಾರ ಸಂಸ್ಥೆ ಜಿಎಸ್‌ಟಿ ಅಡಿಯಲ್ಲಿ ನೋಂದಾಯಿಸಿಕೊಳ್ಳುವುದು ಕಡ್ಡಾಯವಾಗಿದೆ. ಈ ಪಾನಿಪುರಿ ವ್ಯಾಪಾರಿಯ ಯಶಸ್ಸು ಸಣ್ಣ ಉದ್ಯಮಗಳ ಶಕ್ತಿಯನ್ನು ತೋರಿಸುತ್ತದೆಯಾದರೂ, ತೆರಿಗೆ ಇಲಾಖೆಯ ಗಮನವನ್ನೂ ಸೆಳೆಯುತ್ತಿದೆ.
