ಇರಾನ್ ಮೇಲೆ ಅಮೆರಿಕ-ಇಸ್ರೇಲ್ ಜಂಟಿ ದಾಳಿಯೊಂದಿಗೆ ಆರಂಭವಾದ ಮಧ್ಯಪ್ರಾಚ್ಯ ಬಿಕ್ಕಟ್ಟು ಈಗ ಜಾಗತಿಕ ತೈಲ ಪೂರೈಕೆ ವ್ಯವಸ್ಥೆಯ ಮೇಲೆ ಗಂಭೀರ ಪರಿಣಾಮ ಬೀರಿದೆ. ಕಳೆದ ಎರಡು ವಾರಗಳಿಂದ ನಡೆಯುತ್ತಿರುವ ಈ ಸಂಘರ್ಷದಿಂದಾಗಿ ಭಾರತದಾದ್ಯಂತ ಲಿಕ್ವಿಫೈಡ್ ಪೆಟ್ರೋಲಿಯಂ ಗ್ಯಾಸ್ (LPG) ಅಭಾವ ತಲೆದೋರಿದೆ. ಇದರ ಪರಿಣಾಮವಾಗಿ ಮುಂಬೈ, ಬೆಂಗಳೂರು ಮತ್ತು ಕೋಲ್ಕತ್ತಾದಂತಹ ನಗರಗಳಲ್ಲಿ ಹೋಟೆಲ್ಗಳು ಮತ್ತು ಸ್ಥಳೀಯ ಉದ್ದಿಮೆಗಳು ತಾತ್ಕಾಲಿಕವಾಗಿ ಮುಚ್ಚಲ್ಪಟ್ಟಿವೆ.
ಗ್ಯಾಸ್ ಅಭಾವದ ನಡುವೆ ಜನರು ಈಗ ಅಡುಗೆ ಅನಿಲದ ಬದಲು ವಿದ್ಯುತ್ ಬಳಸುವ ಇಂಡಕ್ಷನ್ ಸ್ಟೌವ್ ಗಳ ಕಡೆಗೆ ಮುಖ ಮಾಡುತ್ತಿದ್ದಾರೆ. ವಿಶಾಖಪಟ್ಟಣದಲ್ಲಿ (ವೈಜಾಗ್) ಎಲೆಕ್ಟ್ರಾನಿಕ್ಸ್ ಅಂಗಡಿ ನಡೆಸುತ್ತಿರುವ ವ್ಯಕ್ತಿಯೊಬ್ಬರ ಮಗ ಈ ಕುರಿತು ವಿಡಿಯೋ ಹಂಚಿಕೊಂಡಿದ್ದು, “ವೈಜಾಗ್ ಜನರು ಮುಂಬರುವ ಬಿಕ್ಕಟ್ಟಿಗೆ ಈಗಲೇ ಸಿದ್ಧರಾಗುತ್ತಿದ್ದಾರೆ ಎಂಬುದಕ್ಕೆ ಈ ಅಂಕಿಅಂಶಗಳೇ ಸಾಕ್ಷಿ” ಎಂದು ಬರೆದುಕೊಂಡಿದ್ದಾರೆ.
ಕಳೆದ ಎರಡು ದಿನಗಳಲ್ಲಿ ಎಷ್ಟು ಸ್ಟೌವ್ಗಳು ಮಾರಾಟವಾಗಿವೆ ಎಂದು ಆತ ತನ್ನ ತಂದೆಯನ್ನು ಕೇಳಿದಾಗ ಬಂದ ಉತ್ತರ ಇಂಟರ್ನೆಟ್ ಲೋಕವನ್ನೇ ಬೆರಗುಗೊಳಿಸಿದೆ. ಕೇವಲ 48 ಗಂಟೆಗಳಲ್ಲಿ 100ಕ್ಕೂ ಹೆಚ್ಚು ಇಂಡಕ್ಷನ್ ಸ್ಟೌವ್ಗಳು ಮಾರಾಟವಾಗಿವೆ! ಅಂಗಡಿಯ ಬಿಲ್ಲಿಂಗ್ ಕೌಂಟರ್ನಲ್ಲಿ ಇಂಡಕ್ಷನ್ ಸ್ಟೌವ್ಗಳ ರಾಶಿಯೇ ಬಿದ್ದಿರುವುದನ್ನು ಆತ ವಿಡಿಯೋದಲ್ಲಿ ತೋರಿಸಿದ್ದಾನೆ.
“ಈಗಲೂ ಬಿಲ್ಲಿಂಗ್ ಕೌಂಟರ್ನಲ್ಲಿ 10 ಇಂಡಕ್ಷನ್ ಸ್ಟೌವ್ಗಳು ಮಾರಾಟವಾಗುತ್ತಿವೆ” ಎಂದು ಆ ಯುವಕ ತಿಳಿಸಿದ್ದಾನೆ. ವಿಶೇಷವೆಂದರೆ, ಆತನ ತಂದೆ ಐದು ದಿನಗಳ ಮೊದಲೇ ಈ ಪರಿಸ್ಥಿತಿಯನ್ನು ಊಹಿಸಿ ಇಂಡಕ್ಷನ್ ಸ್ಟೌವ್ಗಳ ದೊಡ್ಡ ಆರ್ಡರ್ ನೀಡಿದ್ದರು. ಕೇವಲ ಸ್ಟೌವ್ ಮಾತ್ರವಲ್ಲದೆ, ಇಂಡಕ್ಷನ್ ಮೇಲೆ ಬಳಸಬಹುದಾದ ಪಾತ್ರೆಗಳ (Cookware) ಮಾರಾಟವೂ ಗಣನೀಯವಾಗಿ ಏರಿಕೆಯಾಗಿದೆ.
