ಕ್ಯಾಲಿಫೋರ್ನಿಯಾ: ಇಂದಿನ ವೇಗದ ಬದುಕಿನಲ್ಲಿ ನಾವು ಅಂದುಕೊಂಡಿದ್ದಕ್ಕಿಂತಲೂ ಹೆಚ್ಚಾಗಿ ನಮ್ಮ ದೈನಂದಿನ ಸಣ್ಣಪುಟ್ಟ ಅಭ್ಯಾಸಗಳೇ ನಮ್ಮನ್ನು ಸಾವಿನ ದೂತ ಹೃದಯಾಘಾತದ ಹತ್ತಿರಕ್ಕೆ ಕೊಂಡೊಯ್ಯುತ್ತಿವೆ. ಸುಮಾರು ಎರಡು ದಶಕಗಳ ಅನುಭವವಿರುವ ಅಮೆರಿಕದ ಖ್ಯಾತ ಹೃದ್ರೋಗ ತಜ್ಞ ಡಾ. ಸಂಜಯ್ ಭೋಜರಾಜ್ ಅವರು, ಪ್ರಸ್ತುತ ತಲೆಮಾರಿನ ಜನರ ಜೀವನಶೈಲಿ ಮತ್ತು ಹೃದಯಾಘಾತದ ನಡುವಿರುವ ನೇರ ಸಂಬಂಧದ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಿದ್ದಾರೆ.
ಘಾತಕವಾಗುತ್ತಿದೆ ಈ ‘ಮಾಮೂಲಿ’ ದಿನಚರಿ: ಹೃದಯಾಘಾತ ಎನ್ನುವುದು ದಿಢೀರ್ ಆಗಿ ಸಂಭವಿಸುವ ಘಟನೆಯಂತೆ ಕಂಡರೂ, ಅದರ ಮೂಲ ನಾವು ವರ್ಷಗಟ್ಟಲೆ ಪಾಲಿಸಿಕೊಂಡು ಬಂದಿರುವ ತಪ್ಪು ದಿನಚರಿಯಲ್ಲಿರುತ್ತದೆ ಎಂದು ಡಾ. ಭೋಜರಾಜ್ ವಿವರಿಸಿದ್ದಾರೆ. ಅವರ ಪ್ರಕಾರ, ಬಹುತೇಕ ಹೃದಯಾಘಾತದ ಪ್ರಕರಣಗಳಲ್ಲಿ ಕಂಡುಬರುವ ಸಾಮಾನ್ಯ ಅಂಶಗಳೆಂದರೆ:
- ಕೆಲಸದ ಒತ್ತಡದಿಂದಾಗಿ ತಡರಾತ್ರಿಯವರೆಗೆ ಎಚ್ಚರವಿದ್ದು ನಿದ್ರೆ ಗೆಡುವುದು.
- ದೈನಂದಿನ ಬದುಕಿನ ಭಾಗವಾಗಿರುವ ದೀರ್ಘಕಾಲದ ಮಾನಸಿಕ ಒತ್ತಡ (Chronic Stress).
- ಪೌಷ್ಟಿಕಾಂಶವಿಲ್ಲದ, ಕೇವಲ ರುಚಿಗೆ ಮತ್ತು ಲಭ್ಯತೆಗೆ ಆದ್ಯತೆ ನೀಡುವ ಸಿದ್ಧ ಆಹಾರಗಳ ಸೇವನೆ.
- ವರ್ಷದಿಂದ ವರ್ಷಕ್ಕೆ ಕಡಿಮೆಯಾಗುತ್ತಿರುವ ನಿದ್ರೆಯ ಅವಧಿ.
“ನನ್ನ ಅನುಭವದಲ್ಲಿ, ಹೆಚ್ಚಿನ ಹೃದಯಾಘಾತಗಳು ಯಾವುದೇ ನಾಟಕೀಯ ನಿರ್ಧಾರಗಳಿಂದ ಸಂಭವಿಸುವುದಿಲ್ಲ. ಬದಲಿಗೆ ನಾವು ನಮಗೆ ತಿಳಿಯದಂತೆ ಮಾಡಿಕೊಳ್ಳುವ ಸಣ್ಣಪುಟ್ಟ ರಾಜಿಗಳಿಂದ ಸಂಭವಿಸುತ್ತವೆ. ಇವು ಕಾಲಕ್ರಮೇಣ ರಕ್ತದ ಪರೀಕ್ಷೆಗಳಲ್ಲಿ ಅಸಹಜ ಬದಲಾವಣೆಗಳನ್ನು ತರುತ್ತವೆ” ಎಂದು ಅವರು ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ.
ದೇಹ ನೀಡುವ ಮೌನ ಸಂಕೇತಗಳು: ಹೃದಯಾಘಾತಕ್ಕೆ ಮುನ್ನ ದೇಹವು ವರ್ಷಗಳಿಂದಲೇ ಸಂಕಷ್ಟದ ಸೂಚನೆಗಳನ್ನು ನೀಡುತ್ತಿರುತ್ತದೆ. ರಕ್ತದೊತ್ತಡದಲ್ಲಿ ಉಂಟಾಗುವ ಸಣ್ಣ ಏರಿಕೆ, ರಕ್ತದಲ್ಲಿನ ಸಕ್ಕರೆ ಅಂಶದ ಏರುಪೇರು ಮತ್ತು ಟ್ರೈಗ್ಲಿಸರೈಡ್‌ಗಳ (Triglycerides) ಪ್ರಮಾಣ ಹೆಚ್ಚಾಗುವುದು ಇವುಗಳ ಲಕ್ಷಣಗಳಾಗಿವೆ. ಇವು ಆರಂಭದಲ್ಲಿ ಗಂಭೀರ ಎನಿಸದಿದ್ದರೂ, ದೀರ್ಘಕಾಲದವರೆಗೆ ಇವುಗಳ ಮೇಲೆ ನಿಗಾ ಇಡದಿದ್ದರೆ ಹೃದಯದ ರಕ್ತನಾಳಗಳ ಮೇಲೆ ಭಾರಿ ಒತ್ತಡ ಬೀರುತ್ತದೆ.
ಪರಿಹಾರ ಮಾತ್ರೆಗಳಲ್ಲಿದೆ ಎನ್ನುವುದು ತಪ್ಪು: ಹೃದಯದ ಆರೋಗ್ಯ ಕಾಪಾಡಿಕೊಳ್ಳಲು ಯಾವುದೇ ‘ಮ್ಯಾಜಿಕ್ ಮಾತ್ರೆ’ ಇಲ್ಲ ಎಂದು ಡಾ. ಸಂಜಯ್ ಸ್ಪಷ್ಟಪಡಿಸಿದ್ದಾರೆ. “ಜನರು ಉದ್ದೇಶಪೂರ್ವಕವಾಗಿ ಆರೋಗ್ಯವನ್ನು ನಿರ್ಲಕ್ಷಿಸುವುದಿಲ್ಲ, ಬದಲಿಗೆ ಅವರು ಕೆಲಸದಲ್ಲಿ ಅತಿಯಾದ ಬ್ಯುಸಿ ಇರುತ್ತಾರೆ. ನಾನೂ ಒಬ್ಬ ತಂದೆಯಾಗಿ ಇದನ್ನು ಅರ್ಥಮಾಡಿಕೊಳ್ಳಬಲ್ಲೆ. ಆದರೆ ನಾವು ಗಮನಿಸಲಿ ಅಥವಾ ಬಿಡಲಿ, ನಮ್ಮ ದೇಹ ಮಾತ್ರ ಪ್ರತಿಯೊಂದು ಅಭ್ಯಾಸದ ಲೆಕ್ಕವನ್ನೂ ಇಟ್ಟಿರುತ್ತದೆ” ಎನ್ನುತ್ತಾರೆ ಅವರು.
ಹೃದ್ರೋಗ ತಡೆಗಟ್ಟಲು ಔಷಧಿಗಳಿಗಿಂತ ಮೊದಲು ನಮ್ಮ ನಿದ್ರೆ, ಒತ್ತಡ ನಿರ್ವಹಣೆ ಮತ್ತು ಆಹಾರ ಸೇವನೆಯ ಕ್ರಮವನ್ನು ಸರಿಪಡಿಸಿಕೊಳ್ಳುವುದು ಅತಿ ಮುಖ್ಯ. ವೈದ್ಯರ ಬಳಿ ಹೋಗುವ ಮೊದಲೇ ನಮ್ಮ ದೈನಂದಿನ ಅಭ್ಯಾಸಗಳನ್ನು ಸರಿಪಡಿಸಿಕೊಂಡರೆ ಹೃದಯಾಘಾತದ ಅಪಾಯವನ್ನು ಶೇ. 80 ರಷ್ಟು ತಗ್ಗಿಸಬಹುದು ಎಂಬುದು ಅವರ ಅಭಿಪ್ರಾಯ.
