ಮಧ್ಯಪ್ರದೇಶ : ಸ್ಕೂಟರ್‌ನ ಸೀಟಿನ ಅಡಿಯಲ್ಲಿರುವ ಸ್ಟೋರೇಜ್ ಕಂಪಾರ್ಟ್‌ಮೆಂಟ್ (ಡಿಕ್ಕಿ) ಒಳಗೆ ತನ್ನ ಹಸುಗೂಸನ್ನು ಇರಿಸಿ, ಸೀಟ್ ಮುಚ್ಚಿ ವಾಹನ ಚಲಾಯಿಸಿಕೊಂಡು ಹೋಗುತ್ತಿರುವ ಮಹಿಳೆಯ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ.
ಘಟನೆಯ ವಿವರ
ವೈರಲ್ ಆಗಿರುವ ವಿಡಿಯೋದಲ್ಲಿ, ಮನೆಯೊಂದರ ಮುಂದೆ ನಿಂತಿರುವ ಮಹಿಳೆ ತನ್ನ ಕೈಯಲ್ಲಿದ್ದ ಪುಟ್ಟ ಮಗುವನ್ನು ಸ್ಕೂಟರ್‌ನ ಡಿಕ್ಕಿಯೊಳಗೆ ಮಲಗಿಸುತ್ತಾಳೆ. ಹೆಲ್ಮೆಟ್ ಅಥವಾ ದಾಖಲೆಗಳನ್ನು ಇಡಲು ಬಳಸುವ ಆ ಕಿರಿದಾದ ಜಾಗದಲ್ಲಿ ಮಗುವನ್ನು ಇರಿಸಿದ ನಂತರ, ಅವಳು ಸೀಟನ್ನು ಸಂಪೂರ್ಣವಾಗಿ ಮುಚ್ಚುತ್ತಾಳೆ. ಇದರಿಂದ ಮಗು ಹೊರಗಿನವರಿಗೆ ಕಾಣಿಸದಂತಾಗುತ್ತದೆ. ನಂತರ ಆಕೆ ನಿರಾಳವಾಗಿ ಸ್ಕೂಟರ್ ಚಲಾಯಿಸಿಕೊಂಡು ಅಲ್ಲಿಂದ ಹೊರಡುತ್ತಾಳೆ. ವಾಹನದ ನಂಬರ್ ಪ್ಲೇಟ್ ಆಧರಿಸಿ ಈ ಘಟನೆಯು ಮಧ್ಯಪ್ರದೇಶದಲ್ಲಿ ನಡೆದಿದೆ ಎಂದು ಶಂಕಿಸಲಾಗಿದೆ.
ನೆಟ್ಟಿಗರ ಆಕ್ರೋಶ
ಈ ವಿಡಿಯೋ ಹರಿದಾಡುತ್ತಿದ್ದಂತೆ ಜನರು ಆ ಮಹಿಳೆಯ ಬೇಜವಾಬ್ದಾರಿತನಕ್ಕೆ ಕಿಡಿ ಕಾರುತ್ತಿದ್ದಾರೆ. ಸ್ಕೂಟರ್ ಡಿಕ್ಕಿಯಲ್ಲಿ ಗಾಳಿಯ ಸಂಚಾರವೇ ಇರುವುದಿಲ್ಲ, ಮಗು ಉಸಿರಾಡುವುದು ಹೇಗೆ?” ಎಂದು ಅನೇಕರು ಪ್ರಶ್ನಿಸಿದ್ದಾರೆ.”ಇಂತಹವರು ಹೇಗೆ ತಾಯಿಯಾಗುತ್ತಾರೆ?” ಎಂದು ಕೆಲವರು ಆಕ್ರೋಶ ವ್ಯಕ್ತಪಡಿಸಿದರೆ, ಇನ್ನು ಕೆಲವರು “ಇದು ಕೇವಲ ಸ್ಕ್ರಿಪ್ಟೆಡ್ ಅಥವಾ ಪ್ರಾಂಕ್ ವಿಡಿಯೋ ಆಗಿರಲಿ” ಎಂದು ಆಶಿಸಿದ್ದಾರೆ. ಇಂತಹ ಕಿರಿದಾದ ಜಾಗದಲ್ಲಿ ಮಗುವನ್ನು ಇರಿಸುವುದು ಜೀವಕ್ಕೆ ಕುತ್ತು ತರಬಹುದು ಎಂಬ ಕನಿಷ್ಠ ಜ್ಞಾನವೂ ಆಕೆಗೆ ಇಲ್ಲವೇ ಎಂದು ನೆಟ್ಟಿಗರು ಕಿಡಿಕಾರಿದ್ದಾರೆ.
