ಬೆಳಗ್ಗೆ ನಿದ್ರೆಯಿಂದ ಎದ್ದ ತಕ್ಷಣ ಒಂದೇ ಸಮನೆ ತಲೆ ತಿರುಗಿದಂತೆ ಅನ್ನಿಸುತ್ತದೆಯೇ? ಕಣ್ಣು ಮಸುಕಾಗಿ ಹೆಜ್ಜೆಗಳು ತಡಬಡಾಯಿಸುತ್ತಿವೆಯೇ? ಅನೇಕರು ಇದನ್ನು ಕೇವಲ ನಿದ್ರೆ ಸಾಲದ ಕಾರಣ ಅಥವಾ ಆಯಾಸ ಎಂದು ಭಾವಿಸಿ ನಿರ್ಲಕ್ಷಿಸುತ್ತಾರೆ. ಆದರೆ ಪದೇ ಪದೇ ಹೀಗಾಗುತ್ತಿದ್ದರೆ ಅದು ನಿಮ್ಮ ಆರೋಗ್ಯದ ವಿಷಯದಲ್ಲಿ ದೇಹ ನೀಡುತ್ತಿರುವ ಎಚ್ಚರಿಕೆ ಇರಬಹುದು. ಅಸಲಿಗೆ ಬೆಳಗ್ಗೆ ತಲೆ ತಿರುಗಲು ಕಾರಣಗಳೇನು? ಅದು ಯಾವ ಅಪಾಯಕಾರಿ ಕಾಯಿಲೆಗಳ ಸಂಕೇ ತ? ತಿಳಿಯೋಣ..
ಬೆಳಗ್ಗಿನ ತಲೆಸುತ್ತಿಗೆ ಕಾರಣಗಳು
ಅನೇಕರಿಗೆ ಬೆಳಗ್ಗೆ ಎದ್ದ ತಕ್ಷಣ ಹಾಸಿಗೆಯಿಂದ ಎದ್ದೇಳಲು ಪ್ರಯತ್ನಿಸಿದಾಗ ಒಮ್ಮೆಗೆ ತಲೆ ಸುತ್ತಿದಂತೆ, ಕಣ್ಣು ಮಸುಕಾದಂತೆ ಅಥವಾ ದೇಹದ ಸಮತೋಲನ ತಪ್ಪಿದಂತೆ ಅನ್ನಿಸುತ್ತದೆ. ಸ್ವಲ್ಪ ಸಮಯದ ನಂತರ ಇದು ಕಡಿಮೆಯಾಗುವುದರಿಂದ ಇದನ್ನು ಸಾಮಾನ್ಯ ದೌರ್ಬಲ್ಯ ಎಂದು ಭಾವಿಸಿ ಬಿಟ್ಟುಬಿಡುತ್ತಾರೆ. ಆದರೆ ಹೀಗೆ ಪದೇ ಪದೇ ನಡೆಯುತ್ತಿದ್ದರೆ ಅದು ನಿಮ್ಮ ದೇಹ ನೀಡುತ್ತಿರುವ ಅಪಾಯದ ಸಂಕೇತವಿರಬಹುದು ಎಂದು ವೈದ್ಯರು ಎಚ್ಚರಿಸುತ್ತಾರೆ. ಬೆಳಗ್ಗೆ ತಲೆ ತಿರುಗಲು ಪ್ರಮುಖ ಕಾರಣಗಳು ಮತ್ತು ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆಗಳು ಇಲ್ಲಿವೆ:
- ಆರ್ಥೋಸ್ಟಾಟಿಕ್ ಹೈಪೋಟೆನ್ಷನ್ (Orthostatic Hypotension)
ನಾವು ಮಲಗಿದ್ದಾಗ ರಕ್ತ ಪರಿಚಲನೆ ಒಂದು ರೀತಿಯಲ್ಲಿರುತ್ತದೆ. ಹಠಾತ್ತನೆ ಎದ್ದು ನಿಂತಾಗ ಗುರುತ್ವಾಕರ್ಷಣೆಯ ಪ್ರಭಾವದಿಂದ ರಕ್ತವು ಕಾಲುಗಳ ಕಡೆಗೆ ಹರಿಯುತ್ತದೆ. ಇದರಿಂದ ಮೆದುಳಿಗೆ ರಕ್ತ ಪರಿಚಲನೆ ತಾತ್ಕಾಲಿಕವಾಗಿ ಕಡಿಮೆಯಾಗಿ ತಲೆ ಸುತ್ತುತ್ತದೆ. ಇದನ್ನು ವೈದ್ಯಕೀಯ ಭಾಷೆಯಲ್ಲಿ ‘ಆರ್ಥೋಸ್ಟಾಟಿಕ್ ಹೈಪೋಟೆನ್ಷನ್’ ಎನ್ನಲಾಗುತ್ತದೆ. - ಡಿಹೈಡ್ರೇಶನ್ (ನಿರ್ಜಲೀಕರಣ)
ರಾತ್ರಿಯಿಡೀ ನಾವು ನೀರು ಕುಡಿಯದೆ ಮಲಗಿರುತ್ತೇವೆ. ಹಗಲಿನಲ್ಲಿಯೂ ಕಡಿಮೆ ನೀರು ಕುಡಿಯುವ ಅಭ್ಯಾಸವಿದ್ದರೆ ಬೆಳಗ್ಗೆ ವೇಳೆಗೆ ದೇಹವು ನಿರ್ಜಲೀಕರಣಕ್ಕೆ ಒಳಗಾಗುತ್ತದೆ. ಇದರ ಪ್ರಭಾವ ಮೆದುಳಿನ ಕಾರ್ಯನಿರ್ವಹಣೆಯ ಮೇಲೆ ಉಂಟಾಗಿ ತಲೆ ಸುತ್ತಲು ಕಾರಣವಾಗಬಹುದು. - ರಕ್ತಹೀನತೆ (Anemia)
ದೇಹದಲ್ಲಿ ಹಿಮೋಗ್ಲೋಬಿನ್ ಮಟ್ಟ ಕಡಿಮೆಯಾದಾಗ ಮೆದುಳಿಗೆ ತಲುಪಬೇಕಾದ ಆಮ್ಲಜನಕದ ಪೂರೈಕೆ ಕಡಿಮೆಯಾಗುತ್ತದೆ. ಪರಿಣಾಮವಾಗಿ ತಲೆ ಸುತ್ತುವುದು, ಆಯಾಸ, ನಿಶ್ಯಕ್ತಿ ಅಂತಹ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. ಈ ಸಮಸ್ಯೆ ಮಹಿಳೆಯರು ಮತ್ತು ವೃದ್ಧರಲ್ಲಿ ಹೆಚ್ಚಾಗಿ ಕಂಡುಬರುತ್ತದೆ. - ಲೋ ಶುಗರ್ (ರಕ್ತದಲ್ಲಿನ ಸಕ್ಕರೆ ಅಂಶದ ಕೊರತೆ)
ರಾತ್ರಿ ಊಟ ಕಡಿಮೆ ಮಾಡಿದ್ದರೂ ಅಥವಾ ಮಧುಮೇಹದ ಮಾತ್ರೆಗಳನ್ನು ಬಳಸುತ್ತಿದ್ದರೂ ಬೆಳಗ್ಗೆ ವೇಳೆಗೆ ರಕ್ತದಲ್ಲಿನ ಸಕ್ಕರೆ ಮಟ್ಟ ಕುಸಿಯಬಹುದು. ಇದರಿಂದ ತಲೆ ಸುತ್ತುವುದರ ಜೊತೆಗೆ ನಡುಕ, ಬೆವರುವಿಕೆಯಂತಹ ಲಕ್ಷಣಗಳು ಕಾಣಿಸಿಕೊಳ್ಳುತ್ತವೆ. - ವಿಟಮಿನ್ ಬಿ12 ಕೊರತೆ ಮತ್ತು ಇತರ ಕಾರಣಗಳು
ನರಮಂಡಲವು ಸುಗಮವಾಗಿ ಕಾರ್ಯನಿರ್ವಹಿಸಲು ವಿಟಮಿನ್ ಬಿ12 ಅಗತ್ಯ. ಇದರ ಕೊರತೆಯಿದ್ದರೂ ಅಥವಾ ಒಳ ಕಿವಿಯಲ್ಲಿ ಯಾವುದಾದರೂ ಸಮಸ್ಯೆಗಳಿದ್ದರೂ ದೇಹದ ಸಮತೋಲನ ತಪ್ಪುತ್ತದೆ. ಅಧಿಕ ಒತ್ತಡ ಮತ್ತು ನಿದ್ರಾಹೀನತೆ ಕೂಡ ಇದಕ್ಕೆ ಹೆಚ್ಚುವರಿ ಕಾರಣಗಳಾಗಬಹುದು.
ತಡೆಗಟ್ಟುವ ಮಾರ್ಗಗಳು
• ನಿಧಾನವಾಗಿ ಎದ್ದೇಳಿ: ನಿದ್ರೆಯಿಂದ ಎದ್ದ ತಕ್ಷಣ ಹಠಾತ್ತನೆ ಹಾಸಿಗೆಯಿಂದ ಇಳಿಯಬೇಡಿ. ಮೊದಲು ಪಕ್ಕಕ್ಕೆ ತಿರುಗಿ, ನಿಧಾನವಾಗಿ ಕುಳಿತುಕೊಳ್ಳಿ. ಒಂದು ನಿಮಿಷದ ನಂತರವಷ್ಟೇ ಎದ್ದು ನಿಲ್ಲಿ.
• ನೀರು ಕುಡಿಯಿರಿ: ಎದ್ದ ತಕ್ಷಣ ಒಂದು ಗ್ಲಾಸ್ ಉಗುರು ಬೆಚ್ಚಗಿನ ಅಥವಾ ಸಾಮಾನ್ಯ ನೀರು ಕುಡಿಯುವುದನ್ನು ಅಭ್ಯಾಸ ಮಾಡಿಕೊಳ್ಳಿ.
• ಪೌಷ್ಟಿಕ ಆಹಾರ: ನಿಮ್ಮ ಆಹಾರದಲ್ಲಿ ವಿಟಮಿನ್ ಮತ್ತು ಕಬ್ಬಿಣದ ಅಂಶ ಹೆಚ್ಚಿರುವಂತೆ ನೋಡಿಕೊಳ್ಳಿ.
• ವೈದ್ಯರನ್ನು ಯಾವಾಗ ಸಂಪರ್ಕಿಸಬೇಕು?: ತಲೆ ಸುತ್ತುವಿಕೆಯೊಂದಿಗೆ ತೀವ್ರ ತಲೆನೋವು, ವಾಂತಿ, ಎದೆನೋವು, ಮಾತನಾಡಲು ತೊಂದರೆ ಅಥವಾ ಕೈ ಕಾಲುಗಳು ಮರಗಟ್ಟಿದಂತೆ ಅನ್ನಿಸಿದರೆ ತಡಮಾಡದೆ ವೈದ್ಯರನ್ನು ಸಂಪರ್ಕಿಸಬೇಕು.
