ಟೆಹ್ರಾನ್: ಇರಾನ್ ರಾಜಧಾನಿ ಟೆಹ್ರಾನ್‌ನ ಹೃದಯಭಾಗದಲ್ಲಿದ್ದ ಸುಪ್ರೀಂ ಲೀಡರ್ ಅಯತೊಲ್ಲಾ ಅಲಿ ಖಮೇನಿ ಅವರ ಅತ್ಯಂತ ಸುರಕ್ಷಿತ ಭೂಗತ ಬಂಕರ್ ಅನ್ನು 50 ಇಸ್ರೇಲಿ ಯುದ್ಧ ವಿಮಾನಗಳು ದಾಳಿ ನಡೆಸಿ ಧ್ವಂಸಗೊಳಿಸಿವೆ. ಈ ಕಾರ್ಯಾಚರಣೆಯ ದೃಶ್ಯಗಳನ್ನು ಇಸ್ರೇಲ್ ರಕ್ಷಣಾ ಪಡೆ (IDF) ಬಿಡುಗಡೆ ಮಾಡಿದೆ.
ಟೆಹ್ರಾನ್ ಮಧ್ಯಭಾಗದಲ್ಲಿ ಇಸ್ರೇಲ್ ಅಬ್ಬರ
ಇರಾನ್ ಆಡಳಿತ ವ್ಯವಸ್ಥೆಯ ನಿವಾಸದ ಸಂಕೀರ್ಣದ ಅಡಿಯಲ್ಲಿದ್ದ ಅತ್ಯಂತ ಬಲಿಷ್ಠ ಭೂಗತ ಮಿಲಿಟರಿ ಕಮಾಂಡ್ ಸೆಂಟರ್ ಅನ್ನು ಇಸ್ರೇಲ್ ವಾಯುಪಡೆ (IAF) ನೆಲಸಮ ಮಾಡಿದೆ. ಈ ಬಂಕರ್ ಮೇಲೆ ದಾಳಿ ಮಾಡಲು ಸುಮಾರು 50 ಯುದ್ಧ ವಿಮಾನಗಳು ಭಾಗವಹಿಸಿದ್ದವು ಎಂದು ಐಡಿಎಫ್ ಶುಕ್ರವಾರ ಘೋಷಿಸಿದೆ. ಇರಾನ್‌ನ ಮಿಲಿಟರಿ ಮೂಲಸೌಕರ್ಯಗಳನ್ನು ಗುರಿಯಾಗಿಸಿಕೊಂಡು ನಡೆಸುತ್ತಿರುವ ಸರಣಿ ದಾಳಿಗಳ ಭಾಗವಾಗಿ ಈ ಕಾರ್ಯಾಚರಣೆ ನಡೆದಿದೆ.
‘ಆಪರೇಷನ್ ರೋರ್ ಆಫ್ ದಿ ಹ್ಯಾರಿಯರ್’ (Roar of the Harrier)
ಇರಾನ್ ತನ್ನ ರಕ್ಷಣೆಗಾಗಿ ವರ್ಷಗಳ ಕಾಲ ಶ್ರಮಿಸಿ ನಿರ್ಮಿಸಿದ್ದ ಈ ಭೂಗತ ಸಂಕೀರ್ಣವು ಟೆಹ್ರಾನ್‌ನ ಹಲವು ಬೀದಿಗಳವರೆಗೆ ವಿಸ್ತರಿಸಿತ್ತು. ತುರ್ತು ಸಂದರ್ಭಗಳಲ್ಲಿ ಸುಪ್ರೀಂ ಲೀಡರ್ ಯುದ್ಧ ಚಟುವಟಿಕೆಗಳನ್ನು ಮೇಲ್ವಿಚಾರಣೆ ಮಾಡಲು ಇದನ್ನು ಬಳಸುತ್ತಿದ್ದರು. ಆದರೆ, ‘ಆಪರೇಷನ್ ರೋರ್ ಆಫ್ ದಿ ಹ್ಯಾರಿಯರ್’ ಮೂಲಕ ಇಸ್ರೇಲ್ ಇದನ್ನು ಸಂಪೂರ್ಣವಾಗಿ ನಾಶಪಡಿಸಿದೆ. ಫೆಬ್ರವರಿ 28ರ ದಾಳಿಯಲ್ಲಿ ಖಮೇನಿ ಮೃತಪಟ್ಟ ನಂತರವೂ, ಇರಾನ್ ಸರ್ಕಾರದ ಉನ್ನತ ಅಧಿಕಾರಿಗಳು ಈ ಬಂಕರ್ ಅನ್ನು ತಮ್ಮ ಅಡಗುತಾಣವಾಗಿ ಬಳಸುತ್ತಿದ್ದರು ಎನ್ನಲಾಗಿದೆ.
ಖಮೇನಿ ಸಾವು: ಯುದ್ಧಕ್ಕೆ ಮಹತ್ವದ ತಿರುವು
ಅಮೆರಿಕಾ-ಇಸ್ರೇಲ್ ಜಂಟಿ ಕಾರ್ಯಾಚರಣೆ ‘ಆಪರೇಷನ್ ಎಪಿಕ್ ಫ್ಯೂರಿ’ ಅಡಿಯಲ್ಲಿ ಫೆಬ್ರವರಿ 28 ರಂದು ನಡೆದ ವೈಮಾನಿಕ ದಾಳಿಯಲ್ಲಿ 87 ವರ್ಷದ ಅಲಿ ಖಮೇನಿ ಮೃತಪಟ್ಟಿದ್ದಾರೆ. ಕೇವಲ 60 ಸೆಕೆಂಡುಗಳ ಅಂತರದಲ್ಲಿ ನಡೆದ ಈ ದಾಳಿಯಲ್ಲಿ ಖಮೇನಿ ಜೊತೆಗೆ ಇರಾನ್ ಸಶಸ್ತ್ರ ಪಡೆಗಳ ಮುಖ್ಯಸ್ಥ ಅಬ್ದುಲ್ ರಹೀಮ್ ಮೌಸವಿ ಸೇರಿದಂತೆ 40ಕ್ಕೂ ಹೆಚ್ಚು ಪ್ರಮುಖ ನಾಯಕರು ಹತರಾಗಿದ್ದಾರೆ. ಇದನ್ನು ಮೊದಲು ಅಮೆರಿಕಾ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ್ದು, ನಂತರ ಇಸ್ರೇಲ್ ದೃಢಪಡಿಸಿದೆ.
ಪ್ರತಿಕಾರ ಮತ್ತು ಉದ್ವಿಗ್ನತೆ
ಖಮೇನಿ ಹತ್ಯೆಯ ನಂತರ ಇರಾನ್ ತೀವ್ರ ಸ್ವರೂಪದ ಪ್ರತಿಕಾರಕ್ಕೆ ಇಳಿದಿದೆ. ಗಲ್ಫ್ ರಾಷ್ಟ್ರಗಳಾದ ಕತಾರ್, ಯುಎಇ, ಕುವೈತ್ ಮತ್ತು ಸೌದಿ ಅರೇಬಿಯಾದಲ್ಲಿರುವ ಅಮೆರಿಕಾ ಹಾಗೂ ಇಸ್ರೇಲ್ ನೆಲೆಗಳ ಮೇಲೆ ಡ್ರೋನ್ ಮತ್ತು ಮಿಸೈಲ್ ದಾಳಿ ನಡೆಸಿದೆ. ಕುವೈತ್‌ನಲ್ಲಿ ನಡೆದ ದಾಳಿಯಲ್ಲಿ ನಾಲ್ವರು ಅಮೆರಿಕಾ ಸೈನಿಕರು ಸಾವನ್ನಪ್ಪಿದ್ದಾರೆ ಎಂದು ಪೆಂಟಗನ್ ದೃಢಪಡಿಸಿದೆ.
ಮುಂದುವರಿದ ಬಾಂಬ್ ಮಳೆ
ಪ್ರಸ್ತುತ ಇರಾನ್-ಇಸ್ರೇಲ್ ಯುದ್ಧವು ಏಳನೇ ದಿನಕ್ಕೆ ಕಾಲಿಟ್ಟಿದೆ. ಟೆಹ್ರಾನ್ ಆಕಾಶದಲ್ಲಿ ನಿರಂತರ ಸ್ಫೋಟದ ಶಬ್ದಗಳು ಕೇಳಿಬರುತ್ತಿವೆ. ನಗರದಲ್ಲಿ ಇಂಟರ್ನೆಟ್ ಸೇವೆ ಶೇ. 1ಕ್ಕೆ ಕುಸಿದಿದ್ದು, ಸಂವಹನ ವ್ಯವಸ್ಥೆ ಸಂಪೂರ್ಣ ಸ್ಥಗಿತಗೊಂಡಿದೆ. “ಆಪರೇಷನ್ ಎಪಿಕ್ ಫ್ಯೂರಿ ಈಗಷ್ಟೇ ಆರಂಭವಾಗಿದೆ” ಎಂದು ಅಮೆರಿಕಾ ರಕ್ಷಣಾ ಕಾರ್ಯದರ್ಶಿ ಪೀಟ್ ಹೆಗ್ಸೆತ್ ತಿಳಿಸಿದ್ದಾರೆ.
